Munafumi Nsañu Yakuzatisha muChihandilu niMudimu Wanetu AkwaKristu Mukanda waKupompa
MAY 3-9
YUMA YALEMA YAMWIZU DANZAMBI | KUCHINDA 27-29
“Mwimbujolenuña Yehova Wabula Chaambu”
Hamekenuña Chikupu Yilwilu yaYehova
Anyana awambanda atanu ayili kudi Mosi nawa amwihwili nawu: “Ijina datata yetu akudifumishiladi hachisaka chindi? Muloña chochu chabuliliyi mwana weyala tahindi?” Amulembeleli nawu: “Atwinki wuswana wetu hamu nawana kwatata. Komana Mosi wayakwili nakuhosha nindi, ‘Imu dimwatalisha nshimbi, kwosi munatela kuyikwashila’? Inehi, “Mosi watweli nsañu yawu kudi Yehova.” (Kuch. 27:2-5) Amwakwili nawudi? Yehova wamulejeli Mosi nindi: “Anyana kaZelofwehadi awambanda anahoshi chachiwahi; eña yinki ituña dawu dakuswanaña hamu nawana kwatata yawu wakayiswanishi wuswana watata yawu.” Dichi Yehova watwalekeluhu. Wabalumwini iyi nsañu kwikala lushimbi, wamulejeli Mosi nindi: “Neyi kwakekala muntu wakafwa chakubula mwana weyala, wuswana windi mwakaswanishi mwanindi wamumbanda.” (Kuch. 27:6-8; Yosh. 17:1-6) Kufuma hayina mpinji, aIsarela awambanda ejima amweneña kukala kwamuchidiwu adi kukiñewa.
Hamekenuña Chikupu Yilwilu yaYehova
Iku kwadiña kufuukula kwakuwahi nawa kwakadi chaambu! Yehova wayakameneni nakalemesha awa ambanda adiña mukukala, neyi chochayakameneniyi aIsarela adiña nachihandilu chachiwahi. (Mas. 68:5) Iyi hinsañu yimu yekala hakachi kansañu yayivulu yamuBayibolu yamwekeshaña wunsahu walala wakwila nawu: Yehova wakamenaña ambuñindi ejima chakadi chaambu.—1 Sam. 16:1-13; Yilw. 10:30-35, 44-48.
Hamekenuña Chikupu Yilwilu yaYehova
Tunateli kumwimbujola ñahi Yehova hakwikala abula chaambu? Anukenu nenu, neyi tunakukeña tubuli kumwekesha chaambu kudi antu amakwawu, twatela kwiluka netu hitwatela kumwekesha chaambu kudi muntu wudi wejimaku. Mwamweni, wonsu wetu twatoñojokaña netu hitwekala nachaambuku. Hela chochu, munateli kwiteja nenu, chekala chakala kudishinshika chiwahi etu aweni nakwiluka yitoñojoka yetu. Dichi, tunateli kwila ñahi kulonda twiluki neyi antu amakwawu atwiluka nawu hitwekala nachaambuku? Hampinji Yesu yakeñeleñayi kwiluka chadiña nakuhoshawu antu hadi yena wenhwili amabwambu jindi akuhweleleliyi nindi: “Ami Mwana kamuntu, antu elaña nawu yaminyi?” (Mat. 16:13, 14) Komana kwila twila neyi cheliliyi Yesu nehi? Munateli kwihula amabwambu jenu imwakuhwelela anateli kuyileja mwalala neyi ayiluka nawu himwekala nachaambuku. Chakutalilahu, nateli kuyileja nindi mpinji jikwawu mwakamenaña antu amuchidi wumu kubadika wukwawu hela nindi mwekala chiwahi kudi antu aheta hela ataña chikupu. Neyi ibwambu denu yayileja mwenimu, chumanyi chimwatela kwila? Lombenu chikupu kudi Yehova hachimunakutiya, nakumulembelela yayikwashi muhimpi yitoñojoka yenu hakwila mumwekesheña chikupu chilwilu chindi chakubula chaambu.—Mat. 7:7; Kol. 3:10, 11.
Yuma Yalema yakuSpiritu
it-2 528 ¶5
Nyilambu
Nyilambu yakuhuñununa. Nyilambu yakuhuñununa ayileteleña hamu nanyilambu yikwawu, sweje-e hanyima yakwila aIsarela aneñili dehi Mwituña daChikaninu. (Kuc 15:2, 5, 8-10) Iwu wadiña mulambu wavinyu (“wawalwa washetana”) nawa adiña nakuwuhuñunwina hakameña. (Kuc 28:7, 14; esekejenu Kwi 30:9; Kuc 15:10.) Kapostolu Pawulu wayisonekeleli akwaKristu amuFwilipi nindi: “Hela chakwila anakunhuñununa neyi mulambu wavinyu hamulambu wamudimu wajila wumunakuzata muloña wachikuhwelelu chenu, natiyi kuwaha.” Wazatishili nhoshelu yankinji yamulambu wakuhuñununa, hakumwekesha chadihaniniyi yomweni kukoola akwawu akwaKristu. (Fwp 2:17) Henohu kanda yafwi wamusonekeleli Timotewu nindi:“Muloña ami anatachiki dehi kunhuñununa neyi mulambu wavinyu, nawa mpinji yami yakukasunuka yinashiki dehi mukamwihi.”—2 Ti 4:6.
