Munafumi Nsañu Yakuzatisha muChihandilu niMudimu Wanetu AkwaKristu Mukanda waKupompa
NOVEMBER 7-13
YUMA YALEMA YAMWIZU DANZAMBI | 2 ANYANTA 5–6
“Adi Nanetu Amavulu Kubadika Adi naWena”
it-1 716 ¶4
Elisha
Isarela Anamupulwishi Kudi Siriya. Hampinji yayuulileñayi Mwanta Yehorami Isarela, Siriya wakwatili kafuta kakumulukuka Isarela. Mapampa kakavulu Benihadadi II wamuhililileña Elisha, wamusolweleña Mwanta Yehorami mwejima mwendeleleñawu aSiriya. Hakusambila Benihadadi nakutoñojoka nindi muchilombu chawu mudi muntu wunakuya nakushimuna. Ilaña nawani kunakufuma kukala, natemeshi amashidika kuDotani, nakuwunyeñumuka natuwalu nimakalu kulonda amukwati Elisha. (MWEVULU, Vol. 1, ifu 950) Nhembi yaElisha nafwi mutentu chikupu, Elisha nalombi kudi Nzambi kulonda enzununi mesu anhembi, “nawa [chineliyi] nindi atali! [namoni] iluña damapidi dinenzali natuwalu nimakalu anjita akesi iku anamunyeñumuki Elisha.” Dichi, aSiriya chashikiliwu kukamwihi, Elisha walombeli chihayamisha chambukaku, “Mwani putishaku iwu muza.” Elisha wayilejeli aSiriya nindi, “Nlondelenu,” ilaña hatela kuyikwata kumakasa hakuyilombolaku, chinakumwekesha nawu muyitoñojoka bayi kuputa mesuku. Amwilukili wanyi Elisha, enjili nakukwatawu nawa elukili wanyi kwayitwalileñawu.—2An 6:8-19.
Elisha Wamweni Makalu Akesi—Komana Ninenu Mwayimonaña?
Hela chakwila ayinyeñumukili kudi ayilumbu haDotani, Elisha hatiyili womaku. Muloñadi? Muloña wamukuhweleleli Yehova chikupu. Anetu nawa twatela kwikala nachikuhwelelu chakola chamuchidiwu. Dichi, twatela kulomba spiritu yajila yaNzambi kulonda yitukwashi twikali nachikuhwelelu ninyikabu yikwawu yamukabu waspiritu.—Luka 11:13; Ñal. 5:22, 23.
it-1 343 ¶1
Kupuuta mesu
Chakadi nikujina, wumputamesu welishiliyi Elisha amashidika awaSiriya wadiña wamuyitoñojoka. Neyi amashidika ejima apuutili mesu neyi chichekala dikalu adi kuyilombolaña namakasa ejima wawu. Ilaña Bayibolu yashimuna nawu Elisha wayilejeli nindi: “Iyi diyi njila wanyi, nawa iwu hidiwu musumbaku. Dichi nlondelenu.” Kuhosha hanichi chuma chakuhayamisha chamwekeni, William James wahosheli mumukanda windi waPrinciples of Psychology (1981, Vol. 1, ifu 59) nindi: “Chuma chaleteshaña woñu wamuntu kuluwankana hikupuuta muyitoñojoka. Chumichi hichinayi mukwila nawu hiwukutoñojokaña chiwahiku, chakwila wukañanya kutiyishishaku. Kwesekeja nasayansi tukuhosha netu hikujimbesha wuswa wakwiluka chuma hela chakwila wunakuchimona namesu; nawa kujimbesha yitoñojoka yakwashaña kwiluka yuma.” Chakadi nikujina, dikupuuta kwayiputishiliyi Yehova amashidika awaSiriya chashikiliwu kuSamariya. (2An 6:18-20) Iku kupuuta muyitoñojoka kwatela cheñi dikwayimwekeneni amayala amuSodoma, chineli nsañu yamwekeshaña nawu, chatela aneñi muloña wakubula kumona, wena afwilileña kuwana hachiisu chetala daLoti.—Kut 19:11.
