Kakavulu, antu amuYuda amushiyileña Yehova nakudifukula kudi anzambi akutwamba. Hadi yaaka yayivulu, Yehova wesekeleña kuyikwasha. Wayitemesheleli atuprofwetu amavulu nakuyisoñamisha, ilaña wena hiyatiyililiku. Ayisupishileña atuprofwetu. Yehova wafumishilihu ñahi kudifukula kwadifukwileñawu kudi ankishi?

Mwanta Nebukaneza wakuBabiloni, washindileña muza-himuza. Mpinji yatachi yashindiliyi Yerusalema, wakwatili Mwanta Yehoyakini, ayilolu, akakuzuña njita niakawukalawenu nakuyitwala wejima wawu kuBabiloni. Wasendeli cheñi nimaheta ejima amutembeli yaYehova. Kuhiñahu Nebukaneza wamwilishili Zedekiya kwikala mwanta waYuda.

Hakusambila, Zedekiya wamwovwahilileña Nebukaneza. Ilaña nyuza yamukamwihi niatuprofwetu akutwamba, amulejeli Zedekiya nawu yadikañi naBabiloni. Yeremiya wamusoñamishili nindi: ‘Neyi wukudikaña, antu muYuda akuyijaha, mukwikala nzala yasweja nimusoñu.’

Chelili nayuuli dehi yaaka 8, Zedekiya wadikañili naBabiloni. Walombeli wukwashu kudi amashidika awaEjipitu. Kuhiñahu Nebukaneza watemesheli amashidika indi nakulukuka Yerusalema nawa akuchikili musumba. Yeremiya wamulejeli Zedekiya nindi: ‘Yehova nahoshi nindi neyi wudihana kudi aBabiloni, eyi nimusumba mukupuluka. Ilaña neyi wukudihana wanyi, aBabiloni akwocha Yerusalema nawa eyi akukutwala mukaleya.’ Zedekiya wahosheli nindi: ‘Nukudihana wanyi!’

Chimwahitili chaaka chimu nachikunku, amashidika awaBabiloni ahumwini mbañu jaYerusalema nawa musumba awocheli. Ocheli tembeli, ajahili antu amavulu nawa asendeli antu amavulu nakuyisha mukaleya.

Zedekiya watemukili muYerusalema, ilaña eni Babiloni amukumpishili. Amukwatilili kwakwihi naYeriku nawa amutwalili kudi Nebukaneza. Zedekiya wadiña nakutalaku hamujahilileñawu anyanindi kudi Mwanta wakuBabiloni. Kuhiñahu, Nebukaneza wamuputishili Zedekiya mesu nawa wamushili mukaleya, mwafwililiyi mukuhita kwampinji. Ilaña Yehova wayishiikili antu amuYuda nindi: ‘Hanyima yayaaka 70 nakayifuntisha mumukala wenu muYerusalema.’

Chumanyi chadi kumwekana kudi atwansi akwatiliwu nakuyitwala mukaleya kuBabiloni? Komana adi kutwalekahu kwikala ashinshika kudi Yehova?

Nebukaneza chasendeliyi ayilolu amuYuda nakuyitwala kuBabiloni, wamwinkeli Ashipenazi chilolu wamuchota mudimu wakuyihemba. Wamulejeli Ashipenazi nindi atondihu anyikwenzi akola kumujimba nawa anakumwekana chiwahi. Awa anyikwenzi akuyidizisha hadi yaaka yisatu. Yuma yikudizawu yikuyikwasha kwikala ayilolu alema muBabiloni. Awa anyikwenzi adizili kutaña, kusoneka nikuhosha idimi dawaKalideya damuBabiloni. Ayilejeli cheñi nawu akudaña yakuda yoyimu yikudaña mwanta niayilolu jindi. Awa anyikwenzi awana adiña Danyeli, Hananiya, Mishayeli niAzariya. Ashipenazi wayituumbili majina acheñi aweni Babiloni nindi: Beleteshaza, Shadiraki, Mishaki niAbedinego. Komana iyi shikola yadi kuyiletesha aleki kumukalakela Yehova?

Awa anyikwenzi awana afuukwilihu kumwovwahila Yehova. Elukili nawu hiyatela kuda yakuda yamwantaku, muloña Nshimbi jaYehova jashimwini nawu yakuda yikwawu yadiña yamajilu. Dichi amulejeli Ashipenazi nawu: ‘Mwani bayi wutwinka yakuda yamwantaku.’ Ashipenazi wayilejeli nindi: ‘Neyi mukudaña wanyi nawa mwanta akayimoni munakumwekana kukata, wakanjaha!’

Danyeli welukili chuma chatela kwilawu. Wamulejeli nhembi yawu nindi: ‘Mwani wutwinkeña hohu yisakola nimenji akunwa hadi mafuku 10. Kuhiñahu akatwesekeji nawanyikwenzi anakuda yakuda yamwanta.’ Iwu nhembi wetejeli.

Chamanini mafuku 10, Danyeli niamabwambu jindi asatu amwekeneña chiwahi kubadika anyikwenzi ejima. Yehova watiyili kuwaha chamwovwahililiwu. Wamwinkeli niDanyeli maana akwiluka mwatalishili yimwenu niyilota.

Chamanishiliwu kuyidizisha, Ashipenazi wayitwalili awa anyikwenzi kudi Nebukaneza. Mwanta wahanjekeli nawu nawa wamweni nindi aDanyeli, Hananiya, Mishayeli niAzariya adiña namaana nankashi nawa ababala kubadika anyikwenzi ejima. Wayitondeli kulonda azatileña kuchota chindi. Kakavulu mwanta wadiña nakuyihula yitoñojoka yawu neyi kudi nsañu yalema. Yehova wayinkeli maana kubadika akamaana ejima amwanta niatutepa.

Hela chakwila adiña mwituña dacheñi, Danyeli, Hananiya, Mishayeli niAzariya avulameneni wanyi nawu adiña antu jaYehova. Nineyi wakatwalekahu kumwanuka Yehova, hela chakwila hiwudi hamu nawanvwali jeyiku?