Munafumi Nsañu Yakuzatisha Muchihandilu niMudimu Wanetu akwaKristu Mukanda Wakupompa
© 2023 Watch Tower Bible and Tract Society of Pennsylvania
NOVEMBER 6-12
YUMA YALEMA YAMWIZU DANZAMBI | YOBA 13-14
“Neyi Muntu Nafwi, Komana Wakahanda Cheñi?”
w99 10/15 3 ¶1-3
Kukeña Kushakama Haya Nyaaka
NIMAKONU antu antesha hohu diwu akukaana nawu muntu nateli kushakama hadi mpinji yantesha, hela chakwila iyi nsañu ayisonekeli dehi yaaka 3,500 yinahitihu. Chayineñeshaña antu amavulu hakumona antu anakushakama hohu yaaka yantesha, kuhiñahu hiyakushinakaja nikufwa. Kufuma hohu kunyima, antu aneseki kuwana jinjila jinateli kukwasha natu kulonda ashakameña yaaka yayivulu.
Mumafuku aYoba, aEjipitu adileña makutu awanyama atoñojokeleña nawu akufunta kuwansi. Afwilileña chikupu kuwana njila yakubalumwinamu malola adi ejima kulonda ekali wuru nawa chumichi chikukwasha antu kushakama yaaka yayivulu. Antu amavulu adiña naniyi yitoñojoka akuhweleli nawu wuru yakulumbisha chakulumbisha yinateli kukojeja antu kushakama chakadi kufwa nawa nawu kudiila hayeña yawuru kukojeja muntu kushakama yaaka yayivulu. Mukachisemwa wumu wakuChina wetejeli abalumwineña nyijimba yawu kuhitila mukutoñojoka nankashi, kwona nakuhudikila nikuda yakuda yikwawu nawa chumichi chikuyikwasha kushakama haya nyaaka.
Mukakusandujola wakuSpain wejina daJuan Ponce de León amwiluka nawu wafwilileña chaleteshaña twikaleña nanyijimba yawansi. Ndotolu wadiñaku muyaaka yamuma 1800 wasonekeli mumukanda windi waHermippus Redivivus nindi atwansi abulahu dehi kwilahu wuvumbi atela kuyihembela mukapeka kanyanya mumpinji yachishika nawa mpepela yinakwidishawu hakoona atela kuyisha mumabotolu kulonda ayizatisheña yiyikwasheña kutwalekahu kuhanda. Chawushona, iji njila jejima jazatikileña wanyi.
Komana Mutondu Wunatemuwu Wunateli Kumena Cheñi?
MUOLIVE waheña nawa wadinyeta hiwunateli kumwekana lubanjuku neyi awesekeja namusida wawuwahi wakuLebanoni. Ilaña nyiolive yekala nañovu yakuhanda muyuma yakala. Nyiolive yikwawu yinashakami kwakwihi nayaaka 1,000. Nyiji yamuolive yayaña chikupu hamaseki chakwila mutondu weniwu wunateli kuhanda hela anawukisañani. Chakala hohu neyi nyiji yape, wunateli kumena cheñi.
Nkakulula Yoba wakuhweleleli chikupu nindi hela neyi nafwi, wukahanda cheñi. (Yoba 14:13-15) Wazatishili mutondu, hadaha muolive kulonda yahoshi chakuhwelelayi muñovu yaNzambi yakumusañula. Yoba wahosheli nindi, ‘Kudi chikuhwelelu, neyi mutondu akuwutema wakamena cheñi.’ Neyi nvula yinoka hanyima yachaña cheneni, muolive womini wukutachika kwidisha nyitombu kunyiji nakwila “nyitayi neyi chiputa.”—Yoba 14:7-9.
“Wunafwili”
Mazu aYoba atudizishaña nawu Yehova wukweti luwi: Wayikeña nankashi antu adi neyi Yoba adihanaña aweni mumakasindi kulonda yayifumbi nikuyolola hakwila ekali antu asweja kukeñewa kumesu indi. (Isaya 64:8) Yehova walemesha akwakudifukula indi ashinshika. ‘Wafwilaña’ kusañula antu jindi ashinshika afwa dehi. Kadizi wumu wahosheli nindi, izu dachiHeberu dazatishawu “chakadi nikujina hiizu dakola damwekeshaña chikupu chafwilañayi muntu mumuchima.” Eñañi, Yehova hakuminaña dakwanuka akwakudifukula indi ashinshikaku ilaña wafwilaña cheñi kuyisañula.
Yuma Yalema yakuSpiritu
it-1 191
Mawuti
Mawuti emeneneñaku kubula kulema hela chuma chamukunkulwayi, Chakutalilahu, Abarahama hahosheleñayi naYehova wahosheli nindi, “nidi lunkuñu nawa wuti.” (Kut 18:27; talenu cheñi Isa 44:20; Yob 30:19.) Nawa Yoba wesekejeli mazu awakundeji indi akutwamba nindi “hiyishimu yamawuti.”—Yob 13:12.
NOVEMBER 13-19
YUMA YALEMA YAMWIZU DANZAMBI | YOBA 15-17
“Elifazi Namwekeshi Njila Yitwatela Kubula kuKudejelamu Muntu”
w05 9/15 26 ¶4-5
Kanenu Yitoñojoka Yatama!
