KUDIZA 4

Kuzatisha Chiwahi Nsona

Matewu 22:41-45

CHIKUMA: Yikwashenu antiyilili jenu eluki nsañu yimukutaña henohu kanda mutañi nsona.

Ilukenu chimunakutañila nsona. Neyi munakukeña kuhosha hansona, hoshenu munjila yikukwasha antiyilili jenu kumona chikuma chimunakukeña kuhosha muvasi.

Talenu chidi nsañu yejima. Neyi munakukeña kutena muntu wahosheli mazu imunakutaña hela wasonekeli mukanda wamuBayibolu, owu muntu chiña yekala diyi.
Kunjikenu nsañu yejima kuBayibolu. Neyi munakuhosha nawantu amukuhwelela Nzambi, yitañilenu Mwizu daNzambi, Bayibolu, chumichi chikumwekesha nawu mwayilemesha nenu dimwafumaña maana aweni.
Yisañumunenu akeñi nsona. Ihulenu lwihu lukwakulawu munsona, shimunenu kukala kunateli kumanishawu kudi nsona hela shimunenu chishina chikuyikwasha antiyilili kutiya nsañu yidi muNsona.

Toñojokenu hayuma yelukawu antiyilili hanoyu nsañu hela hanoyu nsona. Neyi himukutaña nsona yelukawu, yiletenu munjila yikuyisañumuna nawa yikwashenu antiyilili jenu kutoñojokahu cheñi.