Yesu niatumbanji twindi anashakami mafuku asatu muBetani kufuma hafuminiwu muYeriku. Dichi, nantetemena Hachimu, Nisani 10, anatachiki kuya kuYerusalema. Yesu nafwi nzala. Chinamoniyi mutondu wamukuyu, nayi nakutalaku. Nawani nyikuyu?

Hikumakumishilu akakweji kaMarch, ilaña nyikuyu yasoñaña muJune. Hela chochu, mafu anasapuki dehi, anameni swayi. Dichi, Yesu natoñojoki nindi kudi yikuyu yakusambila. Hela chochu, kwosi yinawaniyi. Mafu analeteshi amwekani neyi wukweti yikuyu. Dichi Yesu nahoshi nindi: “Bayi muntu akadaku cheñi nyikaabu kudi eyiku.” (Maku 11:14) Hohenohu mutondu wutachika nikuuma, ilaña munatalishi chumichi akachidiza ifuku dinalondelihu.

Hanashimbuli wanyi, Yesu niatumbanji twindi anashiki muYerusalema. Haloshi namwana waya mutembeli nakutalatala. Lelu nakumini dakutalatalaku, neli chuma chinadifwani nacheliliyi yaaka yisatu yinahitihu haChipandakenu cha 30 C.E. (Yowanu 2:14-16) Haniyi mpinji Yesu nahañi “antu alandishileña nikulanda yuma mutembeli.” Nawa nahinuni “nimesa jawakakuhimpa mali niyitwamu yawantu [anakulandisha] tupompa.” (Maku 11:15) Nawa hanakwiteja antu anakudihitila nakuya kwacheñi kuhitila mulubanza lwatembeliku.

Muloñadi Yesu chinakwililayi chuma chamuchidiwu kudi akakuhimpa mali niakakulandisha anyama mutembeli? Nahoshi nindi: “Komana hichasonekewa nawu, ‘Itala dami akaditena nawu itala dakulombelamu kudi antu akunyuza yejimaku,’ tahindi? Ilaña enu munadibalumuni diikali iyeñu dawatupondu.” (Maku 11:17) Nayiteni awa amayala nindi atupondu muloña afweteshaña mali amavulu antu anakulanda anyama akulambula nachu. Yesu nateni nyidimu yawu nindi yawupondu.

Hela chochu, akulumpi jawatupristu, ansoneki niantu alombolaña antu anatiyi chuma chineliyi Yesu, nawa anakukeña kuwana kafuta kacheñi kakumujahilamu. Ilaña, kudi kukala. Aneluki wanyi chakumukwata muloña antu amavulu anakuya kudi yena kulonda atiyi jinakuhoshayi.

Bayi neyi aYudeya hohu diwu anenzi kuChipandakenuku, ilaña niantu abalumuka nakwikala aYudeya. Hakachi kawu hadi aGiriki anenzi nakudifukula hanichi chawija. Wenawa anamuwani Fwilipu, hadaha, muloña wakwila wudi nejina dachiGiriki, anamulombi kulonda amumoni Yesu. Fwilipu neluki wanyi neyi chinateleli wena kudimona nindi, dichi namulejimu Anderi. Dichi muwuyedi wawu anayi nakumulejamu Yesu, watela wuchidi mutembeli.

Yesu neluki nindi kunashali mafuku antesha nakufwa, dichi iyi hidiyi mpinji yakutiyisha antu kuwaha hela yakutiyakenamu mpuhuku. Nayakuli apostolu indi ayedi nachakutalilahu nindi: “Mpinji yinashiki kulonda Mwana kamuntu amulemeshi. Inakuyileja chikupu nami, neyi luchacha lwatidiku lubula kuholokela heseki nakufwa, lukwikala hohu luchacha lumu; ilaña neyi lufwa, lukusoña nyikaabu yayivulu.”—Yowanu 12:23, 24.

