Munafumi Nsañu Yakuzatisha muChihandilu niMudimu Wanetu AkaKristu Mukanda waKupompa
© 2024 Watch Tower Bible and Tract Society of Pennsylvania
NOVEMBER 4-10
YUMA YALEMA YAMWIZU DANZAMBI ISAMU 105
“Wanukaña Chitiyañenu Chindi Haya Nyaaka”
Tunateli Kukolesha Ñahi Chikuhwelelu Chetu muChikaninu chaYehova chaKaayi Kakaha?
11 Talenu yuma yamwekeni neyi yikutwesheka kuzatika wanyi yakaniniyi Yehova antu jindi kunyima. Wayikanini aAbarahama naSara nindi akavwala mwana weyala muwushinakaji. (Kutach. 17:15-17) Wamulejeli cheñi nindi mutaña windi akawinka ituña daKenani. Hadi yaaka yayivulu yashakamini mutaña waAbarahama, dikwila nawu aIsarela, muwuduñu muEjipitu, chatela chamwekeni neyi ichi chikaninu chakashikijewa wanyi. Ilaña chashikijeweli. Chimwahitili mpinji, Yehova washimwini nindi kashinakaji Elizabeta wakavwala mwana. Wamulejeli cheñi mujiki Mariya nindi, wakamuvwalila Mwanindi owu wakaniniyi Yehova kunyima hadi yaaka yayivulu mwitempa daEdeni nindi wakenza—ichi chikaninu nichena chashikijeweli!—Kutach. 3:15.
12 Twakuhwelelaña chikupu muñovu jaYehova jakuleta kaayi kakaha neyi tutoñojokaña hayikaninu yakaniniyi nichayishikijañayi. (Tañenu Yoshuwa 23:14; Isaya 55:10, 11.) Chumichi chatuleteshaña kwikala adiloñesha chiwahi kukwasha antu kulonda eluki nawu chikaninu chahosha hakaayi kakaha bayi neyi hichilota hela kaanuku. Yehova yomweni diyi wahosheli kutalisha hamawulu amaha niiseki dadiha nindi: “Awa mazu atelela kuyikuhwelela nawa alala.”—Chim. 21:1, 5.
it-2 1201 ¶2
Izu
Yileñaleña, yonaña niyabulaña kwona, yovwahilaña Izu daNzambi, nawa nateli kuyizatisha kulonda ashikiji nkeñelu yindi. (Ms 103:20; 148:8) Izu dindi dashindamenewa; Nzambi welaña yuma yejima yakanañayi. (Kuh 9:5; Ms 105:42-45) Neyi chahoshayi yomweni nindi, Izu dindi “datwalekañahu haya nyaaka”; hidakafunta chakadi kushikija nkeñelu yaduku.—Isa 40:8; 55:10, 11; 1Pe 1:25.
Yuma Yalema yakuSpiritu
w86 11/1 19 ¶15
Atwansi—Yuma Yimwatela Kwila muChisaka chaMuzañalu nawa Chanuñañana
15 “Ahatili nyendu yindi [yaYosefu] mumpompa, nshiñu yindi ayishili muyikuñu; sampu nichashikijeweli izu dindi, mazu aYehova diwu amutookesheli.” (Isamu 105:17-19) Hadi yaaka 13, Yosefu wakabakeni hadiñayi nduñu nawa kayili sampu nichashikijeweli chikaninu chaYehova. Muloña wayuma yahitilimu amutookesheli. Hela chakwila Yehova hidiyi wakojejeli chumichiku, wetejeli chumichi muloña wakwila wadiña nankeñelu. Komana Yosefu wukutwalekahu kuchiñeja ‘mumazu aYehova’ hela chakwila wamweneña ikabisha dasweja? Komana wukupama nakwikala nayilwilu yayiwahi, nikwikala wadiwunjika, wadizoza, wakola kuspiritu nawa nikufwila chikupu kuzata mudimu wakala? Mwamweni, Yosefu watookeli neyi wuru yinafumi mukesi kamukakweñununa dikwila nawu watookeli nankashi nawa wekalili walema chikupu kumesu aNzambi, wamuzatishili chiwahi.—Kutachika 41:14, 38-41, 46; 42:6, 9.
NOVEMBER 11-17
YUMA YALEMA YAMWIZU DANZAMBI ISAMU 106
“Amuvulameneni Nzambi, Chamwinu Chawu”
‘Hinyi Wudi Kukabadi kaYehova?’
13 AIsarela atiyili woma nevu dashishita, kukenashana niyinjikijilu yikwawu yakuhayamisha yamwekesheliyi Nzambi. Alombeli nawu Mosi ayihosheleñaku, Mosi wetejeli kuyihoshelaña hayuma yejima yahosheleñayi Yehova haMpidi yaSinayi. (Kwid. 20:18-21) Mosi washimbwili hewulu dampidi. Komana aIsarela alulutili muchinkalampata hakubula nlomboli yawu akuhweleleliwu? Chinamwekani neyi awa antu chikuhwelelu chawu chashindameneni hadi Mosi neyi wudi hohu. Akameneni nawa amulejeli Aroni nawu: “Nyamukaku wutwilili [nzambi yetu] atwaminaña kumbidi kutukuya; yeniwu Mosi, iwu iyala watufumishili mwituña daEjipitu, hituneluki kwanayiyuku.”—Kwid. 32:1, 2.
