Mosi washakamini muMidiyani hadi yaaka 40. Wasumbwili nawa wekalili nawanyana. Ifuku dimu habiñileñayi nyikoku yindi kuMpidi yaSinayi, wamweni chuma chakuhayamisha. Wamweni chiputa chanyiña chinakubutuka kesi, ilaña kuha nehi! Mosi chayiliyi kukamwihi nakutala chuma chinakuletesha chibuleña kuha, watiyili izu dafumini muchiputa nawu: ‘Mosi! Bayi winza kukamwihiku. Subulaku nkwabilu jeyi muloña wunemani heseki dajila.’ Yehova diyi wahosheleña nayena kuzatisha kañelu.

Mosi watiyili woma, dichi wadibutili kumesu. Izu dahosheli nawu: ‘Namoni makabi anakumonawu aIsarela. Nukuyamwina kudi aEjipitu nakuyitwala mwituña dadiwahi. Yeyi wukulombola antu jami nakuyifumisha muEjipitu.’ Chatela chamuhayamishili Mosi.

Mosi wehwili nindi: ‘Neyi antu akañihuli nawu hinyi wunakutemeshi, ami nakayakula namidi?’ Nzambi wamwakwili nindi: ‘Wakayileji neyi Yehova, Nzambi yaAbarahama, Nzambi yaIsaka, nawa Nzambi yaYakoba diyi wunantemeshi kudi enu.’ Mosi wahosheli nindi: ‘Indi neyi antu akakaani kuntiyilila?’ Yehova wamumwekesheleli Mosi chinjikijilu, wunsahu wamwekesheleña nawu wakamukwashaña. Wamulejeli Mosi nindi anatili mukombu windi heseki. Dichi mukombu wabalumukili kapela! Mosi chakikwatiliyi kapela kumukila, kabalumukili nakwikala cheñi mukombu. Yehova wahosheli nindi: ‘Neyi wakamwekesha ichi chinjikijilu, akeluka nawu yami inakutemeshi.’

Mosi wahosheli nindi: ‘Ami neluka kuhosha chiwahi wanyi.’ Yehova wamushiikili nindi: ‘Nakakulejaña yuma yiwatela kuhosha, nawa nakamutemesha manakweyi Aroni kulonda akakukwasheñaku.’ Mosi chelukiliyi nindi Yehova wadiña nayena, wasendeli ñodindi nianyanindi nakufunta kuEjipitu.

AIsarela adiña anduñu nawa ayikanjikijileña kuzata nyidimu yakola. Yehova wayitemesheli aMosi naAroni kudi Fwaru nakumuleja nawu: ‘Yuumbiku antu jami ayi kulonda akadifukuleña kudi ami mwisaña.’ Ilaña Fwaru wadivwimbili nakwakula nindi: ‘Jinahoshiyi Yehova ami nukujitiya wanyi, nawa nukuyuumbaku aIsarela wanyi.’ Kuhiñahu Fwaru waswejeleliku kuyizatisha nyidimu yakola. Yehova wamubabesheli Fwaru. Wuneluki chamubabesheliyi? Waleteli Yipupu 10 hadi aEjipitu. Yehova wamulejeli Mosi nindi: ‘Fwaru hanakuntiyililaku. Nantetemena, wakekala kuKaloña Nile. Wakayi nakumuleja neyi chineli nakaani kwiteja antu jami kuya, menji ejima amukaloña Nile akabalumuka mashi.’ Mosi wovwahilili nawa wayili kudi Fwaru. Fwaru wadiña nakutalaku heteliyi Aroni muNile namukombu windi, nawa menji abalumukili mashi. Kaloña katachikili kununka, inshi jafwili, nawa muNile himwadiña menji amawahi akunwaku. Hohamu Fwaru wakaanini kuyuumbaku aIsarela.

Chimwahitili mafuku 7, Yehova wamutemesheli cheñi Mosi kudi Fwaru nakumuleja nindi: ‘Neyi hiwukwiteja antu jami kuyaku, muEjipitu mukwinzala yuula.’ Aroni wolweli mukombu windi, nawa yuula yatachikili kwinzala mwituña. Antu awanineña yuula mumatala awu, hatudidi nihayeña. Mwituña dejima mwadiña yuula! Fwaru wamulejeli Mosi amulembeleli Yehova kulonda afumishi ichi chipupu. Fwaru wahosheli nindi wukuyuumbaku aIsarela. Dichi Yehova walekesheli ichi chipupu, nawa aEjipitu alumbikili nyilumba yayivulu yayuula yafwa. Mwituña mwatachikili kununka. Hela chochu, Fwaru hayitejeli cheñi antu kuyaku.

Kuhiñahu, Yehova wamulejeli Mosi nindi: ‘Aroni eti mukombu windi mulunkuñu, nawa lunkuñu lukubalumuka mbwibu hela tukabubu twanyanya twasumanaña.’ Hohenohu mwituña dejima mwenzeli mbwibu. Antu jaFwaru amu amulejeli nawu: ‘Ichi chipupu chinafumi kudi Nzambi.’ Hohamu, Fwaru hayitejeli aIsarela kuyaku.