Ifuku dimu nawufuku, Nebukaneza waloteli chilota chamutiyishili woma. Watambikili antu jindi akamaana amuleji muchinatalishi. Ilaña kwosi wamulumbulwilili muchatalishili. Nkumininaku, mwanta wahanjekeli naDanyeli.

Nebukaneza wamulejeli Danyeli nindi: ‘Muchilota chinalota, namona mutondu. Wakula chakwila washika nimwiwulu. Wamwekenaña kwakumina iseki dejima. Wadiña namafu amawahi ninyikaabu yayivulu. Anyama ashakamaña muwulelu nawa atuda atuñilaña yisakala kunyitayi. Kuhiñahu kañelu wasuluka mwiwulu. Wabidika nindi: “Temenu mutondu nawa ketulenu nyitayi yawu. Ilaña chishinji ninyiji yachu chishiyenu hamaseki nawa chikasenu nakankasi kachikuñu nikawuneñu. Muchima wamuntu wudi mumutondu akuwuhimpa nakushamu muchima wakanyama nawa hadi yena hakuhita mpinji 7. Antu ejima akeluka nawu Nzambi diyi nyuuli nawa nateli kuhana wanta kudi muntu wejima anakeñiyi.”’

Yehova wamulejeli Danyeli mwatalishili ichi chilota. Danyeli chelukiliyi muchatalishili, watiyili woma. Wahosheli nindi: ‘Eyi mwanta, chadi kuwaha neyi yuma yiwalota yakamwekena ayilumbu jeyi, ilaña yakakumwekena eyi. Mutondu weneni atemawu diyi eyi. Akakufumisha hawanta nawa wakadaña matahu amwisaña neyi kanyama wamwisaña. Ilaña chineli kañelu wahosha nindi chishinji chishali nanyiji yachu, wakekala cheñi mwanta.’

Chimwahitili chaaka, Nebukaneza wadiña nakwenda hewulu detala muchipañu chindi nakutala chinawahi Babiloni. Wahosheli nindi: ‘Talenu iwu musumba weneni innadituñili. Talenu chinnatuumbakani!’ Iku wuchidi kuhosha, izu dafumini mwiwulu nawu: ‘Nebukaneza! Ichi wanta wunafumi dehi kudi eyi.’

Hayoyina mpinji, Nebukaneza wazalukili nawa wekalili neyi kanyama wamwisaña. Amufumishili muchipañu chindi nawa watachikili kushakama nawanyama amwisaña. Nsuki jaNebukaneza jaleheli neyi mavuji ambuulu nawa mazala indi neyi mazala atuda.

Chamanini yaaka 7, Nebukaneza wakoleli nawa Yehova wamwilishili kwikala cheñi mwanta waBabiloni. Kuhiñahu Nebukaneza wahosheli nindi: ‘Inakumushimeka Yehova, Mwanta wamawulu. Ichi neluki nami Yehova diyi Nyuuli. Wazozeshaña adivwimba nawa nateli kuhana wanta kudi wejima anakeñiyi.’

Mukuhita kwampinji, Beleshaza wekalili mwanta waBabiloni. Ifuku dimu nawufuku, watambikili antu amavulu alema nankashi amwituña kuchawija. Walejeli ambuñindi nindi aleti makaapu awuru asendeliyi Nebukaneza mutembeli yaYehova. Beleshaza niantu atambikiliyi anwinini munawa makaapu nawa ashimekeli anzambi jawu. Hohenohu, chikasa chamuntu chamwekeni nawa chatachikili kusoneka nsona jakala hambañu yamukapeka kakudiila.

Beleshaza watiyili woma. Watambikili atutepa indi nawa wayishiikili nindi: ‘Muntu wejima wukulumbulula iji nsona, nukumwilisha ekali wamuchisatu hadi antu akweti ñovu muBabiloni.’ Esekeli, ilaña kwosi watwesheli kulumbulula iji nsona. Mama yamwanta wenjili mukachi nawa wahosheli nindi: ‘Kudi iyala wejina daDanyeli wamulumbulwilileña Nebukaneza yuma. Nateli kukulumbulwila munatalishi iji nsona.’

Danyeli wenjili kudi mwanta. Beleshaza wamwilili nindi: ‘Neyi wukutwesha kutaña iji nsona nikujilumbulula, nukukwinka ileñi dawuru nawa nukukwilisha kwikala wamuchisatu hadi antu añovu muBabiloni.’ Danyeli wahosheli nindi: ‘Inakukeña yawaana yeyi wanyi, ilaña nukukuleja munatalishi iji nsona. Tata yeyi Nebukaneza wadivwimbili nawa Yehova wamuzozesheli. Wuneluki yuma yejima yamumwekeneni, ilaña wamulemesha Yehova wanyi kuhitila mukunwina vinyu mumakaapu awuru afumishiliwu mutembeli Yindi. Dichi Nzambi nasoneki awa mazu, Mene, Mene, Tekeli niParisini. Awa mazu anatalishi mukwila nawu, aMediya nawaPeresi akamushinda Babiloni nawa eyi hiwakekala cheñi mwantaku.’

Chamwekeneña neyi kwosi watela kushinda Babiloni. Iwu musumba awukiñili nambañu jakola nikaloña kakunama. Ilaña hawowuna wufuku, aMediya nawaPeresi alukukili. Mwanta Kirusi wakuPeresi wateñulwili menji kulonda amashidika ahiti nakushika kuyiisu yamusumba. Chashikiliwu, awanini yiisu yakwenzununa! Amashidika eñilili mukachi, ashindili musumba nawa amujahili mwanta. Kuhiñahu Kirusi wekalili nyuuli waBabiloni.

Muchochina chaaka, Kirusi wabidikili nindi: ‘Yehova nanleji kumutuñulwila tembeli muYerusalema. Muntu wejima hakachi kawantu jindi wunakukeña kuya nakuzata, watela kuya.’ Neyi chashiikiliyi Yehova, aYudeya amavulu afuntili kumukala wawu hanyima yayaaka 70 kufuma hajilumwiniwu Yerusalema. Kirusi wafuntishili makaapu awuru niasiliva niyipwepu yasendeliyi Nebukaneza mutembeli. Wunamoni Yehova chamuzatishiliyi Kirusi hakukwasha antu Jindi?