Yuma Yalema yakuSpiritu
w05 8/1 9 ¶2
Yikuma Yamaneni Kufuma muMukanda wa 2 Anyanta
5:15, 16—Muloñadi Elisha chakaaniniyi chawaana chaNayamani? Elisha wakaanini muloña welukili nindi ñovu jaYehova dijamuukili Nayamani muchihayamisha bayi ñovu jindiku. Chadi kwikala chachiwahi wanyi kudi yena kudiila hamudimu wamwinkeliwu kudi Nzambi. Akakudifukula alala makonu hiyadiilaña hamudimu waYehovaku. Alondelaña chikupu mazu aYesu akwila nawu: “Mwatambwilili chamukunkulu, hanenu chamukunkulu.”—Matewu 10:8.
NOVEMBER 14-20
YUMA YALEMA YAMWIZU DANZAMBI | 2 ANYANTA 7-8
“Yehova Welili Chuma Chabuliliwu kuKuhwelelawu”
it-1 716-717
Elisha
Hela chochu, chimwahitili mpinji, Benihadadi II nalukuki, bayi neyi chalukukañayi mpinji yejima mukakusumwishaku, ilaña nalukuki Samariya nanyitakalaji. Iku kulukuka kweneni chikupu chakwila mwanta anamuleji nawu mumbanda wumu nadii mwanindi weyala. Chineli wamuchisaka chaAhabi, “mwana kambanji,” Mwanta Yehorami nasanyiki kumujaha Elisha. Ilaña munasanyikiyi munashikijewi wanyi. Chinashikiyi kwitala dakaprofwetu namukulumpi wawamashidika, Yehorami nahoshi nindi naleki kukuhwelela wukwashu waYehova. Elisha namuleji mwanta nindi yakuda yikuvula ifuku dinalondelihu. Mukulumpi wawamashidika nasehi chinahoshiyi, nawa Elisha namuleji nindi: “Wakadimwena namesu eyi, ilaña wakadaku wanyi.” Muloña wepumba dakojejeliyi Yehova kutiyakana muchilombu chawaSiriya, aSiriya atoñojokeli nawu, izaza deneni dawamashidika anyuza yadibombeli dinenzi nakuyilukuka, dichi atemukili, nakushiya yakuda yejima muchilombu. Mwanta chinelukiyi nindi aSiriya anatemuki, namuleji mukulumpi wamashidika nindi ahembeña chiisu chaSamariya, nawa kwenoku diku kunamudatoleliwu kudi izaza dawaIsarela datiyili nzala dinzi nakupupa yakuda muchilombu. Namoni yakuda ilaña nadiiku wanyi.—2An 6:24–7:20.
Yuma Yalema yakuSpiritu
it-2 195 ¶7
Inoñu
Anyanta amuchisaka mwavwalikililiyi Davidi. Yehova Nzambi wamwilishili Mwanta Davidi kwikala mwanta waIsarela, nawa Davidi wamwekesheli nindi hinlomboli wamuwahi wamuza, nawunlomboli waNzambi. Dihafumini hiyakumutena nawu “inoñu daIsarela.” (2Sa 21:17) Muchitiyañenu chindi chawanta naDavidi, Yehova wamukanini nindi: “Itanda deyi dakakoleshewa chikupu haya nyaaka.” (2Sa 7:11-16) Mwamweni, anyanta amuchisaka ayuulili kufuma hadi Davidi kushika kudi mwanindi Solomoni adiña neyi “inoñu” kudi Isarela.—1An 11:36; 15:4; 2An 8:19; 2Ku 21:7.
NOVEMBER 21-27
YUMA YALEMA YAMWIZU DANZAMBI | 2 ANYANTA 9-10
“Wahamukili, Wafwilileña, nawa Wadiña Neyena”
Yehu Wahakwililuku Chikupu Kudifukula Kwalala
Yehu amwinkeli mudimu hampinji yakoñeleña muza waIsarela yuma yatama. Ituña dadiñi mumakasa amuntu watama Yezebeli, ntuluwa wakuAhabi nawa wadiña mama yamwanta wayuulileña, Yorami. Walejeli antu nindi apesheña Bayali chatela adifukuleña kudi Yehova, wajahili atuprofwetu aNzambi nawa waluwañesheli antu ‘nawuvumbi’ ‘niwuloji’ windi. (2 Anya. 9:22; 1 Anya.18:4, 13) Yehova wahosheli nindi wukujiyisha antu ejima amwitala daAhabi, kushilahu niYorami niYezebeli. Yehu diyi wadiña nlomboli muniyi njita.
