Mukanda wamuBayibolu Naambala 55—2 Timotewu

Nsoneki: Pawulu

Awisonekeleli: muRoma

Awimanishili Kuwisoneka: Kwakwihi na 65 C.E.

PAWULU amukasili cheñi muRoma. Ilaña, kukasewa kwamuchiyedi kwaswejeli kutama kubadika kwatachi. Hekwawu mwadiñi mu 65 C.E. MuJuly 64 C.E., muRoma mwahitili kesi keneni kakisañeni chikupu nyisumba 10 yamutubeta 14. Kwesekeja nachahosheli Tacitus wakuRoma weluka nsañu yanyaka, Mwanta Nero “wakañenyi kufwomona yitoñojoka yatama yakwila nawu diyi waheni lushimbi lwakwocha kesi. Hakwila nindi yaluwañeshi iyi nsañu, Nero watwambilili izaza daweniKristu daheleluwu antu nawu elaña yishimashima nakutachika kuyimwesha kalula. . . . EniKristu amavulu ayinkeli muloña, bayi hansañu yakwocha mukalaku, ilaña hansañu yakuyihela kudi antu. Makabi ashiyashana amweneñawu ayileñeleleña kufwa. Hamuloña wakuyinañila muyitembi yawanyama, ayitambolileña kudi atuwa nakufwa, nawa ayipopeleleña hakulusu, hela kuyinatila munyilañi yakesi, kulonda atooñekeña neyi chejeji nawufuku, itañwa chidahuma. Nero waheni matempa indi kulonda elileñamu iyi yuma . . . Antu atachikili kutiya wushona; muloña hichadiñi chachiwahi kumona chayiyandishileñawuku, ilaña ayikisañeni hamuloña wakukola kwamuchima wamuntu wumu.”a

² Hekwawu haniyi mpinji yalukadi lwasweja kutoha dihamukasiluwu cheñi Pawulu muRoma. Haniyi mpinji wadiña mumaleñi. Hadiñi nakutoñojoka nindi akamumbakuku, ilaña wadiñi nakutalila hohu kusompesha kwakukumishaku nikumujaha. Hikwenjileña antu amavulu nakumutalaku. Chakalili nankashi kudilumbulula hatooka nawu nidi mwiniKristu muloña neyi akutiya akukwata nikukujaha kuhitila mukukuyandisha. Dihafumini Pawulu kusoneka nakuhameka antu ejima enjileña nakumutala kufuma kuEfwesesa nindi: “Mwanta atiyili wushona akwetala daOnesifwolu, wankwashili kakavulu, hatiyili nsonyi yeleñi damuku. Chadiñiyi muRoma wankeñakeñeli nankashi, hakunwana.” (2 Tim. 1:16, 17) Hakwiluka nindi keña yafwi, Pawulu wasonekeli nakuditena yomweni nindi: “kapostolu kaKristu Yesu mwaya muchima waNzambi, mwaya kukana kwawumi wamudi Kristu Yesu.” (1:1) Pawulu welukili nindi amutentekeleli wumi wamudi Kristu. Washimwinini munyisumba yayivulu yamaneni yatiyakana chikupu mukaayi, kufuma kuYerusalema kushika nimuRoma, hadaha washikili nikuSipeni. (Rom. 15:24, 28) Wamanishili njila yakutemukila nakashinshi.—2 Tim. 4:6-8.

³ Hekwawu iwu mukanda awusonekeli kwakwihi na 65 C.E., henohu adi kwakwihi nakumujaha Pawulu. Timotewu watela wachidiña muEfwesesa, muloña Pawulu wamulejeli kushakama kwokuna. (1 Tim. 1:3) Ilañichi, Pawulu hakumushinjila Timotewu mapampa kayedi kwinza swayi kwadiyi, nawa wamulejeli kwinza hamu naMaku, nikuhitula cheñi kahuma ninyikanda yashiliyi Pawulu kuTirowasi. (2 Tim. 4:9, 11, 13, 21) Hela chakwila awusonekeli hampinji yakala nankashi, iwu mukanda wadiña nansañu yakumukolesha Timotewu chikupu, nawa wunatwalekuhu nakukolesha eniKristu alala amumakiñu ejima kufuma tuhu kumashiita.

⁴ Mukanda waTimotewu Wamuchiyedi walala nawa awiteja kwesekeja nanyiloña yinashimuniwu muTimotewu Wamuchimu. Awitejeli nawa awizatishileña kudi ansoneki akushankulu niakwakuhosha haBayibolu, kushilahu niPolycarp wamuyaaka nkulakaji yamuchiyedi C.E.