Yuma Yalema yakuSpiritu
w06 7/15 13 ¶9
Yikuma Yamaneni Kufuma muNyikanda Yisatu niYiwana yaMasamu
106:36, 37. Awa mavasi ahoshaña nawu hekala chaambu wanyi hakachi kakudifukula kudi ankishi nakulambula kudi andemoni. Chumichi chinatalishi mukwila nawu muntu wazatishaña ankishi amulombolaña kudi andemoni. Bayibolu yatukonkomwenaña nawu: “Tondolwelenu kupesha ankishi.”—1 Yowanu. 5:21.
NOVEMBER 18-24
YUMA YALEMA YAMWIZU DANZAMBI MASAMU 107-108
“Musakililenu Yehova, Muloña Himuwahi”
Chipompelu Chimuhameki Yehova
2 Chipompelu hichekala hohu neyi izanvu dawantu dazatilaña hamuku. Hichidi neyi izanvu damuchituñilu hela chendu kwakuñulukilaña antu achisemwa chimu hela akeña yisela yoyimuku. Ilaña, nkeñelu yachipompelu yekala hohu yakumuhameka Yehova Nzambi. Iyi nkeñelu yatachikili dehi, neyi chakwonkomwenaña mukanda waMasamu. HaMasamu 35:18, twatañañahu nawu: “Nukukusakilila muchipompelu cheneni, nukukuhameka mukachi kawantu amavulu.” Chochimu, Isamu 107:31, 32 datukwonkomwenaña nawu: “Antu mutenowu adi kumusakilila Yehova chaswejayi luwi! O chelilañayi anyana kawantu nyidimu yindi yakuhayamisha! Amutuumbakeshi nawa muchipompelu chawantu.”
Musakililenu Yehova Kulonda Ayikiswili
4 Neyi tunakukeña kwikala namuchima wakusakilila nikutwalekahu kusakilila, twatela kwiteja nikutoñojoka chikupu chatukiswilayi Yehova nikutoñojoka nakanañachima chatukeñayi. Ñimbi yamasamu cheliliyi mwenimu, wahayamini chikupu hakumona yuma yayivulu yamwililiyi Yehova.—Tañenu Masamu 40:5; 107:43.
Yuma Yalema yakuSpiritu
it-2 420 ¶4
Mowabi
Mukuhita kwampinji, hadiñayi Davidi mwanta, kwadiña cheñi njita hakachi kawaIsarela nawaMowabi. AMowabi ayishindili chikupu nawa atachikili kumuletela Davidi mulambu. Chinamwekaniyi neyi hakukuma kwanjita nyisululu yiyedi yawamashidika awaMowabi ayijahili. Chinamwekani neyi Davidi wayikaamikili heseki nakuyipima namonji nawa kuhiñahu wayipimini nakujaha nyisululu yiyedi nawa musululu wumu awujahili wanyi. (2Sa 8:2, 11, 12;1Ku 18:2, 11) Hadaha hampinji yazuñileñawu iyi njita, Benaya mwana kaYehoyada “watapili anyana kaAriyeli wakuMowabi ayedi awamayala.” (2Sa 23:20; 1Ku 11:22) Davidi chashindiliyi aMowabi chashikijili mazu awuprofwetu aBalami ahosheliyi kubadika yaaka 400 yahitilihu: “Katumbwa kakafuma kudi Yakoba, nawa nkuunyi yakafuma kudi Isarela. Nawa chakadi nikujina, wakachika ihama daMowabi nikubalola tuwekesi twawanyana awamayala ejima aletaña yikonkojola.” (Kuc 24:17) Cheñi hadaha muloña waniku kushinda, ñimbi yamasamu wahosheli hadi Nzambi kutalisha hadi aMowabi nindi ‘hicheña chakuwelelahu.’—Ms 60:8; 108:9.
NOVEMBER 25–DECEMBER 1
YUMA YALEMA YAMWIZU DANZAMBI MASAMU 109-112
Muhakwilenuku Yesu, Mwanta!
w06 9/1 13 ¶6
Yikuma Yamaneni Kufuma muNyikanda Yitanu yaMasamu
110:1, 2—Yumanyi yeliliyi “Mwanta [waDavidi],” Yesu Kristu hashakaminiyi kuchikasa chaNzambi chachidiilu? Hanyima yakusañuka, Yesu wayili mwiwulu nakuhembelela kuchikasa chaNzambi chachidiilu sampu nichashikili chaaka cha 1914 hekaliliyi Mwanta. Hayina mpinji, Yesu wayulileña akakumulondela indi awayishewa, nakuyilombola mumudimu wakushimwina nikwilisha atumbanji, nikuyiloñesha kulonda akayuuli hamu nayena muWanta windi.—Matewu 24:14; 28:18-20; Luka 22:28-30.
w00 4/1 18 ¶3
Akakuzuña naNzambi hiyaKashindaku!
