Munafumi Nsañu Yakuzatisha muChihandilu niMudimu Wanetu AkaKristu Mukanda waKupompa
© 2023 Watch Tower Bible and Tract Society of Pennsylvania
SEPTEMBER 4-10
YUMA YALEMA YAMWIZU DANZAMBI | ESITA 1-2
“Fwilenuña Kwikala Adikehesha Neyi Esita”
Munateli Kwikala Adikehesha Hela Anayeseki
11 Tunateli kutachika kudinka wanta neyi antu atachika kutuhameka. Toñojokenu hañakwilu yayiwahi yaEsita chiyafwomweni kukala kwejima. Wadiña mumbanda walubanji nankashi nawa hachaaka-hachaaka amwinkeleña yuma yayiwahi nankashi. Wahanjikileña cheñi hefuku-hefuku nawatunkaña amuChiyuulu chawaPeresi wejima afwilileña nawu mwanta yayimoni kuwaha. Ilaña, wadiwunjikili nawa wahosheleña nakalemesha. Watwalekelihu kudikehesha nicheliliyi mwanta yamutondi kwikala mwadi.—Esita 2:9, 12, 15, 17.
Wahakwililuku Antu jaNzambi
15 Chelili mpinji yinashiki dehi yakumutwala Esita kudi mwanta, amwitejeli kutonda yuma yidi yejima yakeñeleñayi, hadaha yakudiwahisha nachu chikupu. Muloña wakwila wadiña wadizoza, halombeli chuma chikwawu kubadika hayuma yamutoñweleluwu kudi Hegayuku. (Esita 2:15) Chakadi nikujina welukili nindi lubanji hohu hilunateli kumutiyisha mwanta kuwahaku, ilaña yililu yakudizoza yabulili kwikala nawantu amuchipañu diyinateli kumutiyisha kuwaha. Komana watoñojokeli mwalala?
Munateli Kwikala Adikehesha Hela Anayeseki
12 Kudikehesha kwatukwashaña kulemesha akwetu ninetu aweni kuhitila munvwalilu nimummwekenu yetu. Chatela tutachiki kuditiya hela kwila yuma yimu yikuletesha antu atulemesheña, twatela kumwekesha ‘spiritu yakuwunda nikwovwaha.’ (Tañenu 1 Petulu 3:3, 4; Yere. 9:23, 24) Mukuhita kwampinji, twakadimwekesha chitwekala muyilwilu yetu. Chakutalilahu, tukutachika kumwekesha yilwilu yimu yinakumwekesha nawu twakeña nyidimu yikwawu yitukweti, tweluka yuma yayivulu, hela twadiluka chikupu nawamanakwetu alombolaña. Hadaha, tukutachika kuhosha yuma chakwila antu akutachika kutuhameka hayuma yitwazatili nawakwetu. Yesu niyena watwimikila chakutalilahu chachiwahi. Yuma yayiwahi yikwawu yahosheliyi hayifumishileña hela hiyakundamini kuNsona yachiHeberuku. Wahosheli muniyi njila kulonda antu eluki nawu yuma yahosheleñayi yafumineña kudi Yehova bayi chatoñojokeleñayiku.—Yow 8:28.
Yuma Yalema yakuSpiritu
Komana Mweluka?
Akakuvumbujola awanini muvuñilu wakusoneka mwidimi dachiPeresi hadina nsona yateneni iyala wejina daMarduka (muLunda Modekayi). Wadiña mukulumpi wamudimu, hadaha mukakutala mali, muShushani. Hampinji yawaniniwu iwu muvuñilu, Arthur Ungnad, wadiña nkuluñaña munsañu jakunyaaka jakunidi iluña, wasonekeli nindi aka dikadiña katachi kumutena “Modekayi mumuvuñilu wabulili kwikala nansañu yamuBayibolu.”
Kufuma tuhu hashimwiniyi Ungnad iwu wunsahu, antu adiza chikupu anabalumuni nyivuñilu yikwawu yayivulu yamwidimi dachiPeresi. Hakachi kayumiyi, hadiña nimalola awubasa aPeresepolisi, awaniniwu muChisweku chakisiliwu, chadiña kwakwihi nambañu jamusumba. Awa malola awubasa ayisonekeli kunyima hampinji yayuulileñayi Xerxes I. Ekala mwidimi dachiElami nawa mwawanikaña majina amavulu ekala mumukanda waEsita.
Hamalola awubasa amavulu aPeresepolisi hekala ijina daMarduka, wakalakeleña mudimu wawunsoneki kuchipañu muShushani hampinji yayuulileñayi Xerxes I. Ilola dimu dawubasa damulumbulwili Marduka nawu wadiña mukakubalumuna. Iyi nsañu yinesekani nachamulumbululawu Modekayi muBayibolu. Wadiña chilolu wadiña nakukalakela muchota chaMwanta Ahasuwerusi (Xerxes I) nawa wahosheleña madimi ayedi. Mpinji yejima Modekayi washakamineña muchiisu chachipañu chamwanta muShushani. (Esita 2:19, 21; 3:3) Ichi chiisu chamwanta dadiña hiitala deneni mwazatilileñawu ayilolu amuchipañu.
Hadi kudifwana nankashi hakachi kaMarduka ashimunawu hamalola awubasa niModekayi ashimunawu muBayibolu. Adiñaku hampinji yoyimu nimwiluña dodimu, nawa adiña hachifulu chochimu niheluña dakuzatila dodimu. Iku kudifwana kwejima kunakumwekesha nawu iwu wunsahu wawaniniwu akakuvumbujola, wunakundami kudi Modekayi ashimunawu mumukanda waEsita.
