Yosefu wadiña hakachi kawanyana kaYakoba awamayala achidiña atwansi. Ayaya jindi amweni nawu Yosefu amukeñeli nankashi kudi tata yawu. Wunakutoñojoka neyi chumichi chayitiyishileña ñahi? Amutiyilili Yosefu ichima nawa amuheleli. Yosefu chaloteliyi yilota yakuhayamisha, wayilejelimu amanakwindi iyi yilota. Atoñojokeli nawu yatalishili mukwila nawu ifuku dimu akamufukamina. Chumichi chaletesheli asweji kumuhela!

Ifuku dimu amana kwaYosefu adiishileña anyikoku kwakwihi namusumba waShekemi. Yakoba wamutemesheli Yosefu ayi nakutala chinakuhandawu amanakwindi. Amumweneni Yosefu hahalehi nakwinza nawa adilejeli nawu: “Mukakulota yilota ona wunakwinza. Twayenu tumujahi!” Amukwatili nakumuumbila mwibuku dakunama. Ilaña manakwindi Yuda wahosheli nindi: ‘Kumujaha nehi! Twayenu tumulandishi kulonda akekali nduñu.’ Dichi amulandishili Yosefu nayikunku yasiliva 20 kudi aMidiyani akakulanda nakulandulula ayileña kuEjipitu.

Kuhiñahu, amana kwaYosefu atumpikili munkukumba windi mumashi ampembi. Atemesheli iwu munkukumba kudi tata yawu, nakumwila nawu: ‘Komana iwu hidiwu munkukumba wamwaneyiku?’ Dichi Yakoba watoñojokeli nindi Yosefu anamujahi kudi kanyama wamwisaña. Waneñeli nankashi. Atwesheleña wanyi kumukundeja.

MuEjipitu, Yosefu amulandishili nakwikala nduñu kudi chilolu walema wejina daPotifwari. Ilaña Yehova wadiña naYosefu. Potifwari wamweni nindi Yosefu wazatileña chiwahi mudimu windi nawa wadiña washinshika. Hashimbwili wanyi Yosefu amwinkeli mudimu wakutala yuma yejima yaPotifwari.

Ñoda Potifwari wamweni nindi Yosefu wadiña walubanji nawa wakola. Ifuku niifuku wamulejeleña Yosefu nindi akaami nindi. Yosefu wadi kwiladi? Wakaanini nawa wahosheli nindi: ‘Inehi! Kwila nila chumichi nehi. Nkaaka yami wankuhwelela, nawa eyi wudi ñodindi. Neyi nikaama naneyi, nukumuvulumuna Nzambi!’

Ifuku dimu ñoda Potifwari wamukanjikijili Yosefu nindi akaami nindi. Wamukwatili kuyakuvwala yindi, ilaña Yosefu watemukili. Potifwari chafuntiliyi kwitala, ñodindi wamulejeli nindi Yosefu wamukwata nindi akaami nindi. Ilaña wadiña nakutwamba. Potifwari wahilili nankashi nawa wamushili Yosefu mukaleya. Ilaña Yehova hamuvulameneni Yosefuku.

Hadiñayi Yosefu mukaleya, Fwaru mwanta wakuEjipitu waloteli yilota nawa kwosi niwumu watwesheli kuyilumbululaku. Kambuña aFwaru wumu wamulejeli nindi Yosefu nateli kulumbulula munatalishi yilota yindi. Hohenohu Fwaru watemesheli antu kuya nakumutambika Yosefu.

Fwaru wamwihwili nindi: ‘Wunateli kulumbulula yilota yinalota?’ Yosefu wamulejeli Fwaru nindi: ‘MuEjipitu mwakavula yakuda nankashi hadi yaaka 7, ilaña yaaka yakalondelahu 7 yakekala yanzala yasweja. Tondaku muntu wukweti maana akapompeshi yakuda kulonda antu jeyi akabuli kufwa nanzala.’ Fwaru wamulejeli nindi: ‘Iyeyi inatondi! Yeyi wukwikala chinlonda chami wukwikala nawuswa chikupu muEjipitu!’ Hanu dinu Yosefu welukili ñahi mwatalishili yilota yaFwaru? Yehova diyi wamukwashili Yosefu.

Yosefu wapompesheli yakuda hadi yaaka 7 yalondelelihu. Neyi chashimwiniyi Yosefu, kwaholokeli nzala yasweja mwahita iseki dejima. Antu afumineña kumaluña ashiyashana nakwinza nakulanda yakuda kudi Yosefu. Tata yindi Yakoba watiyili nawu muEjipitu mudi yakuda, dichi watemesheli anyanindi awamayala 10 nindi akalandi yakuda.

Anyana kaYakoba ayili kudi Yosefu, nawa yena washikeneni dakuyiluka. Ilaña amanakwindi hiyamwilukili nawu diyi Yosefuku. Amufukaminini, neyi chaloteliyi hachidiñayi kansi. Yosefu wakeñeleña kwiluka neyi achidi amuhela. Dichi Yosefu wayilejeli amanakwindi nindi: ‘Enu mudi akakwendesha ituña. Munakukeña mwiluki maluña abula kukiñewa mudinu ituña.’ Wena amulejeli nawu: ‘Inehi! Twavwalikili anyana awamayala 12, tunafumi kuKenani. Manakwetu wumu wafwa dehi, nawa wakansi nashali natata yetu.’ Yosefu wayilili nindi: ‘Yenu mwakamuleti manakwenu wakansi, chimwamuleta nukwiluka nami munakuhosha mwalala.’ Dichi afuntili kudi tata yawu.

Yakuda chiyamanini, Yakoba wayitemesheli cheñi anyanindi kuEjipitu. Haniyi mpinji ayili naBenjamini, manakwawu wakansi. Hakwila ayeseki amanakwindi, Yosefu waswekeli kaapu kindi kasiliva mwisaka daBenjamini dayakuda. Kuhiñahu, wayilili amanakwindi nindi aneyi kaapu. Ambuña aYosefu chawaniniwu kaapu mwisaka daBenjamini, amanakwindi ahayamini. Amulembeleleli Yosefu nawu ayibabeshi wena bayi Benjaminiku.

Haniyi mpinji dihelukiliyi Yosefu nindi amanakwindi anahimpi. Yosefu hatwesheli kudiyuulaku. Watachikili kudila nawa wahosheli nindi: ‘Yami manakwenu Yosefu. Tata yami wuchidi wamumi?’ Amanakwindi ahayamini chikupu. Wayilili nindi: ‘Bayi mutiya kutama hachuma chimwañililiku. Nzambi wantemesheli kunu kulonda nipulwishi mawumi enu. Dichi yenu swayi-swayi mwakamuleti tata yami kunu.’

Ayili kumukala nakumuleja tata yawu nsañu yayiwahi yawaniniwu nawa amuleteli kuEjipitu. Hahitili yaaka yayivulu, Yosefu natata yindi adimweni cheñi.