APENDIKISI

Kumanisha Kukala muNsañu jaKulanda naKulandulula

Neyi chasonekawu ha 1 Akorinda 6:1-8, kapostolu Pawulu wahosheli hadi akakwitiya ayedi hansañu yakudiholokelaña kuyota. Wahosheli nakuneña nindi akwaKristu amakwawu muKorinda ‘aholokeleleña amana kwawu muchota chawabula kuloña.’ (Vasi 1) Pawulu washimwini nyiloña yashikila yikukañesha mukwaKristu kubula kuholokela mukwawu kuchota ilaña atela kuyimanishila muchipompelu. Tusambilenu kutala hanyiloña yikwawu yaleñeleli yohani iku kufumba kwonenawu nawa tukuhosha hayakutalilahu yantesha yinabuli kukundama kuniku kufumba.

Neyi tudi nakukala munsañu jakulanda nakulandulula namukwetu mukwakwitiya, twatela kusambila kukwimanisha munjila yaYehova, bayi yetuku. (Yishimu 14:12) Neyi chashimwiniyi Yesu, twatela kumanisha kukala swayi-swayi henohu kanda kusweji. (Matewu 5:23-26) Chawushona, akwaKristu amakwawu aswejaña ntadi, chakwila nyiloña yeniyi yashikaña nikuyota yanyiloña. Pawulu wahosheli nindi: “Ochu chimukudiholokela muntu namukwawu, chikwikala chuma chatama mukachi kenu.” Muloñadi? Muloña waweni wudi wakwila nawu wunsompeshi wamuchidiwu wukutamisha ijina dadiwahi dachipompelu nidaNzambi yitwalombaña. Dichi twatela kwanukaña lwihu lwaPawulu lwehwiliyi nindi: “Mwalekelañadi kukumina dakwiteja kuyikoña chatama?”—Vasi 7.

Pawulu walumbulwili cheñi nindi Nzambi washa ntanjikilu yayiwahi muchipompelu yakumanishilamu yikonkojola yayivulu. Aeluda hiyakwaKristu akweti maana akwiluka chalala chamuNsona, nawa Pawulu wahosheli nindi atweshaña “kuketula muloña mukachi kawana kwindi” neyi kunasoñi “nsañu jakumina muwumi wunu.” (Vasi 3-5) Yesu wahosheli nindi neyi kudi yikonkojola yamaneni, chidi neyi matuñu nikutwamba, atela kuyimanisha kulondela njila jisatu; yatachi, fwilenu kumanisha kukala kumbadi muwuyedi wenu; yamuchiyedi, neyi njila yatachi yinakañanyi, tambikenu chinsahu wumu hela ayedi; yamuchisatu, neyi njila jejima jinakañanyi, twalenu nsañu kuchipompelu chiyanakwimenawu kudi aeluda.—Matewu 18:15-17.

Hela chochu, aeluda awakwaKristu bayi neyi himahaku hela hiyakwakuhana maanaku, nawa hiyatela kwila mwenimuku. Hiyashimunaña yuma yakeñakaña hakwila amanishi kukala kunamwekani hadi amana kwetu munsañu jakulanda nakulandulaku. Ilaña, afwilaña kukwasha ejima adi nakukala kuzatisha Nsona nakufwila kuleta kuwunda. Neyi kudi nyiloña yamaneni, atela kwihula nkoñi wañinza hela kasanji kamutayi kawaYinsahu jaYehova. Hela chochu, kudi nsañu yikwawu yinabuli kushimunawu mukufumba kwaPawulu. Nsañwinyi?

Mpinji jikwawu, muloña wunateli kumana chachiwahi sampu muwutwala kuchota. Chakutalilahu, kudiholokela hadaha diyi njila yimu hohu yakutambwilamu lusesa lwakudiseñelamu, kwikala nalusesa lwakuhemba mwana, nikufweta muntu anaseñuwu, kutambula mali ainsurance, kwikala handandanda yawantu akweti mali kunyambawulu yinabuvuki, nikufwachika jiwilu. Kudi nyiloña yikwawu cheñi mana kwetu yikutoñojokayi nindi watela kuholoka cheñi kuchota chanyiloña kulonda yadikiñi kumuloña.a

Neyi nyiloña yamuchidiwu akuyisenda chakadi kumwekesha yililu yamadombu, hiyakumotoka kufumba kwonenawu kwahosheliyi Pawuluku.b Hela chochu, chuma chikukeñeshayi mukwaKristu chidi chakulemesha ijina daYehova nikuleta kuwunda nikunuñañana muchipompelu. Chuma cheneni chamwekeshaña chaambu hadi atumbanji twaKristu hikukeña, nawa “kukeña . . . hikwakokwelaña kwindi hohuku.”—1 Akorinda 13:4, 5; Yowanu 13:34, 35.

[Tumazu twaheshina]