Yehu Wahakwililuku Chikupu Kudifukula Kwalala
Chelili yakaani kuhosha nawantemesha ayedi atemesheluwu, Yehu wayili nakudimona naMwanta Yorami nimulundanindi Ahaziya, mwanta wamuYuda, wonsu wawu adiña mumakalu awu. Lwihu lwehwiliyi Yorami nindi, “Eyi Yehu, kwamwena tahindi?” alwakwilili tuhu mwacheñi nawu: ‘Kwikali kumwena chikuneli mawuvumbi amama yeyi Yezebeli niwuloji windi saña wavulila?’ Hakutiya awa mazu, Yorami wabalumukili nakutemuka. Ilaña Yehu wamukupishili! Hakwevula wuta wamukunji, hakumusowa Yorami nsewu hamuchima, hohenohu mwanta yafwila nimwikalu dindi. Hela chakwila Ahaziya watemukili, ilaña Yehu wamukupishili niyena nakumujaha.—2 Anya. 9:22-24, 27.
Muntu mukwawu wamwitala daAhabi wajahiluwu wadiña Yezebeli Mwanta watama. Yehu wamuteneni nindi “mumbanda washiñewa.” Chashikiliyi Yehu muYezereyeli, wamumweni Yezebeli nakutala mwishina hanjanina yachipañu. Chakadi kumba mpinji, Yehu walejeli akwanshimbi amuchota nindi amunatili Yezebeli mwishina hanjanina. Atuwalu twaYehu hiyakumudatujola Yezebeli waluwañesheli antu muIsarela yejima. Kufumahu, Yehu wayili nakujilumuna antu amavulu amwitala daAhabi watama.—2 Anya. 9:30-34; 10:1-14.
Yehu Wahakwililuku Chikupu Kudifukula Kwalala
Yehu wamwañili mashi awantu amavulu. Nsona yamushimuna nawu wadiñi iyala wahamuka wapulwishili aIsarela kuchiyuulu chawukatu chaYezebeli nichisaka chindi. Hakwila nawu nlomboli wamuIsarela yeli mwenimu, chiña yekala namuchima wawulombu, wakanyama niyena. Dikishonali yimu yahosha haBayibolu yahosha nawu: “Wadiña mudimu wamashi mumazulu nawa awuzatili wejima to-o. Neyi abulili kushamu katwa mutenowu akwakupesha Bayali hiyadi kuyijiyisha muIsarelaku.”
Chakadi kujina, kukala kunakumonawu akwaKristu makonu kunakumwekesha nawu niwena atela kwikala nayililu neyi yadiña naYehu. Chakutalilahu, tunateli kwila ñahi neyi atuleja nawu twili chuma chahelayi Yehova? Twatela kumwekesha muchima wakuhamuka, nawa twatela kukaana swayi. Kutalisha kunsañu jakudifuukula kwetu, twatela kumutiyila Yehova iyena.
Yuma Yalema yakuSpiritu
Yehu Wahakwililuku Chikupu Kudifukula Kwalala
Yehu watela welukili nindi hakwila nawu wanta waIsarela waambuki kudi aYuda, awa mawanta ayedi ateleli kwaambuka munsakililu. Chochelili anyanta amuIsarela akunyima, wesekeli kuyambula kuhitila mukuleja antu nindi adifukuleña kudi mwana kañombi. Chuma cheliliyi chamwekesheli nawu hamukuhweleleli Yehova wamutondeli kwikala mwantaku.