SEPTEMBER 11-17
YUMA YALEMA YAMWIZU DANZAMBI | ESITA 3-5
“Kwashenu Amakwawu Kulonda Ashikihu Chikupu”
it-2 431 ¶7
Modekayi
Nakaani Kumufukamina Hamani. Hamani mwana mwini Agagi amwinkeli wukana mpumba kudi Ahasuwerusi, walejeli antu ejima amuwanta nindi adibuukeña kudi yena muloña wachifulu chamwinkeliwu. Modekayi wakaanini kudibuka nakudifukula kudi yena nawa wamulejeli nindi yena hikaYudeya. (Esi 3:1-4) Chineli Modekayi wahosheli muniyi njila chinakumwekesha nawu hikaYudeya wadihana, kudi Yehova Nzambi yindi. Welukili nindi kumubandamina hamaseki Namani munadibombeli kunoñama hohu wanyi ilaña munadibombeli kubandamina muntu wadinyamuna, eyi chelileña aIsarela kunyima, welukili nindi kwila mwenimu hikulemesha muntu wabadika nawu hinyuuli. (2Sa 14:4; 18:28; 1An 1:16) Kudi chuma chaletesheli Modekayi abuli kudibuka nakudifukula kudi naHamani. Hamani hadaha wadiña mwini Amaleki, nawa Yehova washimwini nindi wukuzuñaña njita nawaAmaleki “kufuma kwikiñu dimu nakushika kwikiñu dikwawu.” (Kwi 17:16; talenu HAMANI.) Wadiña hohu washinshika kudi Nzambi bayi mukudiñija mujatuñaku.
it-2 431 ¶9
Modekayi
Amuzatishili Kwamwina aIsarela. Haniyi mpinji yakeñeleñawu kujilumuna aYudeya ejima adiña muwanta, Modekayi welukili nindi Esita amuleteli muwanta haniyi mpinji kulonda amwini aYudeya. Wamulejeli Esita nindi wukweti mudimu walema nawa wamulejeli nindi amutiyi kuwaha nikumukwasha kudi mwanta. Hela chakwila chumichi chashili wumi waEsita muwubanji, wetejeli kulondela mwamulejeliwu.—Esi 4:7–5:2.
Wahakwililuku Antu jaNzambi
22 Esita watela wayitiyili woma nankashi chatiyiliyi awa mazu. Chikuhwelelu chindi achesekeli chikupu. Chamwakwiliyi Modekayi chamwekeshaña nawu watiyili woma. Wamwanukishili lushimbi lwamwanta. Neyi muntu yaya kudi mwanta chakubula kumutambika akumujaha. Nateli kuhanda hohu neyi mwanta amwolwela nkunyi yawuru. Komana Esita wakuhweleleli nindi akumujaha wanyi, sweje-e dinu nachuma cheliliyi Vashitayi chakudikaña hampinji yamutambikiluwu kudi mwanta? Esita wamulejeli Modekayi nindi hanahiti mafuku 30 chakubula kumutambika kudi mwanta. Chineli mwahitili mafuku amavulu chakubula kumutambika, wajinokeleña neyi chakwila mwanta wahimpili yitoñojoka yindi nawa hamukeñeleña nawa cheñuku.—Esita 4:9-11.
23 Modekayi wakwili munjila yakolesheli chikuhwelelu chaEsita. Wamulejeli nindi neyi yakañanya kuzatilahu, wamwinu wawaYudeya wadi kufuma kwacheñi. Hanu dinu Esita wadi kupuluka neyi atachika kuyiyandisha? Modekayi wamwekesheli nindi wamukuhweleleli Yehova chikupu, wabulaña kwiteja antu Jindi kuyijilumuna nawa washikijaña yikaninu Yindi. (Yosh. 23:14) Kuhiñahu Modekayi wamwihwili Esita nindi: “Kwiji chiwunenzi muwanta wunenjili nsañu yoyeniyi; wukuchiluka hinyi?” (Esita 4:12-14) Komana hitwatela kumwimbujola Modekayuku? Wamukuhweleleli chikupu Nzambi yindi, Yehova. Komana ninetu twamukuhwelela Yehova?—Yish. 3:5, 6.
Yuma Yalema yakuSpiritu
Twalwishaña Kulonda Twikali Akasunuka Kudifukula Neyi Atukañesha
14 Kufwana Esita naModekayi akushankulu, antu jaYehova makonu alwishaña kulonda ekali akasunuka hakudifukula kudi Yehova kwesekeja nachayilejayi. (Esita 4:13-16) Ninenu munateli kulwisha? Eña. Munateli kuyilombelaku amanakwenu niahela anakukabakana hanyiloña yinakuyikasilawu. Kulomba muniyi njila kunateli kukwasha amanakwetu niahela anakuhita mukukala nimumakabi. (Tañenu Yakoba 5:16.) Komana Yehova watiyaña kulomba kwamuchidiwu? Nyiloña yitwashindaña yamwekeshaña chikupu nawu watiyaña!—Heb. 13:18, 19.
SEPTEMBER 18-24
YUMA YALEMA YAMWIZU DANZAMBI | ESITA 6-8
“Yuma Yitwadizilaña Kukuhanjeka Chiwahi”
Wakoñeli Mwamaana, Chakadi Woma nawa Wadihanini
15 Muloña wakwila Esita wadiwunjikili, nakwimena mpinji yayiwahi yakushimuna chuma chakeñeleñayi kudi mwanta, chumichi chaleñeleli Hamani yadisawishi yomweni. Komana Yehova Nzambi hidiyi waleñeleli tulu tuumumi mwanta mumesuku? (Yish. 21:1) Dihafuma Izu daNzambi kutukolesha nawu twikali ‘nachililu chakuchiñilila.’ (Tañenu Mika 7:7.) Neyi tumukuhwelela Nzambi nikuchiñilila kulonda yazatiluhu, tukwiluka netu nateli kuwana njila yayiwahi yakumanishilamu kukala kwetu kubadika etu aweni.
Wahosheli Chakubula Woma
16 Esita wamweni nindi chikuwaha wanyi neyi yabula kumuleja mwanta cheñi; hachawija chamuchiyedi wamulejeli mwanta yuma yejima. Hanu dinu wateleli kumuleja mpinjinyi? Mwanta wamwilili cheñi nindi yalombi chuma chakeñeleñayi. (Esita 7:2) Esita welukili nindi “mpinji yakuhosha” yashikili.