MAY 10-16
YUMA YALEMA YAMWIZU DANZAMBI | KUCHINDA 30-31
“Ilenuña Mumwakanini”
it-2 1162
Kukana
Neyi Chakwila Wudikana Watela Kushikijamu. Chakeñekeleña kudihana hakwila muntu yadikani. Hela chochu, neyi muntu nakani, wadiña nakushikijamu kwesekeja nanshimbi. Kudikana kwadiña tuhu neyi muntu ‘nadikasi mumuchima,’ nakumwekesha nawu nahani wumi windi wejima kulonda yeli mwanakaniyi. (Kuc 30:2; talenu cheñi Rom 1:31, 32.) Chineli wumi wetu wudi muwubanji, chalema kutoñojoka chatulejaña Nsona nawu twatela kwikala asoñama henohu kanda tudikani nikutoñojoka ntahi hayuma yinateli kufumamu. Nshimbi yahosheleña nawu: “Chiwakadishiila kumwinka Yehova Nzambi yeyi chuma . . . Nzambi yeyi wakachikeña kudeyi; chakenza kakubalumukila hinshidi. Ilaña neyi wakaleka kudishiila hichakekala nshidi kudeyuku.”—Kuh 23:21, 22.
it-2 1162
Kukana
Hichikaninu chakanañayi muntu kudi Nzambi kulonda yakoñihu chuma, kuhana mulambu hela yawaana, kuzataku nyidimu nikubula kwila yuma yikwawu yabula kukaanishawu. Kudikana kwamwekesheleña nawu muntu nadihani yomwenindi chakufuma hamuchima. Neyi nadikani, mazu indi akudikana adiña neyi nasanyiki, nawa mpinji yikwawu awa mazu ayedi endelaña hamu muBayibolu. (Kuc 30:2; Mat 5:33) “Kudikana” hikufwila kwilamu, ilaña “kusanyika” himazu ahoshañayi muntu kudi akwawuswa hakumwekesha nindi wukuhosha walala. Kunyima, kusanyika kwadiña neyi hikutiyañana chitiyañenu.—Kut 26:28; 31:44, 53.
w04 8/1 27 ¶3
Yikuma Yamaneni Kufuma muMukanda waKuchinda
30:6-8—Komana iyala mukwaKristu watela kudiwula mwakanayi ñodindi? Kutalisha hakudikana, Yehova watiyaña chakanañawu akwakudifukula indi makonu. Chakutalilahu, muntu neyi nadihani kudi Yehova, wadikanaña nkawindi. (AÑalija 6:5) Dichi iyala hakweti wuswa wakudiwula mwakaniniyi ñodindiku. Hela chochu, mumbanda watela kutondolwela kudikana kwila yuma yaditadikishaña nezu daNzambi hela yikumukañesha kuzata nyidimu yatela kuzatayi mumbanda.
Yuma Yalema yakuSpiritu
it-2 28 ¶1
Yefwata
Antu adihanineña awenawu kudi Yehova kukalakela hetala daNzambi. Anvwali niwena ahanineña anyanawu. Samweli wudi hakachi kanawa antu, mama yindi Hana wakanini nindi wukamuhana kulonda yakalakaleña nyidimu yahatabanaka neyi navwaliki. Nfumwindi Elekana wetejeli mwakaniniyi. Chasumukiliyi hohu, Hana wamutwalili Samweli kutabanaka. Hampinji yamutwalileñayi, Hana wasendeli nichimuna chakulambula. (1 Sa 1:11, 22-28; 2:11) Mwana mukwawu wahaniniwu kumukalakela Yehova wadiña Samisoni kaNaziri.—Ans 13:2-5, 11-14; esekejenu wuswa wekala natata yawantu hadi mwanindi wamumbanda neyi chashimunawu haKuc 30:3-5, 16.
MAY 17-23
YUMA YALEMA YAMWIZU DANZAMBI | KUCHINDA 32-33
“Mwakatemuni Ashakama Mwituña Ejima”
w10 8/1 23
Komana mweluka?
‘Yinañanañanyi’ yatenawu nankashi muNsona jachiHeberu?