Ilaña, Yehova wamuhamekeli Yehu muloña ‘wakoñeli chuma chachiwahi hakukoña mwaloña kumesu aNzambi.’ Hela chochu, Yehu “hashili muchima windi wejima kukwenda munshimbi jaYehova Nzambi yaIsarelaku.” (2 Anya. 10:30, 31) Neyi mutoñojoka hayuma yejima yakoñeliyi Yehu hakusambila, mukudihayamina nawa mukuneña. Ilaña, tunateli kudizilaku. Bayi tuhemesha wubwambu wetu naYehovaku. Twatela kumwovwahila Yehova hefuku-hefuku kuhitila mukudiza Izu dindi, kutoñojoka chikupu hayuma yitunadizi nikulomba chakufuma hamuchima kudi Tata yetu wamwiwulu. Dichi, twikalenu namuchima wakwenda mwaya nshimbi jaYehova namuchima wetu wejima.—1 Kor. 10:12.
NOVEMBER 28–DECEMBER 4
YUMA YALEMA YAMWIZU DANZAMBI | 2 ANYANTA 11-12
“Mumbanda waLwisu nawa Watama Anamubabeshi”
it-1 209
Ataliya
Kufwana mama yindi Yezebeli, Ataliya wamulejeleña nfumwindi, Yehorami, kwila yuma yatama kumesu aYehova yaaka yejima yayuuliliyi. (1An 21:25; 2Ku 21:4-6) Nawa kufwana mama yindi, Ataliya wapwekesheli mashi awantu akadi nyiloña. Chelili mwanindi Ahaziya afwi hanyima yakuyuula hadi chaaka chimu, wajahili ejima amuchisaka chawanta, kufumishaku hohu mukeki Yehowashi, aswekeliwu kudi kapristu muneni nimwini kwindi, tata yaYehowashi wamumbanda. Hohenohu Ataliya wadiswanishili wanta nakwikala Mwadi hadi yaaka 6, c. 905-899 B.C.E. (2Ku 22:11, 12) Anyanindi eyili yuma yajila mutembeli yaYehova nakuyihana kudi Bayali.—2Ku 24:7.
it-1 209
Ataliya
Chelili Yehowashi ashikiji yaaka 7, Kapristu Muneni wamutiyileña Nzambi woma wamusolweli kansi weyala nakumuswanisha kwikala nswana wawanta. Chatiyiliyi chumichi, Ataliya wayili kutembeli lufuchi nawa chamweniyi hohu yuma yamwekeneña, wabidikili nindi, “Anakasi kafuta! Anakasi kafuta!” Kapristu Muneni Yehoyada wahanini lusesa nawu amukwati nakumutwala hanji yatembeli kulonda amujahili kuchiisu chatuwalu chachipañu; hadaha diyi wadiña wakukumishaku hadi antu amwitala daAhabi. (2An 11:1-20; 2Ku 22:1–23:21) Awa mazu ashikijeweli: “Kwosi izu daYehova nidimu dahosheliyi Yehova kutalisha hadi amwitala daAhabi dakabula kushikijewaku”!—2An 10:10, 11; 1An 21:20-24.
Yuma Yalema yakuSpiritu
it-1 1265-1266
Yehowashi
Kuhiñahu, chineli Kapristu Muneni Yehoyada watwalekelihu kwikala nawumi nawa wadiña neyi tata ninkwashi yaYehowashi, iwu mwanta wakansi watwalekelihu. Wasumbwili nayaaka 21, wahadikilili ambanda ayedi, wumu wadiña diyi Yehowadani, nawa mudi awa dimu mwavwaliliyi Yehowashi anyana awamayala niawambanda. Chumichi chakwashili kuhemba chisaka mwadi kuvwalikilayi Davidi nakushika nikudi Mesiya.—2An 12:1-3; 2Ku 24:1-3; 25:1.
DECEMBER 5-11
YUMA YALEMA YAMWIZU DANZAMBI | 2 ANYANTA 13-15
“Mukuzata naMuchima Wejima Mwafumaña Nkisu Jajivulu”
Komana Munakumwimbujola Kristu Chikupu?
