Munafumi Nsañu Yakuzatisha muChihandilu niMudimu Wanetu AkwaKristu Mukanda waKupompa
MARCH 7-13
YUMA YALEMA YAMWIZU DANZAMBI | 1 SAMWELI 12-13
“Kudinka Wanta Kwaletaña Hohu Kusawuka”
w00 8/1 13 ¶17
Kudinka Wanta Kwaletaña Hohu Kusawuka
Neyi mubula kutoñojokahu chiwahi, yuma yeliliyi Sawulu yikumwekana neyi yaloña. Kafwampi, ambuña aNzambi adiña “mukukala kweneni,” “yuma yayitaminini chikupu” nawa azaalileña muloña wakukala kuyamweneñawu. (1 Samweli 13:6, 7) Mwamweni, chatama wanyi kutachikilahu kwila yuma yikutukwasha neyi chakwila tukufumpa wanyi nshimbi jaNzambi. Anukenu nenu, Yehova watalaña mumuchima wamuntu nawa welukaña yuma yitwafwilaña. (1 Samweli 16:7) Dichi, watela wamweni yuma yadiña mumuchima waSawulu yafwilileñayi kwila yabula kusonekawu muBayibolu. Chakutalilahu, hadaha Yehova wamweni nindi Sawulu nakañanyi kudiwunjika muloña wakudivwimba. Hadaha Sawulu watiyili kutama nindi—chineli yena himwanta waIsarela—wateleleli wanyi kuhembelela kashinakaji nawa kaprofwetu wabulileña kuhemba mpinji! Hela chochu, Sawulu chamweniyi nindi Samweli nalabi kwinza chamuletesheli kwila yuma yabulili kumwitejawu nakufumpa nshimbi jamwinkeliwu. Chumanyi chafuminimu? Samweli watiyili kuwaha wanyi nayuma yeliliyi Sawulu. Dichi, wamuzuwilili Sawulu, nindi: “Wanta weyi wukushimbula wanyi . . . muloña eyi wunovwahili mwakulejeliyi Yehova wanyi.” (1 Samweli 13:13, 14) Komana mwalala, kudinka wanta kwaletaña hohu kusawuka.
Yehova Walemesha Kwovwahila Kwenu
Nsañu yamuBayibolu yaMwanta Sawulu yakonkomwenaña hakulema kwakwovwahila. Sawulu watachikili kuyula neyi mwanta wadizoza nawa walumbuluka, ‘wadimweni yamweni kukeha.’ Mukuhita kwampinji, kudisamba niyitoñojoka yamukunkulwayi yatachikili kuyula kufuukula kwindi. (1 Samweli 10:21, 22; 15:17) Mpinji yimu, Sawulu wateleleli kwasa njita nawaFwilistinu. Samweli wamulejeli mwanta nindi yamuhembeleli kulonda chashikayi yahani mulambu kudi Yehova nawa yamuleji nimwakwilila. Ilaña, Samweli henjili hampinji yadiña nakumutalilawuku, dichi antu atachikili kumwañala. Chamweniyi ichi, Sawulu ‘waheni mulambu wakushita.’ Chumichi chamuneñesheli Yehova. Cheliliyi Samweli nashiki dehi, mwanta watachikili kudibaba, nakuhosha nindi muloña Samweli washimbwili, ‘dichamunkanjikijili’ kulambula mulambu wakushita kulonda yatambwili wuselewa waYehova. Kuhana mulambu dichuma chaswejeli kulema kudi Mwanta Sawulu kubadika kwovwahila nshimbi yamulejeliwu yakuhembelela Samweli kwinza nakuhana wuna mulambu. Samweli wamulejeli nindi: “Wuneli chuma chawusupi; hiwunahembi mwakulejeliyi Yehova Nzambi yeyuku.” Kudikaña naYehova kwamukojejeli Sawulu kujimbesha wanta windi.—1 Samweli 10:8; 13:5-13.
Yuma Yalema yakuSpiritu
Komana Mukulondela Wunlomboli Wawuwahi waYehova?
