Munafumi Nsañu Yakuzatisha muChihandilu niMudimu Wanetu AkwaKristu Mukanda waKupompa
MARCH 1-7
YUMA YALEMA YAMWIZU DANZAMBI | KUCHINDA 7-8
“Yuma Yitwadizilaña kuChilombu chawaIsarela”
it-1 497 ¶3
Chipompelu
Antu atondeliwu muIsarela kwikala añimenu adiña nakwimenaku antu. (Ezr 10:14) Dichi, “atulamba twanyichidi” diwu emeneneniku hanyima yakumanisha Tabanaka. (Kuc 7:1-11) Cheñi, antu emeneneniku hakulamika chilamiku “chachitiyañenu chakashinshi” mumafuku aNehemiya adiña atupristu, aLevi, ‘niakulumpi awantu [añimenu jawantu].’ (Ne 9:38–10:27) Mulwendu lwendeliwu aIsarela muchinkalampata, “atulamba amuchipompelu, alema muchipompelu, aya mpuhu,” wejima wawu 250 adibombeli naKora, Datani, Abirami, niOni kulonda adikañi naMosi niaAroni. (Kuc 16:1-3) Neyi chamulejeliwu kudi Nzambi, Mosi watondeli akulumpi amuIsarela 70 adiña alema ‘kulonda amukwashi kusenda chisenda chawantu,’ chadi kukañanyayi kusenda nkawindi. (Kuc 11:16, 17, 24, 25) Alevi 4:15 yahosha hadi “akulumpi achipompelu,” nawa chinamwekani neyi awa añimenu adiña akulumpi anyitaña yawu, anyanta jawu, ansompeshi jawu niatulala twawu.—Kuc 1:4, 16; Yos 23:2; 24:1.
it-2 796 ¶1
Rubeni
Muchilombu chawaIsarela akwaRubeni, anyana kaSimeyona niGadi atekeleli kukabadi kakuchidiilu katabanaka. Neyi anakunyamuka iyi nyichidi yisatu yalondeleleña chendu chamuchidi waRubeni, kuhiñahu hihakulondela nyichidi yisatu muchidi waYuda, waIsakari niwaZebuluni. (Kuc 2:10-16; 10:14-20) Iyi diyi ntanjikilu yalondeleleñawu cheñi neyi hiyakuhana nyilambu hefuku dakujilika tabanaka.—Kuc 7:1, 2, 10-47.
w04 8/1 25 ¶1
Yikuma Yamaneni Kufuma muMukanda waKuchinda
8:25, 26. Hakwila nyidimu yawaLevi yendeña chiwahi nikuyitoñojokelaku muloña wayaaka, atushinakaji awamayala ayilekesheleña kuzata nyidimu yawu. Hela chochu, adihanineña kukwashaku aLevi amakwawu. Hela chakwila kwekala wanyi yaaka yakulekelahu kushimwina nsañu yaWanta, chikuma chidi munilu lushimbi chinakutudizisha chuma chalema. Neyi mukwaKristu nakuli dehi chakwila hakutwesha kuzata nyidimu yikwawuku, watela kuzataku nyidimu yikwawu kwesekeja nahanakumini ñovu jindi.
Yuma Yalema yakuSpiritu
it-1 835
Wedi, Awedi
Chineli anyana kawaIsarela awedi ekalileña nyitu yayisaka yamboka-mboka, dikwila nawu emeneneñaku muza wejima. Yehova wateneni muza wejima nindi, “wedi wami,” wekalili wedi windi, hamuloña wachitiyañenu chakwatiliyi naAbarahama. (Kwi 4:22) Hamuloña wakwila wayipulwishili, Yehova wahosheli nawaIsarela nindi: “anyana kaIsarela akusambila kuvwalika mumavumu awamama jawu, hela hadi antu, hela hadi anyama,” atela kuyijilika nakwikala indi hohu. (Kwi 13:2) Dichi, anyana awedi awamayala ekalili ambala aNzambi.