Mapampa ejima asatu ahosheliyi Elifazi, wakonkomweneni nindi Nzambi weluka nindi kwosi chuma chachiwahi chinateli kwilayi kambuñindi. Elifazi wamulejeli Yoba nindi: “Tiyaña! Ambuñindi wayikuhwelela wanyi, nawa wawanaña yiluwa mudi añelu jindi.” (Yoba 4:18) Elifazi cheñi wamuteneni Nzambi nindi: “Indi ajila hayikuhwelelaku, nimawulu aweni hiyekala atooka kumesu indiku.” (Yoba 15:15) Wehwili nindi: “Komana Wañovu Jejima wakamaña nindi eyi waloña.” (Yoba 22:3) Bilidadi wetejeli iyi yitoñojoka muloña niyena wahosheli nindi: “Nikakweji kakeni hikatamukaku; nawa tutumbwa tutooka kumesu [aNzambi] wanyi.”—Yoba 25:5.
Twatela kusoñama nayitoñojoka yamuchidiwu. Yikutukojeja kutachika kutoñojoka netu Nzambi wakeñaña nindi twileña yuma yitukubula kutwesha kwila. Iyi yitoñojoka yikuluwañesha wubwambu wetu naYehova. Kubombelahu, neyi twiteja iyi yitoñojoka, tukwila ñahi neyi atufumba? Chatela tudizozi nakwiteja kuna kufumba, muchima wetu ‘wukumuhililaña Yehova,’ nawa tunateli nikumuhembela ndulu. (Yishimu 19:3) Chumichi chikutuletela wubanji wafwana wakuspiritu!
Imbujolenu Kudizoza niLuwi lwaYesu
16 Mazu etu amwovu. Luwi lutwatiyilaña akwetu lwatuleñelaña ‘kukundeja antu akweti chineñi.’ (1 Tesa. 5:14) Tunateli kuhoshadi hakwila tukoleshi antu amuchidawa? Tunateli kuyikolesha kuhitila mukuyileja netu twayakamenaña chikupu. Tunateli kuyihameka chakufuma hamuchima kulonda eluki nawu akweti wuswa niyililu yayiwahi. Tunateli kuyanukisha netu Yehova wayikundamishili kudi Mwanindi, dikwila nawu ekala alema kumesu indi. (Yow. 6:44) Tunateli kuyileja netu Yehova wakamenaña nankashi ambuñindi “abaluka nyichima” hela “akweti spiritu yachikeka puchi.” (Mas. 34:18) Mazu etu amwovu anateli kukwasha antu anakukeña kuyikundeja.—Yish. 16:24.
Yuma Yalema yakuSpiritu
w06 3/15 14 ¶11
Yikuma Yamaneni Kufuma muMukanda waYoba
7:9, 10; 10:21; 16:22—Komana awa mazu anakumwekesha nawu Yoba hakuhweleleli mukusañukaku? Yoba wahosheleña hayuma yakumbidi. Hadi dinu, watalishili mudihi? Hadaha watalishileña mukwila nindi neyi nafwi, kwosi niwumu hakachi kawamabwambu jindi wukamumona. Kwesekeja nachatoñojokeleñayi, hadi kufunta kwitala dindi hela hiyadi kamushaku cheñi maanaku sampu mpinji yatoñolayi Nzambi yinashiki. Hadaha Yoba watalishili cheñi mukwila nindi kwosi muntu wunateli kufunta kufuma muSheluku. Mukanda waYoba 14:13-15 watukwashaña kwiluka netu Yoba wakuhweleli nindi akamusañula.
NOVEMBER 20-26
YUMA YALEMA YAMWIZU DANZAMBI | YOBA 18-19
“Bayi Mushiya Chisayikila Akwenu Akakudifukulaku”
Yuma Yitunateli Kudizila kuMadilu aYesu
9 Munateli kukwasha antu ananeñi. Yesu hakuminini hohu dakudilila hamu naMata niMariyaku, ilaña wayitiyilili nikuyikolesha. Tunateli kwila chuma chochimu kudi antu ananeñi. Dan, mukulumpi washakamaña Australia, wahosheli: “Chafwili ñodami, nakeñeleña muntu wakunkwasha. Amanakwetu amavulu niañodijawu enjileña mpinji yejima nakuntiyilila. Awundili nakutiyilila chinalumbulwileña nawa hiyatiyili nsonyi nanochu chinadilileñaku. Ankwashili cheñi muyuma yidi neyi kukosa motoka yami, kunlandilaku yuma nikuntelekelaku yakuda neyi chakwila nakañanyi kuzata iyi nyidimu. Kakavulu alombeleña hamu nanami. Amwekesheli nawu hiyamabwambu alala ‘amanakwamuntu avwalikila mumpinji yakala.’”—Yish. 17:17.