3 Antu jaYehova atachikili dehi kuyilukuka kufuma tuhu kumatachikilu ayaaka yamuma 1900. Mumatuña amavulu, antu atama afwilaña kukañesha, hela netu kulekesha, mudimu wakushimwina nsañu yayiwahi yaWanta waNzambi. Anayiluwañeshi kudi Mukankunyi netu muneni, Diyabolu, “wendujolaña neyi mutupa wabulumaña, nakukeñakeña watela kudayi.” (1 Petulu 5:8) Hanyima yakukuma “[kwa]mpinji yatoñolawu yawakanyuza” mu 1914, Nzambi wamutondeli Mwanindi kwikala Mwanta weseki wamuha, nakumuleja nindi: “Yaña wuyuuleña hakachi kawayilumbu jeyi.” (Luka 21:24; Isamu 110:2) Kristu wazatishili ñovu yindi nakumunata Satana kufuma mwiwulu nakwinza hanu hamaseki. Chineli neluki nindi mpinji yinashaliku yinakehi dehi, Diyabolu nakusukwila ndulu yindi hadi akaKristu awayishewa nialundanawu. (Chimwekeshu 12:9, 17) Yumanyi yinafumimu muniku kulukuka kwawakakuzuña naNzambi kunatwalekihu?
be 76 ¶2
Yenuña haMbidi—Pamenuña
Kukonkomwena kwakuzatisha waana wenu kwatalisha mukwila nawu mwatela kutachikilañahu. Komana mwatachikilañahu kukeña antu akuzata nawu mumudimu wakushimwina? Komana mwakwashaña amaha, atwansi, hela ayifwayi amuchipompelu chenu? Komana mwadihanaña kuwahishaku Mwitala daWanta hela kukwashanaku munyidimu yambokamboka hakupompa kwamaneni hela kwanyanya? Komana kwila musonekeshañaku wupayiniya wakukwasha mumpinji-mumpinji nehi? Komana munateli kuzata wupayiniya wampinji yejima hela kuya nakuzatila muchipompelu mudi kukankila? Neyi mudi manakwetu, komana munakufwila kushikija yuma yakeñekaña yamuNsona hakwila mwiikali nkoñi wakuzatila hela mukulumpi? Neyi mudihanaña nawa mwitejaña nyidimu hichinjikijilu chinakumwekesha nawu munakupama.—Mas. 110:3.
Yuma Yalema yakuSpiritu
it-1 524 ¶2
Chitiyañenu
Chitiyañenu chakwikala kaPristu neyi Melekizedeki. Ichi chitiyañenu achimwekesha haIsamu 110:4, nawa nsoneki waBayibolu wasonekeli AHeberu wachikundamishili kudi Kristu haAHeberu 7:1-3, 15-17. Hichitiyañenu chatiyañeniyi Yehova naYesu. Hadaha Yesu wahosheleña hanichi chitiyañenu hakwatileñayi chitiyañenu nawakakumulondela indi. (Luk 22:29) Kwesekeja nachasanyikiliyi Yehova, Yesu Kristu, Mwana kaNzambi, wakekala kapristu neyi chadiñayi Melekizedeki. Melekizedeki wadiña mwanta nawa kapristu waNzambi heseki. Yesu Kristu wakekala Mwanta nawa Kapristu Muneni, bayi hanu hamasekiku, ilaña mwiwulu. Amwinkeli ichi chifulu hanyima yakuya mwiwulu. (Heb 6:20; 7:26, 28; 8:1) Ichi chitiyañenu chakatwalekahu haya nyaaka, chineli Yesu wakazataña kwesekeja nachakamulombolañawu kudi Yehova hamu neyi Mwanta nawa Kapristu wahaya nyaaka.—Heb 7:3.
DECEMBER 2-8
YUMA YALEMA YAMWIZU DANZAMBI MASAMU 113-118
Nukumufwetadi Yehova?
w01 1/1 11 ¶13
Tuñewenu naKukeña
13 Mazu aYesu, anamwekeshi hatooka nawu chuma chalema nankashi chitwatela kwila hikumukeña Yehova. Hela chochu, hitwavwalikaña nachilwilu chakumukeña chikupu Yehovaku. Hichuma chitwatela kwikala nachu. Chitwamutiyili katachi, twaswinini kwakwihi nayena muloña wayuma yitwatiyili. Mukuhita kwampinji, twadizili chaloñesheliyi iseki kulonda antu akashakameñahu. (Kutachika 2:5-23) Twadizili yuma yayikoñelayi antu, hatuumbili chisayikila chelili nshidi yiñili mudi antuku, ilaña kudi yuma yeliliyi kulonda yatukuuli. (Kutachika 3:1-5, 15) Wayililileña yuma yayiwahi antu ashinshika, nawa nkumininaku wahanini Mwanindi wumu hohu kulonda atwanakeni nshidi jetu. (Yowanu 3:16, 36) Chitwaswejeli kumwiluka, chatuletesheli twiikali namuchima wakumusakilila Yehova. (Isaya 25:1) Mwanta Davidi wahosheli nindi wamukeñeli Yehova muloña wakukeña kwindi. (Isamu 116:1-9) Makonu, Yehova watwakamenaña, watulombolaña, watwinkaña ñovu nikutukolesha. Chitwasweja kumwiluka, kukeña kwetu kwaswejelañaku.—Isamu 31:23; Zefwaniya 3:17; ARoma 8:28.