Wakoñeli Mwamaana, Chakadi Woma nawa Wadihanini
17 Esita watela walombeli mumuchima kudi Nzambi yindi henohu kanda yahoshi awa mazu nindi: “Eyi mwanta, neyi nawani wuselewa kumesu eyi, neyi mwanta natiyi kuwaha, nakeñi nami anyinki wumi wami, nalombi nami anyinki ataña jami.” (Esita 7:3) Ilukenu nenu wamulejeli mwanta nindi walemesheli chuma chafuukwiliyi mwanta hayuma yamweniyi nindi yayiwahi. Esita wadiña wambukaku chikupu naVashitayi, wadiña ñoda mwanta, wamusawishili nfumwindi mumushikila. (Esita 1:10-12) Kubombelahu, Esita hamuhosholeli mwanta hamuloña wakumukuhwelela Hamanuku. Ilaña wamulembeleli mwanta kulonda yakiñi wumi windi wadiña hakatoña.
Wakoñeli Mwamaana, Chakadi Woma nawa Wadihanini
18 Chuma chalombeliyi Esita chamuhayamishili mwanta chikupu. Muntwinyi wakeñeleña kujaha mwadi windi? Esita watwalekeluhu nindi: “Atulanda dehi, ninami niantaña jami, nawu atujilumuni, atujahi, atunoñeshi. Neyi akumina dakutulanda kwamuwuduñu twikali anduñu amayala nawambanda, nadi kudimwenena tuhu kwami, hela chenochu ntahi, mukwankunyi wadi kumufuntishila cheñi mwanta yuma yanamubondiyi wanyi.” (Esita 7:4) Ilukenu nenu Esita washimwini iku kukala chakubula kuhita mumbadi, ilaña wabombeleluhu nindi wadi kudimwenena neyi ayilandishili muwuduñu. Wateleleli kushimuna iyi nsañu yakujilumuna aYudeya ejima muloña nimwanta adi kumubonda.
19 Chakutalilahu chaEsita chatudizishaña yuma yayivulu kutalisha hakwiluka chakushinjila antu. Neyi chakwila munakukeña kushimuna kukala kweneni kudi muntu imwakeña hela muntu wayibadika ñovu, mwatela kudiwunjika, kwikala nakalemesha nikwikala ashinshika.—Yish. 16:21, 23.
Yuma Yalema yakuSpiritu
w06 3/1 11 ¶1
Yikuma Yamaneni Kufuma muMukanda waEsita
7:4—Kujilumuna aYudeya ejima ‘kukuleta ñahi kukala nikudi mwanta’? Chahosheliyi nsañu yakulandisha aYudeya muwuduñu mukubabala, Esita waleteli nsañu yikuleta kukala kudi mwanta neyi ayijilumuna. Yikunku yasiliva 10,000 yashiikiliyi Hamani yadiña yalema wanyi kudi mwanta kubadika maheta adi kwinza neyi Hamani walandishili aYudeya muwuduñu. Neyi aka kafuta kazatikili mwanta wadi kujimbesha mwadi windi.
SEPTEMBER 25–OCTOBER 1
YUMA YALEMA YAMWIZU DANZAMBI | ESITA 9-10
“Hazatishili Wuswa Windi Chatamaku”
it-2 432 ¶2
Modekayi
Ichi Modekayi namusinsi Hamani nakwikala kanampumba nawa mwanta wasubwili kazeya kindi kawanta kulonda afwachikeña nachu nyikanda. Esita wamwinkeli Modekayi mudimu wakutala yuma yaHamani yejima, yamwinkeliwu kudi mwanta. Kuhiñahu Modekayi wazatishili lushimbi lwamwanta kulonda ayinki aYudeya wuswa wakudikiña kulonda adihakwileñaku. Iyi yadiña mpinji yawamwinu kudi aYudeya nawa yamuzañalu. Antu amavulu adiña muwanta wawaPeresi ahakwilileñaku aYudeya, nawa chashikili ifuku damu 13 dakakweji dakakweji kaAdari, ifuku dakutiyilila kunshimbi dashikili, nawa aYudeya adiloñesheli. Anyuuli amakwawu emeni kunyima yawu muloña Modekayi wadiña nachifulu cheneni. MuShushani azuñili kushika nifuku dalondelelihu. Ajahili ayilumbu jawaYudeya akubadika ha 75,000 muWanta wawaPeresi, kushilahu nianyana kaHamani awamayala 10. (Esi 8:1–9:18) Hanyima yakwila Esita neteji Modekayi wahanini lushimbi lwakwanakana chawija chahachaaka hefuku damu 14th ni 15th dakakweji kaAdari, “mafuku aPurimi mafuku achawija nikuzañalala akwanukañawu nawa akudinkelamu yakuda wumu namukwawu nikwinka atuzweñi yawaana. AYudeya etejeli nawa adikasili nawu akwanakanaña chawija nawanyanawu niejima adibombeli nawu. Chineli wadiña chinlonda muwanta, Modekayi amulemeshi nankashi kudi antu adihana kudi Nzambi aYudeya nawa watwalekelihu kuyizatila.—Esi 9:19-22, 27-32; 10:2, 3.