Neyi Ntaña Yenu Naleki Kumukalakela Yehova
16 Twalekenuhu kukwasha antu amuchisaka ashinshika. Sweje-e dinu chayinu mpinji, anakukeña nawu muyikeñi nikuyikolesha chikupu. (Heb. 10:24, 25) Mpinji yikwawu, chisaka chikweti ntaña yawu anahañiwu muchipompelu, chatiyaña neyi ayikeña wanyi kudi antu amuchipompelu. Bayi mwiteja chuma chamuchidiwu kumwekanaku! Sweje-e dinu atwansi akweti anvwali jawu anafumi muchalala, akeñaña kuyihameka nikuyikolesha. Muhela Maria, wukweti nfumwindi ahañiliwu muchipompelu nawa washili chisaka wahosheli nindi: “Amabwambu jetu amakwawu enjili kwitala detu, atelekeli yakuda nawa twadizilili hamu kudifukula kwachisaka. Aneñeli nawa twadilili nawu hamu. Anhosheleleñaku neyi antu anakuhosha nsañu yakutwamba hadi ami. Ankolesheli chikupu!”—Rom. 12:13, 15.
w90 9/1 22 ¶20
Komana Munakushikahu?
20 Izanvu dawakulumpi datela kwiluka nawu kujima mukulumpi hela nkoñi wakuzatila kunateli kumukojeja kuneña, hela chakwila neteji nindi chimwekani. Neyi chakwila anamuhañi wanyi, ilaña akulumpi amona nawu manakwetu naneñi chikupu, atela kumukwasha najinsona munjila yakukeña. (1 Tesalonika 5:14) Atela kumukwasha kulonda eluki nindi nakukeñeka muchipompelu. Hela chakwila munamufumbi, himwatela kushimbula hakwila mukatachiki cheñi kumuzatisha manakwetu wadizoza nakumwinka kukooleka muchipompeluku.
Yuma Yalema yakuSpiritu
w94 10/1 32
Ñovu Yekala Mumazu Amawahi
Hela chochu, hampinji Yoba yakeñeleñayi kumukolesha, Elifazi nialunda nindi ahosheli mazu amawahi wanyi. Amutwikili Yoba muloña nawu kukala kunakumonayi watela wakoñeli yuma yatama mukuswamujoka. (Yoba 4:8) The Interpreter’s Bible yahosha nawu: “Chuma chinakukeñayi Yoba hikumutiyila wushona waweni. Yuma yayivulu yinakuhitamu mwamweni hiyuma yatama chikupu nawa yabula kushikilamu.” Dichi Yoba watiyili kutama nankashi namazu aElifazi nialunda nindi chakwila wabidikili nindi: “Mukuleka mpinjinyi kuhilisha wumi wami, kunchika namazu?”—Yoba 19:2.
Bayi tukojeja mukwetu kambuña Nzambi abidiki nakwaaba muloña wamazu etu abula kutelela hela kushikilamuku. (Esekejenu Kuhituluka 24:15.) Chishimu chamuBayibolu chatusoñamishaña nawu: “Yuma yiwukuhosha yinateli kuhandisha wumi hela kuwujilumuna; dichi watela kwiteja yuma yikufuma mumazu eyi.”—Yishimu 18:21, TEV.
NOVEMBER 27–DECEMBER 3
YUMA YALEMA YAMWIZU DANZAMBI | YOBA 20-21
“Maheta Hidiwu Akojejaña Muntu Kwikala Waloñaku”
Komana ‘Mwaheta Kumesu aNzambi’?
12 Mumazu aYesu, kwikala aheta kumesu aNzambi chinambuki nakudilumbikila maheta, hela kuheta yuma yakumujimba. Kafwampi, Yesu wahosheleña nindi chuma chitwatela kwakamena muwumi hichatela kwikala chakudilumbikila maheta akumujimba hela kudizañalesha nayuma yitunateli kuhetaku. Ilaña twatela kuzatisha mahetetu munjila yatela kuwahisha hela kukolesha wulunda wetu naYehova. Kwila mwenimu chikutuleñela kwikala aheta kumesu aNzambi. Muloñanyi? Muloña kwaletaña nkisu jajivulu kufuma kudi Nzambi. Bayibolu yatulejaña nawu: “Nkisu yaYehova yaheteshaña muntu, habombelañaku kukalaku.”—Yishimu 10:22.
Yuma Yalema yakuSpiritu
w95 1/1 9 ¶19
Kwimika Mushindu Satana niNyidimu Yindi
19 Kambuña aNzambi Yoba wakabakeni “nayitoñojoka” yaleteliyi Satana kuhitila mudi Elifazi niZofari. (Yoba 4:13-18; 20:2, 3) Dichi Yoba wamweni “makabi,” amuletesheli kuhosha “mazu akutuboka” hamuloña “wawoma” wamukwatili. (Yoba 6:2-4; 30:15, 16) Elihu wamutiyilili Yoba nakanañachima nawa wamukwashili kwiluka Yehova chamonañayi yuma. Nimakonu, akulumpi akamenaña anyikoku anakuhita mukukala kuhitila mukubula “kuyitiyisha woma” antu wenawa. Ilaña, kufwana Elihu, ayitiyililaña nakanañachima nawa kuhiñahu ayiwayaña manji Ezu daNzambi. (Yoba 33:1-3, 7; Yakoba 5:13-15) Dichi muntu wejima wunakutiya chikela hela wunaluwankani muyitoñojoka namakabi hela anakuchinishawu “nayilota . . . niyimwenu” neyi Yoba, munateli kuwana nsona yinateli kuyikundeja mukachi kachipompelu.—Yoba 7:14; Yakoba 4:7.
DECEMBER 4-10
YUMA YALEMA YAMWIZU DANZAMBI | YOBA 22-24
“Komana Muntu Anateli Kumuzatisha Kudi Nzambi?”
w05 9/15 27 ¶1-3
Kanenu Yitoñojoka Yatama!