Kalubutu kamu katidiku kanateli kumwekana neyi kalema wanyi. Ilaña neyi akatumba “nakufwa,” kanateli kumena nawa mukuhita kwampinji kakwila nsaachi yikwikala nambutu yayivulu. Munjila yoyimu, Yesu himuntu wawanina. Hela chochu, neyi ekala washinshika kudi Nzambi kushika nikukufwa, wukwila njila yakwikalilamu nawumi wahaya nyaaka kudi antu akweti muchima wakudihana. Dichi, Yesu nahoshi nindi: “Muntu wejima wakeña wumi windi wawukisañanaña, ilaña muntu wejima wahela wumi windi mukanu kaayi, wawuhembaña kulonda akekali nawumi wahaya nyaaka.”—Yowanu 12:25.

Yesu nakuditoñojokelaku hohu yenaku, muloña nahoshi nindi: “Neyi muntu nakukeña kunkalakela, anlondeli, nawa kunakekala, dikwakekala nimukakunkalakela. Muntu wejima wukunkalakela, Tata wakamulemesha.” (Yowanu 12:26) Wenowu wuloku! Awa akalemeshawu kudi Tata akazatila hamu naKristu muWanta.

Chinelukiyi makabi akumonayi nikufwa kwayeña kudi hambidi, Yesu nahoshi nindi: “Ichi nadishoni, nawa nukuhosha namidi? Tata, ñamwini hayinu mpinji.” Nabombelihu nindi: “Hela chochu, iyi diyi mpinji yinenjililili.” (Yowanu 12:27) Yesu neteji yuma yejima kumumwekena yashimwiniyi Nzambi, kushilahu nikufwa kwakudihana.

Hatembeli Hachimu, Nisani 10, Yesu nakuhosha hakufwa kwindi kunakwinza. Yesu nakameni hakasawuntu kanateli kuletawu hejina daNzambi, dichi nahoshi nindi: “Tata, lemeshaku ijina deyi.” Izu dañovu dinafumi mwiwulu nawu: “Nadilemesha dehi, inakudilemesha nawa cheñi.”—Yowanu 12: 27, 28.

Antu adi mukamwihi analuwankani. Amakwawu anakutoñojoka nawu anatiyi kudidima. Amakwawu anakuhosha nawu: “Kañelu nahoshi nayena.” (Yowanu 12:29) Hela chochu, Yehova diyi anatiyiwu nakuhosha! Nawa aka dikatachi wanyi antu kutiya Nzambi nakuhosha kutalisha hadi Yesu.

Yaaka yisatu nachikunku yinahitihu, hamupapatishileñawu Yesu, Yowanu Mpapatishi wamutiyili Nzambi nakuhosha nindi: “Iwu diyi Mwanami, inakeña, inatiyaña kuwaha.” Kuhiñahu hanyima yaChipandakenu chamu 32 C.E., Yesu wabalumukili iku Yakoba, Yowanu niPetulu anakutalaku. Awa amayala asatu atiyili Nzambi chahosheliyi nindi: “Iwu diyi Mwanami, inakeña, inatiyaña kuwaha. Mutiyililenu.” (Matewu 3:17; 17:5) Ilaña haniyi mpinji, ipampa damuchisatu Yehova nakuhosha kulonda antu ejima atiyi.

Yesu nahoshi nindi: “Idi izu dinenzi hamuloña wanenu, bayi hamuloña wanamiku.” (Yowanu 12:30) Hiwunsahu wunakumwekesha nawu chalala hiMwana kaNzambi, Mesiya ashimwineñahu dehi.

