Komana Kuvwalika Chachiha​—Diyi Njila yaWamwinu?

MUNATELI kwakula nenudi neyi ayihula nawu, “Komana mwavwalika dehi chachiha?” Akwakwitiya amavulu mukaayi kejima anateli kwakula nawu, “Eña.” Akuhwelela nawu kuvwalika chachiha dichinjikijilu chakwilukilaku akwaKristu alala ejima nawa diyi njila yawamwinu. Akuhwelela yitoñojoka yawakulumpi jansakililu chidi neyi Robert C. Sproul wadiza jansakililu wasonekeli nindi: “Neyi muntu wavwalika chachiha wanyi, . . . dikwila nawu himukwaKristu wanyi.”

Komana mwekala hakachi kawantu akuhwelela nawu kuvwalika chachiha diyi njila yawamwinu? Neyi dimu, chakadi kujina munakukeña kukwasha antaña niamabwambu jenu kulonda awani iyi njila kulonda atachiki kwendamu. Hela chochu, hakwila nawu eli mwenimu, atela kwiluka chaambu chekala hakachi kamuntu wavwalika dehi chachiha nimuntu wabula kuvwalika chachiha. Munateli kuyilumbulwila ñahi chalumbuluka kuvwalika chachiha?

Amavulu akuhwelela nawu nhoshelu yakwila nawu ‘kuvwalika chachiha’ yatalisha kudi muntu wadihana chikupu kumukalakela Nzambi niKristu, chikufumamu wukuhimpa kufuma kukufwa kuspiritu nakwikala wamumi kuspiritu.

Komana munakukeña kwiluka chuma chacheni chatañishaña Izu daNzambi hakuvwalika chachiha? Chakadi kujinoka, mukuhetelamu neyi mutaña chikupu iyi nsañu. Muloñadi? Muloña kwiluka chalala kutalisha hachalumbuluka kuvwalika chachiha kukuyikwasha muwumi wenu nikwiluka yuma yimwatalilaña kumbidi.

Chumanyi Chatañishaña Bayibolu?

Nhoshelu yakwila nawu ‘kuvwalika chachiha’ yekala haYowanu 3:1-12, iyi nsona yahosha hayuma yayiwahi yahanjekeliyi Yesu nanlomboli wansakililu muYerusalema. Mukuwana iyi nsañu yamuBayibolu anayisombololi yejima muchikasha chidi hamu nachinu chibaba. Tunayikoleshi kutaña ichi chikasha nakanañachima.

Muniyi nsañu, Yesu wahosheli yuma yayivulu kutalisha ‘hakuvwalika chachiha.’ Kafwampi, yuma yahosheliyi Yesu yatukwashaña kwakula awa malwihu atanu alema chikupu:

◼ Indi kuvwalika chachiha kwalema ñahi?

◼ Komana tunateli kuditondela kuvwalika chachiha?

◼ Indi kuvwalika chachiha kukweti nkeñelwinyi?

◼ Indi muntu wavwalikaña ñahi chachiha?

◼ Indi kuvwalika chachiha kwaletaña wulunda wamuchidinyi?

Tushinshikenu malwihu wenawa lumu hampinji.

Indi Kuvwalika Chachiha—Kwalema Ñahi?

MUMPANJI yejima yahanjekeluwu naNikodemu, Yesu wakonkomweneni nindi kuvwalika chachiha, hichuma chalema nankashi. Walumbulwili ñahi jiika?

Shinshikenu Yesu chakonkomweneniyi hakulema kwakuvwalika chachiha mumpanji yahosheluwu naNikodemu. Wahosheli nindi, ‘Muntu kutwesha kumona wanta waNzambi chiña avwalika chachiha.’ (Yowanu 3:3) Mazu akwila nawu “chiña [ni]kutwesha” akonkomwenaña kulema kwakuvwalika chachiha. Chakutalilahu: Neyi muntu yahosha nindi, “Hakwila nawu kwikali mwaana, chiña tuhu mutena wutoñeka,” nahoshi nindi mutena wakeñekaña chikupu hakwila nawu kwikali mwaana. Munjila yoyimu, Yesu wahosheli nindi kuvwalika chachiha kwakeñekaña hakwila nawu muntu yamoni Wanta waNzambi.