w09 7/15 29 ¶4-5
Tambwilenu naKusakilila, Hanenu naMuchima Wumu
Ñimbi yamasamu wadihwili nindi: ‘Indi Yehova nukumwinkadi nayuma yayiwahi yejima yinañililiyi?’ (Mas. 116:12) Kukoolekanyi kwatambwililiyi? Yehova wamukwashili hampinji yamweniyi “yihuñu nimakabi.” Kubombelahu, Yehova ‘wapulwishili niwumi windi mukufwa.’ Dichi wakeñeleña ‘kumwinka’ Yehova chuma munjila yidi yejima. Chumanyi chadi kwilayi ñimbi yamasamu? Wahosheli nindi: “Nukumufuta Yehova yuma yinadishiilili.” (Mas. 116:3, 4, 8, 10-14) Wafuukwiluhu kushikija yuma yejima yamukaniniyi Yehova nawa nikushikija yuma yejima yahosheliyi nindi wukumwilila.
Munateli kwila chuma cheliliyi ñimbi yamasamu. Munjilanyi? Kuhitila mukukakela kunshimbi jaNzambi muchihandilu chenu mpinji yejima. Dichi, ilukenu chikupu nenu mwalemesha nankashi kudifukula kudi Yehova muwumi wenu, nawa mwetejaña spiritu yaNzambi kuyilombola muyuma yejima yimwelaña. (Mukwa. 12:13; Ñal 5:16-18) Kafwampi, himukutwesha kumufuntishila Yehova chikupu hayuma yejima yayililayuku. Hela chochu, ‘mwatiyishaña muchima waYehova kuwaha’ hakudihana namuchima wejima mumudimu windi. (Yish. 27:11) Hikukooleka kwakweni kwakumuzañalesha Yehova muniyi njila!
Yuma Yitunateli Kudizila kuMukanda waAlevi
9 Chamuchiyedi: Twamukalakelaña Yehova muloña twakeñaña kumutiyisha kuwaha. Hakwila tutiyishi chiwahi iyi nsañu, tuhanjekenu hanyilambu yakuwunda yahanineñawu aIsarela hakudifukula kwalala. Mumukanda waAlevi twadizañamu netu, kaIsarela walambwileña mulambu wakuwunda neyi chuma “chakusakilila nachu.” (Lev. 7:11-13, 16-18) Walambwileña iwu mulambu bayi neyi dichateleli kwilayiku, ilaña dichakeñeleñayi. Wafwilileña kwila mwenimu muloña wakumukeña Yehova Nzambi yindi. Muntu wahanineña mulambu nichisaka chindi kushilahu nikapristu adiileña mbiji yakanyama wunalambuluwu. Ilaña yiidi yimu yakanyama ayihanineña hohu kudi Yehova? Yiidi yamuchidinyi?
10 Chamuchisatu: Twamukalakelaña Yehova chakufuma hamuchima. Yehova walemesheli nankashi manji akanyama. Yehova washimwini cheñi yiidi yikwawu, kushilahu ninshiya nindi yadiña yalema. (Tañenu ALevi 3:6, 12, 14-16.) Dichi, Yehova watiyileña kuwaha sweje-e neyi kaIsarela mukudikeñela yamulambula iyi yiidi yakanyama yamanji. KaIsarela walambwileña yumiyi wamwekesheleña nindi nakumwinka Yehova chakufuma hamuchima. Munjila yoyimu, Yesu, wamukalakeleli Yehova namuchima windi wejima muloña Wakumukeña. (Yow. 14:31) Yesu wakeñeli nankashi kwila nkeñelu yaYehova nawa wakeñeli nankashi nshimbi jaNzambi. (Mas. 40:8) Yehova watiyileña kuwaha chamukalakeleleñawu kudi Yesu muloña wakumukeña!
11 Nyidimu yitwamukalakelaña Yehova yidi neyi nyilambu yakuwunda, muloña diyi yamwekeshaña chitwamukeña. Twamukalakelaña Yehova hakumina ñovu jetu, muloña twamukeña chakufuma hamuchima. Yehova watiyaña kuwaha hakumona mamiliyoni awantu anakumukalakela muloña wakusweja kumukeña nikukeña nshimbi jindi. Yehova wamonaña nyidimu yetu nawa wayilemesha. Chumichi chatukundejaña hama. Chakutalilahu, neyi mwakula dehi nawa munakukañanya kuzata neyi chimwazatileña, ilukenu nenu Yehova weluka kukala kumunakumona. Hadaha mwatoñojokaña nenu mukutwesha wanyi kumukalakela Yehova nankashi, ilaña Yehova weluka kukeña kwenu kwayileñelaña mumuzatileña hanakumini ñovu jenu. Watambwilaña yuma yejima yimwamwinkaña kwesekeja nañovu jenu.