Hakwila nawu twiluki chichalemena kwikala neyena mumudimu waNzambi, talenu chuma chamumwekeneni Mwanta wawaIsarela Yehowashi. Hamuloña wakwakamena nindi aSiriya akuyishinda aIsarela, Yehowashi wenjileña nakudila kudi Elisha. Kaprofwetu wamulejeli kwasila nsewu hanjanena kukabadi kawaSiriya kulonda kumwekesha nawu diyi nsewu yamushindu waYehova yoyi nsewu yakuyiimika nachu aSiriya mushindu. Chakadi nikujina, chumichi chadi kumuleñela mwanta kwikala wakola. Kuhiñahu, Elisha wamulejeli Yehowashi kunona nsewu jindi nakujeta heseki. Yehowashi wajeteli heseki mapampa kasatu. Elisha wahilili nachuma chenichi, muloña neyi wasili nsewu mapampa katanu hela katanu nakamu kwadi kumwekesha ‘kutapa aSiriya nichadi kuyinoñeshayi to-o.’ Ichi Yehowashi wadi kuyitapa hohu mapampa kasatu. Hamuloña wakubula kuzata neyena, Yehowashi wakañenyi kuyishinda aSiriya. (2 Anya. 13:14-19) Chumanyi chitunateli kudizila kuniyi nsañu? Yehova wakatukiswila chikupu neyi tumukalakela neyena nawa namuchima wejima.
‘Mukwakusomwena Antu Amukeñakeñaña’
Antu amuchidinyi asomwenañawu kudi Yehova? Pawulu nindi: ‘Antu amukeñakeñaña.’ Mukanda wumu wawakwakubalumuna Bayibolu wahosha nawu “kukeñakeña” hikwaya mukwila nawu “kuya nakukeñaku,” ilaña kwatalisha mukwila nawu kuya “nakudifukula” kudi Nzambi. Mukanda wukwawu walumbulula nawu idi izu daChiGriki dahosha nankashi hakudikita chikupu nikushaku maana. Yehova wasomwenaña antu akweti chikuhwelelu chayileñelaña kudifukula kudi yena namuchima wawu wejima nawa neyena.—Matewu 22:37.
Yehova wasomwenaña ñahi antu jindi ashinshika? Wayikana yuma yayiwahi yamwekeshaña nawu wahanaña nawa wukweti kukeña, dikwila nawu wumi wahaya nyaka muParadisa hamaseki. (Chimwekeshu 21:3, 4) Antu amukeñakeñaña Yehova adiluñishaña nkisu yindi nimakonu. Ekalaña nachihandilu chachiwahi muloña Yehova wayikwashaña naspiritu yindi yajila nimaana ekala Mwizu dindi.—Masamu 144:15; Matewu 5:3.
Yuma Yalema yakuSpiritu
w05 8/1 11 ¶3
Yikuma Yamaneni Kufuma muMukanda wa 2 Anyanta
13:20, 21—Komana ichi chihayamisha chinakumwekesha nawu twatela kulemesha yozelu yakunyima yakwitiya? Inehi mwani. Bayibolu yashimuna wanyi nawu mafwaha aElisha ayitentekeli nakuyihemba. Hiñovu jaNzambi jakojejeli ichi chihayamisha kumwekana, neyi chichadiña nayihayamisha yakoñeliyi Elisha hadiñayi wamumi.
DECEMBER 12-18
YUMA YALEMA YAMWIZU DANZAMBI | 2 ANYANTA 16-17
“Kudiwunjika kwaYehova Kwekala naMwakukumina”
it-2 908 ¶5
Shalimanesa
Wamubadikili Isarela ñovu. Hampinji yayuulileña Mwanta Hosheya wamuIsarela (c. 758-740 B.C.E.), Shalimanesa V wekalili nañovu kushika nikuPalesitini nawa Hosheya wamulambwileña nyilambu hachaaka-hachaaka. (2An 17:1-3) Hela chochu, chimwahitili mpinji, Hosheya walekeli kuhana nyilambu nawa enjili nakwiluka nawu nakwati kafuta naMwanta So, wakuEjipitu. (Talenu SO.) Muloña wachumichi, Shalimanesa wamushili Hosheya mukaleya nawa wakuchikili Samariya hadi yaaka yisatu, chimwahitili mpinji nyisumba yakiñewa ayijilumwini, nawa aIsarela ayitwalili muwunkoli.—2An 17:4-6; 18:9-12; esekejenu Hos 7:11; Eze 23:4-10.