Chelili aIsarela hiyakukeña kwiñila Mwituña daChikaninu, Yehova wayilejeli kukisañana maluña akudifukwila ejima awaKenani ashakamineña mudina ituña. Nzambi wayilejeli nindi: “Mwakakisañani niakishi awu akusuñununa ejima mwakakisañani ninkishi jawu jakusuñununa jejima mwakasandi niyinañanaña yawu yejima.” (Kuchinda 33:52) Awa maluña akudifukula kwakutwamba hadaha adiña hewulu damapidi hela hayinañanaña yatuñiliwu mumaluña amakwawu, chidi neyi mwishina danyitondu hela munyisumba. (1 Anyanta 14:23; 2 Anyanta 17:29; Ezekeli 6:3) Adiña nakudifukula kutumeña, tuposhi twawu, akishi awu akusoña, akishi etañwa niyuma yikwawu yazatishileñawu hakudifukula.
w08 2/15 27 ¶5-6
Dizilenu Kuyiluwa Yakoñeliwu aIsarela
Makonu, twamonaña kukala kwadifwanaku nakwamweniwu aIsarela. Antu makonu niwena adi nawakishi awu. Munabombeli mali, yuma yakumanishilamu wuudi, yisela, jipolitiki, anlomboli ansakililu niantu amuchisaka. Hakachi kaniyi yuma tunateli kulemeshahu chuma chimu muchihandilu chetu. Kukwata wubwambu nawantu abula kumukeña Yehova kunateli kutuzeyesha kuspiritu.
Wuvumbi wadiña mbadi yakudifukula kwaBayali nawa wakokweli aIsarela amavulu. Antu jaNzambi niwena anakufwa mumuhetu wowumu. Chakutalilahu, neyi munakuzatisha kompyuta mwitala mwankawenu nawa muchinta hayuma yamuchidiwu chinleji chenu chachiwahi chinateli kukisika. Chinateli kwikala chatama neyi mukwaKristu yatachika kutala nyevulu yanzekesi haintaneti!
it-1 404 ¶2
Kenani
Yoshuwa welili ‘mwejima mwamulejeluwu Mosi kudi Yehova, hashiyili kwindi chuma chimu chakadi kwilaku,’ wajilumwini aKenani. (Yos 11:15) Ilaña muza waIsarela wakañenyi kulondela wunlomboli windi nawa wakisañeni yuma yejima yamwituña. Chatwalekeliwu aIsarela kushakama nawaKenani, chayiluwañesheli nankashi chakwila mukuhita kwampinji, aIsarela amavulu afwili (mwaswejeli mandombu, wuvumbi nikupesha) kubadika aKenani ejima ajahiliwu ayiluwañesheli wena. (Kuc 33:55, 56; Ans 2:1-3, 11-23; Ms 106:34-43). Yehova wayisoñamishili aIsarela nindi wakamwekesha chaambu wanyi hakuyisompesha nawa nindi neyi aIsarela atachika kudikunda nawaKenani, kusumbwañana nawu, kukuhwelela yuma yakuhweleleliwu, tushidikilu twamunsakililu yawu nikwila yuma yakuhweleleliwu chadi kuyiletela awenawu ihuñu dodimu chakwila adi kuyijilumuna nawa ‘adi kuyisanza mwituña’ hela kuyifumishamu.’—Kwi 23:32, 33; 34:12-17; Lev 18:26-30; Kuh 7:2-5, 25, 26.
Yuma Yalema yakuSpiritu
it-1 359 ¶2
Ñinza
Neyi chinjikijilu chakusakula nachu chinashimuni dehi iluña kwatela kushakama muchidi, atalileña hakutoha kweluña kushindamena hachikuma chamuchiyedi: kutoha kweluña. ‘Mwakadanzañeni ituña kuzatisha chinjikijilu chakusakula nachu mwahita yisaka yenu. Amavulu mwakayinki wuswana wawuvulu, antesha mwakayinki wuswana wantesha. Kwakamuholokela muntu chinjikijilu, dikwindi.’ (Kuc 33:54) Neyi chinjikijilu chinatondi iluña ahimpileña wanyi, ilaña atandumwineñaku hohu ñinza kwesekeja nakutoha kwawuswana wanowu muchidi. Dichi, chamweniwu nawu mpata yaYuda yinatohi, aketwiliku nakuyinka amuchidi waSimeyona.—Yos 19:9.
MAY 24-30
YUMA YALEMA YAMWIZU DANZAMBI | KUCHINDA 34-36
“Batamenu Mudi Yehova”
Komana Munakubatama Mudi Yehova?
Hanu dinu, aIsarela elileña ñahi neyi muntu yajaha mukwawu chamaposu? Hela chakwila namujahi chamaposu, iwu wunajahañani wadiña namuloña wakupwekesha mashi akadi muloña. (Kutach. 9:5) Kukooleka, iwu muntu amwitejeleña kutemukila kumusumba wumu hanyisumba 6 yakubatamina kuchina kumujaha kudi mukwakutenda mashi. Wapulukilileña kwenoku. Nawa washakamineña munowu musumba wakupulukila sampu kapristu muneni nafwi.—Kuch. 35:15, 28.
Komana Munakubatama Mudi Yehova?
Neyi namujahi mukwawu chamaposu, itunduka wasambilileña kushimuna “nsañu yindi kudi akulumpi” hachiisu chamusumba wakubatamina kunatemukiliyi. Amutambwilileña chiwahi. (Yosh. 20:4) Neyi munahiti dehi mafuku, amufuntishileña kudi akulumpi kumusumba kwajahililiyi mukwawu nawa akulumpi asompeleña muloña windi. (Tañenu Kuchinda 35:24, 25.) Itunduka wafuntileña kumusumba wakubatamina chiña hohu neyi anasompi nawu wajaha mukwawu chamaposu.
