Munafumi Nsañu Yakuzatisha muChihandilu niMudimu Wanetu AkaKristu Mukanda waKupompa
© 2022 Christian Congregation of Jehovah’s Witnesses
JANUARY 2-8
YUMA YALEMA YAMWIZU DANZAMBI | 2 ANYANTA 22-23
“Muloñadi Chitwatela Kwikala Adizoza?”
w00 9/15 29-30
Yosiya Wadizoza Amutiyili Kuwaha Kudi Yehova
Kufuma hankunku yakucha, akakuloñesha tembeli anakudikiti chiwahi chikupu. Chakadi nikujina, Yosiya namusakilili Yehova hakumona akakuzata anakuwahisha yuma yakisañeni ankakulula atama kwitala daNzambi. Mudimu chiwunakuyilaku hambidi, Shafani nenzi nakushimuna chinakwenda mudimu. Hanu chumanyi chinasendiyi? Nasendi muvuñilu wankahi! Nalumbululi nindi, Kapristu Muneni Hilikiya “nawani mukanda waNshimbi mwitala daYehova.” (2 Kushindulula 34:12-18) Nawani chuma chalema chikupu—muvuñilu waweni waNshimbi!
Yosiya nakufwila chikupu nsañu yidi mumukanda. Chinakuwutañayi Shafani, nakutiyilila chikupu nshimbi jinateli kuzatishayi yena niantu. Sweje-e natiyi kuwaha mukanda chiwunakonkomweni hakudifukula kwalala nichiwunashimuni chadimu nawu yipupu niwunkoli wukenza neyi antu adibomba mukwitiya kwakutwamba. Hanu chinamoniyi nindi nshimbi jaNzambi jikwawu anakujilondela wanyi, Yosiya natabuli chakuvwala chindi nakuyileja aHilikiya, Shafani niamakwawu nindi: “Yenu mukañihwiliku kudi Yehova, muyihwiliku niantu niaYuda ejima kutalisha hamazu adi muniwu mukanda wunawaniwu.”—2 Anyanta 22:11-13; 2 Kushindulula 34:19-21.
w00 9/15 30 ¶2
Yosiya Wadizoza Amutiyili Kuwaha Kudi Yehova
Antemesha aYosiya anayi kudi kaprofwetu wamumbanda Hulida muYerusalema nawa anafunti nansañu. Hulida nayileji mazu anahoshiyi Yehova, nakumwekesha nawu yihuñu yinateniwu mumukanda wunawaniwu katataka yakashikena nyuza yawakakusekesha. Hela chochu, chineli wadizozeli kudi Yehova Nzambi, Yosiya hakamona iyi yihuñuku. Akamutwala kwayili ankakulula jindi nawa akamujiika mukuwunda.—2 Anyanta 22:14-20; 2 Kushindulula 34:22-28.
Yuma Yalema yakuSpiritu
w01 4/15 26 ¶3-4
Munateli Kutwesha hiChikweti Muloña naNkulilu Yenuku
Hela chakwila wamweneña kukala hadiñayi kansi, Yosiya welileña yuma yayiwahi kumesu aYehova. Dichi wayuulili chiwahi chakwila Bayibolu yashimuna nawu: “Hikwadiñahu mwanta wadiña neyi yena henohu yena kanda ekaliku, owu wafuntili kudi Yehova namuchima windi wejima, nawumi windi wejima ninañovu yindi yejima kwesekeja naNshimbi jejima jaMosiku; nawa hikwekalilihu mukwawu wadiña neyi yena kufuma hadi yenaku.”—2 Anyanta 23:19-25.
Ichi chakutalilahu chaYosiya chinateli kukwasha ejima amweneña kukala hampinji yakulileñawu! Yumanyi yitunateli kudizila kudi yena? Chumanyi chamukwashili Yosiya kutonda njila yayiwahi nikwendamu?
JANUARY 9-15
YUMA YALEMA YAMWIZU DANZAMBI | 2 ANYANTA 24-25
“Ilukenu Mpinji Yitunakushakamamu”
w01 2/15 12 ¶2
Ifuku daYehova Dakusompesha Didi Mukamwihi!