it-1 414-415
Wunkoli
Wanta wanyichidi 10 wakukabeta kakuchimunswa waIsarela niwanta wanyichidi yiyedi wakukabeta kakuchidiilu waYuda, wejima wawu ayitwalili muwunkoli muloña wachuma chimu: alekeli kudifukula kudi Yehova nakutachika kudifukula kudi anzambi akutwamba. (Kuh 28:15, 62-68; 2An 17:7-18; 21:10-15) Yehova, yena kwindi, watwalekelihu kuyitemeshela atuprofwetu kulonda ayisoñamishi ilaña wena kutiya nehi. (2An 17:13) Kwosi nimwanta niwumu hawanta wanyichidi 10 walekeli chikupu kudifukula kwakutwamba kwayina nyuza kwatachikishiliyi mwanta watachi, Yerobowami. Yuda, wanta wukwawu wakukabeta kakuchidiilu, akañenyi kwovwahila mwayisoñamishiliyi Yehova nikudizila kuchayitwaliliwu aIsarela muwunkoli. (Yer 3:6-10) Antu ejima adiña munawa mawanta ayitwalili muwunkoli, mumuza himuza ayisendeleña amavulu hampinji yimu.
Yuma Yalema yakuSpiritu
it-2 847
Samariya
Izu dakwila nawu “akaSamariya” damwekana katachi muNsona hanyima yakushinda wanta wanyichidi 10 waSamariya mu 740 B.C.E.; adizatishileña hakutena antu ashakamineña muwanta wanyichidi 10 wakukabeta kakuchimunswa henohu kanda ayishiindi kwambukaku nawañinza enjili nakuletawu kufuma muwanta wawaAsiriya. (2An 17:29) Chinamwekani neyi Asiriya hiyafumishili aIsarela ejimaku, muloña nsañu yekala ha 2 Kushindulula 34:6-9 (esekejenu 2An 23:19, 20) yamwekeshaña nawu hampinji yayuulileñayi Mwanta Yosiya, aIsarela achidiña mwituña. Chimwahitili mpinji, izu dakwila nawu “akaSamariya” atachikili kudizatisha hakutena anyana kanana ashalili muSamariya ninowu aleteliwu kudi aAsiriya. Hela chochu, chakadi nikujina kwadiña makwawu asumbwañeni. Chimwahitili mpinji, idi ijina dakundamini nankashi kukwitiya, kubadika kumuchidi hela kujachiyuulu. Izu dakwila nawu “kaSamariya” adizatishileña hakutena izanvu dawakakwitiya dadiña nankashi mumpinji yaShekemi naSamariya nawa akuhweleli yuma yambukaku nawaYudeya.—Ywn 4:9.
DECEMBER 19-25
YUMA YALEMA YAMWIZU DANZAMBI | 2 ANYANTA 18-19
“Ayilumbu Jetu Chafwilañawu Kutuzeyesha”
w05 8/1 11 ¶5
Yikuma Yamaneni Kufuma muMukanda wa 2 Anyanta
18:19-21, 25—Komana Hezekiya wakwatili chitiyañenu naEjipitu? Inehi. Yuma yahosheleñayi Rabisheka yadiña yakutwamba, chineli wahosheli nindi wenjili muloña ‘amwitejeli kudi Yehova.’ Mwanta Hezekiya washinshika wamushindameneni Yehova.
“Bayi Wutiya Womaku, Nukukukwashañaku
Rabishake wazatishili nsañu yakutwamba kulonda antu atachiki kujinooka. Wahosheli nindi: “[Yehova] hidiyi wukweti yinañanaña nitumeña twanafumishiyi Hezekiya[ku]? . . . Yehova diyi nañili nindi ‘Yaku wakaasi ituñidi wakadijilumuni.’” (2 Anya. 18:22, 25) Rabishake wahosheli nindi Yehova kwila yalwila antu Jindi nehi muloña amuneñesheli. Ilaña watwambili chikupu. Yehova wadiñi wamukeña Hezekiya niaYudeya afuntili kukudifukula kwalala.—2 Anya.18:3-7.