Komana Munakubatama Mudi Yehova?
Itunduka wadiña wakiñewa neyi wudi mumusumba wakubatamina. Yehova wahosheli kutalisha kuniyi nyisumba nindi: “Yakekali nyikala yenu yakupulukila.” (Yosh. 20:2, 3) Yehova wakeñeleña wanyi nindi muntu wunajahañani amusompeshi cheñi, nawa hiyetejeleña mukwakutenda mashi kwiñila mumusumba nakujaha ona muntuku. Dichi itunduka wachinineña wanyi kumujaha. Yehova wamukiñileña hampinji yadiñayi mumusumba. Aka hikadiña kaleya kakubataminaku. Musumba wamukwashileña kuzata, kukwasha amakwawu nikumukalakela Yehova mukuwunda. Mwamweni, washakamineña chiwahi namuzañalu!
Yuma Yalema yakuSpiritu
w91 2/15 13 ¶13
Ifutu Danyiloña Dakukuula Nachu Antu Ejima
Adama naEva akayikuula wanyi nefutu danyiloña. MuNshimbi yaMosi mwadiña ichi chishina nawu: “Kukuula wumi wambanji wudi nachitela chakufwa nehi.” (Kuchinda 35:31) Adama hiyamudimbiliku, ilaña wakoñeli nshidi mumushikila. (1 Timotewu 2:14) Chaletesheli anyanindi kuswana kubula kuwanina kwindi, kwenza hamuloña wakufwa. Mwamweni, Adama wateleli kufwa, hakwikala muntu wawanina, wafuukwilihu kudikaña nanshimbi jaNzambi mumushikila. Neyi azatishili ifutu danyiloña kumukuula nachu Adama, chadi kwambukaku nayishina yaYehova yaloña. Hela chochu, atukuula kunshidi yaAdama, dikwila nawu atukuula kumuloña wakufwa wutwaswanini kudi Adama. (Aroma 5:16) Chumichi chinatalishi mukwila nawu, nshidi ayifumishiluhu chikupu. Mukwakukuula ‘watompela antu ejima kufwa,’ nawa womikili kukala kwejima kwanshidi jawanyana kaAdama ejima.—AHeberu 2:9; 2 AKorinda 5:21; 1 Petulu 2:24.
MAY 31–JUNE 6
YUMA YALEMA YAMWIZU DANZAMBI | KUHITULUKA 1-2
“Wuñaji Wambala waNzambi”
w96 3/15 23 ¶1
Yehova Wakeña Kuloña niWuñaji
Akulumpi ayinka mudimu wakusompesha muntu wunakoñi nshidi. (1 AKorinda 5:12, 13) Anukaña nawu neyi anakusompesha atela kumwekesha wuñaji hanateleli. Ilaña neyi anakusompa muloña wamuntu wabulaña kubalumuka, hiyatela kumutiyila luwiku. Akulumpi hiyahañaña muntu wunavulumuni muchipompelu muloña wakuhilaku. Akuhwelelaña nawu neyi amuhaña nateli kuhimpa. (Esekejenu Ezekeli 18:23.) Chineli alondelaña wumutu waKristu, akulumpi amwekeshaña wuñaji, nawa ‘ekalaña neyi kwakubatama mpepela.’ (Isaya 32:1, 2) Hiyatela kumwekeshaña chaambuku nawa atela kuyitoñojokelañaku.—Kuhituluka 1:16, 17.
w02 8/1 9 ¶4
Ovwahilenuña Wunlomboli waNzambi
Hakwila muntu yekali nsompeshi, wateleli kwiluka yuma yayivulu kubadika kwiluka hohu Nshimbi. Chineli adiña awanina wanyi, akulumpi awamayala ateleli kudiyuula hakwila abuleña kwikala nayilwilu yidi neyi, kudikeña, chaambu nilwisu yadi kuyikañesha kusompeshaña chiwahi. Mosi wayilejeli nindi: “Chimwakasompeshaña bayi mwakaakamaña antu kumesuku; mwakatiyililaña hamu niwanyanya nimuneni; bayi mwakatiyaña woma wamesu amuntuku; muloña wuñaji wambala waNzambi.” Ansompeshi awaIsarela adiña nakumusompelaku Nzambi. Iku kwadiña hikukooleka chikupu!—Kuhituluka 1:16, 17.