it-2 716 ¶5
Purimi
Nkeñelu. Hela chakwila antu amakwawu ahoshaña nawu chawija chaPurimi chanukañawu antu amakwawu amakonu mwadibombela jachisemwa kupandakana jakwitiya nawa mpinji yikwawu ashañamu yuma yabuliliku, dichachanukileñawu hampinji yachitachikiliwu wanyi. Ejima wawu aModekayi naEsita añamba aYehova Nzambi walala, nawa ichi chawija chekaliliku kulonda amulemesheña Yena. Yehova Nzambi diyi wayamwinini aYudeya hayina mpinji, muloña iyi nsañu yenjili hamuloña wakashinshi kazatishiliyi Modekayi hamuloña wakudifukula kudi Yehova. Hadaha Hamani wadiña kaAmaleki, muza washiñiliyi Yehova nawa wateneniyi nindi watela kuwujilumuna. Modekayi walemesheli nshimbi jaYehova nawa wakaanini kudifukula kudi Hamani. (Esi 3:2, 5; Kwi 17:14-16) Cheñi, mazu amusonekeleliwu Esita kudi Modekayi (Esi 4:14) amwekeshaña nawu washindameneni hañovu jaNzambi kulonda ayipulwishi aYudeya nawa Esita chajiñiliyi nzala henohu kanda ayi kudi mwanta nakulomba chuma chakeñeleñayi, chamwekeshaña nawu walombeli wukwashi kudi Nzambi kulonda amukwashi.—Esi 4:16.
cl 101-102 ¶12-13
“Mwimbujolenuña Nzambi” haKuzatisha Wuswa
12 Yehova washaku akulumpi kulonda alomboleña chipompelu chawakaKristu. (AHeberu 13:17) Awa amayala ashikahu atela kuzatisha wuswa wayinkawu kudi Nzambi kulonda akwasheña nikwakamena anyikoku. Komana chifulu chayinkawu chakwikala akulumpi chatalisha mukwila nawu ekaleña anyanta hadi akwawu akakwitiya? Inehi! Akulumpi atela kwikala adizoza ninammwenu yayiwahi, nachifulu chikwetiwu muchipompelu. (1 Petulu 5:2, 3) Bayibolu yalejaña akulumpi nawu: “Mubiñeña chipompelu chaNzambi, chalandiliyi namashi aMwanindi.” (Yilwilu 20:28) Dichi atela kwakamenaña muntu wejima wamuchipompelu chachiwahi.
13 Twatela kulumbulula ñana. Ibwambu denu nayileji nindi mumuhembeliku chuma chalemeshayi. Muneluki nenu ibwambu denu wachilandili namali amavulu. Komana mukuchihemba wanyi chachiwahi namuchima wejima? Munjila yoyimu, Nzambi wayinka akulumpi mudimu wakwakamena iheta dalema: chipompelu, antu ekalamu anayesekeji nanyikoku. (Yowanu 21:16, 17) Yehova wakeña nankashi anyikoku yindi, kafwampi wayilandili namashi alema aMwanindi akeñayi, Yesu Kristu. Yehova hadi kufweta wuseya weneni kukoola nyikoku yindiku. Akulumpi adizoza anukaña chumichi nawa akamenaña chiwahi nyikoku yaYehova.
Yuma Yalema yakuSpiritu
w06 3/1 11 ¶4
Yikuma Yamaneni Kufuma muMukanda waEsita
9:10, 15, 16—Hela chakwila nshimbi yetejeli kupuupa yuma kunjita, muloñadi aYudeya chabuliliwu kupuupawu? Chakadi nikujina, chuma chacheni chaletesheli akeñeleña kudikiña bayi kudiheteshaku.
OCTOBER 2-8
YUMA YALEMA YAMWIZU DANZAMBI | YOBA 1-3
“Twalekenuhu Kumwekesha Nenu Mwamukeña Chikupu Yehova”
Imbujolenu Chikuhwelelu niKwovwahila kwaNowa, Danyeli niYoba
16 Kukala kwamweniyi Yoba. Kukala kwamweniyi Yoba kwambukaku chikupu. Henohu kanda yamoni yihuñu, “wabadikili antu akumusela ejima.” (Yoba 1:3) Wadiña namaheta chikupu, wadiña waya mpuhu nawa amulemesheli chikupu. (Yoba 29:7-16) Hela chakwila Yoba wadiña nayuma yejimiyi, wadiña wadivwimba wanyi nawa hamudiwili Nzambiku. Yehova wamuteneni nindi “kambuñami,” wabombelelihu nindi: “Muntu waakama Nzambi, waambuka kuyuma yatama.”—Yoba 1:8.
17 Chihandilu chaYoba chahimpikili neyi mukulabula kwadisu. Washikeneni kwikala kazweñi nawa muntu wamukunkulwayi. Tuneluki wakojejeli netu hiSatana mukwakutwamba, watwambili nindi Yoba wadifukulaña kudi Nzambi muloña wayuma yamwinkayi. (Tañenu Yoba 1:9, 10.) Yehova wafumishilihu wanyi kuna kutwamba kwahamesu bwi-i. Ilaña, wamwitejeli Yoba yamwekeshi kashinshi kindi, yamwekeshi nindi wadifukwileña chakufuma hamuchima bayi muloña wayuma yamwinkeliwuku.
Hembenu Kashinshi Kenu!
10 Nsañu yahosheliyi Satana hadi Yoba yinatukundami ñahi ninetu? Satana wahoshaña nindi mwamukeña wanyi Yehova Nzambi, munateli kuleka kumukalakela kulonda mudipulwishi nawa nindi kashinshi kenu kakutwamba. (Yoba 2:4, 5; Chim. 12:10) Awa mazu ayitiyishaña ñahi? Ayitiyishaña kutama, netu? Hela chochu, ilukenu nenu: Yehova wayikuhwelela dichayinkelayi nyidimu yayivulu. Yehova wamwitejaña Satana kweseka kashinshi kenu. Yehova wayikuhwelela chikupu nindi munateli kutwalekahu kwikala ashinshika nawa nateli kuyikwasha kumwekesha nawu Satana hisakutwamba. Wakana nindi wukuyikwashaña kwikala ashinshika. (Heb. 13:6) Hikukooleka chikupu kuyikuhwelela kudi Mwanta wakuleña kwejima! Munamoni kashinshi chikalemena? Katukwashaña kwiluka netu Satana hisakutwamba, katukwashaña kuhakwilaku ijina dadiwahi daTata yetu nichiyuulu chindi. Tunateli kutwalekahu ñahi kwikala nakashinshi?
