Mumusumba waNiniva wawaAsiriya, mwadiña antu adiña nayilwilu yatama. Yehova wamutemesheli kaprofwetu Yona kuya kuNiniva nakuyisoñamisha antu nindi ahimpi yilwilu yawu. Ilaña Yona watemukili nakuya kwiluña dacheñi. Wakandamini mumbopolu yayileña kuTashishi nawa wayili.

Iku mbopolu yidi hakaluñalwiji, kwenjili nvula yampepela yeneni nawa akakwendesha mbopolu atiyili woma. Alombeli kudi anzambi jawu nakuyihula nawu: ‘Muloñadi ichi chuma chichinakumwekena?’ Nkumininaku, Yona wayilejeli nindi: ‘Yami inakojeji. Inakutemuka mudimu wanlejayi Yehova nindi nizati. Ñuumbilenu hakaluñalwiji nawa nvula yampepela yeneni yikuleka.’ Akakwendesha mbopolu hiyakeñeleña kumunatila Yona hakaluñalwijiku, ilaña yena wayikanjikijili. Chamunatililiwu hakaluñalwiji, nvula yampepela yeneni yalekeli.

Yona watoñojokeleña nindi wukufwa. Chajiminineñayi chovu-chovu mukaluñalwiji, walombeli kudi Yehova. Kuhiñahu Yehova watemesheli inshi weneni. Wamuminyini Yona, ilaña hamujahiliku. Iku wudi mwivumu danshi, walombeli nindi: ‘Nakukanini nami nakakwovwahilaña mpinji yejima.’ Yehova wamuhembeli Yona chiwahi mwivumu danshi hadi mafuku asatu, kuhiñahu waletesheli inshi kumusanzila Yona kumasaña.

Chineli Yehova wamupulwishili Yona, komana chatalishili mukwila nawu hadi kuya kuNinivaku? Inehi. Yehova wamulejeli cheñi kuya kuNiniva. Haniyi mpinji, wovwahilili. Wayili kwenoku nawa wayilejeli antu atama nindi: ‘Kunashali mafuku 40, Niniva akumujilumuna.’ Kuhiñahu kwamwekeni chuma chabulili kukuhwelelayi, aNiniva atiyilili nawa ahimpili yilwilu yawu. Mwanta wakuNiniva wayilejeli antu jindi nindi: ‘Mutambikenu Nzambi nawa mubalumuki munyichima. Hekwawu wukutujilumuna wanyi.’ Yehova chamweniyi nindi antu anabalumuki munyichima, wajilumwini wanyi musumba waNiniva.

Yona wazuwili chamweniyi nindi anawujilumuni wanyi. Wunamoni: Yehova wadiwunjikili nawa wamutiyilileña Yona luwi, ilaña Yona hayitiyilili luwi antu amuNinivaku. Ilaña, washakamini hanji yamusumba muwulelu wakamutondu katandalaña iku nadihombi. Kufumahu kamutondu koomini nawa Yona wazuwili. Dichi Yehova wamwilili nindi: ‘Eyi wunatiyili aka kamutondu luwi kubadika aNiniva. Nayitiyila luwi nawa apuluka.’ Muloñadi chayitiyililiyi luwi? Antu amuNiniva adiña alema chikupu kubadika mutondu wudi wejima.

Wanta waAsiriya watambwili wanta wanyichidi 10 waIsarela. Haniyi mpinji, Senakeribi, mwanta wakuAsiriya wakeñeleña kutambula wanta wanyichidi yiyedi waYuda. Watachikili kutambula nyisumba yamuYuda wumu-wumu. Ilaña Yerusalema dimusumba wakeñesheliyi. Senakeribi welukili wanyi nindi Yehova wakiñileña Yerusalema.

Hezekiya mwanta wakuYuda, wamufweteli Senakeribi mali amavulu nankashi kulonda abuli kulukuka Yerusalema. Hela chakwila Senakeribi watambwili awa mali, ilaña hohamu watemesheli amashidika indi añovu kulonda alukuki Yerusalema. Antu mumusumba atiyili woma muloña Asiriya aswinineña kwakwihi. Kuhiñahu Hezekiya wayilejeli nindi: ‘Bayi mutiya womaku. Asiriya akola, ilaña Yehova wukutukwasha kwikala akola kubadika wena.’

Senakeribi watemesheli ntemesha windi, Rabisheka, kuYerusalema nakusupisha antu. Rabisheka wemeni hanji yamusumba nakubidika nindi: ‘Yehova hakutwesha kuyikwashaku. Bayi mumwiteja Hezekiya ayidimbiku. Kwosi Nzambi wunateli kuyipulwisha kudi etuku.’

Hezekiya wamwihwili Yehova chuma chinateli kwilayi. Yehova wamwakwili nindi: ‘Bayi wutiya woma yuma yinahoshi Rabishekaku. Senakeribi hakutambula Yerusalemaku.’ Kuhiñahu, Hezekiya watambwilili nyikanda yafumini kudi Senakeribi. Muniyi nyikanda asonekelimu nawu: ‘Dihani hohu. Yehova hakutwesha kuyamwinaku.’ Hezekiya walombeli nindi: ‘Eyi Yehova, mwani twamwini kulonda antu ejima eluki nawu eyi nkaweyi, yeyi Nzambi walala.’ Yehova wamulejeli nindi: ‘Mwanta wakuAsiriya wukwinza muYerusalema wanyi. Nukukiña musumba wami.’

Senakeribi wakuhweleleli nindi katataka Yerusalema yikwikala yindi. Ilaña ifuku dimu nawufuku, Yehova watemesheli kañelu muchilombu mwadiña amashidika hanji yamusumba. Kañelu wajahili amashidika 185,000. Mashidika añovu aMwanta Senakeribi afwili. Hadiña cheñi namwakwililaku, dichi wafuntili kwitala iku anamushindi. Yehova wamukiñili Hezekiya niYerusalema neyi chashiikiliyi. Neyi haniyi mpinji wadiña muYerusalema, komana wadi kumukuhwelela Yehova?