Hadaha aIsarela atoñojokeli nawu anateli kukuhwelela mwanta wawu kubadika Yehova. Neyi dichatoñojokeleñawu, dikwila nawu alondeleleña yuma “yamukunkulwayi.” Hamuloña wakukuhwelela chuma chamukunkulwayi, chadiña chaswayi kutachika kukuhwelela yuma yayivulu “yamukunkulwayi” yafumineña kudi Satana. Mwanta wawu wadi kuyileñela atachiki kupesha. Antu adifukulaña kudi akishi atoñojokaña nawu anateli kukuhwelela anzambi akusoña hela amalola muloña anateli kuyimona nikuyikwasha. Hiyakuhwelelaña Nzambi wabulaña kumwekana Yehova, waleñeli yuma yejimaku. Ilaña kapostolu Pawulu wahosheli nindi akishi “hichuma munu mwishinaku.” (1 Kor. 8:4) Hiyanateli kumona, kutiya, kuhosha, hela kwila chidi chejimaku. Munateli kuyimona nikuyikwasha, ilaña neyi mutachika kudifukula kudi mukishi, dikwila nawu munakulondela chuma chamukunkulwayi, chakadi nimuchaya nawa munateli kufuma jakala.—Mas. 115:4-8.
MARCH 14-20
YUMA YALEMA YAMWIZU DANZAMBI | 1 SAMWELI 14-15
“Kwovwahila Kwabadika Mulambu”
Yehova Walemesha Kwovwahila Kwenu
Hamuloña wakwila diyi Nleñi, Yehova wukweti yuma yejima yitukweti yakumujimba. Hela chochu, kudihu chuma chitwatela kumwinka? Eña, twatela kumwinka chuma chasweja kulema. Chumanyi? Ñakwilu tukuyiwana mukufumba kunalondeluhu: “Eyi mwanami, ikalaku mukwamaana, wutiyishaña muchima wami kuwaha, kulonda nakatweshi kwakula muntu wukunsawula.” (Yishimu 27:11) Twatela kumwovwahila Nzambi. Hela chakwila yihandilu niyisemwa yetu yashiyashana, kuhitila mukwovwahila, muntu himuntu nateli kwakula mazu akasawuntu ahosheliyi Satana Diyabolu nindi antu neyi ayeseka hiyanateli kutwalekahu kwikala akashinshi kudi Nzambuku. Kwenoku kukooleka kutukweti!
it-2 521 ¶2
Kwovwahila
Kwovwahila kwalema nankashi, hitunateli kwikala nawuselewa waNzambi neyi tubulaña kwovwahilaku. Samweli wamulejeli Mwanta Sawulu nindi: “Komana Yehova watiyaña kuwaha nanyilambu yakushita ninanyilambu yikwawu kubadika kwovwahila [izu dafuma kwizu dasha·maʽʹ] mwizu daYehova tahindi? Tiyaña! Kwovwahila” [muchiHeberu, kutiyilila] “kwabadika mulambu, nawa kutiyilila nakanañachima kwabadika anyikoku ayizamba anuna.” (1Sa 15:22) Kubula kwovwahila hikukaana izu daYehova, hela kumwekesha nawu wunakuhweleli wanyi munowu mazu niWayisonekeli. Dichi muntu wabulaña kwovwahila hohamu namuntu wahoñaña hela wadifukulaña kudi ankishi. (1Sa 15:23; esekejenu Rom 6:16.) Kukumina dakwiteja hohu munakulejiwu chakadi kwilamu chamukunkulwayi; kubula kwila mwakulejawu chamwekeshaña nawu wunakuhweleli wanyi hela wunamudiwuli owu wakuleja. (Mat 21:28-32) Antu akuminaña hohu dakutiya nikwiteja chalala ilaña kwila mwaya izu nehi, anakudidimba awenawu nayitoñojoka yakutwamba nawa hiyakatambwila nkisuku. (Yak 1:22-25) Mwana kaNzambi washimwini nindi niantu elaña yuma yadifwana nayatulejeliyi nindi twileña, ilaña ayilaña munjila yatama hela nayitoñojoka yatama, hiyakeñila muWantaku ilaña wakayikaana.—Mat 7:15-23.