Yuma Yalema yakuSpiritu
Yuma Yitunateli Kudizila Kumazu aYesu Akukumishaku
9 Yesu wahosheli nindidi? Kwakwihi nakufwa kwindi, Yesu wabidikili nindi: “Nzambi yami, Nzambi yami, wunanshiyilidi nkawami?” (Mat. 27:46) Bayibolu yalumbulula wanyi chaletesheli Yesu yahoshi awa mazu. Hela chochu, toñojokenu hayuma yitunateli kudizila kunawa mazu. Chuma chimu chitukudizilaku kunawa mazu, Yesu washikijileña wuprofwetu wekala haMasamu 22:1. Cheñi, awa mazu amwekesheleña nawu Yehova hashili “ikoli kwi-ndo” dakumukiña nachu Mwanindiku. (Yoba 1:10) Yesu welukili nindi Tata yindi wamuhanini chikupu mumakasa awayilumbu jindi kulonda amweseki chikupu kushika nikukufwa, kwosi muntu esekawu dehi chamuchidiwuku. Kubombelahu, awa mazu amwekesheleña nawu wadiña wanyi namuloña wateleleliwu kumujahilahu.
OCTOBER 9-15
YUMA YALEMA YAMWIZU DANZAMBI | YOBA 4-5
“Soñamenu naNsañu Yakutwamba”
it-1 713 ¶11
Elifazi
2. Wadiña wumu hakachi kawamabwambu jaYoba asatu. (Yoba 2:11) Himwini Temani, hadaha wadiña wamuchisaka chaNa. 1 dichi wadiña wamuchisaka chaAbarahama nawa ntaña yaYoba wakutonta. Yena niakwawu aditiyili hamaana awu. (Yere. 49:7) Hadi awa “akakukudeja,” asatu Elifazi diyi wadiña walema nawa waswejeli kuhosha, hadaha diyi wadiña nimukulumpi. Yena diyi wadiña watachi kuhosha mapampa kasatu ahosheleñawu nawa wahosheli mazu amavulu.
w05 9/15 26 ¶2
Kanenu Yitoñojoka Yatama!
Chanukiliyi chuma chakuhayamisha chamweniyi hampinji yimu, Elifazi wahosheli nindi: “Spiritu wahitili kumesu ami; Mujimba wejima wendeli. Kuhiñahu, wemeni kuka-a, Ilaña namwilukili wanyi. Kumesu ami kwemeni chuma; Kwamweneni nzo-o, nawa kuhiñahu natiyili izu nawu.” (Yoba 4:15, 16) Yadiña spiritu yamuchidinyi yaluwañesheli yitoñojoka yaElifazi? Mazu atama ahosheliyi amwekeshaña nawu spiritu yamuluwañesheli hiyadiña añelu jaNzambi aloñaku. (Yoba 4:17, 18) Wadiña spiritu watama. Hanu dinu muloñadi Yehova chamuzuwililiyi Elifazi niakwawu ayedi hakuhosha makudi? (Yob 42:7) Eñañi, Elifazi amuluwañesheli kudi ndemoni. Mazu ahosheleñayi amwekesheleña nawu hiyafumineña kudi Nzambiku.
Kaanenu Nsañu jaKutwamba jaSatana
Satana wazatishili Elifwazi, wahakachi kawalunda jaYoba asatu amwendeleleli, kulonda kutadika nindi antu hiyanateli kutwalekahu kwikala ashinshika kudi Nzambuku. Hakutena antu nindi “ashakama mumatala amaseki,” wamulejeli Yoba nindi: “Afuma mulunkuñu, achikekaña neyi kabubu? Elaña budidi adi kwoku, namelela anachikeki dehi puchi-puchi, ajilumukaña chakadi niniwu wukutalaku.”—Yoba 4:19, 20.
Nsona jikwawu jatufwanisha ‘kunsaba jamawumba,’ nuñu jamawumba. (2 Kor. 4:7) Twekala azeya muloña twaswana nshidi nikubula kuwanina. (Rom. 5:12) Neyi tudimena, chaswayi kutwilukuka kudi Satana. Ilaña hakwikala akwaKristu, Yehova watukwashaña. Hela chakwila twazeya, twekala alema kumesu aNzambi. (Isa. 43:4) Kubombelahu, Yehova wayinkaña spiritu yajila antu amulombaña. (Luka 11:13) Spiritu yindi yinateli kutwinka “ñovu jabadika nankashi,” kulonda kutukwasha kuumika makabi atuletelañayi Satana. (2 Kor. 4:7; Fwi. 4:13) Neyi tudikaña naDiyabolu, ‘nakukola muchikuhwelelu,’ Nzambi wakatukolesha. (1 Pet. 5:8-10) Dichi, hitwatela kutiya Satana Diyabolu womaku.
mrt 32 ¶13-17
Dikiñenu kuNsañu Yakutwamba
● Ilukenu kunafumi oyu nsañu nichiyinakuhosha
Chahoshaña Bayibolu: “Esekenu yuma yejima.”—1 ATesalonika 5:21.
Henohu kanda mwiteji hela kutemesha nsañu, hela chakwila anayiluki hela anayihoshi munyijimbu yansañu, sambilenu kushinshika kulonda mumoni neyi yalala. Munjilanyi?
Keñakeñenu mwiluki neyi oku kunafumi oyu nsañu akuhwelela. Makampani asonekaña nsañu nimakuloñesha amakwawu anateli kulebumuna nsañu kulonda akwati mali hela muloña wajipolitiki. Neyi munatiyilili nsañu yesekejenu nayakwacheñi kulonda mumoni neyi yalala. Mpinji jikwawu, amabwambu jetu anateli kututemeshela nsañu yakutwamba kuzatisha emelu hela kuzatisha njila jikwawu jakuhanjekelamu. Dichi, bayi mukuhwelela nsañu sampu muneluki kuyinafumi.