Kubombelahu, Yesu chekaliliyi washinshika muwumi windi chatulejaña chatela kuhandawu antu nawa chamwekeshaña nawu Satana Diyabolu, nyuuli wakanu kaayi, watelela kumujilumuna. Yesu nahoshi nindi: “Ichi kanu kaayi anakukisompesha; ichi nyuuli wakanu kaayi akumuhañamu.” Chatela amushindi, kufwa kwaYesu kunakwinza kwakela hikushinda. Munjilanyi? Nalumbululi nindi: “Ami neyi ananyamuni dehi kufuma hamaseki, nakakoka antu ejima akenzi kudi ami.” (Yowanu 12:31, 32) Neyi nafwi dehi hamutondu wakuyandishila, Yesu wakadikokela antu kudi yena, nakwenzununa njila yaya kuwumi wahaya nyaaka.

Hakwakula mazu anahoshi Yesu nindi “ananyamuni,” izaza dinahoshi nawu: “Twatiyili muNshimbi nawu Kristu wakashakamaña haya nyaaka. Hanu dinu, wunahoshelidi neyi Mwana kamuntu atela kumunyamuna? Indi yeniwu Mwana kamuntu hinyi?” (Yowanu 12:34) Hela chakwila anamoni wunsahu wawuvulu, kushilahu nikutiya izu daNzambi yomweni, antu amavulu anamwiteji wanyi Yesu nawu hiMwana kaNzambi walala, Mesiya akaniniwu.

Neyi chahosheliyi cheñi, Yesu naditeni yomweni nindi “chejeji.” (Yowanu 8:12; 9:5) Naleji izaza nindi: “Chejeji chikwikala mukachi kenu hakapinji kantesha. Endenuña himuchidi nachejeji, kulonda mwidima wubuli kuyishinda . . . Hampinji yimuchidi nachejeji, kuhwelelenu muchejeji, kulonda mwiikali anyana kachejeji.” (Yowanu 12:35, 36) Nkumininaku Yesu nafumihu muloña Nisani 10 didu ifuku datela kufwayi wanyi. HaChipandakenu chaNisani 14 dihu ‘hakamunyamunawu,’ kumupopela hamutondu.—AÑalija 3:13.

Neyi tufunta chantesha hanyima, mudimu waYesu wunakumwekesha hatooka nawu wuprofwetu washikijeweli chelili aYudeya abuli kumukuhwelela. Isaya washimwineñahu dehi nindi mesu awantu akaputa ninyichima yawu yakakola kulonda akabuli kuyuuka. (Isaya 6:10; Yowanu 12:40) Eña, amavulu akaanaña chikupu wunsahu wunakumwekesha nawu Yesu hiChamwinu chawu akaniniwu, wakuyiletesha akekali nawumi.

Nikodemu, Yosefu wakuAramateya nianyuuli amakwawu “amukuhweleleli” Yesu. Komana akwila kwesekeja nachikuhwelelu chawu tahindi akudifuntamu, muloña wakutiya woma nawu akuyihaña musinagogi hela muloña ‘akeña kulema kwafumaña kudi antu’?—Yowanu 12:42, 43.

Yesu yomweni nalumbululi muchatalisha kumukuhwelela nindi: “Muntu wejima wunankuhweleli, hanakuhweleli ami hohuku, ilaña nakuhweleli ninowu wantemesheli; nawa muntu wejima wunammoni, namoni niNowu wantemesheli.” Chalala chamulejeliwu Yesu kudi Nzambi kutañisha nawa chinatwalekiyi kutañisha chalema, chakwila nahoshi nindi: “Muntu wejima wandiwulaña nawa wabulaña kutambwila mazu ami, kudi wakamusompesha. Mazu innahoshi diwu akamusompesha hefuku dakukumishaku.”—Yowanu 12:44, 45, 48.

Kuhiñahu Yesu nakunkululi nindi: “Hinnaditachikilili kuhosha ami aweniku, ilaña Tata wantemesheli diyi wunanyinki lushimbi lwayuma yinatela kushimuna nikuhosha. Nawa neluka nami lushimbi lwindi diwu wumi wahaya nyaaka.” (Yowanu 12:49, 50) Yesu neluki nindi katataka afwili antu ejima amukuhwelelaña.—ARoma 5:8, 9.