Muhela Hulda Wekalili naChuma Chafwilileñayi
Neyi mwayahu dehi kuchituutu chanyanya chaSangir Besar muIndonesia yaaka yinahitihu, hadaha mwayimwenihu ahela jetu asatu akaKristu anakuzatila hamu kuchikumu. Ayiluka nankashi hanichi chituutu muloña wakushimwina, akwashaña antu kutiyishisha Bayibolu. Ilaña haniyi mpinji, kudi chuma chikwawu chelileñawu.
Chituutu chaSangir Besar chekala kukabeta kakuchimunswa chaIndonesia
Ayileña hakaluñalwiji nakunona malola alema, nawa ayisendeleña nakuyitwala kuchikumu. Malola amakwawu adiña amaneni neyi ngunja. Kuhiñahu, awa ambanda ashakamineña hayitwamu yanyitondu nawa azatishileña masandu nakubalola awa malola sampu anakehi nankashi. Kufumahu, ashileña awa malola anyanya mumbeketi japulasitiki nawa ayisendeleña nakukandama hamankenka nakuyitwala kwashakamineñawu. Nkumininaku, ashileña awa malola mumapakumuna amaneni ashileñawu mumatraki (munyotoka) nakuya nakuyizatisha hakutuña nyikwakwa.
Muhela Hulda, nakunonojola malola kuchikumu
Hakachi kanawa ahela wumu wadiña Hulda. Yena wazatileña mpinji yeneni haniwu mudimu kubadika akwawu ayedi. Kakavulu mali akwatileñayi muniwu mudimu, wayizatishileña kukwasha nachu chisaka chindi kumujimba. Ilaña haniyi mpinji, watachikili kuhembahu kadali kulonda alandi chuma chafwilileñayi. Wafwilileña kulanda tabuleti kulonda atweshi kwikala naJW Library® app. Muhela Hulda welukili nindi mavidiyo niyuma yikwawu yekalaña haniyi app yikumukwashaña kuzata chiwahi mudimu wakushimwina nikutiyishisha nsañu yamuBayibolu.
Dichi muhela Hulda watachikili kuzata maora ayedi nantetemena hadi kakweji kamu nachikunku, nakubalola malola amavulu akutwesha kwinzesha traki (motoka) yanyanya. Nkumininaku, wekalili namali nawa walandilimu tabuleti.
Muhela Hulda iku wudi natabuleti yindi
Muhela Hulda wahosheli nindi: “Hela chakwila nazeyeleña nankashi nikudikatisha hakubalola malola, nashikeneni dakujimbalaku kukuyeña nikukata kwejima chelili nitachiki kuzatisha iyi tabuleti mumudimu wakushimwina nihakuloñesha kupompa kwanetu akaKristu munjila yapela.” Wahosheli cheñi nindi iyi tabuleti yamukwashili kumatachikilu achipupu, muloña kupompa kwejima nikushimwina asokankesheleña kuzatisha yozelu. Tunatiyi kuwaha kwiluka netu muhela Hulda watwesheli kwikala nachuma chafwilileñayi.