Nkumininaku, hakwila nawu yahoshi jiika chakubula kuletesha muntu kujinoka kutalisha haniyi nsañu, Yesu wahosheli nindi: ‘Chiña muvwalika chachiha.’ (Yowanu 3:7) Chakadi nikujina, kwesekeja nachahosheliyi Yesu, kuvwalika chachiha hichuma chakeñekaña hakwila nawu muntu yotweshi “kwiñila muwanta waNzambi.”—Yowanu 3:5.

Chineli Yesu wamweni nindi kuvwalika chachiha hichuma chalema nankashi, akwaKristu atela kwiluka iyi nsañu chikupu. Chakutalilahu, komana mwatoñojokaña nenu mukwaKristu watela kuditondela kuvwalika chachiha?

[Mazu ekoku adi hefu 5]

“Hakwila nawu kwikali mwaana, chiña tuhu mutena wutoñeka”

Komana Kuvwalika Chachiha—Hichuma Chatela Kuditondelayi Muntu?

HINYI waleteshaña muntu kuvwalika chachiha? Hakukonkomwena antiyilili jawu kwikala akwaKristu avwalika chachiha, antañishi amakwawu asombololaña mazu aYesu akwila nawu: “Chiña muvwalika chachiha.” (Yowanu 3:7) Antañishi amuchidiwu azatishaña awa mazu neyi akukanjikija, munjila yikwawu ahoshaña nawu, “Vwalikaku chachiha!” Dichi atañishaña nawu mukwakwitiya wejima watela kutondahu kumwovwahila Yesu nikwila yuma yakeñekaña hakwila nawu muntu yovwaliki chachiha. Kwesekeja nayitoñojoka yeniyi, dikwila nawu ahoshaña nawu muntu watela kuditondela kuvwalika chachiha. Komana yitoñojoka yeniyi yesekana nansañu yamulejeluwu Nikodemu kudi Yesu?

Neyi tutaña nakanañachima mazu aYesu, amwekeshaña nawu Yesu hatañishili nindi muntu watela kuditondela kuvwalika chachihaku. Muloñadi wutunahosheli mwenimu? Izu dachiGriki dabalumunawu nawu “wavwalika chachiha” anateli cheñi kudisoneka nawu “watela kuvwalika kufuma mwiwulu.”a Dichi, kwesekeja naniyi nsonekelu yikwawu, kuvwalika chachiha ‘kwafumaña mwiwulu’—hela “kudi Tata.” (Yowanu 19:11; Yakoba 1:17) Eña, Nzambi diyi waleteshaña muntu kuvwalika chachiha.—1 Yowanu 3:9.

Neyi twanukaña nhoshelu yakwila nawu “kufuma mwiwulu,” chikwikala chaswayi kwiluka muloña wukuletesha muntu kubula kuditondela kuvwalika chachiha. Toñojokenu tahi hakuvwalika kwenu kwakumujimba. Komana mwaditondeleli kuvwalika? Inehi. Tata yenu diyi waletesheli kulonda muvwaliki. Chochimu, tunateli kuvwalika chachiha neyi chakwila Nzambi, Tata yetu wamwiwulu, yatuleñela kuvwalika chachiha. (Yowanu 1:13) Dichi, kapostolu Petulu wahosheli chachiwahi nindi: ‘Amukiswili Nzambi yaMwanta wetu Yesu Kristu, yowu Tata, hamuloña waluwi lwindi lwasweja waletesheli tuvwaliki chachiha.’—1 Petulu 1:3.

Komana Kuvwalika Chachiha hiChuma chaKukanjikija?

Amakwawu anateli kujinoka nawu, ‘Neyi chalala muntu hanateli kuditondela kuvwalika chachihaku, muloñadi Yesu chahaniniyi ilu lushimbi lwakwila nindi: “Chiña muvwalika chachiha”?’ Ilu hilwihu lwalema. Kafwampi neyi mazu aYesu chalala amwekeshaña nawu hikukanjikija, dikwila nawu nakutuleja kwila chuma chabadika ñovu jetu. Ichi hichuma chatelelaku. Indi mazu akwila nawu “chiña muvwalika chachiha” alumbuluka nawudi?