Yuma Yalema yakuSpiritu
Malwihu Kufuma Kudi Antañi
Ñimbi yamasamu wonenenuwu wembili nindi: ‘Kufwa kwawantu jindi ashinshika kwalema kumesu aYehova.’ (Mas. 116:15) Wumi wawakwakudifukula alala aYehova ejima walema nankashi kumesu indi. Ilaña mazu adi muMasamu 116 hiyanakuhosha hakufwa kwamuntu wumuku.
Hakuhana mpanji yakufwa kwamukwaKristu, bayi mukunjika mazu adi haIsamu 116:15 kudi muntu wunafuku, hela chakwila nafwi nakashinshi kumesu aYehova. Muloñadi? Muloña mazu añimbi yamasamu atalisha mwamuvulu. Atalisha mukwila nawu Nzambi hanateli kwiteja antu jindi ashinshika ejima kufwaku muloña wayimonaña nindi alema.—Talenu Masamu 72:14; 116:8.
DECEMBER 9-15
YUMA YALEMA YAMWIZU DANZAMBI ISAMU 119:1-56
“Mukwenzi Nateli Kuhemba Ñahi Njila Yindi naWunyonji?”
w87 11/1 18 ¶10
Munatwalekihu Kwikala aWunyonji muYuma Yejima?
10 HaAEfwesesa 5:5 Pawulu watusoñamishili nindi: “Muloña enu aweni mweluka chikupu chumichi nenu, kwosi chivumbi, hela muntu wamajilu, hela mukalwisu, dikwila nawu mukakupesha, wakaswana wanta waKristu niwaNzambiku.” Hela chochu, antu amavulu hachaaka-hachaaka ayizuwilaña hela kuyifumisha muchipompelu muloña wawuvumbi, dikwila nawu ‘kutamisha mujimba.’ (1 AKorinda 6:18) Kakavulu, chuma chaleteshaña himuloña wakubula “kudihemba kwesekeja nezu [daNzambi].” (Isamu 119:9) Chakutalilahu, amanakwetu amavulu akoñaña yilwilu yatama neyi anayi nakunooka. Adiwulaña chahosha Bayibolu kutalisha hakukwata amabwambu, akwataña wubwambu nawantu akwituña awanañawu anayi nakunooka. Atoñojokaña nawu ‘hiyantu amawahi,’ akaKristu amakwawu adibombaña nawu muyilwilu yatama. Munjila yoyimu, amakwawu akwataña wubwambu nawantu azatañawu nawu. Mukulumpi mukaKristu wumu watachikili kudikunda nankashi namumbanda azatileñayi nindi chakwila washili chisaka chindi nakutachika kushakama nindi. Nawa amuhañili muchipompelu. Mwamweni, Bayibolu yatwamba wanyi hakuhosha nawu, “Kudikunda nawantu atama kwakisañanaña yilwilu yayiwahi.”—1 AKorinda 15:33.
w06 6/15 25 ¶1
“Nakeña Nankashi Yanukishu Yeyi”
YEHOVA wenkaña antu jindi yanukishu kulonda ekali nañovu yakuumika kukala mujinu mpinji jakala. Iyi yanukishu yikwawu twayiwanaña hakutaña Bayibolu kwahalwetu, yikwawu twayitiyilaña kujimpanji hela kuñakwilu yahanañawu hakupompa kwawakaKristu. Nsañu yayivulu yitwatañaña hela kutiya haniji mpinji twayiluka dehi. Hadaha, twadizilihu nsañu yoyimu kunyima. Hela chochu, chineli twavulamenaña, twakeñekaña kwanukisha yitoñojoka yetu kutalisha hankeñelu yaYehova, nshimbi niwunlomboli. Twatela kusakililaña hayanukishu yaYehova. Yatuleteshaña kwanuka yuma yatusañumwini kwila nkeñelu yaNzambi. Dichaletesheli ñimbi yamasamu kumwimbila Yehova nindi: “Nakeña nankashi yanukishu yeyi.”—Isamu 119:24.
Tondolwelenu Kutala Yuma Yamukunkulwayi!
2 Hela chochu, yuma yitwamonaña yinateli kutuletela wubanji. Kunuñañana kwekala hakachi kamesu etu niyitoñojoka kwekala kwakola chikupu chakwila yuma yitwamwonaña namesu etu yinateli kuleñela hela kusañumuna chikupu yuma yitwafwilaña. Nawa chineli twashakamaña mwituña datama dinakuyuulewa naSatana Diyabolu nawa mwekala yuma yakuditiyisha nachu kuwaha, twamonaña nyevulu yayivulu nikutiya nsañu jakutwamba jinateli kunyakala kutuluwañesha, hela chakwila tuyikewukila hohu chakuyikewukila. (1 Yow. 5:19) Dihafumini ñimbi yamasamu kumulembelela Nzambi nindi: “Mbalumwini mesu ami abuli kutala yuma yamukunkulwayi, wunhizumwishi munjila jeyi.”—Mas. 119:37.
