Mwanta mukwawu waBabiloni wadiña Dariyusi wakuMediya. Dariyusi wamweni nindi Danyeli wadiña wambukaku. Wamwinkeli mudimu wakutala antu alema amwituña. Awa amayala amutiyilili Danyeli ichima nawa akeñeleña kumujaha. Elukili nawu walombeleña kudi Yehova kapampa kasatu hefuku-hefuku. Dichi amulejeli Dariyusi nawu: ‘Eyi mwanta, kwatela kwikala lushimbi lwakwila nawu antu ejima atela hohu kulomba kudi eyi. Muntu wejima wakabula kwovwahila ilu lushimbi atela kumunatila muwina mudi anyitupa amavulu.’ Mwanta Dariyusi wetejeli mwahosheliwu nawa wafwachikili kulushimbi.

Danyeli chatiyiliyi nindi kudi lushimbi lwaluha, wayili kwitala dindi. Wafukamini nakulomba kudi Yehova kumbidi yawindu yakwenzununa. Amayala amutiyilileña ichima eñilili mwitala dindi nawa amuwanini nakulomba. Ayili lufuchi kudi Dariyusi nakumuleja nawu: ‘Danyeli hanakukwovwahilaku. Walombaña kudi Nzambi yindi kapampa kasatu hefuku.’ Dariyusi wamukeñeli Danyeli nawa hakeñeleña nindi afwiku. Wesekeleña kuwana njila yakumupulwishilamu Danyeli nichaholokeli itena. Nimwanta yomweni hadiña nawuswa wakuhimpa lushimbi lwafwachikayi dehiku. Walejeli antu jindi nindi amunatili Danyeli muwina wawanyitupa azuwa.

Hawuna wufuku, Dariyusi wamwakameneni nankashi Danyeli chakwila wakañenyi nikukaama. Nantetemena wayili lufuchi kuwina nawa wamutambikili Danyeli nindi: ‘Nzambi yeyi nakupulwishi?’

Dariyusi watiyili izu daDanyeli! Wamubidikili Dariyusi nindi: ‘Kañelu kaYehova wajika tunwa twawanyitupa. Hiyanankatishiku.’ Dariyusi watiyili kuwaha chikupu! Walejeli antu nindi amufumishi muwina, nawa hosi nihanti hamukatishiliwu. Kuhiñahu mwanta wahanini lushimbi nindi: ‘Yinatilenu muwina amayala amutwambila Danyeli.’ Chayinatililiwu muwina ayidiili kudi anyitupa.

Dariyusi watemesheli lushimbi kudi antu jindi nindi: ‘Antu ejima atela kumutiya woma Nzambi yaDanyeli. Wamupulwisha Danyeli kudi anyitupa.’

Komana walombaña kudi Yehova mafuku ejima neyi Danyeli?

Esita wadiña kaYudeya washakamineña mumusumba wawaPeresi waShushani. Hahitili yaaka kufuma hasendeliwu chisaka chindi muYerusalema kudi Nebukaneza. Amukulishili kudi musonyindi Modekayi, kambuña aMwanta Ahasuwerusi wakuPeresi.

Mwanta Ahasuwerusi wakeñeleña mwadi wamuha. Ambuñindi amuleteleli ambanda alubanji nankashi amwituña, kushilahu niEsita. Hadi awa ambanda ejima, mwanta watondelihu Esita kwikala mwadi. Modekayi wamulejeli Esita nindi abuli kudishimuna nindi hikaYudeya.

Iyala wadivwimba Hamani diyi wadiña mukulumpi wawayilolu ejima. Wakeñeleña antu ejima adifukuleña kudi yena. Modekayi wakaanini nawa Hamani wahilili nankashi chakwila wakeñeleña kumujaha. Hamani chelukiliyi nindi Modekayi hikaYudeya, wakasili kafuta kakujaha aYudeya ejima mwituña. Wamulejeli mwanta nindi: ‘AYudeya hiyambanji; watela kuyijilumuna.’ Ahasuwerusi wamulejeli nindi: ‘Ilaku chuma chejima chiwunakukeña kwila,’ nawa wamwinkeli ñovu yakutuña lushimbi. Hamani watuñili lushimbi lwalejeli antu nawu akajahi aYudeya ejima hefuku damu 13 dakakweji kaAdari. Yehova wadiña nakumona.

Esita welukili wanyi nindi kwadiña ilu lushimbi. Dichi Modekayi wamutemesheleli Esita mukanda mwadiña ilu lushimbi nakumuleja nindi: ‘Yaña wakahoshi namwanta.’ Esita wahosheli nindi: ‘Muntu wejima wukuya kudi mwanta chakadi kumutambika akumujaha. Mwanta nantambikihu wanyi hadi mafuku 30! Ilaña nukuya. Neyi wukuñwolwela nkuunyi yindi, nukuhanda. Neyi wukuñwolwela wanyi, nukufwa.’

Esita wayili mulubanza lwamwanta. Mwanta chamumweniyi, wamwolweleli nkuunyi yindi. Esita wayili kudi yena, nawa mwanta wamwihwili nindi: ‘Esita, chumanyi chiwunakukeña nikwilili?’ Yena wamwakwili nindi: ‘Inakukeña kukutambika eyi niHamani kuchawija.’ Hadiñawu hachawija, Esita wayitambikili cheñi kuchawija chamuchiyedi. Hadiñawu hachawija chamuchiyedi, mwanta wamwihwili cheñi nindi: ‘Chumanyi chiwunakukeña nikwilili?’ Waakwili nindi: ‘Kudi muntu wunakukeña kunjaha niantu jami. Mwani twamwini.’ Mwanta wamwihwili nindi: ‘Hinyi wunakukeña kuyijaha?’ Waakwili nindi: ‘Iwu iyala watama Hamani.’ Ahasuwerusi wahilili nankashi chakwila washimwini nindi amujahi Hamani hohenohu.

Ilaña kwosi wadi kutwesha kufumishahu lushimbi lwaHamaniku, hela tuhu mwanta. Dichi mwanta wamutondeli Modekayi kwikala mukulumpi wawayilolu nawa wamwinkeli ñovu yakutuña lushimbi lwaluha. Modekayi watuñili lushimbi lwayitejeli aYudeya kudamwina aweni neyi anayilukuki. Hefuku damu 13 dakakweji kaAdari, aYudeya ashindili ayilumbu jawu. Kufuma hohenohu, hachaaka-hachaaka anukileña idi ifuku dashindiliwu.