Yitoñojoka yinesekani nayitoñojoka yakwila nawu Nzambi wakeñaña yuma yitukubula kutwesha, hiyitoñojoka yakwila nawu wamonaña antu nindi amukunkulwayi. Mazu ahosheliyi Elifazi mwipampa damuchisatu mwekala ilu lwihu: “Komana muntu anateli kumuzatisha kudi Nzambi? Komana muntu wejima wudi nakashinshi nateli kumukwashaku?” (Yoba 22:2) Elifazi wahosheleña nindi Nzambi wamonaña antu nindi amukunkulwayi. Munjila yoyimu, Bilidadi wahosheli nindi: “Dichi muntu wafwaña nateli kwikala ñahi waloña kumesu aNzambi, Hela muntu wavwalika kudi mumbanda nateli kwikala wakadi muloña?” (Yoba 25:4) Kwesekeja naniyi yitoñojoka, Yoba, muntu wunateli kufwa, nateli kutoñojoka ñahi nindi waloña kumesu aNzambi?
Antu amakwawu makonu akweti aditoñojokelaña chatama aweni. Yuma yidi neyi nkulilu, yuma yatama yamuchihandilu hela kuyimwekeshela chaambu chekowa dikwakojejeli adimoneña muniyi njila. Ilaña Satana niandemoni jindi atiyaña kuwaha kuyikabisha antu. Neyi amukojeja kutoñojoka nindi kwosi yuma yelañayi yikumutiyisha kuwaha Nzambi Wañovu Jejima, wukutachika kuneña. Mukuhita kwampinji, iwu muntu wukusempuka, nikufuma tuhu kudi Nzambi wamumi.—AHeberu 2:1; 3:12.
Wushinakaji niyikatu jatukojejaña kubula kuzata chiwahi. Yuma yitunakuzata mumudimu waWanta yinateli kumwekana neyi yantesha neyi tuyesekeja nayuma yitwazatileña hitwachidiña atwansi, akola kumujimba hela nañovu. Dichi twatela kwiluka netu Satana niandemoni jindi akeñaña tumoneña netu yuma yitwelaña yashikilamu wanyi kumesu aNzambi. Twatela kukaana chikupu iyi yitoñojoka.
w95 2/15 27 ¶6
Chuma Chitunateli Kudizila kuChakumanisha Kukala
Amabwambu jindi asatu amuzeyesheli Yoba kuhitila mukuhosha yitoñojoka yawu chatela ahoshi maana aNzambi. Elifazi washikili nihakuhosha nindi ‘Nzambi hakwetihu kambuñindi washinshikaku,’ nawa Yehova hakameneneña neyi chakwila Yoba wadiña waloña hela nehiku. (Yoba 4:18; 22:2, 3) Wahosheli mazu akumuzeyesha akutwamba chikupu! Mwamweni, chimwahitili mpinji Yehova wamuzuwilili Elifazi niamabwambu jindi hanaka kasawuntu kahosheliwu. Wahosheli nindi: “Himunahoshi chalalaku”. (Yoba 42:7) Ilaña kwadiña cheñi kukala kukwawu kwenjileña nakumwekana hambidi.
w03 4/15 14-15 ¶10-12
Atwansi Azañaleshaña Muchima waYehova
10 Neyi chamwekeshaña Bayibolu, Satana wajinokeli hohu wanyi kashinshi kaYoba ilaña kawantu ejima amukalakelaña Nzambi, kushilahu ninenu. Kafwampi, hahosheleñayi hadi antu ejima, Satana wamulejeli Yehova nindi: “Muntu (bayi Yoba hohuku) wukuhana yuma yejima yikwetiyi kulonda apulwishi wumi windi.” (Yoba 2:4) Komana munakumona chuma chimwatela kwila muniyi nsañu yalema? Neyi chahosha Yishimu 27:11, Yehova nakuhosha nindi kudi chuma chimunateli kumwinka, hakumwakwila muntu wamusupishaña, Satana. Toñojokenu chumichi—Mukakubadika Mukuleña Kwejima nakuyitambika enu nindi mumukwashiku kumanisha muloña wasweja kubadika. Kwenoku kukoleka kumukweti! Komana mukushikija munakuyilejayi Yehova nindi mwili? Yoba welilimu. (Yoba 2:9, 10) NiYesu niyena welilimu kushilahu niantu amakwawu amavulu adiñaku kunyima, kushilahu niatwansi. (AFwilipi 2:8; Chimwekeshu 6:9) Ninenu muteli kwilamu. Hela chochu, bayi mujimbalaku ichi chikuma, kwosi kwikala hakachi muniyi nsañu. Yuma yimukwilaña diyikumwekesha nawu munatondihu kwikala kukabadi kaSatana kakusupisha, hela munakumuhakwilaku Yehova. Kabadi kamu kadihi kimukutonda?
Yehova Wayakamenaña!
11 Yehova wakamenaña wanyi neyi chakwila muntu nateli kufuukulahu kumukala hela nehi. Wudi dehi nawantu amavulu anatwalekihu kwikala ashinshika hakwila atweshi kumwakula Satana wamusawulaña. Eñañi, Diyabolu wahosheli nindi kwosi muntu wamukalakelaña Yehova muloña wakumukeña, watwambili. Hela chochu, Yehova nakukeña muhakwileñaku chiyulu chindi muloña wayakamenaña hamuntu-hamuntu. Yesu wahosheli nindi: “Tata yami wekala mwiwulu niyena hakeñaña nindi wumu hadi awa akehelamu akisikiku.”—Matewu 18:14.