Yuma Yalema yakuSpiritu
Yanukishu yaYehova Yalala
A Isarela chatachikiluwu lwendu lwendeluwu hadi yaaka 40 lwakuhita ‘mwisaña mwatiyishileña woma nankashi,’ Yehova hayilejeli chadi kuyilombolayi, kuyikiña nikuyakamenaku. Hela chochu, watwalekeluhu nakumwekesha nindi ateleleli kumukuhwelela nikukuhwelela nshimbi jindi. Kuhitila mukuzatisha chishimi chevu namwana nichishimi chakesi nawufuku, Yehova wayanukishileña aIsarela nindi wayikwashileña hampinji yayilombweleñayi hakuhita mwisaña datama. (Kuhit. 1:19; Kwid. 40:36-38) Cheñi nawa wayinkeleña niyakudya yakeñeleñawu. “Yuma yawu yakuvwala kukulaña nehi, nyendu yawu kunanaña nehi.” Eñañi, “hiyabulili chumaku.”—Nehe. 9:19-21.
JUNE 7-13
YUMA YALEMA YAMWIZU DANZAMBI | KUHITULUKA 3-4
“Nshimbi jaYehova Jajiwahi nawa jaWuñanji”
it-2 1140 ¶5
Kashinshi
Kudiza Izu daNzambi, Nshimbi jindi nikujizatisha kunateli kumukwasha muntu kwikala nakashinshi chikupu kubadika amudizishaña nawa wukwikala nakashinshi kubadika atushinakaji. (Ms 119:99, 100, 130; esekejenu Luk 2:46, 47.) Muloña wakwila maana nikashinshi, enzaña kuhitila mukwiluka yidika yaNzambi niwuñaji waloña; dichi neyi aIsarela adiña ashinshika adi kuyimonaña kudi nyuza yayinyeñumukili nawu, ‘hiyantu akweti maana nikashinshi.’ (Kuh 4:5-8; Ms 111:7, 8, 10; esekejenu 1An 2:3.) Muntu wakashinshi wakeñaña kwiluka kulema kwezu daNzambi, watalaña chidi chihandilu chindi nawa wamulombaña Nzambi nindi yamukwashi. (Ms 119:169) Wetejaña Izu daNzambi kushimata chikupu mumuchima windi (Mat 13:19-23), wadisonekaña mumukanda wamumuchima windi (Yis 3:3-6; 7:1-4), nawa wahelaña “njila jejima jakutwamba.” (Ms 119:104) Mwana kaNzambi niyena wamwekesheli nindi wadiña nakashinshi, chakaaniniyi kulomba nindi yabuli kufwa hamutondu wakuyandishila kulonda Nsona yahosha nawu watela kufwa yishikijewi.—Mat 26:51-54.
w99 11/1 20 ¶6-7
Neyi Chisambu Chisweja
Wahayamini nayuma yatiyiliyi nikumona, mwanta wamwakwili nindi: “Ambuñeyi emanaña mafuku ejima kumesu eyi nakutiya maana eyi amona kuwaha.” (1 Anyanta 10:4-8) Bayi neyi wahosheli nindi ambuña aSolomoni amona kuwaha muloña wakwila ashakamineña namuntu wahetaku. Ilaña, ambuña aSolomoni ayikiswilili muloña adiña nakutiya maana aSolomoni amwinkeliwu kudi Nzambi. Ambuña aYehova makonu atela kumwimbujola mwanta wamumbanda wakuSheba, watiyileña kuwaha namaana ekala naNleñi niMwanindi, Yesu Kristu!
Talenu cheñi mazu alema amulejeliwu Solomoni kudi mwanta wamumbanda: “Kisu kisu Yehova Nzambi yeyi.” (1 Anyanta 10:9) Mwamweni, welukili nindi Yehova diyi wamwinkeli Solomoni maana nimaheta. Chumichi chinesakani nachayikaniniyi Yehova aIsarela. Wayilejeli nindi: “Mwakahembaña [yidika yami]; muloña diwu maana enu nikashinshi kenu kumesu awantu ejima, chakatiyawu yidika iyi yejima, akahosha nawu, Chalala iwu muza weneni hiyantu akweti maana nakashinshi.”—Kuhituluka 4:5-7.
w07 8/1 29 ¶13
Komana ‘Mwaheta Kumesu aNzambi’?
Neyi Yehova yakiswila antu jindi, wayinkaña yuma yayiwahi mpinji yejima. (Yakoba 1:17) Chakutalilahu hampinji yayinkeliyi Yehova aIsarela iluña dakushakamamu, dadiña “ituña datuloña twamayeli nawuchi.” Hela chakwila ituña daEjipitu nidena adilumbulwili muniyi njila, ituña dayinkeliyi Yehova aIsarela dadiña dambukaku munjila yimu yalema nankashi. Mosi wayilejeli aIsarela nindi, dadiña “hiituña dakuhemba kudi Yehova Nzambi yeyi.” Mumazu amakwawu, adi kuheta muloña Yehova wadiña nakuyihemba. Hampinji yatwalekeluhu aIsarela kwikala ashinshika kudi Yehova, wayikiswilili chikupu nawa ahandileña chihandilu chachiwahi kubadika chanyuza yejima yayinyeñumukili. Mwalala nkisu yaYehova diyi “yaheteshaña”!—Kuchinda 16:13; Kuhituluka 4:5-8; 11:8-15.