Neyi tukushinshika iwu mukuku wamazu mwidimi dakusambila muyawusonekeluwu wunakumwekesha nawu hiyawusoneka munjila yakukanjikijaku. Ilaña, iwu mukuku wamazu awusoneka munjila yakubula kukanjikija. Munjila yikwawu, Yesu chahosheliyi nindi, “chiña muvwalika chachiha,” washimwineña nsañu yalala, bayi neyi wakanjikijileñaku. Wahosheli nindi: ‘Chalema kudenu kuvwalika chakufuma mwiwulu.’—Yowanu 3:7, Modern Young’s Literal Translation.

Hakwila tushimuni chakutalilahu kutalisha haniyi nsañu munhoshelu yakukanjikija nanhoshelu yakubula kukanjikija, toñojokenu hayuma yakwesekeja. Fwikijenu muntu nayi mwituña dacheñi, dichi nakukeña kulanda mpata munodu ituña. Munodu ituña ahana nshimbi yakwila nawu hakwila muntu yolandi mpata, chiña yekala mwenimbu wamunodu ituña. Ifuku dimu, muntu yeniwu hakuya kudi mukwanfulumendi nakumuleja nindi, “Inakukeña kulanda mpata.” Dichi mukwanfulumendi hakumuleja nindi, “Hakwila nawu wulandi mpata, watela kwikala mwenimbu mudinu ituña.” Kafwampi, mazu amukwanfulumendi hiyakukanjikija muntuku. Hanakumukanjikija ona muntu nindi, “Ikalaku mwenimbu mudinu ituñaku!” Mukwanfulumendi nakumuleja hohu nsañu yalala, chuma chakeñekaña hakwila nawu yolandi mpata.” Chochimu, Yesu chahosheliyi nindi, “Chiña muvwalika chachiha,” washimwineña hohu nsañu yalala, chuma chakeñekaña hakwila nawu ‘muntu yatweshi kwiñila muwanta waNzambi.’

Wanta waNzambi wadifwana nachuma chikwawu chakuvwalika chachiha. Watalisha kulwihu lwakwila nawu, Indi kuvwalika chachiha kukweti nkeñelwinyi? Kwiluka ñakwilu yanilu lwihu chalema hakwila nawu twiluki chikupu chichalumbuluka kuvwalika chachiha.

[Tumazu twaheshina]

[Mwevulu wudi hefu 6]

Kufwanañananyi kwekala hakachi kakuvwalika chachiha nakuvwalika kwakumujimba?

Indi Kuvwalika Chachiha—Kukweti Nkeñelwinyi?

ANTU amavulu akuhwelela nawu atela kuvwalika chachiha kulonda akatambwili wamwinu wahaya nyaka. Talenu Yesu chahosheliyi kutalisha hankeñelu yakuvwalika chachiha. Wahosheli nindi: “Muntu kutwesha kumona wanta waNzambi chiña avwalika chachiha.” (Yowanu 3:3) Dichi, muntu watela kuvwalika chachiha kulonda yakeñili muWanta waNzambi, bayi neyi kutambwila wamwinuku. Ilaña, antu amakwawu anateli kukaana nakuhosha nawu, ‘komana iyi nyikuku yamazu yiyedi, kwiñila muWanta nikutambwila wamwinu, hiyahoshaña hesomu dodimuku?’ Inehi. Hakwila nawu tutiyishi chaambu chiduhu, tusambilenu kushinshika nhoshelu yakwila nawu, “wanta waNzambi.”

Wanta himutapu wanfulumendi. Dichi dinu, nhoshelu yakwila nawu “wanta waNzambi” yalumbuluka nawu “nfulumendi yaNzambi.” Bayibolu yatañishaña nawu Yesu Kristu “mwana kamuntu,” diyi Mwanta waWanta waNzambi nawa Kristu wukweti akwawu anyuli. (Danyeli 7:1, 13, 14; Matewu 26:63, 64) Kubombelahu, chimwenu chamweniyi kapostolu Yowanu chamwekesha nawu awa akwakuyula hamu naKristu hiyantu atondawu ‘kunyichidi yejima, kumadimi ejima, kumatuña ejima, kunyunza yejima’ nawa amba ‘kayula neyi anyanta hamaseki.’ (Chimwekeshu 5:9, 10; 20:6) Izu daNzambi dashimuna cheñi nawu antu akayula neyi anyanta atuña ‘mukanka wawanyikoku antesha’ antu 144,000 “anakuuluwu mudi antu ahamaseki.”—Luka 12:32; Chimwekeshu 14:1, 3.

