-
Indi Wanta waNzambi Watachikili Kuyuula Mpinjinyi?—Chibalu 1Kaposhi Kakutalila—2014 | November 1
-
-
KUHANJEKA NAMWINIITALA
Indi Wanta waNzambi Watachikili Kuyuula Mpinjinyi?—Chibalu 1
Iyi mpanji yinalondeluhu diyavula kuhanjekawu aYinsahu jaYehova nawantuñi nawu. Tufwikijenu Chinsahu wejina daKameroni nayi kwitala deyala wejina daYowanu.
‘TWALEKENUHU KUKEÑAKEÑA’ KULONDA MWILUKI
Kameroni: A Yowanu, nadiluñishaña chikupu kuhanjeka hamu nanenu nsañu yamu Bayibolu.a Ifuku ditwahanjekeleña, mwehwili lwihu kutalisha hadi Wanta waNzambi. Mwehwili nenu muloñadi aYinsahu jaYehova chakuhwelelawu nawu Wanta watachikili kuyuula mu 1914.
Yowanu: Eña, natañileña mukanda wenu, nawa wahosheli nawu Wanta waNzambi watachikili kuyuula mu 1914. Chumichi chaletesheli nikali nampwila yakukeña kwiluka, muloña mwahoshaña nenu mwatañishaña nsañu yekala muBayibolu.
Kameroni: Omu dimu.
Yowanu: Nataña Bayibolu yejima. Ilaña inakwanuka wanyi kutañahu nsona yahosha chaaka cha 1914. Dichi nayili muBayibolu yekala haIntaneti kulonda nisandujoli hasonekawu chaaka cha “1914.” Nelili sandujole-e ilaña akayi.
Kameroni: A Yowanu inakuyihameka nankashi hayuma yiyedi. Chatachi, mwataña Bayibolu yejima. Mwalala mwakeña nankashi Izu daNzambi.
Yowanu: Mwamweni. Kwosi mukanda wunateli kwesekana naBayibolu.
Kameroni: Dimu. Chamuchiyedi, inakuyihameka hakuzatisha Bayibolu kulonda muwani ñakwilu kumalwihu enu. Mwela tuhu neyi chatukoleshaña Bayibolu nawu: ‘Twalekenuhu kukeñakeña’ kulonda mwiluki.b Chinawahi chimunakudikita nankashi kulonda mwili mwenimu.
Yowanu: Kusakililaku. Nakeñaña kutwalekahu kudiza. Dichi nasandujola nsañu yahosha ha 1914 muniwu mukanda wutwadizañamu. Iyi nsañu yahosha hachilota chaloteliyi mwanta, chilota chenichi chahosheleña hamutondu weneni watemenuwu nawa wameneni cheñi.
Kameroni: Aha, dimu. Hiwuprofwetu wekala mumukanda waDanyeli kapetulu 4. Wabombelamu chilota chaloteliyi Mwanta Nebukaneza wakuBabiloni.
Yowanu: Eña, dimu. Nahitulukamu nankashi muniwu wuprofwetu. Ilaña kuhosha hohu chalala, iwu wuprofwetu wunakuhosha wanyi haWanta waNzambi hela chaaka cha 1914.
Kameroni: A Yowanu, hela kaprofwetu Danyeli hatiyishili chikupu mwatalishili iwu wuprofwetu wamonenenuwu kusonekaku.
Yowanu: Komana?
Kameroni: Eña. HaDanyeli 12:8, Danyeli wahosheli nindi: “Kutiya natiyili, ilaña kwiluka muchaya nehi.”
Yowanu: Komana yami hohu wanyi. Chumichi chinankundeji.
Kameroni: Walala wudi wakwila nawu, Danyeli hatiyishili iyi nsañuku muloña mpinji yaNzambi yadiña kanda yishiki yakwila antu atiyishishi wuprofwetu wekala mumukanda waDanyeli. Ilaña chayinu mpinji tunateli kuwutiyishisha iwu wuprofwetu.
Yowanu: Muloñadi chimunahosheli ichi?
Kameroni: Talenu mazu adi muvasi yinalondeluhu. Mukanda waDanyeli 12:9 wahosha nawu: “mazu awa anayijiki, anayilamiki ndo nikumpinji yakukuminina.” Dikwila nawu antu adi kutiyisha iwu wuprofwetu kumbidi, ‘mumpinji yakukuminina.’ Neyi chitukuhanjeka katataka mukudiza Bayibolu, tukumona netu wunsahu wejima wunakumwekesha nawu tunakushakama mumpinji yakukuminina.c
Yowanu: Komana kwila munlumbulwilaku wuprofwetu wekala mumukanda waDanyeli nehi?