12 Chakadi nikujina, wakeñaña kwiluka njila yimunatondi. Nawa chabadika, chumichi chamukundamaña. Bayibolu yashimuna hatooka nawu Yehova watiyaña kuwaha hela kutama nayuma yelañawu antu. Chakutalilahu, aIsarela chafuntishafuntishileñahu kudikaña, “amuneñesheli” Yehova. (Isamu 78:40, 41) Henohu Dibaji damumafuku aNowa kanda, Yehova chamweniyi nindi “kutama kwamuntu kunasweji nankashi . . . muchima windi waneñeli.” (Kutachika 6:5, 6) Toñojokenu munatalishi chumichi. Neyi mutachika kwenda munjila yatama, munateli kumuneñesha Nleñi yenu. Chinatalishi wanyi mukwila nawu Nzambi wakola wanyi nateli kuneña hela kudila. Ilaña wayikeña nawa nakukeña mwileña yayiwahi. Munjila yikwawu, neyi mwila yuma yaloña, muchima waYehova wukuzañalala. Wukuzañalala muloña munamukwashiku kumwakula Satana nawa wukuyikiswila. Nawa dichinakukeña kwilayi. (AHeberu 11:6) Yehova Nzambi hiTata yenu wamuwahi chikupu!
Yuma Yalema yakuSpiritu
w04 7/15 21-22
Fwilenuña Nyidimu yakuSpiritu Kulonda Mumulemesheña Nleñi Yenu
Toñojokenu Yehova chamanishiliyi kuleña yuma yejima. Namazu akwila nawu “kwekalili melela nintetemena,” Yehova wambwili mpinji yakuleñelamu yuma. (Kutachika 1:5, 8, 13, 19, 23, 31) Hakusambila kwampinji yejima yaleñeleleñamu yuma, welukili chikupu yuma yikuleñayi nichikuyileñayi nihakukuminayi hanodu ifuku. Nawa Nzambi welili nkeñelu yindi yakuleña yuma. (Chimwekeshu 4:11) Nkakulula Yoba wahosheli nindi: “Neyi [Yehova] nakukeña kwila chuma, wachiilaña.” (Yoba 23:13) Yehova watela watiyili kuwaha chikupu hakumona “yuma yejima yaleñeliyi nindi yinawahi chikupu”!—Kutachika 1:31.
Ninetu hakwila nawu yuma yitunakufwila kuzata twilimu, ninetu twatela kwikala namuchima wakufwila kwilamu. Yumanyi yinateli kutukwasha kwikala neyena damuchidiwu? Nihenohu iseki kanda adituñi, Yehova wamweneni chadimu chidikekala, chuma chalubanji, chikaletaña kalemesha nimpuhu. Chochimu, ninetu hakwila tushikiji mutunafuukuli kwila chiña tutoñojokaña hayuma yayiwahi yikafumamu neyi twila mutunakukeña kwila. Dichuma chamumwekeneni Tony wudi nayaaka 19. Wanukileña yuma yadimweneniyi hampinji yahempwiliyi kasanji kamutayi kawaYinsahu jaYehova kuWestern Europe. Kufuma hayoyina mpinji, Tony watoñojokeleña ‘chadi kutiyañayi kushakama nikuzatila heluña damuchidiwu.’ Tony walekeli wanyi kutoñojoka nindi nateli kuzatilahu nawa watwalekelihu kufwila chikupu kuzatila hanidi iluña. Wenowu muzañalu watiyiliyi chelili amwiteji kuya nakuzatila hakasanji!
DECEMBER 11-17
YUMA YALEMA YAMWIZU DANZAMBI | YOBA 25-27
“Tunateli Kwikala Nakashinshi Hela Twawanina Wanyi”
it-1 1210 ¶4
Kashinshi
Yoba. Yoba, watela wadiñaku mpinji yafwiliyi Yosefu nimpinji yadiñaku Mosi, amutena nawu muntu “waloña [Heb., tam] nawa washinshika; wamwakamineña Nzambi nawa helileña yuma yatamaku.” (Yoba 1:1; talenu YOBA.) Kushinshika kwaniwu muntu dikwakojejeli nsañu hakachi kaYehova Nzambi naSatana hampinji Nzambi yamwihwiliyi Chilumbu chindi hadi Yoba helili Satana enzeña kukubulakana kwawañelu muyota yamumawulu. Satana wahosheli chatama hakudifukula kwaYoba kudi Nzambi, nindi Yoba wamukalakeleleña bayi namuchima walalaku ilaña nindi muloña wamwinkaña yuma. Dichi wajinokeli neyi mwamweni Yoba washinshika kudi Nzambi. Chamwitejeliwu kumutambula yuma yaYoba kushilahu nianyanindi, Satana wakañenyi kukisañana kashinshi kaYoba. (Yoba 1:6–2:3) Watwambili nindi Yoba watwesheli kuumika hanyima yakujimbesha maheta ejima nianyana muloña wakeñeleña kupulwisha ikowa dindi. (Yoba 2:4, 5) Hanyima yakutiya kuyeña, chikatu chafwana nikumukanjikija kudi ñodindi kushilahu nikumutwambila nimahosha atama awamabwambu jindi aheñesheleña nshimbi ninkeñelu yaNzambi (Yoba 2:6-13; 22:1, 5-11), Yoba wamwekesheli nindi wukutwalekahu kwikala washinshika. “Nukuhembaña kashinshi kami, nichinakafwa! Nukuhemba kuloña kwami nawa nakakuumbaku wanyi; Muchima wami wakanfwisha namuloña wanyi, chakala hohu nidi wamumi.” (Yoba 27:5, 6) Chahembeliyi kashinshi kindi chamwekesheli nawu Chilumbu chaNzambi mwamweni himukamakudi.