Chalumbuluka Kwikala Nawatubiña Atanu Nayedi, Niatulamba Atanu Nasatu Makonu
Mwanta wawaAshuri wateekeleli iteeku kuLakishi kukabeta kambwela kakumujika waYerusalema. Kufuma kuna kwatekeleliyi watemesheli atuñanda asatu nakuyileja antu amumusumba nindi aleki kuzuña. Ntemesha yindi Rabishake wazatishili tufuta twashiyashana. Wahosheli mwidimi dawaYudeya, nakuyileja antu nindi amufutuki mwanta kulonda ovwahila aAshuri, nakuyidimba nindi wakayitwala kwituña kwakadiluñishañawu chihandilu chachiwahi. (Tañenu 2 Anyanta 18:31, 32.) Kuhiñahu Rabishake wahosheli nezu dañovu nindi neyi chochakañenyi anzambi amunyuza kukiña antu jawu, dichi Yehova hakatwesha kuyipulwisha aYudeya kudi aAshuruku. Hamuloña wakwila antu adiña ababala hiyakuhweleli ana mazu akutwambaku, dichi chelañawu niambuña Yehova makonu.—Tañenu 2 Anyanta 18:35, 36.
yb74 177 ¶1
Chibalu 2—Germany
Chakuhayamisha aSS, azatishileña tufuta twafwana kulonda muntu afwachiki nindi naleki kwikala Chinsahu, kakavulu ayibalumukilileñamu hanyima yakufwachika nawa ayikabishileña nankashi kubadika hakusambila. Karl Kirscht wamweni chumichi: “Hadi antu ejima aYinsahu jaYehova diwu adimbileñawu nankashi muyilombu yakuyandishila. Atoñojokeleña nawu chumichi chikuletesha afwachiki. Kakavulu atulejeleña nawu tufwachiki. Amakwawu afwachikileña ilaña kakavulu, mwahitileña chaaka nikubadikahu hakwila ayumbiku. Haniyi mpinji kakavulu ayiteneneña hamesu awantu kudi aSS hiyanfwikiji nawa adi nawoma nawa ayikanjikijileña kwenda kwateneneñawu nawu ‘kwenda kwakalemesha’ nakunyeñumuka amanakwawu henohu kanda ayiteji kufuma muchilombu.”
Yuma Yalema yakuSpiritu
it-1 155 ¶4
Kuvumbujola
Chakutalilahu, nsañu yamuBayibolu yashimuna nawu Mwanta Senakaribi wakuAsiriya amujahili kudi anyanindi awamayala ayedi, aAdirameleki naSharezeri, nawa mwanindi weyala wacheñi, Esahadoni diyi wenjili nakuswana. (2An 19:36, 37) Hela chochu, kushindulula kwaBabiloni kwahoshañawu hefuku damu 20th mukakweji kaTebeti, Senakaribi amujahili kudi mwanindi weyala. Kapristu waweni Babiloni Berossus, wamuyaaka nkulakaji yamuchisatu B.C.E., nimwanta waweni Babiloni Nabonidus, wamu nkulakaji yamu 6 B.C.E., ejima wawu ashimwini nawu Senakaribi amujahili kudi mwanindi weyala. Hela chochu, munsañu yasandujolawu akatataka yasonekeli Esahadoni, wamuswanini Senakaribi, Esahadoni wahosheli nindi ayaya jindi (kuvulisha) amubalumukililimu nakujaha tata yawu nawa atemukili. Kuhosha haniyi nsañu, Philip Biberfeld, muUniversal Jewish History (1948, Vol. I, ifu 27), wahosheli nindi: “Kushindulula kwaweni Babiloni, kwaNabonid, niBerossus kwakutwamba; nsañu yamu Bayibolu hohu diyu yashimuna chalala. Chumichi achiwanini nimunsañu yanyanya yasonekeliyi Esahadoni nawa yadiña yoloka chikupu kutalisha kuyuma yamwekeni munsañu jaweni Babiloni nawaSiriya kubadika nsañu jasonekeliwu eniBabiloni aweni. Chumichi chinakumwekesha kulema kwakusandujola nsañu yabula kwesekena natushidikilu twamuBayibolu.”