Kameroni: Kukala kwosi nukwesekaku.
CHILOTA CHALOTELIYI NEBUKANEZA
Kameroni: Chatachi, ti nilumbululi mukwihihisha yuma yamweniyi Mwanta Nebukaneza muchilota chindi. Nkumininaku tukuhanjeka muchatalisha.
Yowanu: EYO.
Kameroni: Muchilota, Nebukaneza wamweni mutondu wasweja kuleha washikili mwiwulu. Kufumahu watiyili kañelu kaNzambi nakuhosha nindi witemenu iwu mutondu. Ilaña wahosheli cheñi nindi chishinji chishali mumaseki. Hanyima yakwila “mpinji jitanu najiyedi” jinahiti dehi, mutondu wukakula cheñi.d Iwu wuprofwetu washikijeweli katachi kudi Mwanta Nebukaneza yomweni. Hela chakwila wadiña mwanta wayili mpuhu kufwana wuna mutondu washikili mwiwulu, amutemeni ‘hampinji jitanu najiyedi.’ Munakwanuka yuma yamwekeni?
Yowanu: Inehi, inakwanuka wanyi.
Kameroni: Kwakama nehi. Bayibolu yamwekesha nawu Nebukaneza wazalukili hadi yaaka yitanu nayiyedi. Dichi hayina mpinji, hayuulileña neyi mwantaku. Ilaña chiyamanini yaaka yitanu nayiyedi, Nebukaneza wakoleli nawa watachikili kuyuula cheñi.e
Yowanu: Eña, inakutiya chimunakuhosha. Hanu dinu iyi nsañu yinadifwani ñahi naWanta waNzambi nichaaka cha 1914?
Kameroni: Ti nilumbululi mukwihihisha, iwu wuprofwetu wukweti kushikijewa kuyedi. Kwatachi kwashikijeweli hampinji yaketwishiluwu chiyuulu chaMwanta Nebukaneza. Kwamuchiyedi kwashikijeweli haketwishiluwu chiyuulu ChaNzambi. Dichi kushikijewa kwamuchiyedi dikwesekana naWanta waNzambi.
Yowanu: Muneluki ñahi nenu iwu wuprofwetu wukweti kushikijewa kwamuchiyedi kwesekana naWanta waNzambi?
Kameroni: Chatachi, twawanaña wunsahu muwuprofwetu weniwu. Kwesekeja namukanda waDanyeli 4:17, iwu wuprofwetu awiheni “kulonda akwakuhanda akeluki nawu komana Mukwakubadika Mwiwulu diyi wayulaña wanta wawantu, wawinkaña muntu anatoñoliyi yowu.” Munayimoni mazu akwila nawu “wanta wawantu”?
Yowanu: Eña, nsona yinahoshi nawu “Mukwakubadika Mwiwulu diyi wayulaña wanta wawantu.”
Kameroni: Dimu. Munakutoñojoka nenu hinyi wekala “mukwakubadika Mwiwulu”?
Yowanu: Hekwawu anakutena Nzambi.
Kameroni: Omu dimu. Komana iyi nsañu yamwekeshaña nawu iwu wuprofwetu wahosha hohu hadi Nebukaneza wanyi. Wabombelamu “wanta wawantu” dikwila nawu chiyuulu chaNzambi hadi antu. Dichi iyi nsañu yalumbulukaña neyi tutaña mavasi ejima ekala munaka kapetulu.
Yowanu: Munatalishi mudihi?
MUTU WANSAÑU WEKALA MUMUKANDA WADANYELI
Kameroni: Mpinji yejima, mukanda wamuBayibolu waDanyeli wahoshaña haniwu muntu wansañu. Wahosha hampinji yakatachika kuyuula Wanta waNzambi nawa Mwanindi Yesu diyi wakayuulaña. Chakutalilahu, tubakulenu tupetulu twakunyima. Munateli kutaña Danyeli 2:44?