Chakadi nikujina, wuprofwetu waZefwaniya wamukwashili kansi Yosiya kwiluka nawu watela kufumishahu kudifukula kwamajilu muYuda. Ilaña mwanta chafumishiliyi kwitiya kwakutwamba mwituña hichafumishilihu kutama kwejima kwawantuku hela hikwatookesheli nshidi jankaka yindi, Mwanta Manasi, “wenzesheli Yerusalema namashi akadi muloña[ku.]” (2 Anyanta 24:3, 4; 2 Kushindulula 34:3) Dichi ifuku daYehova dakusompesha dateleli kwinza.
w07 3/15 11 ¶10
Yikuma Yamaneni Kufuma muMukanda waYeremiya
Muchaaka cha 607 B.C.E. Zedekiya wadiña nayaaka 11 hawanta windi. Mwanta Nebukaneza wamuBabiloni wakuchikili Yerusalema hadi tukweji 18. Hefuku damuchitanu nachiyedi dakakweji kamuchitanu, muchaaka cha 19 chaakuyula kwaNebukaneza, mukulumpi wawatulama Nebuzaradani wayili kuYerusalema. (2 Anyanta 25:8) Hekwawu hanzi yamusumba hadiña nakushakamayi, Nebuzaradani watañili nshakaminu yamuYerusalema nawa wafukwili kukoñahu chuma chimu. Hanyima yamafuku asatu, mukakweji kekumi ‘weñilili’ muYerusalema. Chalondeleluhu wocheli musumba.—Yeremiya 52:12, 13.
Yuma Yalema yakuSpiritu
w05 8/1 12 ¶1
Yikuma Yamaneni Kufuma muMukanda wa 2 Anyanta
24:3, 4. Hamuloña wakwila Manasi wadiña namuloña wamashi, Yehova “hakeñeleña kwanakena” Yudaku. Nzambi walemesha mashi awantu akadi muloña. Tunakuhweleli chikupu netu Yehova wakajilumuna antu ejima apwekeshaña mashi akadi muloña.—Isamu 37:9-11; 145:20.
JANUARY 16-22
YUMA YALEMA YAMWIZU DANZAMBI | 1 KUSHINDULULA 1-3
“Bayibolu hiMukanda Mudi Nsañu Yalala Bayi Yakulumbishaku”
Adama niEva Mwamweni Adiña Kwoku?
Chakutalilahu, toñojokenu hamajina awankakulula asonekawu mumukanda wa 1 Kushindulula 1 nakushika ku 9 nimuNsañu Yayiwahi yaLuka 3. Awa majina atanjikawu chiwahi mundonda mumukanda watachi wutwashimuna mwekala majina 48 nawa muLuka mwekala 75. Luka washimuna ndonda yachisaka mwavwalikiliyi Yesu Kristu, ilaña muKushindulula ashimunamu yisaka yawanyanta niatupristu amuza waIsarela. Muniyi nyikanda yejima yiyedi ashimunamu majina awantu aya mpuhu adi neyi Solomoni, Davidi, Yakoba, Isaka, Abarahama, Nowa, nkumininaku niAdama. Majina ejima adi muniyi nyikanda anakwimenaku antu aweni, nawa Adama diyi wadiña muntu yomweni watachi hanawa majina.
Nsañu yaNowa niDibaji Yalala, Bayi Neyi hiKaanuku
Nsañu yamuBayibolu yiyedi yahoshaña hayikota yayisaka yamwekeshaña nawu Nowa wadiña kwoku. (1 Kushindulula 1:4; Luka 3:36) Ezera niLuka asonekeli haniyi yikota, adiña akwakusandujola ashinshika. Luka walumbulwili chikota chaYesu Kristu kushika nikudi Nowa.
Adama niEva Mwamweni Adiña Kwoku?