Yuma Yalema yakuSpiritu
it-1 493
Wushona
Kufumpa nshimbi jaNzambi kuhitila mukwiteja ikakeja dawakwetu kulonda tutiyili antu wushona mwafumaña jomisha mbaña. Dichuma chamumwekeneni Mwanta Sawulu. Mpinji yashikili yakujilumuna aAmaleki neyi chayilejeliyi Nzambi, aAmaleki diwu adiña atachi kulukuka aIsarela hanyima yakufuma muEjipitu. Nawa aIsarela hiyayivulokeli aAmalekiku. Sawulu amulejeli nawu bayi yayitiyila wushonaku. Chatiyililiyi mwamulejeliwu kudi antu jindi, chamuletesheli kubula kwovwahila nshimbi jaYehova jejima. Dichi, Yehova wamukaanini Sawulu nawa wamutambwili wanta. (1Sa 15:2-24) Neyi muntu yekala namuchima wakwovwahila nshimbi jaYehova nawa yekala washinshika kudi Yena chikumukwasha kubula kuluwañesha, neyi cheliliyi Sawulu, nikujimbesha wuselewa waNzambi.
MARCH 21-27
YUMA YALEMA YAMWIZU DANZAMBI | 1 SAMWELI 16-17
“Yehova Diyomweni Njita”
“Yehova Diyomweni Njita”
Davidi wamulejeli Sawulu chajahiliyi mutupa nibera. Komana wadiña nakudisamba? Inehi. Davidi welukili chayijahiliyi. Wahosheli nindi: “Yehova wampulwishili kwikabu damutupa nikwikabu dabera diyi nawa wukumpulwisha nikudi yeniwu kaFwilistinu.” Nkumininaku Sawulu wetejeli nakumwila nindi: “Yaña Yehova ekali naneyi.”—1 Samweli 17:37.
Komana ninenu mukwikala nachikuhwelelu neyi chaDavidi? Ilukenu nenu, chikuhwelelu chaDavidi hichadiña chakufwikijaku. Wadiña nachikuhwelelu mudi Nzambi yindi muloña wamaana niyuma yamweniyi. Wamwilukili Yehova nindi himuKwakukiña wukweti kukeña nawa Mukwakuhemba yikaninu. Neyi tunakukeña kwikala nachikuhwelelu chamuchidiwu, twatela kutwalekahu kudiza hadi Nzambi mwini Bayibolu. Neyi tuzatishaña yuma yitunakudiza, mwakafuma yuma yayiwahi yikakolesha chikuhwelelu chetu.—Aheberu 11:1.
“Yehova Diyomweni Njita”
Nimakonu, mazu ahosheliyi Davidi amwekeshaña nawu wadiña nachikuhwelelu chikupu. Fwikijenu kansi weyala nakumwila Goliyati nindi: “Eyi wunenzi kudami nampoku yakabali neyoña nankebu; ilaña ami nenzi kudeyi mwijina daYehova wamazaza Nzambi yanjita jawaIsarela jiwunaswidikiji.” Davidi welukili nindi ñovu jawantu niyitwa yanjita jamukunkulwayi. Cheñi welukili nindi Goliyati wamusawili Yehova Nzambi nawa Yehova wukwilahu chuma. Kwesekeja nachahosheliyi Davidi nindi, “hinjita yambala yaYehova.”—1 Samweli 17:45-47.
Davidi welukili kutoha kwaGoliyati niyitwa yindi. Ilaña yumiyi hiyamuleñeleli yatiyi womaku. Helili neyi cheliliyi Sawulu nawamashidika indiku. Davidi hadesekejeli naGoliyatiku. Ilaña, wamwesekejeli Goliyati naYehova. Hela chakwila wadiña wamulehi mamita 2.9 kubadika antu ejima, komana wadiña neyi Mwanta wakuleña kwejima? Kwakulehi, kufwana antu ejima wadiña hohu neyi kabubu, haniyi mpinji Yehova wafuukwilihu kumukisañana.
“Yehova Diyomweni Njita”
Makonu, ambuña aNzambi hiyalwaña njita yamuchidiwuku. Iyi mpinji yahita dehi. (Matewu 26:52) Hela chochu, twatela kwimbujola chikuhwelelu chaDavidi. Kufwana Davidi, twatela kumumona Yehova netu chalala wudi kwoku, netu diyi Nzambi hohu itwatela kukalakela nikukakela. Mpinji yikwawu, tunateli kumona kukala kwetu netu tukutwesha wanyi kukushinda, ilaña kukala kwetu kwantesha neyi tukwesekeja nañovu yaYehova yabadika. Neyi tumutonda Yehova kwikala Nzambi yetu nawa tumukuhwelela neyi cheliliyi Davidi, kwosi kukala kukatutiyisha womaku. Kwosi chuma chatela kukañanyayi Yehova kushindaku!