Yowanu: Kukala kwosi. Hanakuhosha nawu: “Hamafuku amba kekala anyantowu, Nzambi wamwiwulu wamba kaloñesha wanta wakubula kukisika haya nyaka, wantowu hiyamba kawushiyila antu acheñuku; wakahumonaña mawantawa ejima puchi puchi, nakuyinoñesha, wakemana mbe haya nyaka.”
Kameroni: Munatañi chiwahi. Komana munateli kuhosha nenu iyi vasi yinakuhosha haWanta waNzambi?
Yowanu: Aaa. Neluki wanyi.
Kameroni: Talenu iyi nsona yinakuhosha nawu iwu Wanta “wakemana mbe haya nyaka.” Wanta waNzambi diwu wunateli kushakama tuhu haya nyaka, bayi mfulumendi yawantuku, netu?
Yowanu: Eña dimu.
Kameroni: Tutalenu cheñi hawuprofwetu wukwawu wekala mumukanda waDanyeli wahoshaña haWanta waNzambi. Hiwuprofwetu wasonekawu haDanyeli 7:13, 14. Kuhosha hadi nyuuli, iwu wuprofwetu wahosha nawu “Amwinka nikuyula, nimpuhu, niwanta, kulonda antu amwacheñi namwacheñi ejima, ninyuza yawantu yejima, niakwamadimi eñi naeñi ejima akamukalakelaña. Kuyula kwindi hikuyula kwahaya nyaka nanyaka, hikwamba kahitaku, niwanta windi hiwamba kakisikaku.” Kudihu chuma muniwu wuprofwetu chinatiyakani wenyimbu?
Yowanu: Anatenumu wanta.
Kameroni: Munahoshi mwalala. Hiwanta hohu wanyi. Talenu iyi nsona yinahoshi nawu Wanta iwu wukekala nañovu jakuyuula “antu amwacheñi namwacheñi ejima, ninyuza yawantu yejima, niakwamadimi eñi naeñi.” Dikwila nawu, iwu Wanta wakayuulaña iseki dejima.
Yowanu: Neluka wanyi nami dimu mwatalisha iyi nsona, ilaña munahoshi mwalala. Dimu yatalisha.
Kameroni: Iwu wuprofwetu wahosha cheñi nawu: “Kuyula kwindi hikuyula kwahaya nyaka nanyaka, hikwamba kahitaku, niwanta windi hiwamba kakisikaku.” Komana mukwiteja nenu awa mazu anesekani namazu itwataña hamukanda waDanyeli 2:44?
Yowanu: Eña, anesekani.
Kameroni: Tuhitulukenu muyikuma yitunahanjeki. Wuprofwetu wamumukanda waDanyeli kapetulu 4 awiheni kulonda antu eluki nawu “Mukwakubadika Mwiwulu diyi wayulaña wanta wawantu.” Awa mazu anakumwekesha nawu iwu wuprofwetu wekala nakushikijewa kweneni kubadika kuna kwabombelamu Nebukaneza. Nawa mumukanda wejima waDanyeli, twawanañamu wuprofwetu wahoshaña hakutachika kuyuula kwaWanta waNzambi niMwanindi neyi nyuuli muniwu Wanta. Munakumona nenu chidi hohu chiwahi kuhosha netu wuprofwetu wekala mumukanda waDanyeli 4 niwena wahosha haWanta waNzambi?
Yowanu: Namoni dimu. Ilaña dinu iyi nsañu yinakutena 1914 wanyi.
“HAKAHITI MPINJI JITANU NAJIYEDI”
Kameroni: Tuhanjekenu cheñi hadi Mwanta Nebukaneza. Anukenu nenu mutondu wadiñi muwuprofwetu wemeneneñaku Mwanta Nebukaneza. Chiyuulu chindi achiketwishili hampinji yatemenuwu mutondu nikuwushiya hadi mpinji jitanu najiyedi, dikwila nawu hampinji yazalukiliyi. Ayina mpinji jitanu najiyedi jamanini hampinji yakoleliyi Nebukaneza nikutachika kuyuula cheñi. Mukushikijewa kwawuprofwetu kwamuchiyedi, chiyuulu chaNzambi achiketwishili hadi kapinji kantesha, bayi neyi muloña wakwila Nzambi wakañenyi kuyuulaku.
Yowanu: Munatalishi mudihi?