Chakutalilahu, talenu nsañu yamuBayibolu yakeñeshawu nankashi antu ayaña kumachechi, yefutu danyiloña. Kwesekeja nachatañishañawu, Yesu Kristu wahanini wumi windi wawanina neyi ifutu danyiloña dakukula nachu nshidi jawu. (Matewu 20:28; Yowanu 3:16) Neyi chitweluka, ifutu danyiloña hiwufwetu wafwetañawu hakwila akuuli hela atambuli cheñi chuma. Dihafuma Bayibolu yamutena Yesu nawu “ifutu danyiloña dakukuula nachu.” (1 Timotewu 2:6) Dakukuula yumanyi? Bayibolu yakula nawu: “Neyi chinakufwawu antu ejima kuhitila mudi Adama, chochimu nawa antu ejima akekala nawumi kuhitila mudi Kristu.” (1 AKorinda 15:22) Wumi wawanina walambwiliyi Yesu hakukula antu ovwahila wesekana nawumi waloña wajimbesheliyi Adama nanshidi yakoñeliyi muEdeni. (ARoma 5:12) Mwamweni, neyi Adama wadiñaku wanyi, ifutu danyiloña daKristu dadikuya mumenji.
Yuma Yalema yakuSpiritu
it-1 911 ¶3-4
Ndonda yaMajina
Majina awantu awambanda. Majina awantu awambanda ayishimwineña mundonda neyi kudi chuma chinakuletesha eli mwenomu. HaKutachika 11:29, 30, Sarayi (Sara) amutena ijina, hamuloña wakwila nawu mwana akaniniwu wateleli kuvwalika mudi yena bayi ñoda Abarahama mukwawuku. Milika atela amushimuna muniyi nsañu muloña wadiña nkaka yaRabeka, ñoda Isaka, nakumwekesha nawu chisaka mwavwalikililiyi Rebeka adiña antaña yaAbarahama, chineli Isaka wateleli wanyi kusumbula mumbanda wakunyuza yacheñi. (Kut 22:20-23; 24:2-4) HaKutachika 25:1, ashimunahu ijina daKetura wenjili nakwikala ñoda Abarahama. Chumichi chinakumwekesha nawu Abarahama wasumbwili cheñi chelili Sara nafwi, nawa nawu wachidiña nañovu yalusemu henohu munahiti yaaka 40 kufuma hamufuntishililiyi Yehova ñovu yalusemu. (Rom 4:19; Kut 24:67; 25:20) Cheñi, chamwekeshaña nawu hadiña wuntaña hakachi kawaMidiyani niArabiya namuchidi waIsarela.
Liya, Racheli, niantombu jaYakoba, kushilahu nianyanawu awamayala avweliwu, ayishimuna majina. (Kut 35:21-26) Chumichi chatukwashaña kwiluka Nzambi chenjiliyi nakwila nanawa anyana. Hamuloña wachuma chochimu, majina awambanda amakwawu ayisoneka mundonda. Neyi wuswana awuhanini kuhitila mudi wena, majinawu akuyisoneka. (Kuc 26:33) Hela chochu, Tamari, Rahaba niRuti adimena. Ejima wawu kudi njila yayiwahi yaletesheli enzi nakwikala hakachi kawantu mwavwalikiliyi Mesiya, Yesu Kristu. (Kut 38; Lut 1:3-5; 4:13-15; Mat 1:1-5) Majina awambanda makwawu ayitena mundonda ha 1 Kushindulula 2:35, 48, 49; 3:1-3, 5.
JANUARY 23-29
YUMA YALEMA YAMWIZU DANZAMBI | 1 KUSHINDULULA 4-6
“Kulomba Kwami Kwamwekeshaña nawu Nidi Muntu Wamuchidinyi?”
“Mukakutiya Kulomba”
Yabezi wadiña mukakulomba. Watachikili kulomba nindi Nzambi amukiswili. Kuhiñahu walombeli yuma yisatu yamwekesheleña chikuhwelelu chakola.
Chatachi, Yabezi wamulombeli Nzambi, nindi: ‘Ntohesheli iluña dami.’ (Vasi 10) Iwu iyala alemesheliwu hatambwileña maluña awantu hela kukakela chuma chamukwawuku. Kulomba kwalombeliyi kwakufuma hamuchima kwadiña kwakufwila kuhanda chiwahi nawantu bayi mpataku. Watela walombeleña nindi iluña dindi ditohi mukuwunda kulonda mwiikali akakudifukula aNzambi walala.