Indi Wanta waNzambi wayulilaña kudihi? “Wanta waNzambi” awutenaña cheñi nawu “wanta wamwiwulu,” ichi chamwekeshaña nawu Yesu niakwawu anyuli ayulilaña mwiwulu. (Luka 8:10; Matewu 13:11) Dichi, Wanta waNzambi hinfulumendi yamwiwulu yatuñewa naYesu Kristu niizaza dawakwawu anyuli atondawu mudi antu.

Indi Yesu watalishili mudihi hakuhosha nindi muntu chiña yovwalika chachiha mwaka ‘yeñili muwanta waNzambi’? Watalishili mukwila nindi muntu watela kuvwalika chachiha kulonda yakekali nyuli hamu naKristu mwiwulu. Dikwila nawu, nkeñelu yakuvwalika chachiha yekala yakuloñesha izaza dawantu antesha kulonda akayuli mwiwulu.

Ichi dinu, tuneluki netu kuvwalika chachiha kwalema nankashi, akutachikaña kudi Nzambi, nawa waloñeshaña izaza dawantu kulonda dakayuli mwiwulu. Indi kuvwalika chachiha kwazatikaña ñahi?

[Mazu ekoku adi hefu 7]

Nkeñelu yakuvwalika chachiha yekala yakuloñesha izaza dawantu antesha kulonda akayuli mwiwulu

[Mwevulu wudi hefu 7]

Yesu Kristu niizaza dawakwawu anyuli atondawu kufuma mudi antu atuña Wanta waNzambi

Indi Kuvwalika Chachiha—Kwazatikaña Ñahi?

YESU hahosheli naNikodemu hakulema kwakuvwalika chachiha, chuma chaleteshaña ninkeñelu yachu hohuku, ilaña wahosheli cheñi kuvwalika chachiha chikwazatikaña. Yesu wahosheli nindi: ‘Muntu kutwesha kwiñila muwanta waNzambi, chiña avwalika nikumenji nikudi spiritu.’ (Yowanu 3:5) Dichi, muntu wavwalikaña chachiha kuhitila mumenji nimuspiritu. Indi nhoshelu yakwila nawu ‘menji nispiritu’ yatalisha mudihi?

‘Menji niSpiritu’ Hiyumanyi?

Chakadi nikujina, hakwikala nkuluñaña munsakililu yawaYudeya, Nikodemu welukili chikupu Nsona yachiHeberu chiyazatishileña izu dakwila nawu ‘spiritu yaNzambi’—ñovu yaNzambi yinateli kuleñela antu kukoña nyidimu yamaneni. (Kutachika 41:38; Kwidika 31:3; 1 Samweli 10:6) Dichi hampinji yazatishiliyi Yesu izu dakwila nawu ‘spiritu,’ Nikodemu watela welukili nindi hispiritu yajila, ñovu yaNzambi.

Indi Yesu watalishili mudihi hakutena menji? Shinshikenu nsañu yasonekeluwu hohenohu henohu Yesu kanda yahanjeki naNikodemu nihanyima yakuhanjeka nindi. Ichi chamwekeshaña nawu Yowanu Mpapatishu niatumbanji twaYesu adiña nakupapatisha mumenji. (Yowanu 1:19, 31; 3:22; 4:1-3) Ichi chaaku achilukili nankashi muYerusalema. Dichi, hampinji yateneniyi Yesu menji, Nikodemu watela welukili nindi Yesu hanakutena menji hohuku, ilaña wateneneña menji achipapatishu.a

Kupapatishewa ‘naSpiritu Yajila’