DECEMBER 26–JANUARY 1
YUMA YALEMA YAMWIZU DANZAMBI | 2 ANYANTA 20-21
“Kulomba Kwamuletesheli Yehova Kwilahu Chuma”
ip-1 394 ¶23
Kashinshi kaMwanta Akikiswilili
Hampinji yenjiliyi Senakaribi katachi kuYuda, Hezekiya wadiña wakata chikupu. Isaya namuleji nindi wukufwa. (Isaya 38:1) Mwanta wudi nayaaka 39-naneñi chikupu. Bayi neyi naneñi hamuloña wakukata hohu ilaña nichikahandañawu neyi afwa. Yerusalema niYuda wudi muwubanji muloña wawAsiriya anakukeña kumulukuka. Neyi Hezekiya afwa, hinyi wukalombola antu kunjita? Haniyi mpinji, Hezekiya wudanahu mwana wunateli kumusinsa hawanta. Mukulomba kwindi Hezekiya namulembeleli Yehova kumutiyila luwi.—Isaya 38:2, 3.
Mukalakelenu Yehova naMuchima Wejima!
Kuhiñahu Hezekiya wakatili kwakwihi nakufwa. Wamulembeleli Yehova kulonda yaanuki chendeleñayi munjila Jindi. (Tañenu 2 Anyanta 20:1-3.) Tweluka chahosha Nsona netu tunakushakama mumpinji yakwila Nzambi hakutwesha kutuuka muchihayamisha hela kutushilaku mafukuku. Hela chochu, kufwana Hezekiya, wejima wetu tunateli kuhosha mukulomba kudi Yehova netu: “Aanuki mwani chinendeli kumesu eyi chakashinshi namuchima wejima.” Komana munakuhweleli nenu Yehova nateli kuyikwasha nawa nakufwila kuyikwasha hakadidi neyi munakati?—Mas. 41:3.
g01 7/22 13 ¶4
Kulomba Kunateli Kunkwasha Ñahi?
Kunyima amayala amakwawu adiña nachikuhwelelu ayakwili kulomba muchiyahamisha hohenohu. Chakutalilahu, Mwanta Hezekiya chelukiliyi nindi nakati, wamulembeleli Nzambi nindi amukoleshi. Nzambi wamwakwili nindi: “Ami natiyi kulomba kweyi. Namoni madilu eyi. Ichi inakukuuka.” (2 Anyanta 20:1-6) Amayala niambanda amakwawu amwakamineña Nzambi niwena Nzambi watiyili kulomba kwawu hohenohu nawa wayikwashili.—1 Samweli 1:1-20; Danyeli 10:2-12; Yilwilu 4:24-31; 10:1-7.
Yuma Yalema yakuSpiritu
it-2 240 ¶1
Chozelu Chakwesekeja Nachu
Chozelu chakwesekeja nachu anateli kuchizatisha hakutuña nachu itala hela kumona nachu neyi dinoloki kulonda dikashimbuli. Yehova washimwineñahu dehi nindi wakawuvuñulwila Yerusalema “mwonji wakupima nachu owu wunazatishili hadi Samariya nawa nukuzatisha chozelu chakwesekeja nachu chinazatishili kwitala daAhabi.” Nzambi wapimini nawa wawanini nindi Samariya niantu amwitala daMwanta Ahabi adiña nayilwilu yatama yateleleliwu kuyijahilahu. Munjila yoyimu, Nzambi wadi kasompesha Yerusalema nianyuuli awu, nakumwekesha hatooka yilwilu yawu yatama nikujilumuna musumba. Iyi yuma yamwekeni mu 607 B.C.E. (2An 21:10-13; 10:11) Kuhitila mudi kaprofwetu Isaya, akakuditiya nyuli amuYerusalema ayilejeli chuma chatama chenjileña nakuyimwekena nichahosheliyi Yehova: “Nakelisha wuñanji kwikala mwonji wakupima nachu nawa kuloña kwakekala chozelu chakwesekeja nachu.” Wuñanji walala ninshimbi jaloña jikamwekesha adiña ambuña aNzambi alala niabulili, kulonda akamoni neyi chakwila atela kupuluka hela kuyijilumuna.—Isa 28:14-19.