Chamuchiyedi, Yabezi walembeleli “chikasa” chaNzambi chiikali nayena. Chikasa chaNzambi chachifwikija chinakwimenaku ñovu, yazatishañayi hakukwasha akakudifukula indi. (1 Kushindulula 29:12) Hakwila amwinki yuma yakeñeleñayi, Yabezi walombeli wukwashu kudi Nzambi wahanaña kudi owu amwekeshaña chikuhwelelu.—Isaya 59:1.
Chamuchisatu, Yabezi walombeli nindi: “Nkiñi kukukala kulonda kubuli kwikala chuma chatama chikummwekena.” Mazu akwila nawu “kulonda kubuli kwikala chuma chatama chikummwekena” anakumwekesha nawu Yabezi walombeli, bayi neyi atemuki kukalaku, ilaña amukiñi kukubula kwikala nachineñi hela kushinda yuma yatama.
Kulomba kwaYabezi kwamwekesheli nawu wakameneni kudifukula kwalala nichikuhwelelu chindi chakumukuhwelela Mukakutiya kulomba. Yehova wakwili nindidi? Iyi nsañu yayihi yakunkulula nanawa mazu: “Dichi Nzambi wamwililili chuma chalombeliyi.”
Yuma Yalema yakuSpiritu
w05 10/1 9 ¶7
Yikuma Yamaneni Kufuma muMukanda wa 1 Kushindulula
5:10, 18-22. Mumafuku aMwanta Sawulu, nyichidi yakumusela waYodani yayishindili aHagiri hela chakwila iyi nyichidi ayibadikilimu kuvula, muntu wumu wukuzuña nawantu ayedi. Chadiña mwenimu muloña ayilobu aniyi nyichidi amukuhweleli Yehova nawa alombeleña wukwashu kudi yena. Dichi tumukuhwelelenuña Yehova hampinji yitunakuzuña njita yakuspiritu nawayilumbu itwabulaña kumona.—Aefwesesa 6:10-17.
JANUARY 30–FEBRUARY 5
YUMA YALEMA YAMWIZU DANZAMBI | 1 KUSHINDULULA 7-9
“Yehova Nateli Kuyikwasha Kuzata Nyidimu Yakala”
w05 10/1 9 ¶8
Yikuma Yamaneni Kufuma muMukanda wa 1 Kushindulula
9:26, 27. Alevi haembeleña kuyiisu ayikuhweleli chikupu. Ayinkeleña kii yakuchiisu chakwiñilila kumaluña ajila atembeli. Ashinkwileña yiisu ifuku niifuku. Atwinka mudimu wakushimwina mwiluña detu nikuyikwasha kulonda adifukuleña kudi Yehova. Komana kwila tuzata nañovu kulonda atushindameni nikutukuhwelela neyi chazatileña Alevi ahembeleña hayiisu nehi?
Komana Munateli Kumwimbujola Fwinehasi Neyi Muholokela Mukukala?
Fwinehasi wadiña namudimu weneni muIsarela wakushankulu; ilaña, hamuloña wakwikala nawulobu, kashinshi, nikushindamena hadi Nzambi, watwesheli kumanisha kukala munjila yayiwahi. Nawa Fwinehasi wadiña nawuselewa waYehova hamuloña wakwakamena chikupu chipompelu chaNzambi. Chimwahitili yaaka 1,000, Ezera amoneneni kusoneka nindi: “Mwana kaEleyazari Fwinehasi diyi wayiyulileña hamwaka, Yehova wadiñi nayena.” (1 Kushi. 9:20) Tunakulomba netu antu ejima anakulombola antu jaNzambi makonu, dikwila nawu akwaKristu ejima amukalakelaña nakashinshi eleña mwomumu.
Yuma Yalema yakuSpiritu
Mwimbilenu Yehova!