Hembenu Kashinshi Kenu!
3 Ambuña aNzambi amwekeshaña ñahi kashinshi? Amwekeshaña kashinshi hakumukeña Yehova namuchima wawu wejima nawa chafumañamu, mpinji yejima elaña yuma yamutiyishaña Yehova kuwaha. Shinshikenu izu dakashinshi chadizatishawu muBayibolu. MuBayibolu, Izu dachiHeberu dakwila nawu “kashinshi” daya mukwila nawu kukola, kuwaha hela kubula ihuji. Chakutalilahu, aIsarela alambwileña nyilambu yawanyama kudi Yehova nawa Nshimbi yahosheli nawu atunyama ateleleli kwikala amawahi. (Lev. 22:21, 22) Antu jaNzambi hiyayitejeleña kulambula kanyama wabula mwendu, itu, disu hela wakataku. Yehova wakeñeleña nindi amulambuleña kanyama wakola, wamuwahi hela wabula wufwayi. (Mal. 1:6-9) Tunateli kwiluka muloña waweni chakeñelañayi Yehova yuma yayiwahi hela yakadi wufwayi. Neyi tunakulanda chuma chidi chejima, chidi neyi mukabu, mukanda hela chozelu, hitwalandaña mukabu wakisika, mukanda watabuka hela chozelu chafwaku. Twakeñaña chuma chachiwahi, chakola hela chakadi wufwayi. Dichuma chakeñañayi Yehova kudi etu, wakeñaña nindi tumukeñi chikupu nikwikala ashinshika.
4 Komana twatela kukunkulula netu hakwila twikali nakashinshi chiña twikala awanina? Hela chochu tunateli kutoñojoka netu twaluwañeshaña nankashi. Shinshikenu yikuma yiyedi yinateli kutukwasha kubula kutiya woma. Chatachi, Yehova hashaña maana hayiluwa yetuku. Izu dindi datulejaña nawu: “Neyi eyi Yehova wukushinshika mwaluwañawu antu, hinyi wukwimana, eyi Mwanta.” (Mas. 130:3) Weluka nindi twawanina wanyi, tudi akwanshidi ilaña watwanakenaña chikupu. (Mas. 86:5) Chamuchiyedi, Yehova weluka kuzeyazeya kwetu nawa hakeñaña nindi twileña yuma yitukubula kutwesha kwilaku. (Tañenu Masamu 103:12-14.) Hanu dinu, tunateli kwikala ñahi akadi ihuji kumesu aNzambi?
5 Kukeña dichuma chinateli kuyikwasha ambuña aYehova kwikala nakashinshi. Twatela kumukeña nikumwovwahila Tata yetu wamwiwulu namuchima wetu wejima. Tunateli kumwekesha netu tudi nakashinshi neyi tutwalekahu kwikala naniku kukeña hela chakwila tudi mukweseka. (1 Kushi. 28:9; Mat. 22:37) Shinshikenu cheñi hadi aYinsahu asatu itwatena hakusambila. Chumanyi chaletesheli abuli kufumpa nshimbi? Komana ona kansi wamumbanda wakeñeleña wanyi kuhema hashikola, indi kwiji ona kansi weyala wakeñeleña kuya hanidi itala kulonda amusawuli, tahindi ona iyala wakeñeleña nindi amuhañi mudimu? Inehi. Ilaña eluka nawu Yehova wukwetu nshimbi jaloña nawa asha muchima hayuma yinateli kumuzañalesha Tata yawu wamwiwulu. Muloña wakwila amukeña, neyi anakufuukula asambilaña kutoñojoka hayuma yinateli kumutiyisha Nzambi kuwaha. Muniyi njila amwekeshaña nawu adi nakashinshi.
Yuma Yalema yakuSpiritu
Anuñañana Kwesekeja naMukanda waNzambi
3 Yileñaleña yamwekesha nawu Nzambi hiNloñeshi wabadika. Bayibolu yahosha nawu, “Maana wowu ashimatishili nachu Yehova iseki, kashinshi kokakolesheliyi nachu mawulu.” (Yish. 3:19) Tweluka “yuma yakumpumpu yanjila [jaNzambi] hohu,” nawa “twamutiyaña kashawushawu kanti hohu.” (Yoba 26:14) Hela chochu, nsañu yantesha yitweluka hamapulaneti, tutumbwa ninyilalanji yatuleñelaña kwiluka netu yumiyi ayiloñesha chachiwahi chikupu. (Mas. 8:3, 4) Munyilalanji mwekala tutumbwa twatuvulu nankashi nawa twendaña chachiwahi chakadi kudihuma. Mapulaneti anyeñumukaña itena chovu-chovu neyi kwiji anakulondela nshimbi jahamukwakwa. Mwamweni, iyi yuma yamwiwulu chiyendaña chiwahi yatukwashaña kwiluka nawu, twatela kumushimeka, kumwovwahila nikudifukula kudi Yehova ‘waleñeli mawulu nimaseki namaana indi.—Mas. 136:1, 5-9.