Neyi chakwila ‘kuvwalika kumenji’ hohamu nakupapatisha mumenji, indi ‘kuvwalika . . . kuspiritu’ kwalumbulukadi? Henohu Yesu kanda yohanjeki naNikodemu, Yowanu Mpapatishu wabidikili nindi bayi neyi kwekala kupapatisha mumenji hohuku, ilaña spiritu yakakoña mudimu weneni hakupapatisha. Wahosheli nindi: ‘Ami nayipapatishi mumenji, ilaña yena [Yesu] wakayipapatisha naspiritu yajila.’ (Maku 1:7, 8) Nsoneki waNsañu Yayiwahi Maku washimuna katachi hamwekeni chipapatishu chamuchidiwu. Wasonekeli nindi: ‘Hamafuku owu Yesu hakufuma kuNazareta wamuÑaliliya, hiyakumupapatisha kudi Yowanu muYodana. Henohu hadiñi nakufumayi mumenji wamweni iwulu dinenzuluki, spiritu yidi neyi katela hiyikuwila hadi yena.’ (Maku 1:9,10) Chamujimikiluwu Yesu muYodana, amupapatishili mumenji. Hampinji yatambwililiyi spiritu kufuma mwiwulu, amupapatishili naspiritu yajila.

Chimwahitili yaaka kwakwihi nayisatu kufuma hamupapatishiluwu, Yesu wayilejeli atumbanji twindi nindi: ‘Hakwila enu akayipapatisha mudi spiritu yajila hakadi kuhita mafuku amavulu.’ (Yililu 1:5) Chumichi chamwekeni mwakanyi?

Hefuku daPentekosta muchaaka cha 33 C.E., atumbanji twaYesu kwakwihi na 120 apompeli mwitala muYerusalema. ‘Kukasumuka mwiwulu himukufuma lushindu ludi neyi lwampepela yikukunka nañovu yasweja nankashi, hilukwinzesha itala dejima mwashakaminuwu. Hikukuyimwekena madimi adi neyi nyizuzu yakesi . . . ; wejima wawu hiyakwinzala spiritu yajila.’ (Yililu 2:1-4) Ifuku dodina antu amakwawu muYerusalema ayikonkomweneni kupapatishewa mumenji. Kapostolu Petulu walejeli izaza nindi: ‘Balumukenu munyichima yenu, ayipapatishi wejima wenu mwijina daYesu Kristu, kulonda kuyanakena nshidi jenu; mutambuli chamukunkulu chaspiritu yajila.’ Chumanyi cheliluwu? ‘Dichi wena atambwili mazu indi namuzañalu, hiyakuyipapatisha; ifuku denodu hiyakubombelaku antu kafwampi neyi makombakaji asatu.’—Yililu 2:38, 41.

Kupapatishewa Mapampa Kayedi

Indi iyi yipapatishu yamwekeshañadi kutalisha hakuvwalika chachiha? Yamwekeshaña nawu kuvwalika chachiha kwazatikaña kuhitila mukupapatishewa mapampa kayedi. Ilukenu nenu Yesu wasambilili kupapatishewa mumenji. Kuhiñahu watambwilili spiritu yajila. Chochimu, atumbanji akusambila ayipapatishili mumenji (amakwawu kudi Yowanu Mpapatishu), kuhiñahu atambwilili spiritu yajila. (Yowanu 1:26-36) Hohamu niatumbanji 3,000 amaha asambilili kuyipapatisha mumenji, kuhiñahu hiyakutambwila spiritu yajila.

Neyi twanukaña yipapatishu yamwekeni haPentekosta 33 C.E., tunateli kukuhwelela netu kuvwalika chachiha kunateli kuzatika ñahi makonu? Tukukuhwelela netu kunateli kuzatika neyi chikwazatikili kudi apostolu aYesu niatumbanji akusambila. Tachi, muntu wabalumukaña mumuchima hanshidi jindi, kuleka yililu yatama, nakudihana kulonda kudifukula nikumukalakela Yehova, nikumwekesha kudihana kwindi hatooka kuhitila mukupapatishewa mumenji. Kuhiñahu, neyi chakwila Nzambi namutondi kukalakala neyi nyuli muWanta Windi, akumuwayisha naspiritu yajila. Chibalu chatachi chaniku kupapatisha kuyedi (kupapatishewa mumenji) achitachikaña kudi muntu; chibalu chamuchiyedi (kupapatishewa naspiritu) achitachikaña kudi Nzambi. Neyi muntu yopapatishewa mapampa kayedi, dikwila nawu navwaliki chachiha.