MARCH 8-14
YUMA YALEMA YAMWIZU DANZAMBI | KUCHINDA 9-10
“Yehova Chalombolañayi Antu Jindi”
it-1 398 ¶3
Chilombu
Chendeleña ichi chilombu cheneni kufuma heluña dimu nakuya hadikwawu (kwakwihi namateeku 40 ateekeliwu ayishimuna kudi Mosi muKuchinda 33) chadiña hichuma chakuhayamisha. Neyi ivu dinashakami hatabanaka, chilombu chawaIsarela chateekeleleña hanodu iluña. Neyi dinyamuka, chilombu nichena chanyamukileña. “Anyana kaIsarela kwenda chiña ayileja kudi Yehova kuteeka chiña ayileja kudi Yehova.” (Kuc 9:15-23) Embileña mpuña jasiliva jiyedi jakuchila kulonda aleji nachu chilombu chejima mwanahoshiyi Yehova. (Kuc 10:2, 5, 6) Avumishileña mpuña nakuleja chilombu nawu chatela kunyamuka. Mpinji yatachi yamwekeni chumichi yadiñi “mumwaka wamuchiyedi [1512 B.C.E.], mukakweji kamuchiyedi mwifuku dakakweji damakumi ayedi.” Chimbañu chachitiyañenu dichatwaminineñaku, muchidi watachi watwaminineñaku wadiña waYuda himukuhiña waIsakari nawa nkumininaku niwaZebuluni. Kuhiñahu ayilondeleleña kudi aGereshoni niaMerari asendeleña yuma yatabanaka. Kuhiñahu nyichidi yisatu yayilondeleleña wakusambila muchidi waRubeni himukulondela waSimeyona niwaGadi. Hanyima yaniyi nyichidi halondeleleña muchidi waKohati wasendeleña yuma yamumalala, kuhiñahu himukulondela nyichidi yisatu, waEfweremi, Manase niwaBenjamini. Nkumininaku, hanyima hadiña nyichidi yisatu wakusambila waDani himukulondela waAsheri niwaNafwatali. Dichi hadi nyichidi yiyedi yamaneni nawa yañovu, wumu watwaminineñaku nawa wukwawu wadiña hanyima.—Kuc 10:11-28.
Komana Mwamonaña Wunsahu waWunlomboli waNzambi?
Tunateli kumwekesha ñahi netu twalemesha wunlomboli waNzambi? Kapostolu Pawulu wahosheli nindi: “Ovwahilenu anlomboli jenu nakuyitiyilila.” (Heb. 13:17) Kwovwahila nikutiyilila hikwapela mpinji yejimaku. Chakutalilahu: Toñojokenu neyi mudi hakachi kawaIsarela amumafuku aMosi. Fwikijenu neyi munendi hadi mpinji yeneni, dichi chishimi hichikwimana. Chikwimana mafuku añahi? Ifuku dimu, mulungu wumu, tahindi tukweji twatuvulu? Himukutoñojoka nenu, ‘Komana natela kuloñolola yiteli yami yejima?’ Munateli kusambila kuloñolola yiteli yimunakukeña kuzatisha. Ilaña chimwahita mafuku antesha, mukutiya kutama kukeñakeña muyuma yenu, mukutachika nikuloñolola yuma yejima. Ilaña chimukukumisha hohu kuloñolola, nenu mutali chishimi hichikunyamuka nikunyamuka nawa mwatela kutachika cheñi kuloñejeka. Ichi hichuma chakala nankashi. Hela chochu, aIsarela ‘anyamukileña hiyakwenda hohenohu.’—Kuch. 9:17-22.
Chumanyi chitwelaña neyi tutambwila wunlomboli waNzambi? Komana twanyakalaña kuwuzatisha ‘hohenohu’? Tahindi twatwalekañahu kuzata neyi chitwenjilila kwila dikalu? Komana tuneluki wunlomboli wakatataka, chidi neyi wahosha hakulombola atudizi aBayibolu hetala, kushimwina antu ahoshaña idimi dacheñi, kwikala nakudifukula kwachisaka kwampinji yejima, kuzatila hamu naJikometi Jatiyañanaña naYipatela, nikudihemba chiwahi hakupompa kwankambi? Twamwekeshaña cheñi netu twalemesha wunlomboli waYehova kuhitila mukutiyilila kufumba. Neyi tunakukeña kufuukulahu chuma chalema, twamukuhwelelaña Yehova nikuloñesha kwindi kulonda kutulomboli, kubadika kukuhwelela maanetu. Neyi chochakeñaña mwana kumukiña kudi anvwali jindi neyi kudi nvula yeneni, twakeñaña kutukiña mukuloñesha kwaYehova, neyi kukala kwamunu mukaayi kudi neyi nvula yeneni kutumwekena.