Eñañi, kuhitila mudi atuprofwetu twindi, Yehova walejeli akwakudifukula indi kumuhameka natumina. Akakwimba amuyisaka yawatupristu ayilekesheli nikuzata nyidimu yazatileñawu Alevi amakwawu kulonda ekaleña nampinji yeneni yakusoneka tumina, sweje-e dinu, yakuhitulukamu.—1 Kushi. 9:33
FEBRUARY 6-12
YUMA YALEMA YAMWIZU DANZAMBI | 1 KUSHINDULULA 10-12
“Ikalenu naMuchima Wakufwila Kwila Nkeñelu yaNzambi”
“Nleji Kwila Mwaya Muchima Weyi”
Twatela kumwimbujola Davidi walemesheli Nshimbi nikuyizatisha muchihandilu chindi. Talenu chuma chamwekeni chelili Davidi yakeñi ‘menji akunwa mwishima dakuBetelemi.’ Antu jaDavidi asatu ashili wumi wawu hakatoña hakwiñila mumusumba wawaFwilistinu nakutaha menji. Ilaña, “Davidi kuyinwa kwonti kwindi, hakuyimwañila kumesu aYehova.” Muloñadi? Davidi walumbulwili nindi: “Nzambi yami kwaamu, ami kwila mwenimu kwakulehi tuhu ntahi. Ninwi mashi awantu awa aditwala kukufwa? Muloña wena chanayiletuwu anakeñi kumwenamu kufwa.”—1 Kushi. 11:15-19.
Davidi welukili nindi Nshimbi yahosheli nawu mashi atela kuyimwañila kudi Yehova bayi kuyidyaku. Nawa welukili chuma chaleñeleli Nzambi yashuku iyi nshimbi. Davidi welukili nindi “wumi wamujimba wekala mumashi.” Ilaña, awa adiña menji, bayi neyi mashuku. Muloñadi Davidi chakaanininiyi kuyinwa? Muloña welukili yishina yamunshimbi. Davidi, wamweni nindi menji adiña tuhu neyi mashi anana amayala asatu. Dihafumini hakukaana kunwa awa menji. Chatela yanwi, wafuukwiluhu kuyimwañila heseki.—Lev. 17:11; Kuhit. 12:23, 24.
Itejenu Nshimbi niYishina yaNzambi Yidizishi Chinleji Chenu
Hakwila nawu nshimbi jaNzambi jitukwashi, Bayi tukuminaña hohu dakujitaña nikujilukaku. Twatela kujikeña nikujilemesha. Izu daNzambi dahosha nawu: “Helenu yatama, mukeñi yayiwahi.” (Amosa 5:15) Hanu dinu tunateli kwila ñahi mwenimu? Twatela kumona yuma neyi chayimonañayi Yehova. Chakutalilahu: Fwikijenu munakukamaña wanyi. Ndotolu yayileja nindi mudeña yakuda yayiwahi, kwolola mujimba nikuhimpa yuma yimu muchihandilu. Hanyima yakulondela yuma yinayilejiyi ndotolu, nawa mumona nenu yinazatiki, chakadi nikujina mukumusakilila ndotolu hakuyikwasha kuwahishaku chihandilu chenu.
Munjila yoyimu, Nleñi yetu watwinka nshimbi jinateli kutukiña kuyuma yinateli kutuluwañesha yafumaña kunshidi nawa yinateli kuwahishaku chihandilu chetu. Toñojokenu yuma yayiwahi yafumaña mukulondela nshimbi yamuBayibolu yahosha hakutwamba, kufwila yatama, wukombi, yilwilu yawuvumbi, madombu nikupanda. (Tañenu Yishimu 6:16-19; Chim. 21:8) Neyi tumona yuma yayiwahi yafumaña mukwila yuma yakeñañayi Yehova twaswejaña kumukeña Yehova ninshimbi jindi.
Yuma Yalema yakuSpiritu
it-1 1058 ¶5-6
Muchima
Kukalakala “namuchima wejima.” Muchima hakwila wuzatiki chiwahi watela kwikala wamukuma, ilaña muchima wachifwikija wunateli kwikala wadambula. Davidi walombeli nindi: “Nyinki muchima wumu wakutiya woma ijina deyi,” nakumwekesha nawu muchima wunateli kwambuka muloña wayuma hela wawoma. (Ms 86:11, tth.) Muntu wamuchidiwu nateli kwikala ‘namuchima wachibalu,” wukwikala namuchima wawukanvuyenki hakudifukula kudi Nzambi. (Ms 119:113; Chi 3:16) Muntu cheñi nateli kwikala “nanyichima yiyedi” (Muchiheberu, kwikala namuchima), kukalakela anyanta ayedi, hela nakudidimba kuhosha chuma chimu iku nakutoñojoka hayuma yacheñi. (1Ku 12:33; Ms 12:2, tth) Yesu wakaanini chikupu wufwikiji wakwikala nanyichima yiyedi.—Mat 15:7, 8.