Yuma Yalema yakuSpiritu
it-2 871-872
Sawulu
Hanyima yachumichi nawa hanyima yakwila Davidi anamuwayishi dehi kwikala mwanta waIsarela spiritu yaYehova yamufumini Sawulu. Kufuma tuhu haniyi mpinji “spiritu yatama yafumini kudi Yehova yamukabishileña.” Yehova chafumishiliyi spiritu yindi hadi Sawulu, wetejeli spiritu yatama kwinza hadi Sawulu, yamuletesheli Sawulu kubula kwikala nakuwunda kwamuyitoñojoka, cheñi yamukojejeli kutiya, kutoñojoka nikufwikija yuma yatama. Sawulu chabuliliyi kumwovwahila Yehova chamwekesheli nawu wafwilileña yuma yatama yadiña muyitoñojoka nimumuchima windi, chumichi chaletesheli spiritu yaNzambi kubula kumwinka ñovu yakukañesha spiritu yatama. Hela chochu, chineli Yehova diyi wetejeli spiritu yatama kwinza hadi Sawulu nakumukabisha, dichaletesheli ayiteneña nawu “spiritu yatama yafumini kudi Yehova,” nawa dihafumini añamba jindi kuyitena nawu ‘spiritu yatama yaNzambi.’ Chamulejeliwu Sawulu kudi ñamba yindi nawu Davidi weluka kwimba, Sawulu watemesheli antu nakumuleta Davidi kulonda yamwimbileña nikumuwundisha neyi “spiritu yatama” yitachika kumukabisha.—1Sa 16:14-23; 17:15.
MARCH 28–APRIL 3
YUMA YALEMA YAMWIZU DANZAMBI | 1 SAMWELI 18-19
“Ikalenu Adizoza Neyi Kudi Yuma Yayiwahi Yimuneli”
w04 4/1 15 ¶4
Shindamenenu Hadi Spiritu yaNzambi Neyi Yuma Muchihandilu Yinahimpi
Katataka iwu mukwenzi kabiña wukuya mpuhu mwituña dejima. Amutambikili nawu yamukalakeleña mwanta nikumwimbila tumina. Wamujahili ishidika Goliyati, chilombu watiyishileña amashidika aIsarela añovu woma. Chamutemesheliwu hamu nawamayala amakwawu kunjita, Davidi wayishindili aFilisitinu. Antu amukeñeli. Embili tumina twakumushimeka. kunyima, mukakumuleja Mwanta Sawulu maana wamuhamekeli Davidi nindi bayi neyi wadiña ‘weluka kwimba’ tudada hohuku ilaña cheñi “wahamuka, himushidika wañovu, . . . nateli kuhosha chiwahi, [nawa] walubanji.”—1 Samweli 16:18; 17:23, 24, 45-51; 18:5-7.
Shinshikenuña Chekalawu Antu
Antu amakwawu adivwimbaña muloña amwekanaña lubanji, atiyakana, akweti wuswa wakwimba tumina, akuluka yitembi muyuma yimu hela yifulu yamaneni yikwetiwu. Davidi wadiña nayuma yejimiyi, ilaña wadiña wadizoza muchihandilu chindi chejima. Chelili yamujahi Goliyati, amwinkeli mwana kaMwanta Sawulu kulonda yekali ñodindi, Davidi wahosheli nindi: “Yaminyi ntahi hela awusoku wami hela chisaka chatata yami muIsarela hiyanyi ntahi mwaka nimoni nijakwikala Sambanza [muku wamwanta]?” (1 Sam. 18:18) Yumanyi yaletesheli Davidi kwikala wadizoza? Davidi wadiña nayilwilu, wuswa niyifulu muloña Nzambi ‘wadizozeli’ nakumutiyilila. (Mas. 113:5-8) Davidi welukili nindi yuma yejima yadiñayi nayu yafumini kudi Yehova.—Esekejenu 1 Akorinda 4:7.
