Chelili aAdama naEva anayifumishi dehi mwitempa daEdeni, avweli anyana amavulu. Mwanawu wawedi, Kena, wekalili ndimi nawa mwanawu wamuchiyedi, Abeli, wekalili kabiña.

Ifuku dimu, aKena naAbeli amulambwili Yehova nyilambu. Mulambu wawiluka? Hichawaana chakumwinka Nzambi. Yehova watiyili kuwaha mulambu waAbeli, ilaña hatiyili kuwaha namulambu waKenaku. Chumichi chamuhilishili nankashi Kena. Yehova wamusoñamishili nindi kuhila kwindi kukumuletesha eli chuma chatama. Ilaña Kena hatiyililiku.

Hela chochu, Kena wamulejeli Abeli nindi: “Tuyi mumasaña.” Chadiñawu nkawawu mwisaña, Kena wamweteli mwanyikindi nakumujaha. Yehova welilidi hanichi chuma? Yehova wamubabesheli nakumuhañila kwakulehi nachisaka chindi. Kena hiyamwitejeli kufunta kudi antaña jindiku.

Chumanyi chitukudizilaku? Hadaha tukutachika kuhilashana neyi yuma hiyinakwenda kwesekeja nachitunakukeñaku. Neyi tutachika kusweja kuhila indi kwiji akwetu atusoñamisha nawu tunasweji kuhila, twatela kuhimpa yilwilu yetu swayi-swayi, kulonda tubuli kwila chuma chatama.

Chineli Abeli wamukeñeli Yehova nawa welili chuma chaloña, Yehova wakamwanukaña mpinji yejima. Nzambi wakamusañula Abeli hampinji yakabalumunayi iseki kwikala paradisa.

Chimwahitili mpinji, hamaseki hekalili antu amavulu. Amavulu adiña nayilwilu yatama. Niañelu amakwawu mwiwulu ekalili nayilwilu yatama. Afumini mwiwulu mwashakamineñawu nakwinza heseki. Wuneluki chaletesheli afumi mwiwulu? Kulonda avwali nyijimba yawuntu nakusumbula ambanda.

Awa añelu avweli anyana awamayala mudi awa ambanda. Awa anyana chakuliliwu ekalili nañovu chikupu, akabishileña antu nikuyikatisha. Yehova hetejeli yuma yamuchidiwu kutwalekahuku. Dichi wafuukwilihu kujilumuna antu atama nadibaji.

Ilaña kwadiña muntu wumu wambukiliku. Wadiña wamukeña Yehova. Ijina dindi Nowa. Wadiña namumbanda nianyana asatu awamayala, Shemi, Hami niYafweta, nawa awa anyana adiña nawambanda. Yehova wamulejeli Nowa nindi atuñi watu weneni kulonda yena nichisaka chindi akapulukilimu kuDibaji. Watu hichuma cheneni chakwendelamu hamenji. Yehova wamulejeli cheñi Nowa kwiñija anyama amavulu muwatu kulonda niwena akapuluki.

Hohenohu Nowa watachikili kutuña watu. Hahitili yaaka kwakwihi na 50 hakwila Nowa nichisaka chindi amanishi kutuña watu. Awutuñili kwesekeja nachayilejeliyi Yehova. Hayina mpinji, Nowa wayisoñamishileña antu kutalisha haDibaji. Ilaña kwosi niwumu wamutiyilili.

Dichi, mpinji yashikili yakwiñila muwatu. Tutalenu chuma chalondelelihu.