Yuma Yalema yakuSpiritu
it-1 199 ¶3
Kupompa
Kupompa Chikwalemena. Ntanjikilu yaYehova yakupompa mpinji yejima kulonda antu ekaleña nawubwambu wawuwahi naNzambi, ayishimuna muntanjikilu yakwanakana Chipandakenu hachaaka-hachaaka. Muntu wejima wadiña wakadi majilu nawa wadiñahu ilaña kuya kuChipandakenu nehi, amujahileña. (Kuc 9:9-14) Chelili Mwanta Hezekiya yatambiki antu amuYuda niamuIsarela kwinza kuYerusalema nakwanakana Chipandakenu, wayilejeli nindi: “Enu anyana kaIsarela balumukenu cheñi mutali kudi Yehova . . . Bayi muchinchika neyi chachinchikili ankakulula jenuku dihanenu kudi Yehova mwiñili mumalala indi anajilikiyi chahaya nyaka mumukalakelaña Yehova Nzambi yenu kulonda kuzuwa kwindi kwasweja kuyifumi. . . . Yehova Nzambi yenu wukweti wushona waanakenaña neyi mukufunta kudi yena hakabalumuka mesu indi nakutala kwacheñuku.” (2Ku 30:6-9) Neyi muntu yabula kuya nakupompa chakadi kukala kudi kwejima chamwekesheleña nawu namuvulameni Nzambi. Hela chakwila yawija yidi neyi Chipandakenu hiyayanakanaña kudi akwaKristuku, Pawulu wayilejeli kubula kujiña kukupompa kwawantu jaNzambi, dichi wahosheli nindi: “Tudakameneña wumu namukwawu kulonda tudisañumuni wumu namukwawu kumwekesha kukeña nikukoña nyidimu yayiwahi, bayi tujiñaña kukupompa kwetu neyi chelañawu antu amakwawuku, ilaña tudikolesheña wumu namukwawu, sweje-e dinu nanochu chimunamoni nenu ifuku odu dinakuswina kwakwihi.”—Heb 10:24, 25; talenu KUPOMPA.
MARCH 15-21
YUMA YALEMA YAMWIZU DANZAMBI | KUCHINDA 11-12
“Muloñadi Chitwatela Kutondolwela Kutooba?”
w01 6/15 17 ¶20
Bayi Mwikala Akwakutiya naKuvulamenaku
AkwaKristu amavulu hiyakoñaña wuvumbiku. Dichi twatela kwikala ababala kulonda tubuleña kwila yuma yinateli kutuletesha kutachika kutooba, chakwila tumuneñesha Nzambiku. Pawulu watukonkomweneni nindi: “Nawa bayi tumweseka Yehova neyi chamwesekeliwu [aIsarela] amuku, dichi awa antu ayijahili kudi tupela. Nawa bayi mwikala akwakutooba neyi chatoobeleñawu amuku, awa antu ayijilumwini kudi akwakujilumuna.” (1 Akorinda 10:9, 10) A Isarela amutoobeleli Mosi naAroni niNzambi yomweni kutalisha hamanina ayinkeleñayi muchihayamisha. (Kuchinda 16:41; 21:5) Komana chatoobeliwu chamuneñesheli Yehova chanti kubadika chamuneñesheliwu hampinji yeliliwu wuvumbi? Bayibolu yashimuna nawu antu amavulu atoobeli ayijahili kudi atupela. (Kuchinda 21:6) Mpinji yimu, akwakudikaña adiña nakutooba akubadika ha 14,700 ayijahili. (Kuchinda 16:49) Dichi hitwatela kumweseka kuhitila mukubula kulemesha ntanjikilu yindiku.
w06 7/15 15 ¶7
‘Lekenu Kutooba’
Chahimpiliwu aIsarela! A Isarela amusakilili Nzambi chelili ayifumishi muEjipitu nawa ayamwini haKaluñalwiji Kachinana, embili tumina twakumushimeka Yehova. (Kwidika 15:1-21) Hela chochu, antu jaNzambi alekeli kumusakilila Nzambi chelili atachiki kumona kukala muchinkalampata niwoma watiyileñawu aKenani. Chatela amusakilileña Nzambi hakusubuka kwekaliliwu naku, ilaña wena atachikili kumwinkamu nyiloña. Chatachikiliwu kutooba chamwekesheleña nawu alemesheleña wanyi ntanjikilu yaYehova. Dihafumini yahoshi nindi: “Ichi chipompelu chatama chikuntobeshaña tuhu ho-o tahindi?”—Kuchinda 14:27; 21:5.