Muntu wunakufwila kumutiyisha Nzambi kuwaha watela kwikala wanyi namuchima wachibalu hela nanyichima yiyedi, ilaña watela kumukalakela namuchima wejima. (1Ku 28:9) Chumichi chakeñekaña kuzata nañovu muloña muchima wadimbanaña nikufwila yuma yatama. (Yer 17:9, 10; Kut 8:21) Yuma yinateli kutukwasha kwikala namuchima wumu: kulomba kwakufuma hamuchima (Ms 119:145; Mke 3:41), kudiza Izu daNzambi mpinji yejima (Ezr 7:10; Yis 15:28), kushimwina neyena nsañu yayiwahi (esekejenu Yer 20:9), nikudikunda nawantu akweti nyichima yoloka kudi Yehova.—Esekejenu 2An 10:15, 16.
FEBRUARY 13-19
YUMA YALEMA YAMWIZU DANZAMBI | 1 KUSHINDULULA 13-16
“Mukulondela Wunlomboli Mwafumaña Yuma Yayiwahi”
w03 5/1 10-11
Mwehulaña Nenu, “Yehova Wudi Kudihi?”
Hanyima yakwila chimbañu chachitiyañenu anachifuntishi dehi kuIsarela nawa anachihembi hadi yaaka yayivulu muKiriyati Yeyarimi, Mwanta Davidi wafwilileña chikupu kuchitwala kuYerusalema. Wehwili akulumpi jawantu nawa amulejeli nawu Chimbañu anateli kuchitwala ‘Neyi anachimoni nawu chinawahi kudi wena nawa chetejewa kudi Yehova Nzambi.’ Ilaña wadiwili kumwihula Yehova chakeñeleñayi haniyi nsañu. Neyi wamwihwili, Chimbañu hiyadi kuchisendela hetembaku. Ateleli kuchisendela hamafwiji kudi Alevi aKohati, neyi chashimwiniyi Nzambi. Hela chakwila Davidi wamwihwileña Yehova mapampa kakavulu, haniyi mpinji wakañenyi kumwihula. Mwafumini yuma yatama. Davidi wenjili nakuhosha nindi: “Yehova Nzambi yetu watuzuwilili, muloña hitwalondeleli mwashimwiniyiku.”—1 Kushindulula 13:1-3; 15:11-13; Kuchinda 4:4-6, 15; 7:1-9.
w03 5/1 11 ¶13
Mwehulaña Nenu, “Yehova Wudi Kudihi?”
Chelili Chimbañu achileti kudi Alevi kufuma kwitala daObedi Edomi nakuchileta kuYerusalema, embili kamina kembiliwu kudi Davidi. Mwabombeleli mazu akufuma hamuchima: “Mukeñakeñenu Yehova niñovu jindi. Lombenuña wukwashu windi mpinji yejima. Anukenuña nyidimu yindi yakuhayamisha yinakoñiyi, yihayamisha yindi niwunsompeshi wunashimuniyi.”—1 Kushindulula 16:11, 12.
Yuma Yalema yakuSpiritu
Difukulenuña Kudi Yehova, Mwanta Wahaya Nyaka
Davidi waleteli chimbañu chajila chachitiyañenu muYerusalema. Haniyi mpinji yamuzañalu, Alevi embili kamina kakuhameka kadiña namazu alema asonekawu ha 1 Kushindulula 16:31 akwila nawu: ‘Nyuza yawantu yihoshi nawu Yehova nekali Mwanta.’ Muntu nateli kwihula nindi, ‘Chineli Yehova diyi Mwanta wahaya nyaka, hanu dinu wekalili ñahi Mwanta hayina mpinji?’ Yehova wekalili Mwanta hampinji yazatishiliyi ñovu yindi hela kutonda antu akumwimenaku muyuma yikwawu. Kwiluka Yehova chekalayi Mwanta kwalema nankashi. Henohu Davidi kanda yafwi Yehova wamukanini nindi Wanta windi wukatwalekahu haya nyaka wamulejeli nindi: “Nakakunyamwina mwaneyi wamba kakulondela, wakafuma mwivumu deyi, nakamukoleshela wanta windi.” (2 Sam. 7:12, 13) Hakushikijewa kwanawa mazu kapampa kakukumishaku, iwu ‘mwana’ kaDavidi wamwekeni chimwahitili yaaka yakubadika ha 1,000. Indi iwu mwana wadiñanyi, nawa wekalili Mwanta mpinjinyi?