Kameroni: Mpinji yakunyima, anyanta awaIsarela ayulileña muYerusalema ayiteneneña nawu ashakamineña “hetanda daYehova.”f Emeneneñaku Nzambi mukuyuula antu jindi. Dichi chiyuulu chanawa anyanta chadiña hichiyuulu chaNzambi. Mukuhita kwampinji, anyanta amavulu alekeli kumwovwahila Nzambi, nawa antu jawu niwena atachikili kuyimbujola. Muloña wakwila aIsarela hiyadiña nakwovwahilaku, Nzambi wayilekeli kulonda ayishindi kudi aBabiloni mu 607 B.C.E. Kufuma yina mpinji, kwosi mwanta wamwimeneneñaku Yehova muYerusalemaku. Dichi chiyuulu chaNzambi achiketwishili. Munakutiya chinakuhosha?
Yowanu: Eña inakuchitiya.
Kameroni: Dichi mu 607 B.C.E. dimwatachikili mpinji jitanu najiyedi hela netu mpinji haketwishiluwu chiyuulu chaNzambi. Hakumana kwampinji jitanu najiyedi, Nzambi wukatonda mwanta wamuha mwiwulu wakumwimenaku. Dihakashikijewa wuprofwetu wukwawu wutwatañaña mumukanda waDanyeli. Dichi tunateli kudihula netu: Indi mpinji jitanu najiyedi jamanini mpinjinyi? Neyi twakula ilu lwihu, tukwiluka chaaka chatachikili kuyuula Wanta waNzambi.
Yowanu: Ichi dinu neluki. Ti nesekiku, mpinji jitanu najiyedi jamanini mu 1914 netu?
Kameroni: Munasi! Munahoshi mwalala.
Yowanu: Hanu tunateli kwiluka ñahi?
Kameroni: Hampinji yadiñayi hamaseki, Yesu wahosheli nindi mpinji jitanu najiyedi jachidiña kanda jimani.g Dichi iyi mpinji yateleli kuleha nankashi. Mpinji jitanu najiyedi jatachikili yaaka nkulakaji henohu Yesu kanda yenzi hamaseki nawa jatwalekeluhu nihanyima yakwila nafunti dehi mwiwulu. Anukenu cheñi nenu, wuprofwetu wekala mumukanda waDanyeli awilumbulwili wanyi muwatalisha kushika “nikumpinji yakukuminina.”h Kukukuma kwayaaka 1800, atudizi aBayibolu akeñeleña kwiluka mwatalisha iwu wuprofwetu, dichi asandujoleli nankashi. Atachikili kwiluka nawu mpinji jitanu najiyedi jikamana mu 1914. Nawa kufuma tuhu yina mpinji, yuma yamaneni yinakumwekana mukaayi yinakumwekesha nawu Wanta waNzambi watachikili kuyuula mwiwulu mu 1914. Munichi chaaka dihatachikili mafuku akukuminina. Neluki, iyi nsañu kanda muyitiyeñawu dehi, dichi mukukeñeka mpinji yeneni hakwila nawu muyitiyishishi . . .
Yowanu: Dimu. Nikuyitaña cheñi iyi nsañu kulonda niyitiyishishi.
Kameroni: Kwakama nehi. Anami nawa hahitili mpinji yeneni hakwila nitiyishishi iwu wuprofwetu nichiwashikijeweli. Nakuhweleli yuma yitunahanjeki yinayikwashi kwiluka nawu yuma yakuhwelelawu aYinsahu jaYehova yashindamena haBayibolu.
Yowanu: Chakadi nikujina. Nayikomokaña chimwashindamena haBayibolu hayuma yimwakuhwelela.
Kameroni: Namoni nami anenu nawa mwashindamena haBayibolu. Neyi chinahosha, iyi nsañu kanda muyitiyeñawu dehi, dichi mukukeñeka mpinji yeneni hakwila nawu muyitiyishishi. Hadaha muchidi namalwihu amakwawu. Chakutalilahu, tunadizi nawu mpinji jitanu najiyedi jahosha haWanta waNzambi nawa nawu jatachikili mu 607 B.C.E. Hanu dinu tweluka ñahi netu iyi mpinji jitanu najiyedi jamanini mu 1914?i
Yowanu: Anami nawa diyi nsañu yinnakutoñojoka.
Kameroni: Bayibolu yashimuna chikupu kuleha kwampinji jitanu najiyedi. Komana mukwiteja nakenzi cheñi kulonda tukahanjeki haniyi nsañu?