Ilukenu chikupu nenu oyu nsañu yakatataka nawa yalala. Talenu mafuku, wunsahu walala niwunsahu waweni wunakumwekesha nawu oyu nsañu yalala. Ikalenu ababala neyi nsañu yakala yinakumwekana neyi anayipeleshi hela neyi anayihoshi munjila yikuneñesha antu hela kuyizañalesha.
Yuma Yalema yakuSpiritu
w03 5/15 22 ¶5-6
Imanenu Chakola, nawa Shikenu Kumufunda Wawumi
Kwikala mukuloñesha kwawakakudifukula alala mukaayi kejima kunateli kutukwasha kwimana chakola. Hikukooleka chikupu kudikunda nanawa amanakwetu akweti kukeña mukaayi kejima! (1 Petulu 2:17) Nawa ninetu tunateli kuyikwasha akwetu akakwitiya kwimana chakola.
Talenu yuma yakukwasha yeliliyi muntu waloña Yoba. Nikundeji wakutwamba Elifazi wetejeli nindi: “Mazu eyi anyamwineña muntu wejima wahukeneña, Nawa wakolesheleña antu akañenyeña kwimana nkawawu.” (Yob 4:4) Indochu etu? Wejima wetu hamuntu-hamuntu tukweti mudimu wakukwasha amanakwetu niahela kuspiritu kuumika mumudimu waNzambi. Neyi tunakuhanjeka nawu, tunateli kuhanjika nawu kwesekeja nanawa mazu: “Koleshenu makasa azeya, nawa koleshenu manuñu anakuzaala.” (Isaya 35:3) Komana kwila mukoleshaña muntu wumu hela akaKristu ayedi hampinji yejima yimunadiwani nehi. (AHeberu 10:24, 25) Mazu akuhameka nikusakilila hachinakuzatawu nañovu hakumutiyisha Yehova kuwaha anateli kuyikwasha kutwalekahu kwimana chakola nakufwila kushika kumufunda wawumi.
OCTOBER 16-22
YUMA YALEMA YAMWIZU DANZAMBI | YOBA 6-7
“Neyi Chihandilu Chinakoli”
w06 3/15 14 ¶10
Yikuma Yamaneni Kufuma muMukanda waYoba
7:1; 14:14—Awa mazu atalisha mudihi “mudimu wakola” hela “wuduñu”? Makabi amweniyi Yoba aswejeli chakwila watoñojokeli nindi chihandilu chindi chakalili, chawuduñu. (Yob 10:17, tumazu twaheshina) Chineli mpinji yayañayi muntu muShelu, kufuma mpinji yafwañayi nayakasañukayi, yekala yakukanjikija, Yoba wesekejeli iyi mpinji nawuduñu.
“Yehova . . . Wayamwinaña Antu Akweti Spiritu Yachikeka”
MPINJI yikwawu tunateli kutoñojoka hawumi wetu ochi wekala wakapinji kantesha nimafuku etu chekalawu ‘akumona kwayihuñu.’ (Yoba 14:1) Dichi chatama wanyi mpinji yikwawu kuneña. Ambuña aYehova akunyima niwena aneñeleña. Nawa amakwawu akeñeleña nawu afwi. (1 Anya. 19:2-4; Yoba 3:1-3, 11; 7:15, 16) Ilaña Yehova wayikundejeleña mpinji yejima nikuyikolesha. Nsañu yawu ayisonekeli kulonda yitukundejeña nawa tudizileñaku.—Rom. 15:4.
g 1/12 16-17
Neyi Munakutoñojoka Nenu Chihandilu Chinakali
Hela chakwila kukala kumukweti kunasweji chamuchidinyi, anukeñu nenu iyenu munakumona kukala nkawenu wanyi nawa chawushona muntu wejima wudi nakukala kunakumonayi. Bayibolu yahosha nawu: “Yileñaleña yejima yinakwaaba nikukabakana nanyisoñu kushika nikulelu.” (ARoma 8:22) Hela chakwila munakumona nenu kukala kwenu kunakumana wanyi mukampinji kanti, kakavulu yuma yawahaña muhita kwampinji. Chumanyi chinateli kuyikwasha chayinu mpinji?
Lejenuku chimunakutiya muntu imwakuhwelela. Bayibolu yahosha: “Ibwambu walala wamwekeshaña kukeña mpinji yejima Nawa himana kwamuntu wamukwashaña mumpinji yayihuñu.” (Yishimu 17:17) Muntu waloña Yoba, ashimunawu muBayibolu, walejeleñaku amakwawu hampinji yamweneñayi kukala. Chatiyiliyi chuma chateneniyi nindi, “wumi wami nawuheli chikupu,” wahosheli nindi: “Nukushimuna kwaaba kwami. Nukuhosha muloña wayihuñu yami!” (Yoba 10:1). Neyi mulejañaku akwenu kukala kumukweti chineñi chikukeha nawa chikuyikwasha kukuhwelela nenu kukala kumunakumona kwakamana.
Huñununenu muchima wenu kudi Nzambi mukulomba. Antu amakwawu atoñojokaña nawu kulomba hichuma chinateli kuwundisha yitoñojoka yawu, ilaña Bayibolu yahosha chambukaku. Isamu 65:2 damutena Yehova Nzambi nawu “Mukakutiya kulomba,” nawa 1 Petulu 5:7 yahosha nawu: “wayakamenaña.” Bayibolu yatukonkomwenaña chichalemena kumushindamena Nzambi. Chakutalilahu:
“Mukuhweleli Yehova namuchima weyi wejima, nawa bayi wushindamena hamaana eyiku. Munjila jeyi jejima wutoñojokeña hadi yena, nawa yena wakakwolwela njila jeyi.”—YISHIMU 3:5, 6.
“Ejima amutiyaña [Yehova] woma nayuma yakeñañawu; Watiyaña kudila kwawu kwakulomba wukwashu, nawa wayipulwishaña.—MASAMU 145:19.
“Nawa twamukuhwelela Nzambi netu, chuma chejima chitukulomba kwesekeja nankeñelu yindi, watutiyaña.”—1 YOWANU 5:14.