Kufwana Davidi, antu jaYehova makonu azataña nañovu kulonda amwekesheña kudizoza. Twahayamaña chikupu kwiluka netu Yehova, Muntu wabadika kwiwulu nihamaseki, wukweti ichi chilwilu chakudizoza. (Mas. 18:35) Twalondelaña kufumba kwonenawu kwakwila nawu: “Vwalenu muchima wawushona, luwi, kudizoza, kwovwaha nikudiwunjika.” (Kol. 3:12) Tweluka cheñi netu kukeña “hikwadivwimbañaku, hikwadinkaña wantaku.” (1 Kor. 13:4) Neyi tumwekesha kudizoza, antu akuswina kudi Yehova. Neyi chamukokañawu iyala kudi ñodindi chakadi mazu ilaña muyilwilu, muntu niyena nateli kuswina kudi Nzambi nakudizoza kwamwekeshaña antu jindi.—1 Pet. 3:1.
Yuma Yalema yakuSpiritu
it-2 695-696
Kaprofwetu
Hela chakwila atuprofwetu ayitondeleña naspiritu yaYehova, hichinayi mukwila nawu mpinji yejima ahosheleña mazu onenewaku. Ilaña, spiritu yaNzambi ‘yenjileña’ hadi wena mpinji yinakeñiyi Nzambi, nakusolola nsañu yatela kushimunawu. (Eze 11:4, 5; Mik 3:8) Spiritu yaNzambi yayisañumwineña kulonda atachiki kuhosha. (1Sa 10:10; Yer 20:9; Amo 3:8) Bayi neyi elileña hohu yuma yakuhayamishaku ilaña mazu ahosheleñawu nimunjila muyayihosheleleñawu nakuhamuka nineyena yadiña yakuhayamisha. Chumichi chinalumbululi muchatalisha neyi muntu yatachika “kwila neyi atuprofwetu.” (1Sa 10:6-11; 19:20-24; Yer 29:24-32; esekejenu Yil 2:4, 12-17; 6:15; 7:55.) Kashinshi nikuhamuka kuyamwekesheleñawu mumudimu wawu hadaha kwayiletesheleña kwila yuma neyi chiyabulileña kwilawu mpinji yejima, mpinji yikwawu elileña neyi azaluka, amakwawu elileña neyi cheliliyi kaprofwetu wayili kudi akulumpi jamashidika nakumuwayisha Yehu. Ilaña, akulumpi jamashidika chelukiliwu nawu iwu muntu wadiña kaprofwetu, etejeli nsañu yahosheliyi. (2An 9:1-13; esekejenu Yil 26:24, 25.) Sawulu chalondeleliyi kwatemukililiyi Davidi, amuletesheli ‘kwila neyi kaprofwetu,’ wavuulili yakuvwala nawa wakaamini “nzekesi mwaana niwufuku wejima,” chakadi nikujina haniyi mpinji dihatemukiliyi Davidi. (1Sa 19:18–20:1) Hichinayi mukwila nawu kakavulu atuprofwetu adiña nakuvuula yakuvwalaku, muloña Bayibolu dichiyahosha wanyi. Kapampa kakwawu kayedi kashimunawu muBayibolu, kudi yuma yaletesheli atuprofwetu endi nzekesi, chadiña chinjikijilu chayuma yikamwekana kwesekeja nawuprofwetu. (Isa 20:2-4; Mik 1:8-11) Sawulu chakaminiyi nzekesi—tuneluki wanyi neyi chakwila akeñeleña yeluki nindi himuntu hohu, anamutambuli yakuvwala yindi yawanta, wukweti wanyi ñovu yakukañesha wuswa niñovu jaYehova, indi kwiji muloña wayuma yikwawu.
APRIL 4-10
YUMA YALEMA YAMWIZU DANZAMBI | 1 SAMWELI 20-22
“Chakwikala Ibwambu Wamuwahi”
Koleshenu Wubwambu Wenu Henohu Kukuma Kanda
Makonu, amanakwetu niahela anakumona kukala kwamboka-mboka. Chakutalilahu, amavulu akabakanaña nakukala kwaletaña antu hela nawubanji wadimwekenaña. Neyi chumichi chinamwekani, twatela kuyitambwila awa amabwambu mumatala etu. Amakwawu anateli kuyikwasha munsañu yamali. Ilaña wejima wetu twatela kuyilombelaku kudi Yehova kulonda yayikwashi. Chinateli kutukalila kuwana mazu akuhosha hela chuma chakwila namanakwetu hela muhela wunaneñi. Ilaña wejima wetu tunateli kuyikwasha. Chakutalilahu, twatela kwikalaku nampinji yakuhanjekaña nawamabwambu jetu. Twatela kuyimwekeshela luwi neyi anakuhosha. Nawa tunateli cheñi nikuhanjeka nawu nsona yakukundeja yitwakeñesha. (Isa. 50:4) Chuma chalema hikwikala nampinji yakuhanjeka nawu neyi anakuyikeña.—Tañenu Yishimu 17:17.