FEBRUARY 20-26
YUMA YALEMA YAMWIZU DANZAMBI | 1 KUSHINDULULA 17-19
“Twalekenuhu Kwikala naMuzañalu Hela Yuma Yidi Chiwahi Wanyi”
w06 7/15 19 ¶1
Shenu Muchima haKuwaha Kudi muKuloñesha kwaYehova
DAVIDI wadiña muIsarela himuntu wumu ashimunawa muNyikanda yachiHeberu. Iwu kabiña, ñimbi, kaprofwetu, nawa mwanta wamukuhweleli nankashi Yehova Nzambi. Davidi chamukeñeliyi Yehova chamuletesheli kukeña kutuña itala daNzambi. Idi itala hela netu tembeli, yikwikala iluña dakudifukwilamu kudifukala kwalala muIsarela. Davidi welukili cheñi nindi ntanjikilu yinakundami kutembeli yikuyiletela antu jaNzambi muzañalu ninkisu. Dichi Davidi wembili nindi: “Wudi namuzañalu yowu muntu iwunatondi [eyi Yehova] nikumuleta kulonda ashakami mumalubanza eyi. Twakekuta nakuwaha kwamwitala deyi, tembeli yeyi yajila.”—Isamu 65:4.
Zañalalenuña naNyidimu Yimunakumuzatila Yehova
Munjila yoyimu, tunateli kwikala namuzañalu chikupu neyi tudikitaña mumudimu wejima wutukweti mumudimu waYehova. Shenuña “muchima chikupu hamudimu wakushimwina” nawa zatilenuña hamu nachipompelu. (Yilw. 18:5; Heb. 10:24, 25) Yenuña kukupompa iku munaloñeshi kulonda muhaneña ñakwilu jikukolesha antu. Monenuña mpanji yawatudizi yamukachi kamulungu nenu yalema. Neyi anayinki mudimu muchipompelu, wuzatenu mukunyakashana. Bayi mutoñojokaña nenu mudimu wunayinkiwu wamukunkulwayiku nawa nenu kwila mumanishilahu mpinji nehi. Zatenuña nañovu kulonda muwahishiku nzatilu yenu. (Yish. 22:29) Neyi muzataña nañovu mumudimu waYehova, mukwikala ibwambu dindi nawa mukwikala namuzañalu chikupu. (Ñal. 6:4) Mukutiyaña wanyi kutama neyi akwenu ayinka mudimu wumwafwilaña.—Rom. 12:15; Ñal. 5:26.
Yuma Yalema yakuSpiritu
w20.02 12, chikasha
Twamukeña Nankashi Yehova Tata Yetu
Komana Yehova Wañiluka?
Mwadihulahu dehi nenu, ‘Komana Yehova wañiluka ninami, hakachi kawantu amavulu ashakamaña hamaseki?’ Neyi dimu, mudi hakachi kawantu amavulu adi hamaseki adihulaña ilu lwihu. Mwanta Davidi wasonekeli nindi: “Eyi Yehova, muntu wudi ñahi mwaka wumwiluki? Mwana kamuntu wudi ñahi mwaka wumushi kumuchima?” (Mas. 144:3) Davidi welukili chikupu nindi Yehova wamwiluka chiwahi. (1 Kushi. 17:16-18) Yehova washimunaña Mwizu dindi nikuloñesha kwindi nindi wamonaña chimwamukeña. Talenu mazu akela Mwizu daNzambi anateli kuyikwasha kwiluka chumichi:
• Yehova wayilukili henohu kanda muvwaliki.—Mas. 139:16.
• Yehova weluka yuma yidi mumuchima wenu nawa neluki yuma yimunakutoñojoka.—1 Kushi. 28:9.
• Yehova watiyaña kulomba kwenu hamuntu-hamuntu.—Mas. 65:2.