Yuma Yalema yakuSpiritu
w04 9/15 25 ¶3
Yikuma Yamaneni Kufuma muMukanda waKuhituluka
4:15-20, 23, 24—Komana nshimbi yakukaanisha kusoña akishi akufwikija yatalisha mukwila nawu chatama kusoña nyevulu yidi yejima? Inehi. Iyi nshimbi yakaanishili hohu kusoña nyevulu yakudifukulaku, ‘kufukamina akishi nikuyikalakela.’ Nsona yakaanisha wanyi kusoña nyevulu nikuyipenta.—1 Anyanta 7:18, 25.
JUNE 14-20
YUMA YALEMA YAMWIZU DANZAMBI | KUHITULUKA 5-6
“Dizishenu Anyanenu Amukeñi Yehova”
w05 6/15 20 ¶11
Anvwali, Kwashenuña Chisaka Chenu naYuma Yakeñekaña
Muyinu nsañu, Nsona yaKuhituluka 6:5-7 anayizatishi kakavulu nankashi. Mwani bakulenu maBayibolu enu kulonda mutañi awa mavasi. Chatachi anashimuni nawu anvwali atela kusambila kudidizisha aweni kumukeña Yehova nikuhemba mazwindi munyichima yawu. Atela kudizaña Izu daNzambi, kutañaña Bayibolu mpinji yejima nikutoñojokahu chikupu kulonda ekali nakashinshi nawa amwovwahileña Yehova, yishina yindi ninshimbi jindi. Chikufumamu, akwiluka chalala chamuBayibolu chikuyiletesha kwikala namuzañalu nawa akumukeña Yehova. Akwikala nayuma yayivulu yayiwahi yakudizisha anyanawu.—Luka 6:45.
w07 5/15 15-16
Nateli Kuyidizisha Ñahi Anyanami?
Yuma yimwafwilaña kwila, yimwatoñojokaña, yimwalemesha niyimwakeña bayi neyi yamwekenaña muyuma yimwahoshaña hohuku ilaña niyimwelaña. (ARoma 2:21, 22) Anyana adizilaña kudi anvwali jawu kufuma tuhu kuwukeki. Anyana amonaña yuma yalemeshawu anvwali jawu nawa kakavulu diyuma yafwilañawu muchihandilu chawu. Neyi mwalala mwamukeña Yehova anyanenu akwiluka. Chakutalilahu, akwiluka nawu mwalemesha kutaña Bayibolu nikudiza. Akwiluka nawu mwatwamijañaku Wanta waNzambi muchihandilu chenu. (Matewu 6:33) Neyi muyaña nakupompa nikushimwina nsañu yaWanta mpinji yejima, anyanenu akumonaña nawu mwalemesha nyidimu yaYehova.—Matewu 28:19, 20; AHeberu 10:24, 25.
w05 6/15 21 ¶14
Anvwali, Kwashenuña Chisaka Chenu naYuma Yakeñekaña
Neyi chahosha Kuhituluka 6:7, kudi mpinji yashiyashana yimwatela kuhanjekelamu enu anvwali nawanyanenu yuma yakuspiritu. Hela munakwenda, munakuzata nyidimu yahetala, hela neyi munakunooka, munateli kuwana mpinji yakuloñeshelamu anyanenu yakuda yakuspiritu. Hela chochu, himwatela “kuyikanjikijaña” anyanenu kulonda eluki chalala chamuBayiboluku. Ilaña mwatela kuhanjekaña hayuma yakuspiritu yinateli kuyikolesha. Chakutalilahu, muAwake! mwekala yibaaba yayivulu yahosha hansañu yamboka-mboka. Yibaaba yamuchidiwu yinateli kuyiletesha kutachika kuhanjeka hayileñaleña yaYehova yidi neyi anyama, maluña amawahi ekala mukaayi kejima, niyuma yayivulu yadiluñishañawu antu. Kuhanjeka hayuma yamuchidiwu kunateli kuyisañumuna anyana kukeña kutaña nyikanda yayivulu yaloñeshawu kudi nduñu wamaana nikashinshi.—Matewu 24:45-47.
Yuma Yalema yakuSpiritu
Yehova Chamwekesheliyi Kukeña niWuñanji Kudi aIsarela
Yuma yitunateli kudizilaku: Bayi neyi Yehova wamonaña muntu kumesu hohuku, ilaña wamonaña mukachi kamuchima wetu. (1 Sam. 16:7) Yuma yejima yitwatoñojokaña niyitwelaña yidi nzekesi kumesu indi. Wamonaña yuma yayiwahi mudi etu nawa watukoleshaña kutwalekahu kwila yuma yayiwahi. Ilaña wakeñaña nindi twilukeña nikutondolwela yitoñojoka yatama henohu kanda tukoñi yuma yatama.—2 Kushi. 16:9; Mat. 5:27-30.
JUNE 21-27
YUMA YALEMA YAMWIZU DANZAMBI | KUHITULUKA 7-8
“Kusumbwañana Nawu Nehi”
Muloñadi Nzambi Chakeñelañayi Nindi Akwakudifukula Indi Asumbuleña Hela Kusumbuka Mudi Mwanta Hohu?