Muloñadi Yesu chazatishililiyi nhoshelu yakwila nawu ‘kuvwalika kumenji nikuspiritu’ mumpanji yahanjekeluwu naNikodemu? Muloña wakukonkomwena nindi antu apapatishewaña namenji nikuspiritu akamona kuhimpika kweneni. Chibaba chinalondeluhu chinahoshi hansañu yakuvwalika chachiha.

[Tumazu twaheshina]

[Mwevulu wudi hefu 9]

Yowanu wapapatishileña namenji aIsarela abalumukileña mumuchima

Indi Kuvwalika Chachiha—Kwazataña Mudimwinyi?

MULOÑADI Yesu chazatishililiyi nhoshelu yakwila nawu ‘kuvwalika . . . kuspiritu’ hampinji yahosheleñayi hakupapatishewa naspiritu yajila? (Yowanu 3:5) Izu dakwila nawu “kuvwalika” neyi adizatisha munkinji dalumbuluka nawu “kutachika.” Dichi, nhoshelu yakwila nawu “kuvwalika chachiha” yalumbuluka “kutachika chachiha.” Dichi dinu, nhoshelu yankinji yakwila nawu “kuvwalika” ‘nikuvwalika chachiha’ yakonkomwenaña hawalala wakwila nawu antu apapatishewa naspiritu yajila akatachika chachiha wulunda wawu naNzambi. Indi iku kuhimpika chikupu kwawulunda kwazatikaña ñahi?

Hakulumbulula chaloñeshañayi Nzambi antu kwikala anyuli mwiwulu, kapostolu Pawulu wazatishili chakutalilahu chawenyi anakutambwila wenimbu. Wayisonekeleli akwaKristu amumafuku indi nindi, atambwilili wenimbu wamwiwulu. Wahosheli nindi: “Kwinza etu wenimbu wetu wudi mwiwulu.” (Afwilipi 3:20) Hakwila twiluki chakutalilahu chakutambula wenimbu chichikutukwasha kutiyishisha yuma yahimpikaña neyi muntu napapatishewi naspiritu yajila, tushinshikenu cheñi chakutalilahu chamwenyi wunakukeña kulanda mpata mwituña dawenyi.

Kuhimpika Kwamwekanaña Neyi Muntu Natambwili Wenimbu

Munichi chakutalilahu, muntu hanatweshi kulanda mpataku muloña himwenimbu wamunodu ituñaku. Fwikijenu nenu ifuku dimu yuma yinahimpiki chikupu. Akwanfulumendi yamunodu ituña amwinka wenimbu kwesekeja nanshimbi. Indi chumichi chikumukwasha ñahi iwu muntu? Hamuloña wakumwiteja kwikala mwenimbu, nekali nawuswa wakulanda mpata neyi enimbu ejima amunodu ituña. Kutambwila wenimbu kunahimpi chikupu chihandilu chindi.

Ichi chinakulumbulula yuma yalema yamwekanaña kutalisha hadi antu avwalikaña chachiha. Shinshikenu kufwanañana kwekalahu. Munichi chakutalilahu, muntu nateli kulanda mpata chiña neyi yawanisha yuma yakeñekaña hakwikala mwenimbu. Ilaña, kankawindi hakutwesha kuwanisha yuma yakeñekañaku. Chochimu, antu amakwawu akayinka mudimu muWanta waNzambi, hela munfulumendi yamwiwulu, chiña neyi awanisha yuma yakeñekaña hakwikala nalusesa—dikwila nawu “kuvwalika chachiha.” Ilaña, kankawawu hiyanatweshi kuwanisha yuma yakeñekañaku, muloña kuvwalika chachiha kwashindamena hadi Nzambi.