it-2 719 ¶4
Kubobola
Kutooba. Kutooba kwaneñeshaña nikuzeyesha muntu. Hashimbwili wanyi kufuma hayifumishiliwu aIsarela muEjipitu, atachikili kumutoobela Yehova nikuwana yiluwa mudi ambuña indi aMosi naAroni. (Kwi 16:2, 7) Nkumininaku, muloña wakusweja kutooba chamuletesheli Mosi kulomba nindi yafwi. (Kuc 11:13-15) Kutooba kunateli kuleta kukala kudi muntu itunakutoobela. Yehova wachindili yuma yahosheleñawu akwakumutoobela Mosi nindi kwadiña hikudikaña nawunlomboli Windi. (Kuc 14:26-30) Amavulu ajimbesheli mawumi awu muloña wakukeña yiluwa mudi antu.
Yuma Yalema yakuSpiritu
it-2 309
Manina
Kulumbulula. Manina adiña “neyi mbutu yamasa yitooka,” nawa “kuyitala” adiña neyi chikwawusaña wutooka, amwekeneña neyi nsela nawa ahalala neyi mperola. Kuyitompa mukanwa adiña neyi “makamba akudya nawuchi” hela “manji amaha.” Neyi anayihali dehi hamalola hela kuyitwa mumayanda, ayitelekeleña hela kuyila mankendi.—Kwi 16:23, 31; Kuc 11:7, 8.
MARCH 22-28
YUMA YALEMA YAMWIZU DANZAMBI | KUCHINDA 13-14
“Chikuhwelelu Chichatukwashaña Kwikala Ahamuka”
w06 10/1 16-17 ¶5-6
Kwikala Ahamuka Muloña waChikuhwelelu niKumwakama Nzambi
Akwakwendesha ituña ayedi, aYoshuwa naKalebi, afwilileña chikupu kwiñila Mwituña daChikaninu. Ahosheli nawu aKenani “hinshima yetu yakudya.” “Wena hiyakamona hakuhandilaku muloña etu tudi naYehova. Bayi muyitiya womaku.” (Kuchinda 14:9) Komana aYoshuwa naKalebi adiña asupa muloña wachikuhwelelu chawu? Inehi! Hamu namuza, amweni Yehova chasawishiliyi aEjipitu añovu hamu natunzambi twawu naYipupu 10. Kuhiñahu amweni Yehova chamujahiliyi Fwaro hamu niamashidika indi añovu haKaluñalwiji Kachinana. (Masamu 136:15) Mwamweni, akwakwendesha ituña 10 niantu aluwañesheliwu adi kutiya woma wanyi muloña adiña nawunsahu wawuvulu. Yehova wahosheli iku nahili nindi: “Yinjikijilu yinakoñi mukachi kawu yejimiyi saña alekelawu kuñitiya tahindi?”—Kuchinda 14:11.
Yehova wamweni kukala kwaletesheli chikuhwelelu chanawa antu chizeyi. Mwamweni, chikuhwelelu nikuhamuka jendelaña hamu, dichaletesheli kapostolu Yowanu yahoshi hadi chipompelu chawakwaKristu ninjita yawu yakuspiritu nindi: “Kaayi tunakimiki dehi mushindu nachikuhwelelu chetu.” (1 Yowanu 5:4) Makonu, aYinsahu jaYehova kubadika ha 6 miliyoni, atwansi niakulumpi, akola niabula kukola adi nachikuhwelelu neyi chadiña naYoshuwa naKalebi, ashimwinaña nsañu yayiwahi yaWanta kunyeñumuka kaayi kejima. Kwosi chilumbu wunatweshi kukañesha awa amashidika añovu nawa ahamukaku.—Aroma 8:31.
Yuma Yalema yakuSpiritu
it-1 740
Ituña Dayinkeliwu aIsarela Kudi Nzambi
ITUÑA dayinkeliwu aIsarela kudi Nzambi dadiña dadiwahi chikupu. Chelili Mosi yatumi akwakwendesha ituña kuya nakutalatala Ituña daChikaninu nikusenda yuma yedikileñamu, aleteli nkuyu, mabula nimutayi wamuvinyu weneni chakwila amayala ayedi awutembekeli hamutondu! Hela chakwila afuminiku iku anatiyi woma muloña wakubula chikuhwelelu, ashimwini nawu: Ituña “chalala datuloña twamayeli nawuchi.”—Kuc 13:23, 27.
