Awa ambanda anahayami chikupu hakuwana mwijamu mwosi chuma chidimu! Mariya Mandaleni nayi lufuchi nakuleja “Shimona Petulu nikudi kambanji mukwawu akeñeliyi Yesu,” kapostolu Yowanu. (Yowanu 20:2) Hela chochu, ambanda amakwawu adi kwijamu anamoni kañelu. Nawa mukachi kejamu mudi kañelu mukwawu, “navwali munkukumba wutooka.”—Maku 16:5.

Kañelu wumu nayileji nindi: “Bayi mutiya womaku, muloña neluki nami munakukeña Yesu ajahililiwu hamutondu. Munu mwosiyi, anamusañuli dehi neyi chahosheliyi. Twayenu, talenu heluña hakaamayi. Yenu swayi-swayi mwakaleji atumbanji twindi nenu anamusañuli dehi mudi afu nawa wukuyañahu dehi kuÑaliliya.” (Matewu 28:5-7) Dichi “iku anakuzaala nawa anahayami nankashi,” awa ambanda anayi nakuleja atumbanji.—Maku 16:8.

Haniyi mpinji, Mariya nawani Petulu niYowanu. Iku nakwonashana, nayileji nindi: “Mwanta anamufumishimu mwijamu, nawa tuneluki wanyi kunamukaamikiwu.” (Yowanu 20:2) Petulu niYowanu anatemukiliku lufuchi. Yowanu natemuki chikupu nawa nashikihu dehi kwijamu. Nasumbilimu nawa namoni mahina amujiñiliwu nachu, ilaña neñilimu wanyi.

Ilaña Petulu chinashikiyi, nashikeni dakwiñilamu lwe-e. Namoni mahina nihina damukasiliwu Yesu kumutu. Yowanu niyena chineñiliyi, neteji dinu mwahoshayi Mariya. Hela chakwila Yesu wayilejeli, kwosi niwumu hakachi kawu wuneluki nawu anamusañuli. (Matewu 16:21) Anahayami chikupu, nawa anafunti kumukala. Ilaña Mariya, wunafunti cheñi kwijamu, nashali kwenoku.

Hayoyeniyi mpinji, ambanda amakwawu anayi nakuleja atumbanji amakwawu nawu Yesu anamusañuli. Iku anakuya lufuchi nakuyileja, Yesu nayibulakani nawa nayimushi nindi: “Kolenu!” Anadimbuki kunyendu yindi ‘nakudifukula kudi yena.’ Kuhiñahu Yesu nayileji nindi: “Bayi mutiya womaku! Yenu muyileji anakwami kulonda ayi kuÑaliliya, kwenoku dikukummwenawu.”—Matewu 28:9, 10.

Hakusambila, hikwamwekeni mutentashi nawa hamwekeni añelu, amashidika adiña kwijamu “azaalili nawa ekalili neyi anafwi.” Hanyima yakuhinduka, eñilili mumusumba “nakuleja akulumpi jawatupristu yuma yejima yamwekeni.” Kuhiñahu atupristu ehwili akulumpi jawaYudeya. Afuukwili nawu ayifweti amashidika kulonda asweki nsañu nawa ahoshi nawu: “Atumbanji twindi enza wufuku nakumwiyamu hitwadiña mutulu.”—Matewu 28:4, 11, 13.

Amashidika awaRoma ayijahileña neyi akaama iku anakuzata, ilaña atupristu anayishiiki nawu: “Neyi nguvulu wukutiya iyi nsañu [makudi awu akamana], bayi mwakamaku, tukumulumbulwila.” (Matewu 28:14) Amashidika aneteji majika kanwa nawa aneli munayilejiwu kudi atupristu. Dichi nsañu yakutwamba yakwila nawu mujimba waYesu anawiyi yinatandi kwejima mudi aYudeya.

Mariya Mandaleni nakudila kwijamu. Chineli nindi asumbilimu, namoni antu ayedi anavwali jitooka! Wumu nashakami kumutu kwatalishililiwu mujimba waYesu nawa mukwawu kunyendu. Anamwihuli nawu: “Eyi mumbanda, wunakudiladi?” Mariya nakuli nindi: “Mwanta wami anamufumishimu, nawa neluki wanyi kunamukaamikiwu.” Nindi abalumuki, Mariya namoni muntu mukwawu. Niyena namwihuli lwihu lwehulawu añelu nawa nabombelihu nindi: “Wunakukeñanyi?” Iku nakutoñojoka nindi hekwawu hindimi, nahoshi nindi: “Mwanta, neyi yeyi wunamusendi, nleji kuwunamukaamiki kulonda nimusendi.”—Yowanu 20:13-15.