Yuma Yalema yakuSpiritu
w05 4/15 10 ¶2
Kuhwelelenu Mwiizu daYehova
2 Chikuma chalema chekala Hesamu 119 hikulema kwezu daNzambi. Nsoneki wasonekeli idi isamu kwikala kamina kakudizisha nachu ndonda yamazu, chakadi nikujina kulonda kekali neyi chanukishu. Mavasi aku 176 ashindamena handonda yansona yachiHeberu. MuchiHeberu, chibalu hichibalu hayibalu 22 yanidi isamu chikweti mavasi 8 atachika nansona yoyimu. Idi isamu datenaña Izu, nshimbi, yanukishu, njila, kuleja, wunsompeshi, mazu, niyidika yaNzambi. Muchinu chibaaba nichinalondelihu, tukuhanjeka Hesamu 119 kwesekeja nachasonekawu nsona yabalumunawu choloka kufuma muBayibolu yayeni yachiHeberu. Kutoñojoka chikupu hayuma yamweni ambuña aYehova akunyima niamakonu kukutukwasha kuswejelaku kulemesha itu tumina tonenewa nikulemesha Izu daNzambi dasonekawu, Bayibolu.
DECEMBER 16-22
YUMA YALEMA YAMWIZU DANZAMBI ISAMU 119:57-120
Chakuumika Makabi
w06 6/15 20 ¶2
“Ochinakeña Nshimbi Jeyi!”
2 Chikuwaha neyi mukudihula nenu, “Munjilanyi nshimbi jaNzambi mujamukundejeleleña ñimbi yamasamu?” Kukuhwelela nindi Yehova wamukwashileña dichuma chamukolesheleña. Kwovwahilaña nshimbi jaNzambi dichuma chamukwashileña ñimbi yamasamu kwikala namuzañalu, hichikweti muloña nakukala kwamweneñayiku. Welukili nindi Yehova wamutiyilileña luwi. Kubombelahu, kuzatisha nshimbi janzambi kwamukwashili ñimbi yamasamu kwikala namaana akubadika ayilumbu jindi nawa watwalekelihu kwikala wamumi. Kwovwahila nshimbi kwamukwashili kwikala mukuwunda ninachinleji chitooka.—Isamu 119:1, 9, 65, 93, 98, 165.
w00 12/1 14 ¶3
Komana Mwakeñesha Yanukishu yaYehova?
3 Ñimbi yamasamu wakeñeli nankashi yanukishu yaNzambi chakwila wembili nindi: “Nanyakalaña nawa hinashintajalaña Kuhemba nshimbi jeyiku. Nyonji yawantu atama yinannyeñumuki, Ilaña nshimbi jeyi hinajivulamenañaku.” (Isamu 119:60, 61) Yanukishu yaYehova yatukwashaña kuumika makabisha muloña wakwila tweluka chikupu netu Tata yetu wamwiwulu nateli kuketola nyonji yinateli kutukasawu nachu ayilumbu jetu. Mukuhita kwampinji, watusubulaña kumakañesha hakwila tutwalekihu namudimu wetu wakushimwina haWanta.—Maku 13:10.
w06 9/1 14 ¶4
Yikuma Yamaneni Kufuma muMukanda wamuChitanu waMasamu
119:71—Yumanyi yayiwahi yekala mumakabi? Makabisha anateli kutukwasha kumushindamena Yehova chikupu, kulomba chakufuma hamuchima, kutañaña nankashi Bayibolu nikuzatisha yuma yitunatiyi. Cheñi, chitukwila namakabi chikumwekesha hitwatela kuwahishaku halwetu. Neyi twiteja makabi kutukwasha mutunashalili chumichi hichikatuletesha kuzuwaku.
“Dililenuña Hamu Nawantu Adilaña”
3 Chakadi nikujina, Yehova diyi Tata yetu wamwiwulu wasweja luwi watukundejaña. (Tañenu 2 AKorinda 1:3, 4.) Yehova, muntu wasweja luwi walejeli antu jindi nindi: “Ami, chalala yami, nayikundejaña.”—Isa. 51:12; Ms 119. 119:50, 52, 76.
5 Tunateli kukuhwelela chikupu netu Yehova wakatukwasha. Bayi tushintajala kumulejamu mukulomba chakufuma hamuchima chitunakutiyaku. Twakundejewaña chikupu kwiluka netu Yehova weluka chitwatiyaña nawa watukundejaña! Watukundejaña ñahi?
Yuma Yalema yakuSpiritu
w06 9/1 14 ¶5
Yikuma Yamaneni Kufuma muMukanda wamuChitanu waMasamu
119:96—Indi mazu akwila nawu ‘yuma yejima yawanina yikweti hiyakumina’ atalisha mudihi? Ñimbi yamasamu chahosheleñayi hakuwanina wahosheleña kuwanina kutweluka etu antu. Hadaha welukili nindi antu hiyelukisha mwatalisha kuwaninaku. Kwambukaku, nshimbi jaNzambi hijakuminaña hohu hamuku. Jalombolaña antu muyuma yejima yelañawu muchihandilu chawu. The New International Version yahosha nawu “Yuma yejima yawanina yakumaña, ilaña kuleja kweyi kweneni nankashi.”