Yehova welukili chikupu nindi Satana wakeñeleña kuluwañesha antu Jindi kulonda adifukuleña kudi anzambi akutwamba. Dichi Nzambi wayisoñamishili nindi akwakudifukula akutwamba akenda “kakubalumwina mwaneyi weyala hakaleka kunlondela, hakapesha akishi.” Adi kujimbesha yuma yayivulu. Neyi muza waIsarela wetejeli kudifukula kudi anzambi akutwamba, adi kuleka kuyikwasha nikuyikiña kudi Nzambi, muloña adi kuyikabishaña kudi ayilumbu jawu. Hanu dinu, muniwu muza mwadi kufuma ñahi Mesiya akaniniwu? Mwamweni, kudi yuma yamuletesheli Satana yaluwañeshi aIsarela kulonda asumbwañaneña nawantu abula kwitiya.
Kusumbula Hela Kusumbukila “Mudi Mwanta Hohu,” Kuchidi Kwetejewa?
Yehova washimuna Mwizu dindi nshimbi yakwila nawu kusumbula hela kusumbuka chiña mudi Mwanta hohu. Muloñadi? Muloña weluka yuma yinateli kuyitisha antu jindi kuwaha. Bayi neyi wakeñaña hohu kukiña ambuñindi kukala kwafumaña mukufuukulahu yuma yatamaku, ilaña wakeñaña nindi ekaleña namuzañalu. Mumafuku aNehemiya, chineli aYudeya amavulu asumbwileña ambanda akumatuña acheñi abulileña kudifukula kudi Yehova, Nehemiya wayesekejeli nachakutalilahu chatama chaSolomoni. Hela chakwila Solomoni “amukeñeli kudi Nzambi yindi, . . . amuvulumwishili kudi ambanda akwacheñi.” (Nehe. 13:23-26) Hakwila nawu ambuñindi ashakami chiwahi, Nzambi watwinka nshimbi yakusumbula hela kusumbuka kudi akwakudifukula alala hohu. (Mas. 19:7-10; Isa. 48:17, 18) AkwaKristu alala amusakililaña Nzambi chayakamenañayi nakukeña nawa ashindamena hanshimbi jindi. Amwiluka nawu diyi Mwanta Wakuleña Kwejima kuhitila mukumwovwahila neyi Nleñi yawu.—Yish. 1:5.
Ilukenu Antu Imwadikundaña Nawu Munanu Mafuku Akukuminina
Kwiluka antu akudikunda nawu hichuma chalema kudi akwaKristu ajiki anakukeña kusumbula hela kusumbuka. Izu daNzambi datufumbaña nawu: “Bayi mudibombaña nawabula kwitiya mumpanda yoyimuku. Kuloña nakuluwa akutwesha kulondañana? Hela chejeji namwidima akutwesha kutiyañana?” (2 Kor. 6:14) Bayibolu yafumbaña ambuña aNzambi anakukeña kwiñila muwulu nawu atela kusumbula hela kusumbukila ‘chiña mudi Mwanta hohu,’ dikwila nawu, kusumbula hela kusumbuka chiña namuntu wadihana nawa mukwakudifukula waYehova wapapatishewa walondelaña chatañishaña Bayibolu. (1 Kor. 7:39) Neyi yasumbula hela yasumbuka namukwawu mukwakwitiya, mukwaKristu wakwataña wulunda namuntu wadihana kudi Yehova nawa wukumukwasha kuhemba kashinshi kindi.
Yuma Yalema yakuSpiritu
w04 2/1 13 ¶4
Yehova Watwinkaña Yuma Yitwakeñaña
Neyi tunakulomba netu atwinki yakuda yahefuku twatela nikwanuka kulomba netu atwinki yakuda yakuspiritu. Hela chakwila washakamini nanzala mpinji yayilehi, Yesu wakaanini kumweseka kudi Satana nindi yabalumuni malola ekali mankendi, wahosheli nindi: “Chasonekewa nawu: ‘Muntu hatela kuhanda namankendi hohuku, ilaña namazu ejima afumaña mukanwa kaYehova.’” (Matewu 4:4) Aha Yesu wahosheli mazu akaprofwetu Mosi, wayilejeli aIsarela nindi: “[Yehova] wakulekeli nanzala, wakudiishili manina iwabulili kwilukeyi, abulili kwiluka hela ankakulula jeyi, kulonda akwilukishi nawu muntu hahandaña nayakudya hohuku, muntu wahandaña chiña nayuma yejima yafumaña mukanwa kaYehova.” (Kuhituluka 8:3) Njila mwayinkeleliyi Yehova aIsarela manina bayi neyi yayikwashili kwikala nayakuda yakumujimba hohuku ilaña adizililiku niyuma yakuspiritu. Chuma chimu chelileñawu, ayileña “nakukuñula posu yawu yefuku dimu hefuku hefuku.” Neyi akuñula yakuda yayivulu, yashalileñahu yanunkileña nawa yelileña mavunyi. (Kwidika 16:4, 20) Chumichi chamwekeneña wanyi hefuku damu 6 muloña akuñwileña yayivula yatela nikuzatishawu hefuku daSabata. (Kwidika 16:5, 23, 24) Dichi manina ayikwashileña kwiluka nawu atela kwikala ovwahila nawa chihandilu chawu hichashindamena hohu yakudaku “chiña nayuma yejima yafumaña mukanwa kaYehova.”