Endenuña muNjila jaYehova
Nzambi wakeñaña twikali amabwambu jindi ashinshika. (Yishimu 17:17) Jonatani mwana kamwanta Sawulu wekalili ibwambu daDavidi. Jonatani chatiyiliyi nindi Davidi najahi Goliyati, ‘Muchima waJonatani wadikasili namuchima waDavidi hamu mbe, Jonatani hakumukeña neyi chadikeñeliyi yomweni.’ (1 Samweli 18:1, 3) Hampinji yelili Sawulu yakeñi kujaha Davidi, Jonatani wamusoñamishili Davidi. Chelili David natemuki dehi, Jonatani wadiwanini naDavidi akwata nichitiyañenu. Sawulu wakeñeleña kumujaha Jonatani muloña wahosheli naDavidi, ilaña mwayedi wawu ahumañeni cheñi nakukolesha wubwambu wawu. (1 Samweli 20:24-41) Hampinji yadiwenenuwu kakukumishaku, Jonatani wamukolesheli Davidi “mudi Nzambi.”—1 Samweli 23:16-18.
Kuhemba Wubwambu Mukanu Kaayi Mwabula Kukeñañanawu Antu
Ikalenu ashinshika. Solomoni wasonekeli nindi: “Ibwambu damuntu wamukeñaña mukwawu mwahita mpinji jejima; mana kwamuntu wavwalikila yakala.” (Yishimu 17:17) Hakusoneka awa mazu, Solomoni watela watoñojokeleña hawubwambu wadiluñishiliyi tata yindi Davidi naJonatani. (1 Samweli 18:1) Mwanta Sawulu wakeñeleña mwanindi Jonatani kuswana hetanda daIsarela. Ilaña Jonatani wetejeli walala wakwila nawu Yehova wamutondeli Davidi kwikala mwanta. Kwambukaku naSawulu, Jonatani hamutiyilili Davidi ichimaku. Hatiyili kutama chamuhamekeleñawu Daviduku, hela kwiteja nsañu yakutwamba yatandishiliyi Sawulu hadi Daviduku. (1 Samweli 20:24-34) Komana twekala neyi Jonatani? Neyi amabwambu jetu anayinki mudimu muchipompelu, komana twatiyaña kuwaha? Neyi akweti kukala, komana twayikundejaña nikuyikwasha? Neyi atuleja nsañu yakutwamba hadi ibwambu detu, komana twanyakalaña kwiteja? Kufwana Jonatani, komana twamuhakwilañaku ibwambu detu?
Yuma Yalema yakuSpiritu
w05 3/15 24 ¶4
Yikuma Yamaneni Kufuma muMukanda wa 1 Samweli
21:12, 13. Yehova wakeñaña nindi tuzatisheña yitoñojoka yetu niñovu yetu kulonda tuwani njila yakumanishilamu kukala kutwamonaña muchihandilu chetu. Watwinka Izu dindi donenewa, datukwashaña kwikala namaana, niwuswa wakutoñojoka chiwahi muyuma yitunakufuukula. (Yishimu 1:4) Watwinka cheñi akulumpi muchipompelu chawakwaKristu atukwashaña.
APRIL 18-24
YUMA YALEMA YAMWIZU DANZAMBI | 1 SAMWELI 23-24
“Muchiñililenuña Yehova Nakudiwunjika”
w04 4/1 16 ¶8
Shindamenenu Hadi Spiritu yaNzambi Neyi Yuma Muchihandilu Yinahimpi
Davidi wakaanini kumwila Sawulu chatama. Muloña wachikuhwelelu nikudiwunjika, welukili nindi Yehova wukumanisha kukala kwamweneñayi. Mwanta chafuminiyi mwiyeñu, Davidi wamubidikili nindi: “Yehova asompi hakachi kaneyi nanami, nawa Yehova antendi kudi eyi, ilaña chikasa chami hichakakwimakena eyiku.” (1 Samweli 24:12) Hela welukili nindi Sawulu waluwañesheli, Davidi hamujahili Sawuluku; hamuhosheli kasawuntu hela kuhosha yuma yatama hadi yenaku. Kakavulu, Davidi wadiyuulileña yomweni kulonda yabuli kumujaha Sawulu. Muloña welukili nindi Yehova diyi watela kumanisha kukala kwamweneñayi.—1 Samweli 25:32-34; 26:10, 11.
w04 6/1 22-23
Komana Kukala Kumunakumona Kwayileteshaña Mufuukuli Munjila Yaluwa?