MARCH 29–APRIL 4
YUMA YALEMA YAMWIZU DANZAMBI | KUCHINDA 15-16
“Bayi Mudinka Wanta niKusweja Kudikuhwelelaku”
Komana Yehova Wayiluka?
Hela chochu, hela chakwila muza waIsarela wadiña kwakwihi nakwiñila Mwituña daChikaninu, Kora wamweni nindi Yehova waluwañesheli munjila yadiña nakulombwelamu muza. Kuhiñahu amayala amakwawu 250 alombweleña mumuza adibombeli naKora hakufwila kuhimpa yuma. Kora niakwawu atela atoñojokeleña nawu akoñeleña mwaloña kwesekeja nawubwambu wawu naYehova. Amulejeli Mosi nawu: “Munadikilakeshi dehi, chipompelu chejima chajila niwunashaluhu hosi, Yehova wudi mukachi kawu hohu.” (Kuch. 16:1-3) Mwalala aswejeli kudikuhwelela chikupu nikuditiya! Mosi wayilejeli nindi: “Yehova wakamwekesha windi.” (Tañenu Kuchinda 16:5.) Chashikili ifuku damuchiyedi, Kora niantu ejima adikañili adiña kukabadi kindi afwili.—Kuch. 16:31-35.
Komana Yehova Wayiluka?
Hekala chaambu cheneni chikupu hakachi kaMosi naKora kutalisha hakulemesha ntanjikilu yaYehova nikufuukula kwindi. Yehova wayilukili kwesekeja nayuma yakoñeluwu. Kora wadiña kaLevi wamuchisaka chaKohati nawa wadiluñishili muloña wadiña nakukooleka kweneni. Hadaha wadiña nakukooleka kwakumona Yehova chapulwishiliyi aIsarela haKaluñalwiji Kachinana, kuhakwilaku wunsompeshi waYehova wasompesheliyi aIsarela adikañili Hampidi yaSinayi, nimudimu wakusenda chimbañu chachitiyañenu. (Kwid. 32:26-29; Kuch. 3:30, 31) Wadiña washinshika kudi Yehova hadi yaaka yayivulu nawa antu amavulu muIsarela amulemesheli.
Yuma Yalema yakuSpiritu
w98 9/1 20 ¶1-2
Twamijenuñaku Yuma Yalema muChihandilu!
Yehova wayimweneña iyi nsañu nindi yalema chikupu. Bayibolu yahosha nayu, “Yehova wamwilili Mosi nindi Muntu owu chiña kumujaha hohu.” (Kuchinda 15:35) Muloñadi Yehova chatiyilileñayi kutama neyi muntu yaluwañesha?
Antu adiña namafuku 6 akukeñelamu yuma yakeñeleñawu chidi neyi kuchaya nchawa, kukeña yakuda, yakuvwala nihakushakama. Ifuku damu 7 dadiña dakwililamu yuma yakuspiritu. Kuchaya nchawa kwadiña kwatama wanyi, ilaña kuzatisha mpinji yakudifukwilamu kudi Yehova kuzatilamu iyi nyidimu kwadiña kwatama. Hela chakwila twekala wanyi muNshimbi jaMosi, komana iyi nsañu yinakutudizisha wanyi chitwatela kutanjika yuma yalema makonu?—Afwilipi 1:10.
APRIL 5-11
YUMA YALEMA YAMWIZU DANZAMBI | KUCHINDA 17-19
“Yami Wuswana Weyi”
Komana Munakwiteja Yehova Yekali Iseka Denu?
Toñojokenu hadi aLevi, abulili kutambwila wuswana wetuña. Chineli ashili muchima hakudifukula kwalala, akuhweleleli mudi Yehova nawu wukuyinka yuma yakumujimba, muloña wayilejeli nindi: ‘Iseka denu yami.’ (Kuch. 18:20) Hela chakwila hitwakalakalaña mutembeli neyi chakalakeleñawu atupristu niaLeviku, tunateli kwimbujola yilwilu yawu, nakukuhwelela netu Yehova wukutwakamena. Chineli hitukusweja kwiñila mumafuku akukuminina, twatela kusweja kumukuhwelela Nzambi netu wukutwakamenaña.—Chim. 13:17.