Kafwampi, Mariya nakuhosha naYesu anasañuliwu, ilaña haniyi mpinji namwiluki wanyi. Hela chochu, chinamuteniyi nindi, “Mariya!” nashikeni kwiluka nindi Yesu diyi, namwiluki chamutenañayi mpinji yejima. Mariya nabidiki namuzañalu nindi, “Raboni!” (daya mukwila nawu, “Ntañishi!”). Ilaña, chineli neluki nindi keña ayi mwiwulu, namukwatishi chikupu. Dichi, Yesu namuleji nindi: “Lekaku kunkakela, muloña kanda niyi kudi Tata. Ilaña yaña kudi amanakwami, wuyileji neyi, ‘Inakuya kudi Tata yami nawa Tata yenu, kudi Nzambi yami nawa Nzambi yenu.’”—Yowanu 20:16, 17.

Mariya nayi lufuchi kunapompeli apostolu niatumbanji amakwawu. Nayileji nindi: “Namumoni Mwanta!” kubombela hansañu yikwawu yinatiyiwu kudi ambanda amakwawu. (Yowanu 20:18) Hela chochu, “awa mazu amwekeni neyi amukunkulwayi kudi wena.”—Luka 24:11.

HaMulungu, Nisani 16, atumbanji ananeñi chikupu. Aneluki wanyi muchinatalishi hakuwana mwijamu mwosi muntu. (Matewu 28:9, 10; Luka 24:11) Kushika namwaana, Kilopa nikambanji mukwawu anafumi muYerusalema nakuya kuEmawusi, hadi makilomita 11.

Hanakuyawu, anakuhanjeka hayuma yinamwekani. Dichi muntu wacheñi nenzi nakuyiwana. Nayihuli nindi: “Nsañwinyi yimunakuhanjeka enu ayedi munjila?” Kilopa nakuli nindi: “Komana eyi wudi mwenyi nkaweyi wunakushakama muYerusalema wunabuli kwiluka yuma yinamwekani mumusumba munanu mafuku tahindi?” Iwu muntu anabuli kwiluka nayihuli nindi: “Yumanyi yenoyu?”—Luka 24:17-19.

Anahoshi nawu: “Hiyuma yinakundami kudi Yesu wakuNazareta, . . . twakuhwelelaña netu iwu muntu diyi wadi kwamwina Isarela.”—Luka 24:19-21.

Kilopa niibwambu dindi anatwalekihu kulumbulula yuma yamwekana hanidi ifuku. Anahoshi nawu ambanda amakwawu aya kwijamu kwamujiikiliwu Yesu awana mwosiyi nawa amona yuma yakamwekanaña, amona añelu ayedi ayileja nawu Yesu wamumi. Nsañu yashimunawu amakwawu niwena aya kwijamu yoyimu nawa “awana neyi chahosha owu ambanda.”—Luka 24:24.

Atumbanji ayedi anahayami chikupu munatalishi yuma yamwekana. Iwu muntu anabuli kwilukawu nayakuli nawuswa wakwolola yitoñojoka yawu yaheña, yinakuyikabisha kunyichima, nahoshi nindi: “Enu antu abula maana nawa abulaña kwiteja swayi munyichima yuma yejima yahosheli atuprofwetu! Komana Kristu hateleleli kukabakana nayumiyi nikwiñila mukulema kwindiku?” (Luka 24:25, 26) Natwalekihu kuyilumbulwila jiNsona jahosha hadi Kristu.

Ichi anashiki kwakwihi naEmawusi muwusatu wawu. Atumbanji ayedi anakukeña kutiyilahu nsañu yikwawu, anamuleji nawu: “Shakamaku nanetu, muloña kuneli dehi melela nawa itena keña dihumi.” Neteji kushakama nawu, nawa anadii yakuda. Hampinji iwu muntu anabuli kwilukawu chinakulombayi, hakuhumuna dinkendi, nakuyinka wena, anamwiluki, ilaña naleki kumwekana. (Luka 24:29-31) Ichi aneluki chikupu nawu Yesu wamumi!