Chikuma chamuchisatu chitunakudizilaku, hitwatela kuzatisha njila jabula kushimunawu muBayibolu hakwila tumanishi kukala kutunakumonaku, ilaña twatela kumuchiñilila Yehova. Kambanji Yakoba wasonekeli nindi: “Itejenu kuumika kumanishi mudimu waku, kulonda mwiikali awanina nawa alumbwa muyuma yejima, chakadi kukaankila chuma hela chimu.” (Yakoba 1:4) Twatela kwiteja kuumika kumanishi “mudimu waku” kuhitila mukubula kumanisha swayi-swayi kukala kutunakumona kuzatisha njila jabula kwitejawu munsona. Neyi twila mwenimu, chikuhwelelu chetu chinesekiwu chikwikala chakola, nawa chikutukwasha kuumika. Yosefu niDavidi amweni kukala kwokumu nawa omikili. Azatishili wanyi njila yadi kumuneñesha Yehova hakwila amanishi kukala kwawu. ilaña, akuhweleleli nawu Yehova wukumanisha kukala kwawu. Amuchiñililili Yehova nawa Yehova wayikiswilili. Yehova wayizatishili wejima wawu ayedi kwamwina nikulombola antu jindi.—Kutachika 41:39-41; 45:5; 2 Samweli 5:4, 5.
Ninetu tunateli kumona kukala kunateli kutwisha mukweseka kwakukeña kuzatisha njila yabula kwikala yamunsona hakwila tumanishi kukala kwetu. Chakutalilahu, komana munaneñi muloña kanda muwani muntu imwatela kwiñila nindi muwulu? Neyi kanda mumuwani, mwani bayi mufumpa lushimbi lwaYehova lwakusumbuka hela kusumbula “chiña hohu mudi Mwanta[ku].” (1 Akorinda 7: 39) Komana munakumona kukala muwulu wenu? Chatela mutoñojokeña neyi chatoñojokañawu antu mukaayi atemukilaña kwambuka nikudiseña, zatilenu hamu kulonda mumanishi kukala kumunakumona. (Malaki 2:16; AEfwesesa 5:21-33) Komana chinakuyikalila kwakamena chisaka chenu muloña wakukala kwamali? Kumuchiñilila Yehova mwabombela kutondolwela kwila yuma yatama kulonda mwikali namali. (Masamu 37:25; AHeberu 13:18) Mwamweni, wejima wetu twatela kuzata nañovu mukukala kutunakumona nikwila yuma yikuletesha Yehova yatukiswili. Chitukwilaña mwenomu, tumuchiñilileña Yehova kulonda yakamanishi kukala kwejima.—Mika 7:7.
Yuma Yalema yakuSpiritu
Bayi Mwiteja Chuma Chidi Chejima Chiyikañeshi Kutambwila Isomuku
Neyi twikala nakukeña niluwi mumuchima wetu, hitukwikala nechimaku. Izu daNzambi dahosha nawu: “Kukeña kwadiwunjikaña nawa kwatiyilaña luwi. Kukeña hikwatiyilaña ichimaku.” (1 Kor. 13:4) Hakwila nawu tubuli kwikala nechima, twatela kumona yuma neyi chayimonañayi Nzambi, kumona amanakwetu nawahela neyi yiidi yamujimba wumu, dikwila nawu chipompelu chawakwaKristu. Chumichi chikutukwasha kukeña akwetu, kwesekeja nakufumba kwonenewa kwakwila nawu: “Neyi chiidi chimu achilemesha, dikwila nawu yiidi yikwawu yejima yazañalelaña hamu nachu.” (1 Kor. 12:16-18, 26) Dichi, chatela tutiyi ichima, tukuzañalala neyi akwetu anatambwili nkisu. Shinshikenu cheliliyi Jonatani mwana kaMwanta Sawulu. Hatiyili ichima chelili Davidi amutondi nawu wakaswana wantaku. Ilaña wamukolesheli Davidi. (1 Sam. 23:16-18) Kwila twikala naluwi nikukeña neyi Jonatani nehi?