Yehova Diyi Iseka Dami
Indi mudimu wayinkeluwu aLevi watalishili mudihi? Yehova wahosheli nindi wateleli kwikala iseka dawu munjila yakwila nawu chatela ayinki wuswana wetuña dachikaninu, ayinkeli mudimu wasweja kulema. “Wupristu waYehova” diwadiña wuswana wawu. (Yosh. 18:7) Nsona yaKuchinda 18:20 yatukwashaña kwiluka netu atwalekeluhu kwikala nayuma yakumujimba yakeñeleñawu. (Tañenu Kuchinda 18:19, 21, 24.) Alevi ateleleli kuyinka “yamwikumi yamuIsarela yiikali wuswana wawu, nanyidimu yawu.” Ayinkeleña yamwikumi yayuma yadimineñawu aIsarela niayimuna amavulu. Kuhiñahu, aLevi ateleleli kuhana mulambu wamwikumi wayuma yatambwilileñawu, “yoyuma yaswejamu kuwaha,” kulonda kukwasha nachu mudimu wawupristu. (Kuch. 18:25-29) Atupristu ayinkeleña cheñi “nyilambu yakuleleka yejima yayuma yajila” yaleteleñawu anyana kaIsarela kudi Nzambi heluña dindi dakudifukwila. Dichi atupristu ateleleli kukuhwelela nawu Yehova wukuyakamena.
Yuma Yalema yakuSpiritu
g02 6/8 14 ¶2
Muñwa Wadiña Walema
Muñwa wadiña cheñi chinjikijilu chañovu nichahaya nyaaka. Hela chochu, muBayibolu chitiyañenu chakudikasa achiteneneña nawu “hichitiyañenu chamuñwa,” kuyidika kakavulu adiileña mbiji hamu namuñwa. (Kuchinda 18:19) MuNshimbi jaMosi, muñwa awushileña kunyilambu yalambwileñawu hakameña, chakadi nikujina, chinakwimenaku kusubuka kumajika kanwa hela kutoka.
APRIL 12-18
YUMA YALEMA YAMWIZU DANZAMBI | KUCHINDA 20-21
“Twalekenuhu Kwikala Amwovu Hela Mudi Mukukala”
Fwilenuña Kwikala Adizoza Kulonda Mumutiyisheña Yehova Kuwaha
Tukutondolwelaña kukoña yiluwa. Toñojokenu cheñi hadi Mosi. Hadi yaaka yayivulu, watwalekelihu kwikala wadizoza nawa wamutiyishileña Yehova kuwaha. Dichi hakukuma kwayaaka 40 yendeliwu muchinkalampata, Mosi wakañenyi kudizoza. Hanyima yakwila muhelindi hadaha wamupulwishili muEjipitu nafwi nawa anamujiiki dehi kuKadeshi, aIsarela atachikili cheñi kutooba nawu ayihembeleña chiwahi wanyi. Haniyi mpinji ‘amutoobeleli Mosi’ muloña wakubula menji. Antu atachikili kumutobela Mosi hela chakwila Yehova wamuzatishili kukoña yihayamisha nikuyilombola hadi mpinji yayilehi. Bayi neyi adiña nakutooba muloña wakubula menji hohuku, ilaña adiña cheñi nakumutoobela Mosi neyi kwiji diyi waletesheli afwi mpwila.—Kuch. 20:1-5, 9-11.
Fwilenuña Kwikala Adizoza Kulonda Mumutiyisheña Yehova Kuwaha
Mosi wahilili nawa wakañenyi kutwalekahu kwikala wadizoza. Chatela yahoshi kwilola neyi chamulejeliwu kudi Yehova, Mosi watachikili kuyihoshola antu nawa wamwekesheli neyi kwiji yena diyi wukukoña chihayamisha. Kuhiñahu, weteli kwilola kayedi nawa menji atachikili kwidika. Muloña wakudivwimba nikuzuwa, wakoñeli chiluwa cheneni. (Mas. 106:32, 33) Mosi amwitejeli wanyi kwiñila Mwituña daChikaninu muloña wakubula kudizoza.—Kuch. 20:12.
Ichi chakutalilahu chinatudizishi yuma yalema. Chatachi, twatela kutwalekahu kwikala adizoza. Neyi tukañanya kutwalekahu kwikala adizoza, tunateli kutachika kudivwimba nawa tunateli kukoña chuma chatama hela kwikala nanhoshelu yatama. Chamuchiyedi, chineñi chinateli kutuzeyesha, dichi twatela kwikala adizoza hela chakwila yuma yinakali ñahi.