DECEMBER 18-24
YUMA YALEMA YAMWIZU DANZAMBI | YOBA 28-29
“Komana Mwekala Nejina Dadiwahi Neyi daYoba?”
w02 5/15 22 ¶19
Yitiyilenu Luwi Antu Anakankili
19 Nsañu yakela muBayibolu yitunadizi yinakukonkomwena hachikuma chakwila nawu twatela kumwekesha luwi anakukeña kwila yuma yikubula kutweshawu. Hakwila ndonda yachisaka yitwaleki, Abarahama wakeñekeleña wukwashu waBetuweli. Hakwila ayi nakumujiikila kuKenani, Yakoba wakeñekeleña wukwashu waYosefu. Nawa hakwila ekali nanswana, Nawomi wakeñekeleña wukwashu waLuti. Wonsu wawu Abarahama, Yakoba, hela Nawomi hiyadi kwila iyi yuma halwawuku. Hohamu nimakonu, twatela kutiyila antu anakukeñeka wukwashu luwi. (Yishimu 19:17) Twatela kumwimbujola nkakulula Yoba, wadiña “nakwamwina kazweñi wakeñeleña wukwashu, hamu namwana wabula tata yindi nimuntu wejima wabulili nkwashi,” kushilahu “nimuntu wadiña kwakwihi nakufwa.” Yoba cheñi ‘wazañalesheleña muchima wantuluwa’ nawa wekalili “mesu amputamesu nawa nyendu yachifwayi.”—Yoba 29:12-15.
it-1 655 ¶10
Dilesi
Kakavulu idi izu datalisha kuyakuvwala. Neyi chochekala yunifomu hela yakuvwala yikwawu yadimena chiyamushimunaña muntu kwazatañayi, niyakuvwala yashimunawu mu Bayibolu, yashimwineña nshimbi yalondeleleñayi hela nyidimu yazatileñayi kwesekeja nachakutalilahu chashimwiniyi Yesu chawulu. (Mat 22:11, 12; talenu CHITAMBALA; NKWABILU.) HaChimwekeshu 16:14, 15, Mwanta Yesu Kristu wasoñamishili hakukaama tulu twakuspiritu nihakuvuula wunsahu wamwekeshaña nawu wudi chinsahu washinshika waNzambi. Chumichi chikusweja kutama sweje-e hefuku dakwila nawu kumadiki “njita yefuku deneni daNzambi Wañovu Jejima.”
Yumanyi Yekala Mwijina?
Hitunateli kuhimpa ijina datutumbañawu hakusemukaku. Hela chochu, etu halwetu twadifuukwilaña yilwilu yitwatela kwikala nayu. (Yishimu 20:11) Dihulenu nenu: ‘Neyi amwilili Yesu hela apostolu nawu antumbi ijina, ijinanyi dadi kunyinkawu kwesekeja nayilwilu yami? Ijinanyi dadi kuntelela kwesekeja nayilwilu yami?’
Chinakukeñeka kutoñojokahu chikupu hanilu lwihu. Muloñadi? Mwanta wamaana Solomoni wasonekeli nindi: “Ijina dadiwahi akuditonda kubadika maheta amavulu.” (Yishimu 22:1) Chalala, neyi tutuña ijina dadiwahi, hela twikala nayilwilu yayiwahi, kutwashakamaña, tukwikala nayuma yalema chikupu. Chuma chasweja kulema, neyi tutuña ijina dadiwahi naNzambi, tukekala neheta dikashimbula chikupu. Munjilanyi? Nzambi watushika nindi wakasoneka mumukanda windi “mukanda wachanukishu” majina anowu amutiyaña woma, nawa wakayinka wumi wahaya nyaaka.—Malaki 3:16; Chimwekeshu 3:5; 20:12-15.
Yuma Yalema yakuSpiritu
g00 7/8 11 ¶3
Tumbenu Chimwemweta—diChuma Chachiwahi Chimwatela Kwila!
Komana kutumba chimwemweta kunateli kukwasha muntu? Komana munakwanuka helili muntu ayitumbili chimwemweta chakwila muleka nikwakama? Hela helili muntu abuli kuyitumbila chimwemweta mwinza mutiya woma hela kumona nenu anayidiwuli? Eña, kumwemweta kwakuwahi. Kwakwashaña muntu yomweni wunakumwemweta ninowu anakumwemwetelayi. Muntu ashimunawu muBayibolu Yoba wahosheli hadi ayilumbu jindi nindi: “Chinayimwemweteleleña, akuhweleleleña wanyi; Chejeji chakumesu ami chayikolesheleña.” (Yoba 29:24) “Chejeji” chakumesu aYoba watela wadiña muzañalu wakumesu.
DECEMBER 25-31
YUMA YALEMA YAMWIZU DANZAMBI | YOBA 30-31
“Yoba Watwalekelihu Kwikala Wakadi Majilu”
Tondolwelenu Kutala Yuma Yamukunkulwayi!