“Yehova wekala kwakulehi namuntu watama, Ilaña watiyaña kulomba kwamuntu waloña.”—YISHIMU 15:29.
Neyi mumuleja Nzambi kukala kumunakumona, wukuyikwasha. Muloña wachumichi, Bayibolu yatukoleshaña nawu, “mukuhwelelenu mpinji yejima . . . Huñununenu nyichima yenu kudi yena.”—Masamu 62:8.
Yuma Yalema yakuSpiritu
Yitiyililenuña, Yilukenuña niKuyimwekeshela Wushona
10 Twatela kumwimbujola Yehova kuhitila mukwiluka amanakwetu niahela. Yilukenu amanakwenu niahela chiwahi. Hanjekenuña nawu henohu kanda mutachiki kupompa nihanyima yakupompa, shimwinenuña nawu nawa neyi chinatwesheki yitambikenuña kulonda mudi nawu yakuda. Neyi mwila mwenimu, mukwiluka nenu nsonyi diyaleteshaña muhela kubula kudikunda nawakwawu. Nawa manakwetu imwamonaña nenu wukweti mali amavulu, hakweti maliku ilaña wekala hohu nachisambu. Hela chisaka chavula kulaba kukupompa chinakuumika ikañesha. (Yoba 6:29) Hela chochu, hitwatela kwikala “akwakudiñija munsañu [jawakwetuku].” (1 Tim. 5:13) Ilaña twatela kuyiluka amanakwetu niahela nikukala kunakumonawu muchihandilu chawu.
OCTOBER 23-29
YUMA YALEMA YAMWIZU DANZAMBI | YOBA 8-10
“Kukeña kwaNzambi kwaKashinshi Kwatukiñaña Kumakudi aSatana”
w15 7/1 12 ¶3
Mwamweni Tunateli Kumuzañalesha Nzambi?
Yoba wamweni makabi amavulu mukulondashana. Watoñojokeli mwaluwa, nakukunkulula nindi Nzambi wamwakamenaña wanyi hela chakwila atwalekahu kwikala washinshika kudi Yena hela nehi. (Yoba 9:20-22) Yoba wadimweneña chikupu nindi waloña chakwila kudi antu amakwawu chatiyakeneña tuhu neyi waloña kumubadika Nzambi.—Yoba 32:1, 2; 35:1, 2.
Kukeña kwaYehova Kwakashinshi Kwayikwashaña Ñahi?
14 Kukeña kwaNzambi kwakashinshi kwatukiñaña. Davidi walombeli kudi Yehova nindi: “Yeyi chiswamu chami, yeyi wukunhemba kuyuma yakala, wukunnyeñumuka natumina twakupuluka. . . . muntu wamukuhwelela Yehova, luwi lwakamukiña kwi-ndo.” (Mas. 32:7, 10) Kunyima, mpwembu yamusumba yakiñileña antu kudi ayilumbu, kukeña kwaYehova kwakashinshi nikwena kudi neyi mpwembu yatukiñaña kuyuma yatama yinateli kuzeyesha wubwambu wetu naYehova. Kubombelahu, kukeña kwaYehova kwakashinshi kwamukwashaña Yehova kuswina kwakwihi nanetu.—Yere. 1:3.
Yuma Yalema yakuSpiritu
“Hinyi Weluka Mwatoñojokañayi Yehova?”
19 Tunadizi yumanyi kutalisha ‘hayitoñojoka yaYehova’? Twatela kwiteja Izu daNzambi ditukwasheña kwiluka chikupu mwatoñojokañayi Yehova. Bayi tusha kubula kuwanina kwetu hadi Yehova nikumusompesha kwesekeja nayililu niyitoñojoka yetuku. Yoba wahosheli nindi: “[Nzambi] himuntu neyi chinidami mwaka nimoni kumwakulaku, mwaka tudiwani hamu nakudisompeshaku.” (Yoba 9:32) Kufwana Yoba, neyi tutachika kwiluka mwatoñojokañayi Yehova, chikutusañumunaña kuhosha netu: “Tiyenu, yumiyi hiyuma yakumpumpu yanjila jindi hohu; twamutiyaña kashawushawu kanti hohu. Chadidimaña nyidimu yindi yañovu mwatweshaña kwilukanyi?”—Yoba 26:14.
20 Chitukutañaña Nsona, twatela kwila ñahi neyi tuwana nsañu yakala kutiyisha, sweje-e kutalisha mwatoñojokañayi Yehova? Neyi tusandujola hansañu ilaña tukañanya kuyitiya, chumichi twatela kuchimona netu hikweseka kwachikuhwelelu chetu mudi Yehova. Anukenu nenu, mpinji yikwawu nsañu yikwawu yatwinkaña mpinji yakumwekesha chitwakuhwelela yililu yaYehova. Tudizozenu nakwiteja netu hitwelukaña yuma yejima yelañayuku. (Mukwa. 11:5) Dichi chikutuleñela kwiteja mazu ahosheli kapostolu Pawulu nindi: “Maheta amaana nayuma yelukayi Nzambi, o chiyakunama! Wuñaji windi, o chiwakañanya kuwiluka! Njila jindi, o chijakañanya kujishinshika! Mwatoñojokayi Yehova welukamu hinyi? Hinyi nashakami nindi hampuña? Muntwinyi wasambilahu dehi kumwinka chuma, mwaka akamufuntishilichu? Muloña yuma yejima yafumaña kudiyena, ayilaña mudi yena, amwililaña yena. Kudi yena kwikali kulema haya nyaka. Amena.”—Rom. 11:33-36.