Nsompeshi Wahakwilañaku Yuma Yaloña
Chatachi, Nzambi hamulejeli Mosi kuhosha nawantu hela kusompesha akwakudikañaku. Chamuchiyedi, Mosi niAroni amulemesheli wanyi Nzambi. Nzambi wahosheli nindi: “Chimunabuli . . . kunjilika.” (Vasi 12) Chahosheliyi nindi ‘tukuyiidishila menji,’ Mosi wahosheli neyi kwiji yena naAroni diwu edishileña menji muchihayamisha bayi Nzambiku. Chamuchisatu, mazu ahosheliyi ashindameneni hayuma yamwekeni kunyima. Nzambi wakaanishili ikiñu dakusambila kwiñila muKenani muloña dadikañili, dicheliliyi ninaMosi niAroni. (Kuchinda 14:22, 23) Chamuchiwana, Mosi naAroni adiña anlomboli awaIsarela. Ana adi nanyidimu yayivulu akalumbulula kudi Nzambi.—Luka 12:48.
Yuma Yalema yakuSpiritu
Mwamonaña Kuzeyazeya Kwawakwenu Neyi Yehova?
Yehova wadi kumubabesha Aroni hayiluwa yejima yeliliyi chakadi kumba mpinji. Ilaña Welukili nindi Aroni hadiña muntu watamaku nawa hakoñeli nshidi yaswejaku. Chamwekana neyi Aroni wetejeli yuma yatama hela ikakeja dawantu amakwawu dimuleñeli kuheñuka munjila yaloña. Ilaña, chamulejeluwu yiluwa yakoñeliyi, washikeneni dakwiteja yiluwa yindi nawa wetejeli mwafuukwiliyi Yehova. (Kwid. 32:26; Kuch. 12:11; 20:23-27) Yehova watalili hohu hachikuhwelelu chaAroni nichabalumukiliyi mumuchima. Chimwahitili yaaka yayivulu, Aroni nimutaña windi ayanukileña nawu adiña amwakama Yehova.—Mas. 115:10-12; 135:19, 20.
APRIL 19-25
YUMA YALEMA YAMWIZU DANZAMBI | KUCHINDA 22-24
“Yehova Wabalumunaña Ishiñu naKwikala Nkisu”
Kushimwina “Nsañu Yayiwahi yaYesu”
Neyi chichadiña mumafuku awapostolu, nimakonu makabisha hiyanalekeshi antu jaNzambi kushimwinaku. AkwaKristu akanjikijañawu kufuma kumaluña amakwawu nakuyitwala kwacheñi, chili mukaleya hela kumatuña amakwawu, chayikwashaña kushimwina nsañu yaWanta kumaluña kwayitwalañawu. Chakutalilahu, haNjita yaKaayi yamuchiyedi, aYinsahu jaYehova ashimwinini muyilombu yakuyandishila yawaNazi. KaYudeya wadiña muchilombu mwadiña aYinsahu, washimwini nindi: “Chadiña nakuumikawu aYinsahu jaYehova adiña atuyili chankwashili kwiluka nami chikuhwelelu chawu chashindameneni haBayibolu, dichi ninami nekalili Chinsahu.”
it-2 291
Kuzaluka
Kudikaaña naYehova hiKuzaluka. Kaprofwetu Balami wakeñeleña kuprofweta hadi aIsarela kulonda amwinki mali kudi Mwanta Balaki wawaMowabi, ilaña Yehova wamukañesheli. Kapostolu Petulu wasonekeli hadi Balami nindi: “Kanyama kabulaña kuhosha kasendaña yiteli kahosheli nezu damuntu, kakañesheli yilwilu yakuzaluka yaniwu kaprofwetu.” Muloña wakuzaluka kwaBalami, kapostolu wazatishili izu dachiGiriki dapa·ra·phro·niʹa, datalisha mukwila nawu “muntu wunaluwankani muyitoñojoka.”—2Pe 2:15, 16; Kuc 22:26-31.
Yuma Yalema yakuSpiritu
w04 8/1 27 ¶2
Yikuma Yamaneni Kufuma muMukanda waKuchinda
22:20-22—Muloñadi kuzuwa kwaYehova chikwenjilili hadi Balami? Yehova wamulejeli kaprofwetu Balami nindi bayi yayishiña aIsarelaku. (Kuchinda 22:12) Hela chochu, kaprofwetu wayili nawantu jaBalaki kulonda yayishiñi aIsarela. Balami wakeñeleña kuzañalesha mwanta wawaMowabi nikutambwila wufwetu. (2 Petulu 2:15, 16; Yuda 11) Nihampinji yamukanjikijiliwu Balami kuyikiswila aIsarela chatela yayishiñi, wafuukwilihu kumuleja mwanta nindi yazatishi ambanda adifukulaña kudi Bayali kuya nakuhuñumuna amayala amuIsarela. (Kuchinda 31:15, 16) Dichaletesheli kuzuwa kwaNzambi kumushikeni kaprofwetu Balami muloña wadiña nalwisu.