DECEMBER 23-29
YUMA YALEMA YAMWIZU DANZAMBI ISAMU 119:121-176
Chakutondolwela Kuneña-neña Kwabula Kutelela
Itejenu Nshimbi niYishina yaNzambi Yidizishi Chinleji Chenu
5 Hakwila nawu nshimbi jaNzambi jitukwashi, Bayi tukuminaña hohu dakujitaña nikujilukaku. Twatela kujikeña nikujilemesha. Izu daNzambi dahosha nawu: “Helenu yatama, mukeñi yayiwahi.” (Amosa 5:15) Hanu dinu tunateli kwila ñahi mwenimu? Twatela kumona yuma neyi chayimonañayi Yehova. Chakutalilahu: Fwikijenu munakukamaña wanyi. Ndotolu yayileja nindi mudeña yakuda yayiwahi, kwolola mujimba nikuhimpa yuma yimu muchihandilu. Hanyima yakulondela yuma yinayilejiyi ndotolu, nawa mumona nenu yinazatiki, chakadi nikujina mukumusakilila ndotolu hakuyikwasha kuwahishaku chihandilu chenu.
6 Munjila yoyimu, Nleñi yetu watwinka nshimbi jinateli kutukiña kuyuma yinateli kutuluwañesha yafumaña kunshidi nawa yinateli kuwahishaku chihandilu chetu. Toñojokenu yuma yayiwahi yafumaña mukulondela nshimbi yamuBayibolu yahosha hakutwamba, kufwila yatama, wukombi, yilwilu yawuvumbi, madombu nikupanda. (Tañenu Yishimu 6:16-19; Chim. 21:8) Neyi tumona yuma yayiwahi yafumaña mukwila yuma yakeñañayi Yehova twaswejaña kumukeña Yehova ninshimbi jindi.
w93 4/15 17 ¶12
Anyikwenzi—Yumanyi Yimunakufwila?
12 Chuma chasweja kubadika, mwatela kwiluka chakutiya kutama, kubula kuhemba, nikuhela yuma yatama. (Isamu 97:10) Munateli kuhela ñahi yuma yimwakeñeli? Kuhitila mukutoñojoka yuma yinateli kufumamu neyi muchila ochu chuma! “Bayi ayiluwañeshaku: Nzambi hiyamusupishañaku. Muloña chuma chinakukuwayi muntu, dichakamunayi; muloña muntu wunakukuwa kumujimba, wakamuna kutoka kumujimba windi.” (AÑalija 6:7, 8) Neyi chakwila ayeseka chakwila himukukeña kwilamu, sambilenu ntahi kutoñojoka hachuma chinateli kufumamu—indi Yehova Nzambi wukutiya ñahi. (Esekejenu Isamu 78:41.) Toñojokenu cheñi, mudimu wumunateli kwikala nawu wakwakamena mavumu akadi kukuhwelela indi kwiji kutambula kabubu, chidi neyi AIDS. Toñojokenu chimukutiyaña nichimukujimbesha kalemesha kimukweti. Munateli cheñi kukaba hampinji yayilehi neyi chakwila mukoñamu. Mumbanda mukaKristu wahosheli nindi: “Ami nawamwanta wami twakamini hamu henohu kanda tudisumbuli. Hela chakwila ichi twekala dehi akaKristu, kudikama kutwadikamini kunyima kwatuleteshaña tuboboleña nikuditiyila lwisu.” Nawa chuma chacheni chinateli kufumamu, tunateli kujimbesha kukooleka kwetu hela kutuhaña muchipompelu chawakaKristu! (1 AKorinda 5:9-13) Komana mpwila yitwatiyaña hakampinji kantesha diyi yitwatela kutwiteja yituleteshi kumona ilamba damuchidiwu?
Yuma Yalema yakuSpiritu
Kuhwelelenu Chikupu Nenu “Izu [daNzambi] hiChalala”
2 Etu ambuña aYehova twakuhwelela chikupu netu yena “[hiNzambi] yachalala” nawa netu mpinji yejima wafwilaña kutwilila yuma yinateli kutukwasha. (Mas. 31:5; Isa. 48:17) Tweluka netu twatela kukuhwelela nsañu yitwatañaña muBayibolu netu “izu [daNzambi] dejima hichalala.” (Tañenu Isamu 119:160.) Tuneteji mazu amuntu wumu wadiza jaBayibolu netu alala, wasonekeli nindi: “Chuma chejima chahoshañayi Nzambi chalala nawa hichakakañanya kushikijewaku. Antu jaNzambi atela kukuhwelela yuma yinahoshiyi, muloña amukuhwelela Nzambi wunayihoshi.”
