Ifuku dimu nawufuku, Mwanta Nebukaneza waloteli chilota chakola. Chamwakamishili chakwila wakañenyi nikukaama. Watambikili atutepa indi nawa wayilejeli nindi: ‘Nlumbulwilenu chilota chinalota.’ Amwilili nawu: ‘Eyi mwanta tuleji muwalota.’ Ilaña Nebukaneza wayilejeli nindi: ‘Inehi! Enu nlejenu munalota, neyi nehi nukuyijaha.’ Amwilili cheñi nawu: ‘Tuleji muwalota, nawa etu tukukuleja muchinalumbulukili.’ Wahosheli nindi: ‘Wejima wenu munakukeña hohu kundimba. Nlejenu munalota.’ Wena amulejeli mwanta nawu: ‘Kwosi muntu hela wumu wamumi wunateli kwila chumichiku. Chuma chiwunalombi chaswayi wanyi.’

Nebukaneza wazuwili nankashi nawa wahanini lushimbi nindi akamaana ejima amwituña ayijahi, kushilahu niDanyeli, Shadiraki, Mishaki niAbedinego. Danyeli wamulombeli mwanta nindi amwinkiku mpinji. Yena niamabwambu jindi amulombeli Yehova nawu ayikwashi. Yehova welilidi?

Yehova wamusolweleli Danyeli mwatalishili chilota chaNebukaneza muchimwenu. Hefuku dalondelelihu, Danyeli wayili kudi kambuña amwanta nakumuleja nindi: ‘Bayi wujaha mukamaana wudi wejimaku. Nateli kumulumbulwila mwanta chilota chindi.’ Iwu kambuña wamutwalili Danyeli kudi Nebukaneza. Danyeli wamulejeli mwanta nindi: ‘Nzambi nakuleji yuma yikamwekana kumbidi. Ichi dichilota chiwalota: Wamona nkishi weneni wadiña namutu wawuru, ntulu nimakasa asiliva, ivumu nimakata awuneñu, nyendu yachikuñu nawa madatilu indi adiña achikuñu chakubombashana nandambu. Kuhiñahu ilola adiketula kumpidi nawa denza nakweta kumadatilu aniwu nkishi, amuchika nakwikala neyi wuña nawa awulelula kudi mpepela. Idi ilola dabalumuka nakwikala mpidi yeneni nawa yawanina iseki dejima.’

Kuhiñahu Danyeli wahosheli nindi: ‘Imu dimunalumbulukili chilota cheyi: Wanta weyi dimutu wawuru. Siliva diwanta wakekalahu kufuma hadi eyi. Kuhiñahu, hakekala wanta wudi neyi wuneñu, wakayuula iseki dejima. Wanta wakalondelahu wakekala wakola neyi chikuñu. Nkumininaku, kwakekala wanta wakadaambula nawa wakekala aha wakola neyi chikuñu, aha wabula kukola neyi ndambu. Ilola dabalumuka nakwikala mpidi, hiWanta waNzambi. Wakajilumuna awa mawanta ejima nawa wena wakatwalekahu haya nyaaka.’

Nebukaneza wadinatili chamesu heseki kumesu aDanyeli. Wahosheli nindi: ‘Nzambi yeyi diyi wunakuleji munatalishi ichi chilota. Kwosi Nzambi wudi neyi yena.’ Chatela amujahi Danyeli, Nebukaneza wamutondeli kwikala mukulumpi wawakamaana ejima nawa nyuuli wakabeta kaBabiloni. Wunamoni Yehova chakwiliyi kulomba kwaDanyeli?

Chimwahitili mpinji kufuma haloteliyi Mwanta Nebukaneza chilota kutalisha hadi nkishi, watuñili nkishi weneni wawuru. Wamwimikili muchana chaDura nawa watambikili antu alema chikupu amwituña, kushilahu niaShadiraki, Mishaki niAbedinego, kulonda emani kumbidi yaniwu nkishi. Mwanta wahanini lushimbi nindi: ‘Chimwatiya hohu yivumina yampuña, tudada niñoma jampwita, mwatela kudifukula kudi nkishi! Wejima wukubula kudifukula akumunatila muluteñu lwakesi kanakubidima.’ Komana awa aHeberu asatu adi kudifukula kudi nkishi, tahindi kudi Yehova hohu?

Kuhiñahu, mwanta wahanini lushimbi nindi avumishi tumina. Antu ejima adinatili heseki nakudifukula, kufumishaku aShadiraki, Mishaki niAbedinego. Antu amakwawu amweni chumichi nawa amulejeli Mwanta nawu: ‘Ana aHeberu asatu anakaani kudifukula kunkishi weyi.’ Nebukaneza wayitambikili nakuyila nindi: ‘Inakuyinka cheñi mpinji kulonda mudifukuli kudi nkishi. Neyi mukukaana, nukuyinatila muluteñu lwakesi. Kwosi nzambi wukuyamwina kudi amiku.’ Wena amwakwili nawu: ‘Hitunakukeña wutwinki cheñi mpinjiku. Nzambi yetu wukutwamwina. Hela hakutwamwinaku, eyi mwanta, hitukudifukula kudi nkishiku.’

Nebukaneza wahilili nankashi. Walejeli antu jindi nindi: ‘Taatishenu luteñu lwakesi mapampa 7 kubadika chilwadiña!’ Kuhiñahu walejeli amashidika indi nindi: ‘Yikasenu awa amayala nawa muyinatilimu!’ Luteñu lwakesi lwataatili nankashi chakwila amashidika chashikiliwu kwakwihi, ashikeneni kufwa. AHeberu asatu aholokeleli mukesi. Ilaña Nebukaneza chataliliyi mukachi, wamweni amayala awana anakwenda mukesi chatela mwiikali asatu. Watiyili woma nawa wayihwili ayilolu jindi nindi: ‘Hitwanatila hohu amayala asatu mukesiku? Inakumonamu awana nawa wumu nakumwekana neyi kañelu!’

Nebukaneza wayili kwakwihi naluteñu lwakesi nawa wabidikili nindi: ‘Idikenumu, enu ambuña aNzambi Mukakubadika Chikupu!’ Ejima ahayamini chamweniwu aShadiraki, Mishaki niAbedinego anakufuma mukesi iku anahi wanyi. Makowa awu, nsuki niyakuvwala yawu hijinahiku nawa hiyananunkihu wishiku.

Nebukaneza wahosheli nindi: ‘Nzambi yaShadiraki, Misheki niAbedinego wabadika. Watemesha kañelu kindi nakuyamwina. Hikudi nzambi wudi neyi Nzambi yawuku.’

Kufwana aHeberu asatu, komana wukutwalekahu kwikala washinshika kudi Yehova hela kunamwekani kukala kwamuchidinyi?