Yowanu: Munateli kwinza.
Komana kudihu nsañu yikwawu yamuBayibolu yimwajinokaña? Kudihu yuma yikwawu yakuhwelelawu hela yelañawu aYinsahu jaYehova yimwakeñaña kwiluka? Neyi dimu, mwatela kwihula chinsahu chaYehova wudi wejima. Wukutiya kuwaha hakuhanjeka nenu hansañu yamuchidowu.
[Tumazu twaheshina]
a Kuhitila mukudizisha antu Bayibolu chawana, aYinsahu jaYehova ahanjekaña nawatuñinawu nsañu yamuBayibolu mundonda mundonda.
c Talenu kapetulu 9 kamukanda waChumanyi Chacheni Chatañishaña Bayibolu? wasonekawu kudi aYinsahu jaYehova.
g Muwuprofwetu windi wahosha hamafuku akukuminina, Yesu wahosheli nindi: “Yerusalema [yemenañaku chiyuulu chaNzambi] akayidata kudi aJentili, nichamba kamana nyaka yawaJentili.” (Luka 21:24) Dichi chiyuulu chaNzambi adiña achiketula dehi nihampinji yadiñayi Yesu hamaseki nawa chatwalekeluhu nikumafuku akukuminina.
i Talenu mafu 215-218 mumukanda waChumanyi Chacheni Chatañishaña Bayibolu?
-
-
Indi Wanta waNzambi Watachikili Kuyuula Mpinjinyi?—Chibalu 2Kaposhi Kakutalila—2015 | January 1
-
-
KUHANJEKA NAMWINIITALA
Indi Wanta waNzambi Watachikili Kuyuula Mpinjinyi?—Chibalu 2
Iyi mpanji yinalondeluhu diyavula kuhanjekawu aYinsahu jaYehova nawantuñi nawu. Tufwikijenu Chinsahu wejina daKameroni nafunti kwitala deyala wejina daYowanu.
KUHITULUKA CHANTESHA MUCHILOTA CHALOTELIYI NEBUKANEZA
Kameroni: Natiyi kuwaha chinayiwani hetala aYowanu. Nadiluñishaña chikupu kuhanjeka hamu nanenu nsañu yamuBayibolu.a Mudi ñahi?
Yowanu: Nakola mwani.
Kameroni: Chachiwahi. Ifuku dinenjili, twahanjekeli muloña wahoshelañawu aYinsahu jaYehova nawu Wanta waNzambi watachikili kuyuula mu 1914.b Neyi chitwahanjekeli, twawanini wunsahu muwuprofwetu wekala mumukanda waDanyeli kapetulu 4. Munakwanuka nsañu yekalamu?
Yowanu: Chadiña chilota chaloteliyi Mwanta Nebukaneza chahosha hamutondu weneni.
Kameroni: Eña, dimu. Muchilota, Nebukaneza wamweni mutondu wasweja kuleha washikili mwiwulu. Watiyili kañelu kaNzambi nakuhosha nindi mutondu awutemi, ilaña chishinji chateleleli kushala mumaseki. Hanyima yakwila “mpinji jitanu najiyedi” jinahiti dehi, mutondu wukakula cheñi.c Twahanjekeli cheñi chaletesha iwu wuprofwetu wikali nakushikijewa kuyedi. Munakwanuka kushikijewa kwatachi kwaniwu wuprofwetu?
Yowanu: Hichuma chamumwekeneni Nebukaneza yomweni, netu? Wazalukili hadi yaaka yitanu nayiyedi.
Kameroni: Munasi. Nebukaneza wazalukili hakapinji kantesha, dichi chiyuulu chindi chemeni. Ilaña mukushikijewa kwawuprofwetu kwamuchiyedi, chiyuulu chaNzambi achimikili hampinji jitanu najiyedi. Neyi chitwahanjekeli, mpinji jitanu najiyedi jatachikili hampinji yajilumwinuwu Yerusalema mu 607 B.C.E. Kufuma tuhu hayina mpinji, hamaseki hadiña hosi anyanta amwimeneneñaku Yehova Nzambi hakuyuula antu jindi. Hela chochu, hakumana kwampinji jitanu najiyedi, Nzambi watondeli Nyuuli wamuha mwiwulu kulonda yayuuleña antu jindi. Komana tunateli kuhosha netu, Wanta waNzambi watachikili kuyuula mwiwulu chamanini mpinji jitanu najiyedi. Nawa twahanjekeli hatachikili mpinji jitanu najiyedi. Dichi, neyi twiluka kuleha kwampinji yahitiluhu kufuma hatachikili mpinji jitanu najiyedi, tukwiluka mpinji yatachikili Wanta waNzambi kuyuula. Munakutiya chinnakuhosha?