Awa atumbanji ayedi anazañalali nawa anahoshi hachuma chamwekana nawu: “Komana nyichima yetu mukachi hiyatatashanaña chahoshañayi nanetu munjila nichatubakwilañayi chikupu Nsonaku?” (Luka 24:32) Anafunti swayi-swayi kuYerusalema, chinashikiwu anawani apostolu niantu amakwawu adiwu nawu. Henohu Kilopa nebwambu dindi kanda awuuli mujimbu, anatiyi antu amakwawu anakuhosha nawu: “Chalala Mwanta amusañula, nawa wamwekana kudi Shimona!” (Luka 24:34) Kuhiñahu, muwuyedi wawu anashimuni Yesu chamwekanayi kudi wena. Eña, niwena hiyayinsahu achumichi.

Ichi ejima wawu anahayami, muloña Yesu namwekani mukapeka! Chumichi chakuyahamisha muloña adenzelaku kuchina aYudeya. Hela chochu, Yesu nemani mukachi kawu. Namazu awunda, nahoshi nindi: “Kuwunda kwiikali nanenu.” Ilaña anatiyi woma. Neyi cheliliwu hakusambila, ‘anakutoñojoka neyi anamoni spiritu.’—Luka 24:36, 37; Matewu 14:25-27.

Hakudimwekesha nindi himujimu wanyi hela chuma chakufwikija hohu, ilaña nindi wukweti mujimba wamusunyi, Yesu nayitalishi mumakasa ninyendu yindi nawa nahoshi nindi: “Munaakamidi, nawa munakujinokeladi munyichima yenu? Talenu makasa ami ninyendu yami, kulonda mwiluki nenu yami; nkwatenu muntiyi, muloña spiritu hekala namusunyi nimafwaha jinikweti ami neyi chimunammoniku.” (Luka 24:36-39) Anazañalali ilaña cheñi anakujinoka neyi dimu.

Hakukeña cheñi kuyikwasha kulonda eluki nawu diimu, nayihuli nindi: “Mukwetihu yakuda kunu?” Natambuli chitebu chadinkendi ninshi nawa nadii. Kuhiñahu nahoshi nindi: “Awa diwu mazu ami inayilejeli hinachidiña nanenu, nami yuma yejima yasonekawu hadi ami muNshimbi jaMosi, mumazu awaTuprofwetu nimuMasamu yatela kushikijewa.”—Luka 24:41-44.

Yesu wamukwasha Kilopa niibwambu dindi kutiyishisha Nsona, nawa neli chochimu haniyi mpinji kudi awa anapompi, nayileji nindi: “Ichi dichasonekawu: nawu Kristu wakakabakana nawa wakasañuka mudi afu hefuku damuchisatu, nawa kushindamena hejina dindi, nsañu yakwila nawu antu atela kubalumuka munyichima kulonda ayanakeni nshidi jawu akayishimwina mwahita nyuza yejima—kutachikila muYerusalema. Enu mwakekala ayinsahu ayumiyi.”—Luka 24:46-48.

Kudi chinaleteshi kapostolu Tomasi kubula kwikalahu haniyi mpinji. Hamafuku analondelihu, akwawu anamuleji namuzañalu nawu: “Tunamumoni Mwanta!” Tomasi nayakuli nindi: “Ami nukwiteja hohu neyi namoni mwahitili nyisumali mumakasa indi, niiñiji nimunu wami mwahitili nyisumali nawa niiñiji nichikasa chami kukabavu kindi.”—Yowanu 20:25.

Chimunahiti mafuku 8, atumbanji anadishinkiliku cheñi, nawa haniyi mpinji adi naTomasi. Yesu namwekani kudi wena namujimba wawuntu nawa nayimushi nindi: “Kuwunda kwiikali nanenu.” Chinabalumukiliyi kudi Tomasi, Yesu nahoshi nindi: “Shaku munu weyi aha, talaña makasa ami, nawa nonaku chikasa cheyi wuchiñiji kukabavu kami, kulonda wuleki kujinoka, witeji.” Tomasi nabidiki nindi: “Mwanta wami nawa Nzambi yami!” (Yowanu 20:26-28) Ichi dinu nakujinoka wanyi nindi Yesu wamumi nawa nekali ñimenu yaYehova Nzambi.

Yesu nahoshi nindi: “Wuneteji muloña wunammoni tahindi? Adi namuzañalu wowu aneteji hela chakwila hiyanamoniku.”—Yowanu 20:29.