JUNE 28–JULY 4
YUMA YALEMA YAMWIZU DANZAMBI | KUHITULUKA 9-10
“Yehova Nzambi Yenu Nakeñi Chumanyi Kudenu?”
Yumanyi Yinakukeñayi Yehova Nindi Twileña?
Chumanyi chinateli kutusañumuna kumwovwahila Nzambi chakufuma hamuchima? Mosi wahosheli chikuma chimu nindi: “Chiña mumutiyaña Yehova Nzambi yenu woma.” (Vasi 12) Bayi neyi hichuma chatama chakutiyisha woma muloña wayuma yatama yinateli kufumamuku, ilaña hichuma chachiwahi chakumulemeshelamu Nzambi ninshimbi jindi. Neyi twiluka yuma yayiwahi yafumaña kudi Nzambi, tukutondolwelaña kumuneñesha.
Chumanyi chacheni chikutuletesha kumwovwahila Nzambi? Mosi wahosheli nindi: “[Mukeñenu], mumukalakeli Yehova Nzambi yenu nanyichima yenu yejima, nawumi wenu wejima.” (Vasi 12) Kumukeña Nzambi mwabombela yuma yayivulu. Mukanda wumu walumbulula nawu: “Izu dachiHeberu dakutiya, mpinji yikwawu datalisha kuyuma yafumaña muyuma yitwelaña.” Mukanda wowumu wahosha cheñi nawu kumukeña Nzambi kwatalisha “mukwila yuma yamwekeshaña nawu twamukeña.” Munjila yikwawu, neyi twamukeña chikupu Nzambi, tukwilaña yuma yikumutiyishaña kuwaha.—Yishimu 27:11.
Yumanyi Yinakukeñayi Yehova nindi Twileña?
Neyi twovwahilaña chikupu akatukiswila. Mosi wasonekeli nindi: “Mwovwahili . . . munukuyileja lelu kulonda mumoni kuwaha.” (Vasi 13) Mwamweni, nshimbi jejima jatulejañayi Yehova, yuma yejima yatulejañayi yatukwashaña. Ichi chuma chinateli kutwesheka ñahi? Bayibolu yahosha nawu, “Nzambi hikukeña.” (1 Yowanu 4:8) Dichi, watwinkaña iji nshimbi kulonda jitukwasheña muchihandilu chetu. (Isaya 48:17) Kwila mwejima mwatulejañayi Yehova kukutukwasha kubula kuneñaña makonu nawa kukatuletesha kutambwila nkisu yahaya nyaaka hakayuulaña Wanta windi.
cl 16 ¶2
Komana Munateli ‘Kuswina Kwakwihi naNzambi’?
Abarahama himuntu wumu waswinini kwakwihi naNzambi. Yehova wamuteneni iwu nkakulula nindi “ibwambu dami.” (Isaya 41:8) Yehova wamumweneña Abarahama nindi hibwambu dindi chikupu. Abarahama wadiña nawubwambu wawuwahi naNzambi muloña “wamukuhweleleli Yehova.” (Yakoba 2:23) Nimakonu, Yehova ‘watiyaña kuwaha’ antu amukalakelaña muloña wakumukeña. (Kuhituluka 10:15) Izu dindi datukoleshaña nawu: “Swinenu kwakwihi naNzambi, niyena wukuswina kwakwihi nanenu.” (Yakoba 4:8) Munawa mazu mwekala mutambi nichikaninu.
Yuma Yalema yakuSpiritu
it-1 103
Anaki
Adiña muza wawantu ataluka chikupu ashakamineña kujimpidi jamuKenani nimumaluña akuyikumu yatuloña, yekala kuchidilu. Mpinji yimu Ahimani, Sheshayi niTalimayi, amayala asatu aya mpuhu awaAnakim, ayili nakushakama kuHeberoni. (Kuc 13:22) Akwakwendesha ituña 12 awaHeberu asambilili kuyimona aAnaki, nawa akakwendesha ituña 10 ashimwini nsañu yafwishili antu mutentu, yakwila nawu awa amayala adiña anyana kawaNefwili afwili hadibaji, nawa neyi kuyesekeja nawaHeberu, aHeberu adiña neyi “ampasu.” (Kuc 13:28-33; Kuh 1:28) Chelili amoni awa antu, chayiletesheli kuyesekeja nawamayala ataluka awaEmi nawaRefwa. Hadaha ñovu yadiñawu nayu diyaletesheli kuhosha iyi nhoshelu yankinji yakwila nawu: “Watweshaña kwimana nawanyana kaAnaki hinyi?”—Kuh 2:10, 11, 20, 21; 9:1-3.