8 Kufwila kwamesu nikwachisemwa chaheseki kunateli kuluwañesha niakwaKristu alala. Dichi, Izu daNzambi datukoleshaña kudiyuula kutalisha hayuma yitwamonaña nikuyifwila. (1 Kor. 9:25, 27; tañenu 1 Yowanu 2:15-17.) Muntu waloña Yoba himuntu wumu welukili kudifwana kwekala hakachi kakumona nikufwila chuma. Wahosheli nindi: “Natiyañana dehi namesu ami; indi chañadima nukumutala ñahi?” (Yoba 31:1) Yoba hakaanini hohu kukama namumbandaku, ilaña hatoñojokeleña nihayuma yamuchidiwuku. Yesu wakonkomweneni nindi twatela kwikala nayitoñojoka yitooka hampinji yahosheliyi nindi: “Muntu wukutala mumbanda namesu akumufwila, neli dehi nindi wuvumbi mumuchima windi.”—Mat. 5:28.
Toñojokenu “Kukuma kwaNsa Yayu”
Henohu kanda muholokeli munjila nakuya, sambilenu kudihula nenu, ‘Iyi njila yinakuntwala kudihi?’ Hulumanenu nakutoñojoka “yuma yikufumamu hansa yachu” kulonda mutondolweli kwiñila mukukala kwasweja kunateli kuyumisha mbaña. AIDS niyikatu yikwawu yasambukilaña, mavumu akadi kukeña, kufumisha mavumu, wulu watama, nikukabishewa nachilenji yumiyi yezaña kudi antu adiwulaña yinjikijilu yahamukwakwa. Insa yanjila yanana elaña wuvumbi ayishimuna chatiyakana kudi kapostolu Pawulu. Wahosheli nindi “hiyamba kaswana Wanta waNzambiku.”—1 Akorinda 6:9, 10.
Enu Atwansi—Itejenu Izu daNzambi Diyilomboleña
15 Indi kashinshi kenu kudi Nzambi kekalaña mukweseka chikupu mpinjinyi—neyi mudi nawakwenu ntahindi neyi mudi nkawenu? Neyi mudi hashikola hela kumudimu, hadaha mwakiñaña chikupu wuspiritu wenu. Mwekalaña asoñama chikupu kuyuma yatela kuluwañesha wuspiritu wenu. Hampinji yimunakunooka yimwahumbulaña kuyuma yinateli kuluwañesha wuspiritu wenu, diyi mpinji yimunateli kuholokela mukweseka kukuluwañesha yililu yenu yayiwahi.
16 Muloñadi chimukukeñela kumwovwahila Yehova hela chakwila mudi nkawenu? Anukenu nenu: Munateli kumuneñesha Yehova hela kumuzañalesha. (Kutach. 6:5, 6; Yish. 27:11) Yuma yimwelaña yamuneñeshaña hela yamuzañaleshaña Yehova muloña “yena wayihembaña.” (1 Pet. 5:7) Wakeñaña nindi mumutiyilileña kulonda muhetelumu. (Isa. 48:17, 18) Ambuña aYehova amakwawu amuIsarela wakushankulu chadiwiluwu kufumba kwindi, amuneñesheli nankashi. (Mas. 78:40, 41) Cheñi nawa, Yehova wamukeñeli chikupu kaprofwetu Danyeli, nawa kañelu wamuteneni nindi “muntu wasweja kukeñewa.” (Dan. 10:11) Muloñadi? Muloña Danyeli wadiña washinshika kudi Nzambi bayi neyi hamesu awantu hohuku, ilaña nimpinji yadizileñayi nkawindi.—Tañenu Danyeli 6:10.
Yuma Yalema yakuSpiritu
w05 11/15 11 ¶3
Kutiyilila Antu Munjila Yakukeña
Mapampa 10 ahosheleñawu amabwambu jaYoba yena wamweneni hohu nakumutiyilila chahosheleñawu. Hela chochu, Yoba wahosheli nindi: “Neyi kwadiñahu muntu wadi kuntiyilila!” (Yoba 31:35) Muloñadi chahosheleliyi muniyi njila? Muloña adiña nakumutiyilila hohu chakadi kumukundeja. Hiyamwakameneni Yoba hela kukeña kutiya neyi chinakutiyayiku. Awa antu hiyamutoñojokeleliku Yobaku. Dichi kapostolu Petulu nakutufumba nindi: “Wejima wenu nuñañanenu muyitoñojoka, dakamenenuña, keñañanenu nawanakwetu, ditiyilenuña wushona nikudizoza.” (1 Peter 3:8) Tunateli kumwekesha ñahi netu tunakudakamena? Njila yimu hikumwekesha netu tunakumwakamena muntu nikumwiluka chiwahi. Kuhosha nawu munjila yaluwi nawa yawushona netu “nakuhweleli chayikatili nankashi” hela “hadaha mwatiyili nenu hiyelukili chimwatiyiliku,” iyi hinjila yimu mutunateli kumwekeshelamu netu twakamenaña. Njila yikwawu hikusha yuma yinakuhoshayi muntu mumazu etu, dichi kwila mwenimu kukamwekesha nawu tunatiyi chinakuhoshayi. Kutiyilila munjila yakukeña hikwatalisha mukwila nawu twatela kukumina dakutiyilila chinakuhoshayiku ilaña kwatalisha nimukwiluka chinakutiyayi muntu.