• Yilwilu yenu yinateli kumuzañalesha Yehova hela kumuneñesha.—Yish. 27:11.
• Yehova wayikokela kwakwihi nayena.—Yow 6:44.
• Neyi munafwi, Yehova wayiluka chiwahi nawa wakayisañula. Wakayinka mujimba wawuha niyitoñojoka neyi yimukweti. Mwakekala nayilwilu niyitoñojoka yoyimu.—Yow. 11:21-26, 39-44; Yilw. 24:15.
FEBRUARY 27–MARCH 5
YUMA YALEMA YAMWIZU DANZAMBI | 1 KUSHINDULULA 20-22
“Kwashenu Atwansi”
“Kunjikaku Yumiyi Kudi Antu Ashinshika”
Tañenu 1 Kushindulula 22:5. Hadaha Davidi watoñojokeli nindi Solomoni washikililimu wanyi kuzata iwu mudimu walema. Muloña tembeli yadi kwikala ‘yeneni nankashi’ nawa Solomoni haniyi mpinji ‘wachidiña kansi nawa kanda apami.’ Ilaña, Davidi welukili nindi Yehova wukumukwasha Solomoni kuzata iwu mudimu wunamwinkiyi. Dichi Davidi washili maana hakumukwasha nawa waloñesheli yuma yayivulu yakuzatisha.
“Kunjikaku Yumiyi Kudi Antu Ashinshika”
Davidi walekeli wanyi kumukwasha, nakuchina nindi wakaya mpuhu wanyi chineli diwakatuña wanyi tembeli. Tembeli yatuñiliwu ayiteneneña nawu tembeli yaSolomoni, bayi yaDavidi. Hela chakwila Davidi waneñeli hamuloña wakubula kwila chuma chakeñeleñayi, wamukwashili Solomoni. Waloñesheli akwakuzata niyuma yakuzatisha yidi neyi yikuñu, wuneñu, siliva niwuru kushilahu nimbawu janyisida. Wamukolesheli Solomoni nindi: “Eyi mwanami, Yehova ekali naneyi wumonaña kuwaha wakatuñi itala daYehova Nzambi yeyi mwakuteneneniyi.”—1 Kush. 22:11, 14-16.
Anvwali, Munakukwasha Mwanenu Yakapapatishewi?
Aeluda amuchipompelu, atela kukwasha mudimu wawanvwali kuhitila mukuhosha hayuma yakuspiritu yatela kwilawu anyanawu. Muhela wumu wazatili wupayiniya hadi yaaka kubadika ha 70, wanukili mpinji yahanjekeliyi naManakwetu Charles T. Russell henohu wudi nayaaka 6. Wahosheli nindi, “Twahanjekeli hayuma yakuspiritu yinafwilileña kwila hadi maminiti 15.” Mwamweni, neyi mukolesha muntu namazu amawahi, wakayanukaña mpinji yejima. (Yish. 25:11) Aeluda anateli cheñi kwinka anvwali nianyanawu nyidimu yakuwahisha Itala daWanta, anyana anateli kuyinka nyidimu yinesekani nayaaka yikwetiwu.
Antu amuchipompelu niwena atela kukwashana kuhitila mukudikunda nawatwansi amuchipompelu. Munabombeli kumona neyi anakupaminaku kuspiritu. Komana kansi neyi nakwakula, wakulaña chakufuma hamuchima hela wahanaña chiwahi mpanji hakupompa kwamukachi kamulungu? Komana washindahu dehi kweseka hela washimwinahu dehi akwawu akashikola? Nyakalenuña kuyisakilila atwansi chakufuma hamuchima. Komana kwila muhanjekaña nawatwansi henohu kupompa kanda hela hanyima yakupompa nehi? Neyi twilaña mwenimu nikwila yuma yikwawu, atwansi akumona nawu niwena ekala “muchipompelu cheneni.”—Mas. 35:18.
Yuma Yalema yakuSpiritu
w05 10/1 11 ¶6
Yikuma Yamaneni Kufuma muMukanda wa 1 Kushindulula
21:13-15. Yehova walejeli kañelu kulekesha chipupu muloña Nzambi wamweni chakabaakeneña antu Jindi. Mwamweni, “luwi lwindi lwabadika chikupu.”