APRIL 25–MAY 1
YUMA YALEMA YAMWIZU DANZAMBI | 1 SAMWELI 25-26
“Komana Mwelaña Yuma Chakadi Kutoñojokahu?”
Wazatili Mwamaana
Indi ana amashidika adikita ayilileña ñahi atubiña? Adi kwiyaña nyikoku mumpinji-mumpinji, ilaña hiyeyileñaku. Ilaña ahembeleña chiwahi nyikoku niañamba jaNabali. (Tañenu 1 Samweli 25:15, 16.) Anyikoku niatubiña amweneña kukala nankashi. Kwadiña ayisumi amavulu, nawa ñinza yakukabeta kambwela yaIsarela yadiña kwakwihi, chakwila mazanvu awamakombi akumatuña acheñi enjileña nakwiya.
Mudimu wakudyisha ana antu ejima muchinkalampata wadiña wakala chikupu. Ifuku dimu Davidi watemesheli antu ikumi kudi Nabali nakulomba yakudya. Davidi watondeli mpinji yayiwahi. Yadiñi mpinji yakutewula nyikoku, mpinji yayawija nawa yavulileñawu antu kuhana. Davidi wazatishili mazu amawahi akalemesha. Waditeneni nindi “mwaneyi Davidi,” hadaha wamulemesheli Nabali muloña welukili nindi himukulumpi. Indi Nabali wakwili nindidi?—1 Sam. 25:5-8.
Wahilili nankashi. ‘Wayitalumokeleli’ neyi chashimwiniyi mukwenzi atenawu kumatachikilu hakumulumbulwila Abigayili iyi nsañu. Nabali wachifwa watobeli chikupu hamankendi, menji nimbiji yindi. Wamusekesheli Davidi neyi muntu wabula kulema nawa wamwesekejeli nañamba watemukili kudi mwanta windi. Nabali watoñojokeleña neyi Sawulu wamuheleli Davidi. Awa mayala ayedi hiyamumweneña Davidi neyi chamumweneñayi Yehovaku. Nzambi wamukeñeli Davidi nawa hamumweneña neyi ñamba wadikañaku, ilaña neyi mwanta wawaIsarela wakumbidi.—1 Sam. 25:10, 11, 14.
Wazatili Mwamaana
Waditwikili muloña wavulumwini nfumwindi nawa wamulombeli Davidi nindi yamwanakeni. Nawa wamulejeli nindi nfumwindi wadiña wamukunkulwayi neyi mwaya ijina dindi, hadaha wamulejeleña Davidi nindi hatela kumusha muntu wamuchidiwu kumuchimaku. Mazu ahosheliyi amwekesheleña nawu wakuhweleleli nindi Davidi wamwimeneneñaku Yehova nawa waasileña “njita jaYehova.” Washimwini cheñi nindi welukili chakaniniyi Yehova nindi wukamwinka Davidi wanta, muloña welili nindi: “Yehova . . . nakukunjiki dehi kwikala nlomboli yawaIsarela.” Kubombelahu, wamulembeleli Davidi kulonda yabuli kwila chuma chikumuleñela yekali namuloña wamashi hela kwila ‘chuma chakumuneñesha,’ hadaha wateneneña hakwikala nachinleji chamuchima chikumukabishaña. (Tañenu 1 Samweli 25:24-31.) Awa mazu amawahi amushikili hamuchima.
Yuma Yalema yakuSpiritu
Wazatili Mwamaana
Komana chaya mukwila nawu Abigayili wadikañili nawunlomboli wanfumwindi? Inehi, anukenu nenu Nabali wamwilili kambuña Yehova wawayishewa katama, chumichi chadi kujahisha antu amavulu akadi muloña mwitala daNabali. Neyi Abigayili wabulili kuzatilahu, komana niyena wadi kwikala namuloña hachuma cheliliyi nfumwindi? Haniyi mpinji wafuukwiluhu kumwovwahila Nzambi kubadika kumwovwahila nfumwindi.