Chumanyi chinahimpi chihandilu chanona muntu? Kutambwila wenimbu kwesekeja nanshimbi. Kafwampi, chumichi hichinahimpi chekalayi iwu muntuku. Hanyima yakutambwila wenimbu, iwu muntu wukutwalekahu kwikala muntu yowumu, ilaña ichi nekali nachihandilu chachiha. Chalala, natachiki chihandilu chachiha hela tuhoshi netu navwaliki chachiha. Nekali mwenimbu, chinamuleteshi yekali nawuswa wakulanda nikuheta mpata.

Chochimu Yehova wahimpa chihandilu chezanvu dawantu abula kuwanina kuhitila mukuyitambwila neyi enimbu anfulumendi yindi yamwiwulu.

Kapostolu Pawulu wekala mudina izanvu, wayisonekeleli akwawu akwakwitiya nindi: “Dichi dinu, himudi nawa enyi hela akwetuña dacheñuku; munekali dehi enimbu hamu nawakwakujila, munekali dehi akwetala daNzambi.” (Aefwesesa 2:19) Eña, kuhitila mukutambwila wenimbu, akwaKristu wenawa ekala munfulumendi yaNzambi yamwiwulu.

Kafwampi, kutambwila wenimbu wamwiwulu hikwahimpa chekalawu awa atambwilaña wenimbuku, muloña hiyawaninaku. (1 Yowanu 1:8) Hela chochu, kwesekeja nachalumbulwiliyi cheñi Pawulu, hanyima yakuwanisha yuma yakeñekaña munshimbi kulonda kutambwila wenimbu, atambwila chifulu chachiha. Hampinji yoyimu, spiritu yaNzambi yayileñeleli awa antu akuhweleli chikupu nawu akashakama naKristu mwiwulu. (1 Yowanu 3:2) Ichi chikuhwelelu chakola chiyekalañawu nachu hamuloña waspiritu yajila chayiletesha kwikala nachihandilu chachiha. (2 Akorinda 1:21, 22) Eña, atachikaña chihandilu chachiha hela netu avwalikaña chachiha.

Hakuhosha hadi antu atondayi Nzambi, Bayibolu yahosha nawu: “Akekala atupristu ambala aNzambi niaKristu, akayulila hamu nindi ikombakaji danyaka.” (Chimwekeshu 20:6) Antu atondayi Nzambi akatambwila chifulu neyi anyanta muWanta waNzambi hela nfulumendi yamwiwulu hamu naKristu. Kapostolu Petulu wayisonekeleli akwawu akwakwitiya kutalisha haniwu wunyuli nindi, ‘hiwuswana wakatokaña, wakadi kujilola, wabulaña kujimuka,’ dikwila nawu, “wanayiswekeluwu enu mwiwulu.” (1 Petulu 1:3, 4) Chalala, hiwuswana walema chikupu.

Hela chochu, iyi nsañu yakuyula cheñi yaleñelaña kwihula lwihu. Neyi chakwila antu avwalika chachiha akayula neyi anyanta mwiwulu, akayulaña anyi? Ilu lwihu analwakuli muchibaba chinalondeluhu.

[Mwevulu wudi hefu 10]

Indi Pawulu wahoshelidi kutalisha hawenimbu wamwiwulu?

Izanvu Danyanya diKayula, Ilaña Antu Amavulu Akahetelamu

KUFUMA tuhu mumafuku awapostolu, Nzambi nakutonda akwaKristu antesha ashinshika mudi antu, nakuyinka wenimbu wamwiwulu. Kuhimpika kwamonañawu awa akwaKristu kwawanina chikupu chakwila Izu daNzambi dashimuna iku kuhimpika nawu kuvwalika chachiha. Nkeñelu yakuvwalika chachiha yekala yakuloñesha awa ambuña aNzambi avwalika chachiha kwikala anyuli mwiwulu. (2 Timotewu 2:12) Hakwila nawu ekali anyuli, ayisañwilaña kuwumi wamwiwulu. (Aroma 6:3-5) ‘Akayulaña neyi anyanta hamaseki’ hamu naKristu mwiwulu.—Chimwekeshu 5:10; 11:15.

Hela chochu, Izu daNzambi dahosha cheñi nawu kudi antu amakwawu abula kuvwalika chachiha, akatambwila wamwinu wahaya nyaka. MuBayibolu (muNyikanda yachiHeberu hamu tuhu niNyikanda yawakwaKristu