CHIWAWAHILA

¹⁰ ‘Nyikanda yajila yejima ayonena dehi kudi Nzambi nawa yayiwahi.’ Muloñadi chiyawahila? Pawulu natuleji mumukanda windi wamuchiyedi wasonekeleliyi Timotewu nindi: “yawaha kuleja nachu, nikutanyisha nachu, nikwolola nachu, nikufumba nachu mwaloña; kulonda muntu waNzambi awanini chikupu, awahili nyidimu yayiwahi yejima.” (3:16, 17) Dichi kuwaha ‘kwakuleja nachu’ anakwikonkomweni chikupu muniwu mukanda. Makonu antu ejima akeña kuloña atela kutiyilila kufumba kwakuwahi kudi muwunu mukanda hakufwila kwikala antañishi Ezu nihakukabila kwikala antu anetejiwu kudi Nzambi “kulumbulula mazu ansañu yalala mwayawu mwayawu.” Neyi chichadiña muEfwesesa mumafuku aTimotewu, nikulelu kudi antu adiñijaña ‘mukwihujola kwawusupi kwakadi maana,’ “adizaña mafuku ejima, hela chochu, akañanyaña kwiluka nsañu yalala chikupu” nawa analeki “kutiyilila kuleja kwalala” nakuhakwilaku antañishi owaña matu awu kwesekeja nakufwila kwawu. (2:15, 23; 3:7; 4:3, 4) Hakwila tutondolweli yuma yatama yamukanu kaayi yaluwañeshaña, twatela kutwalekahu kukakela ‘kumazu akukolesha’ mukukuhwelela nikukeña. Cheñi nawa, antu amavulu anakukeñeka nankashi kulonda ‘ashikuhu chikupu kuleja akwawu’ mukachi kachipompelu nihanzi, neyi chadiñayi Timotewu, “muntu waNzambi.” Antu ejima akweti iwu mudimu ‘wakushikahu kuleja akwawu mukuwunda,’ nawa ashimwinaña mazu ‘nakudiwunjika nikwiluka mwakutañishila’ anakooleki!—1:13; 2:2, 24, 25; 4:2.

¹¹ Neyi chahosheliyi Pawulu, Timotewu welukili nyikanda yajila “kufumisha kuwansi” muloña amulejeleña chiwahi kudi Lowisi niYunisi. “Kufumisha kuwansi” kunakumwekesha cheñi mpinji yakutachika kuleja anyana nshimbi yamuBayibolu makonu. Indi neyi, munahiti dehi yaaka, wuna muzañalu watachi wutachika kujima? Kufumba kwaPawulu kudi kwakufuntisha cheñi wuna muzañalu naspiritu “yañovu nakukeña nikuwundisha mumesu,” kwikala nachikuhwelelu chakadi wunfwikiji. Wahosheli nindi ‘mumafuku akukuminina,’ kwakenza nyaka yakala, kuluwalala kwawatwansi nintañishilu yakutwamba. Dichichakeñekelaña sweje-e kudi atwansi, niejima, kwikala ‘ababala muyuma yejima, kukalakala mudimu wawu nikuwumanisha chikupu.’—3:15; 1:5-7; 3:1-5; 4:5.

¹² Komana chachiwahi kulwila wufwetu. (2:3-7) Dichi Pawulu wanukili Mbutu yaWanta, hakuhosha nindi: “Anukaku Yesu Kristu, [mbutu] mwana kaDavidi, wasañuka mudi afu, yoyi nsañu yayiwahi.” Kuchiñeja kwaPawulu kwadiña kwakunuñañana hamu naniyi Mbutu. Kubombelahu wahosheli hakufwa kwindi kwadiña kwakwihi mumazu akumwekesha kushinda nindi: “Kufumisha kulelu anantentekeli chibaaba chakuloña, chakanyinkayi Mwanta, mukwakusompesha waloña, hefuku odu. Hakanyinkami hohuku, wakenka niantu ejima akeña kumwekana kwindi.” (2:8; 4:8) Antu ejima akutoñojoka hanyidimu yawu yinakalikaluwu yaaka yayivulu nakashinshi atela kuhosha mazu wowamu. Ilaña dinu, chinakukeña kukalakala nakashinshi yoyinu mpinji, nakukeña kumwekana kwaYesu Kristu, nikumwekesha chikuhwelelu neyi cheliliyi Pawulu hakusoneka nindi: “Mwanta wakampulwisha kunyidimu yatama yejima, wakanhemba nimoni wanta windi wamwiwulu. Kulema kwikali kwindi haya nyaka nanyaka. Amena.”—4:18.

[Tumazu twaheshina]