Yowanu: Eña, kuhituluka muniyi nsañu kunankwashi kwanuka yuma yitwahanjekeli.
Kameroni: Chinawahi. Hanu dinu tuhanjekenu chikupu haniyi nsañu kulonda twiluki kuleha kwampinji jitanu najiyedi. Nafumi tuhu hakutaña iyi nsañu kulonda nanuki yikuma yamaneni. Nukweseka kuyilumbulula hanakumini ñovu jami.
Yowanu: Chachiwahi.
MPINJI JITANU NAJIYEDI JINAKUMI—MAFUKU AKUKUMININA ANATACHIKI
Kameroni: Kushikijewa kwawuprofwetu kwatachi kwahosheleña hadi Nebukaneza, mpinji jitanu najiyedi jadiña hiyaaka yitanu nayiyedi (7). Ilaña kushikijewa kwamuchiyedi kwahosheleña haWanta waNzambi, mpinji jitanu najiyedi jateleleli kuleha chikupu kubadika yaaka yitanu nayiyedi.
Yowanu: Munatalishi mudihi?
Kameroni: Muloña neyi twanuka chitwahanjekeli, mpinji jitanu najiyedi jatachikili hampinji yajilumwinuwu Yerusalema mu 607 B.C.E. Neyi tutachika kuchinda kufuma munichi chaaka, yaaka yitanu nayiyedi yikutushikija mu 600 B.C.E. Ilaña kwosi chuma chalema chamwekeni muchaaka cha 600 B.C.E. kutalisha hachiyuulu chaNzambi. Kubombelahu, neyi chitwahanjekeli hakusambila, chimwahitili yaaka yayivulu hampinji yadiñayi Yesu hamaseki, wahosheli nindi mpinji jitanu najiyedi jachidiña kanda jimani.
Yowanu: Omu dimu. Ichi dinu nanuki dehi.
Kameroni: Dichi, chatela yikali yaaka yitanu nayiyedi hohu, mpinji jitanu najiyedi jateleleli kuleha nankashi.
Yowanu: Iyi mpinji yateleleli kuleha nakushika hadihi?
Kameroni: Mukanda waChimwekeshu wukweti nsañu yesekana nayekala mumukanda waDanyeli, watukwashaña kwiluka kuleha kwampinji jitanu najiyedi. Wahoshaña nawu mpinji jisatu nachiketu himafuku 1,260.d Dichi, mpinji jitanu najiyedi, dikwila nawu mpinji jisatu nachiketu neyi jinza mapampa kayedi jikwikala mafuku 2,520. Munakutiya chinnakulumbulula?
Yowanu: Eña, inakutiya chimunakuhosha. Ilaña iyi nsañu yinakumwekesha wanyi nawu Wanta waNzambi watachikili kuyuula mu 1914.
Kameroni: Chachiwahi, tutali chitunateli kusumbwañesha iyi nsañu. Muwuprofwetu wamuBayibolu wukwawu, ifuku dimu demenañaku chaaka.e Neyi tuzatisha lushimbi lwakwila nawu ifuku dimu demenañaku chaaka, dikwila nawu mpinji jitanu najiyedi jikwikala yaaka 2,520. Dichi neyi tutachika kuchinda kufuma mu 607 B.C.E., yaaka 2,520 yikutwishikija mu 1914.f Dichi twahoshelaña netu 1914 dichaaka hamanini mpinji jitanu najiyedi, hatachikiliyi Yesu kuyuula neyi Mwanta muWanta waNzambi. Kufuma tuhu mu 1914, mukaayi munamwekani yuma yekomwesha, yuma yahosheli Bayibolu nawu diyi yakamwekanaña mumafuku akukuminina.
Yowanu: Yumanyi yeniyi?