APRIL 26–MAY 2
YUMA YALEMA YAMWIZU DANZAMBI | KUCHINDA 25-26
“Yilwilu Yamuntu Wumu Yinateli Kukwasha Amavulu”
“Temukenu Wuvumbi”
CHIBINDA chanshi wayaña hachilondu hanelukiyi nindi wukukwata inshi jinakukeñayi. Washaña ndiisha kwilowa nakudinatila hamenji. Watalilaña nichikwinza inshi nakuminya ndiisha yidi kwilowa, hakuvubula nakumulowa ona inshi.
Dichi chekalaña nikudi antu. Chakutalilahu, chashikiliwu aIsarela kwakwihi nakwiñila Mwituña daChikaninu, atuñili chilombu muYaana yaMowabi. Mwanta wakuMowabi wamukanini iyala wejina daBalami nindi wukumwinka mali amavulu neyi wukuyishiña aIsarela. Nkumininaku, Balami wawanini njila yakwilishilamu aIsarela adileteli aweni ishiñu. Waweni ndiisha yatelela. Watemesheli atunkaña awambanda awaMowabi muchilombu chawaIsarela kulonda ahuñumuni amayala.—Kuchinda 22:1-7; 31:15, 16; Chimwekeshu 2:14.
“Temukenu Wuvumbi!”
Muloñadi aIsarela amavulu chakwatikiliwu kukafuta kaBalami? Atoñojokeleña hohu hayuma yakudizañalesha aweni chakwila avulameneni nikwanuka yuma yayikoñeleliyi Yehova. Nzambi wayikoñeleli aIsarela yuma yayivulu yadi kuyilisha kwikala ashinshika. Wayifumishili muwuduñu muEjipitu, wayidiishileña muchinkalampata nawa wayishikijili kuñinza Netuña daChikaninu. (Aheberu 3:12) Ilaña, afwili mumuhetu wawuvumbi. Kapostolu Pawulu wasonekeli nindi: “Bayi twila wuvumbi neyi cheliliwu amu wuvumbiku, chakwila . . . afwili.”—1 Akorinda 10:8.
Yuma Yalema yakuSpiritu
it-1 359 ¶1-2
Ñinza
Chinamwekani neyi kudi yuma yiyedi yalondeleleñawu hakwanzañena nyichidi yawantu mpata: wunsahu wachinjikijilu chakusakula nachu nikutoha kwamuchidi. Ichi chinjikijilu chayilejeleña iluña dampata yawuswana yikutambula muchidi himuchidi, chayilejeleña kushakama iluña dodimu hela mpata yikwawu chidi neyi kukabeta kakuchimunswa hela kakuchidiilu, kumusela hela kumujika, muyana nikumapidi. Yehova diyi wayilejeleña nanichi chinjikijilu nawa chumichi chakwashileña nyichidi kubula kuditiyila ichima hela kubobola. (Yis 16:33) Kuzatisha ichi chinjikijilu, Nzambi walejeleña muchidi himuchidi chuma chikayimwekena kwesekeja nawuprofwetu wonenewa wankakulula Yakoba wasonekawu haKutachika 49:1-33.
Neyi chinjikijilu chakusakula nachu chinashimuni dehi iluña kwatela kushakama muchidi, atalileña hakutoha kweluña kushindamena hachikuma chamuchiyedi: kutoha kweluña. ‘Mwakadanzañeni ituña kuzatisha chinjikijilu chakusakula nachu mwahita yisaka yenu. Amavulu mwakayinki wuswana wawuvulu, antesha mwakayinki wuswana wantesha. Kwakamuholokela muntu chinjikijilu, dikwindi.’ (Kuc 33:54) Neyi chinjikijilu chinatondi iluña ahimpikileña wanyi, ilaña atandumwineñaku hohu ñinza kwesekeja nakutoha kwawuswana wanowu muchidi. Dichi, chamweniwu nawu mpata yaYuda yinatohi, aketwiliku nakuyinka amuchidi waSimeyona.—Yos 19:9.