OCTOBER 30–NOVEMBER 5
YUMA YALEMA YAMWIZU DANZAMBI | YOBA 11-12
“Njila Jisatu Mwakwikalila naMaana niChakuyizatisha”
w09 4/15 6 ¶17
Yoba Walemesheli Ijina daYehova
17 Yumanyi yamukwashili Yoba kukakela kashinshi kindi? Chakadi nikujina, wadiña nawulunda wakola naYehova henohu yihuñu kanda yimumwekeni. Hela chakwila hitukweti wunsahu wakwila nawu Yoba welukili nindi Satana wamwinkeli Yehova muloñaku, wafwilili kukakela kashinshi kindi. Wahosheli nindi: “Hinamba kafumisha kashinshi kamuku, nichinamba kafwa.” (Yoba 27:5) Indi Yoba wekalili ñahi nawulunda weniwu? Chakadi nikujinoka, walemesheli nsañu yatiyiliyi kutalisha hadi Nzambi chazatiliyi nawantaña jindi Abarahama, Isaka, niYakoba. Cheñi kuhitila mukutala yileñaleña, chamukwashili Yoba kwiluka yililu yaYehova yayivulu.—Tañenu Yoba 12:7-9, 13, 16.
Himudi Nkawenuku, Yehova Wudi Nanenu Mpinji Yejima
10 Kwatenuña wubwambu nawakwaKristu ashinshika. Dikundenuña nawantu muchipompelu imunateli kudizilaku, hela chakwila akweti yaaka ninkulilu yambukaku nayenu. Bayibolu yatulejaña nawu “maana ekala kudi atushinakaji.” (Yoba 12:12) Akulumpi niwena anateli kudizila kudi atwansi ashinshika. Davidi amubadikili yaaka kudi Jonatani, ilaña chumichi hichayikañesheli kwikala amabwambuku. (1 Sam. 18:1) Davidi naJonatani adikwashileña wumu namukwawu kumukalakela Yehova hela chakwila amweneña kukala kwakuvulu. (1 Sam. 23:16-18) Muhela Irina wekala Chinsahu muchisaka chawu nkawindi wahosheli nindi: “Amanakwetu niahela muchipompelu anateli kwikala anvwali jetu, anyiki jetu hela ayaya jetu. Yehova nateli kuyizatisha kulonda atukwashi.”
11 Chapela wanyi kwikala nawamabwambu, sweje-e neyi mwekala nansonyi. Ratna muhela wadiña nansonyi wadizili chalala hela chakwila wamweneña ikañesha wahosheli nindi: “Nakeñeleña nami amanakwetu niahela muchipompelu ankwashi.” Chinateli kuyikalila kulejaku muntu mukwawu chimunakutiya, ilaña neyi mumuleja owu muntu nateli kwikala ibwambu denu. Amabwambu jenu anakukeña kuyikolesha nikuyikwasha, ilaña mwatela kuyilejamu kulonda wena amoni chakuyikwasha.
12 Njila yimu yayiwahi yimunateli kukwatilamu wubwambu hikushimwina hamu nawakwenu akwaKristu. Carol, itwashimunahu hakusambila wahosheli nindi: “Ichi nekali nawamabwambu amavulu amawahi kuhitila mukushimwina nawahela nikuzata hamu nawu munyidimu yaYehova. Hadi yaaka yayivulu, Yehova nankwashi kuhitila mudi awa amabwambu.” Chachiwahi kukwata wubwambu nawakwaKristu ashinshika. Yehova wazatishaña awa amabwambu kutukolesha neyi tunaneñi hela neyi tunakutiya wuudi.—Yish. 17:17.
it-2 1190 ¶2
Maana
Maana aNzambi. Maana alala chikupu ekala naYehova Nzambi, wekala “namaana kankawindi.” (Rom 16:27; Chi 7:12) Kwiluka kwendelaña hamu nachalala, nawa chineli Yehova Diyi Nleñi, wekalaku “Kufuma kunyaaka oko-o nakuya haya nyaaka” (Ms 90:1, 2), weluka yuma yejima, chayituñawu nichiyekala, chiyatachikili nakushika nimakonu. Diyi nshimbi jalondelañawu antu neyi anakusandujola nikutuña yuma, nawa chakadi yuma iyi, hiyakutwesha kutuña chuma chidi chejimaku, yuma yejima Yindi. (Yob 38:34-38; Ms 104:24; Yis 3:19; Yer 10:12, 13) Kuhoshamu hohu, nshimbi jashaku dijatukwashaña kwila yuma yaloña, kufuukula mwamuwahi nikuhanda chiwahi. (Kuh 32:4-6; talenu YEHOVA [Nzambi wanshimbi jajiwahi].) Yena weluka yuma yejima. (Isa 40:13, 14) Hela chakwila nateli kwiteja yuma yambuka nanshimbi jindi nikwiteja yuma yikwawu hakampinji kantesha, yena hohu diyi weluka yuma yakumbidi nawa yakazatika kwesekeja nankeñelu yindi, nawa izu dejima dahoshañayi “dakela chuma chejima.”—Isa 55:8-11; 46:9-11.
Yuma Yalema yakuSpiritu
w08 8/1 11 ¶5
Kuhanjeka nawaTumpululu
▪ ‘Komana nelukaña munatalishi owu mazu?’ Yoba 12:11 yahosha nawu: “Komana itu hidatompaña mazu neyi idimi chidatompaña yakudaku?” Dichi makonu, mwatela ‘kutompa’ mazu anakuhoshayi mwanenu weyala hela wamumbanda. Atumpululu kakavulu ahoshaña chakadi kuhita mumbadi. Chakutalihu, mwanenu nateli kuhosha nindi, “Mwamonaña mpinji yejima neyi nidi kansi!” hela “Mwantiyililaña wanyi!” Chatela mushi maana hamazu adi neyi “mpinji yejima” hela “wanyi,” ilukenu nenu mwanenu hadaha nakutalisha mwacheñi. Chakutalilahu, “Mwamonaña mpinji yejima neyi nidi kansi” hadaha nakuhosha hohu nindi “Inakumona neyi mwakuhwelela wanyi,” nawa “Mwantiyililaña wanyi” hadaha nakuhosha nindi “Inakukeña kuyileja jidi kumuchima.” Ilukenuña munatalishi owu mazu.