DECEMBER 30–JANUARY 5
YUMA YALEMA YAMWIZU DANZAMBI MASAMU 120-126
Akuwili naMadilu, Ilaña Amunini naMuzañalu
w04 6/1 16 ¶10
Antu Aletaña Mpuhu Hadi Nzambi Akiswilewa
10 Neyi tusenda mpaanda yawakaKristu, dikwila nawu tunakuzuña naSatana. Yakoba 4:7 yatukana nawu: “Dikañenu naDiyabolu, nawa wukuyitemuka.” Ilaña hichinatalishi mukwila nawu kwila mwenimu kwapelaku. Chakeñekaña kuzata nañovu hakumukalakela Nzambi. (Luka 13:24) Ilaña Bayibolu yatukana ichi chikaninu haIsamu 126:5 nayu: “Ana anakukuwa mbutu namadilu Akaañula nanyiñula yamuzañalu.” Eñañi, twadifukulaña kudi Nzambi wasakililaña. “Diyi mukakufweta antu amukeñakeñaña chikupu,” nawa wakiswilaña antu aletaña mpuhu hadi Yena.—AHeberu 11:6.
Komana Chikuhwelelu Chenu Chikekala Chakola?
17 Komana munakuneña muloña wakujimbesha ntaña yenu? Ikalenuña nampinji yakutaña nsañu yamuBayibolu kulonda mukoleshi chikuhwelelu chenu. Komana munakuneña muloña wakwila ntaña yenu amuhañili muchipompelu? Dizenuña kulonda mwiluki chikupu nenu Nzambi wababeshaña munjila yayiwahi. Kukala kwejima kumunakumona, kuzatishenuña kulonda mukoleshi chikuhwelelu chenu. Mulejenuña Yehova chimunakutiya. Bayi mudambulaña kudi amanakwenu niahelaku, ilaña dikundenuña nawu. (Yish. 18:1) Zatenuña nyidimu yikuyikwasha kuumika hela chakwila munakudila neyi mwanuka chuma chamwekeni. (Mas. 126:5, 6) Twalekenuhu kupompa, kuya nakushimwina nikudiza Bayibolu mpinji yejima. Nawa toñojokenuña hayikaninu yaYehova yayishiikayi nindi wukayinka kumbidi. Neyi mumonaña Yehova chinakuyikwashayi, chikuhwelelu chenu chikuswejelaku kukola.
w01 7/15 18-19 ¶13-14
Zatenuña Mudimu Wakwaañula!
13 Mazu hekala haIsamu 126:5, 6 akwila nawu: “Ana anakukuwa mbutu namadilu akaañula nanyiñula yamuzañalu, wayaña, hela chakwila nakudila, iku nasendi ipakumuna dambutu, chakadi nikujina wakafunta nanyiñula yamuzañalu, iku nasendi yiita yindi,” akundejaña akakwaañula aNzambi, sweje-e antu akabishañawu. Mazu añimbi yamasamu akukuwa nikwaañula amwekeshaña Yehova chakameneneñayi nikukiswila antu ashalahu afuntili kufuma muwunkoli muBabiloni. Atiyili kuwaha chikupu chayisubwiliwu, ilaña adilili chakuwileñawu mbutu heseki dooma diyabulilihu kwilahu chuma chidi chejima hadi yaaka 70 yashakaminiwu muwunkoli. Hela chochu, ilaña antu akuwili nikuzataku nyidimu yakutuña adiluñishili nayuma yayiwahi yafuminimu munyidimu yakumakasa awu.
14 Tunateli kudila neyi tudi mukweseka hela neyi akwetu akakwitiya anakukabakana kukoola kuloña. (1 Petulu 3:14) Mumudimu wetu wakwaañula, hakusambila chinateli kutukalila muloña chikumwekanaña neyi tudana jakumwekesha mumudimu wetu hela chakwila tunakudikita mumudimu wakushimwina. Ilaña neyi tutwalekahu kukuwa nikutukumwina, Nzambi wakakulisha mbutu, kubadika nichitunakukuhwelela. (1 AKorinda 3:6) Chumichi chamwekanaña nankashi muyuma yafumañamu mumaBayibolu ninyikanda yitwahanaña.
Yuma Yalema yakuSpiritu
cl 73 ¶15
Ñovu Jakukiña—“Nzambi diyi Chiswamu Chetu”
15 Sambilenu ntahi kutoñojoka, chatukiñañayi kumujimba. Hamu neyi akakudifukula aYehova, twatela kukuhwelela netu watukiñilaña hamu neyi izanvu. Muloña, neyi chakwila hatukiñileñaku chadi kwikala chaswayi kutulawula kudi Satana. Toñojokenu hachumichi: Satana, “nyuuli wakanu kaayi,” wafwilaña chikupu kujiyisha kudifukula kwalala. (Yowanu 12:31; Chimwekeshu 12:17) Jifulumendi jikwawu jikweti wuswa chikupu hanu hamaseki jinalekeshi mudimu wetu nawa jineseki kutujiyisha chikupu. Hela chochu, antu jaYehova anatwalekihu kwikala akola nawa anatwalekihu kushimwina chakadi chuma chakuyikañesha! Muloñadi nyuza yikweti ñovu chikupu chiyinakañenyi kulekesha nyidimu yanaka kadizanvu kantesha kanawa kaKristu nawa kanakumwekana neyi kadana wakuyikiña? Muloña Yehova natusweki mumpula jindi jañovu!—Isamu 17:7, 8.