Kameroni: Talenu mazu ahosheliyi Yesu asonekawu haMatewu 24:7. Yesu wahosheli hampinji yakatachikayi kuyuulayi mwiwulu nindi: ‘Munza wumu wakanyamuka nakulwa namunza wukwawu, wanta wumu nawanta wukwawu. Kwamba kaholoka nzala ninyitentanshi kweñi nakweñi.’ Talenu chashimwiniyi Yesu nindi kwamba kaholoka nzala ninyitentashi haniyi mpinji. Mukanu kaayi munamwekani kukala kwamuchidiwu hayaaka yayivulu yinahituhu, natwambi?
Yowanu: Inehi.
Kameroni: Muyinu vasi, Yesu washimwini nindi neyi nekali Mwanta muWanta waNzambi kwakekala ninjita. Nawa mukanda waChimwekeshu hiwashimwini hohu njita yamunyunzaku ilaña washimwini ninjita yamukaayi kejima yikamwekana mumafuku akukuminina.g Munakwanuka chaaka chatachikili njita yatachi yakaayi kejima?
Yowanu: Yatachikili mu 1914, chaaka chimunakushimuna nenu dihatachikili Yesu kuyuula. Kanda nitoñojokeñahu dehi muniyi njila.
Kameroni: Neyi tubomba iyi nsañu yejima, wuprofwetu wahosha hampinji jitanu najiyedi niwuprofwetu wukwawu wamuBayibolu wahosha hamafuku akukuminina tukwiluka netu mwalala diyi mpinji yatachikili kuyuula wanta. A Yinsahu jaYehova eluka chikupu nawu Yesu watachikili kuyuula neyi Mwanta muWanta waNzambi mu 1914 nawa mafuku akukuminina atachikili munichi chaaka.h
Yowanu: Nichidi kanda niyitiyishi iyi nsañu.
Kameroni: Mwalala kwila mushikena dakuyitiyishisha hohenohuku. Neyi chinashimwini, hahitili mpinji kwamu hakwila nawu niyitiyishi chiwahi. Hela chochu, nakuhweleli nsañu yitunahanjeki yinayikwashi kwiluka nenu hela chakwila chaaka cha 1914 achitena wanyi muBayibolu, yuma yakuhwelelawu aYinsahu jaYehova kutalisha hanichi chaaka yashindamena muNyikanda yajila.
Yowanu: Eña, nayikomokaña muloña mpinji yejima neyi munakuhosha mwazatishaña nsona. Yuma yimwahoshaña hiyitoñojoka yenuku. Hela chochu, inakuhayama chuma chaletesha iyi nsañu yikali yakala kutiya. Muloñadi Nzambi chabuliliyi kutuleja muBayibolu nindi Yesu wukatachika kuyuula mwiwulu muchaaka cha 1914?
Kameroni: A Yowanu munehuli chiwahi. MuBayibolu mwekala yuma yayivulu yabula kulumbululawu chikupu. Hanu dinu muloñadi Nzambi chetejeleliyi nindi Bayibolu ayisoneki munjila yakwila antu atela kuzata nañovu hakwila ayitiyishi? Hadaha tukahanjeka iyi nsañu ifuku dikwawu.
Yowanu: Chikawaha nankashi.
Komana kudihu nsañu yikwawu yamuBayibolu yimwajinokaña? Kudihu yuma yikwawu yakuhwelelawu hela yelañawu aYinsahu jaYehova yimwakeñaña kwiluka? Neyi dimu, mwatela kwihula chinsahu chaYehova wudi wejima. Wukutiya kuwaha kuhanjeka nenu hansañu yamuchidowu.
a Kuhitila mukudizisha antu Bayibolu chawana, aYinsahu jaYehova ahanjekaña nawatuñinawu nsañu yamuBayibolu mundonda mundonda.
b Talenu chibaaba chinakwila nawu “Kuhanjeka Namwiniitala—Indi Wanta waNzambi Watachikili Kuyuula Mpinjinyi?—Chibalu 1” mumagazini yaNovember-December, 2014.
c Talenu Danyeli 4:23-25.
d Talenu Chimwekeshu 12:6, 14.
e Talenu Kuchinda 14:34; Ezekeli 4:6.
f Talenu chati yinakwila nawu “Mutondu Waloteliyi Nebukaneza.”
g Talenu Chimwekeshu 6:4.
h Talenu kapetulu 9 kamukanda waChumanyi Chacheni Chatañishaña Bayibolu? wasonekawu kudi aYinsahu jaYehova. Iwu mukanda wudi cheñi ha www.jw.org/lun.
-