A Yinsahu jaYehova añahi imweluka? Hadaha twekala antuñi nenu, twazataña nenu indi kwiji twatañilaña hamu kushikola. Hadaha twahanjekahu dehi nenu nsañu yamuBayibolu. Twekala antu amuchidinyi, nawa muloñadi chitwashimwinaña hatooka yuma yitwakuhwelela?

Twekala neyi antu ejima. Twafuma kuyitachi yashiyashana niyihandilu yambokamboka. Etu amakwawu twadiña mukwitiya kwacheñi, amakwawu niwena hiyamukuhweleleli Nzambuku. Hela chochu, henohu kanda twikali aYinsahu, wejima wetu twadiña nampinji yakushinshika chachiwahi yuma yatañishaña Bayibolu. (Yililu 17:11) Twetejeli yuma yitwadizili, nawa twatondeluhu kudifukula kudi Yehova Nzambi.

Kudiza Bayibolu kwatukwashaña hama. Kufwana antu ejima, anetu nawa twomikaña kukala nikuzeyazeya. Ilaña kuzatisha nshimbi jamuBayibolu mafuku ejima kwatukwashaña hama muchihandilu chetu. (Masamu 128:1, 2) Ichi hichuma chimu chatuleñelaña kuleja akwetu yuma yayiwahi yitwadiza muBayibolu.

Twovwahilaña nshimbi jaNzambi. Iyi nshimbi yekala muBayibolu yatukwashaña kwikala namuzañalu nikulemesha akwetu kushilahu niyililu yidi neyi kushinshika niluwi. Yaleñelaña antu muchituñilu kwikala akola nawa yakwashaña chisaka kwikala chanuñañana nikumwekesha yililu yikwawu yayiwahi. Chineli twakuhwelela netu ‘Nzambi hekala nachaambuku,’ twekala muchisaka chimu chamukaayi kejima chanuñañana nayuma yitwakuhwelela nawa nsañu yajipolitiki nichaambu chekowa yatwambulaña wanyi. Hela chakwila twekala neyi antu ejima, twambukaku.—Yililu 4:13; 10:34, 35.

• Indi aYinsahu jaYehova ekala ñahi neyi antu ejima?

• Yumanyi yelukawu aYinsahu kuhitila mukudiza Bayibolu?

Antu amavulu atoñojokaña nawu aYinsahu jaYehova hiijina dakwitiya kwakuha. Hela chochu, kubadika yaaka 2,700 yinahituhu, ambuña Nzambi walala wumu hohu ayiteneni nawu “ayinsahu” jindi. (Isaya 43:10-12) Atwilukili nawu Atudizi aBayibolu kushika tuhu nimuchaaka cha 1931. Muloñadi chitwatachikili kuditena netu aYinsahu jaYehova?

Dakumwilukilaku Nzambi yetu. Kwesekeja namanyusikiliputi yakushankulu ijina daNzambi Yehova damwekanaña mapampa kakavulu nankashi muBayibolu. MumaBayibolu amavulu idi ijina adifumishamu nakuhiñishamu nkumbu yidi neyi Mwanta hela Nzambi. Ilaña, Nzambi walala wadimwekesheli yomweni kudi Mosi nejina dindi, Yehova, nindi: “Ijina dami dodenidi dahaya nyaka.” (Kwidika 3:15) Dikwila nawu wadambwiluku nawanzambi akutwamba ejima. Twatiyaña kuwaha hakututena hejina daNzambi dajila.

Dalumbululaña mudimu wetu. Antu amavulu nankashi akushankulu, kutachika namuntu waloña Abeli ashimwinini wunsahu hayuma yakuhweleleluwu mudi Yehova. Kufuma tuhu kushankulu, Nowa, Abarahama, Sara, Mosi, Davidi niantu amakwawu azatililili hamu nanidi “ivu dawayinsahu dikumaha.” (Aheberu 11:4–12:1) Neyi chochinateli muntu kushimuna wunsahu wakwimenaku mukwawu wakadi muloña muchota, twafuukulahu chikupu kushimwina wunsahu wansañu yalala hadi Nzambi yetu.

Twamwimbujolaña Yesu. Bayibolu yamutenaña nawu, ‘chinsahu washinshika nawa walala.’ (Chimwekeshu 3:14) Yesu yomweni washimwini nindi ‘walumbulwili ijina daNzambi kulonda adiluki’ nawa watwalekeluhu ‘kushimwina wunsahu wansañu yalala’ hadi Nzambi. (Yowanu 17:26; 18:37) Dichi akwakumulonda Kristu alala ashimwinaña ijina daYehova nikudilumbulula kulonda adiluki. Dichi chuma chafwilaña kwilawu aYinsahu jaYehova.

• Muloñadi Atudizi aBayibolu chatachikiluwu kuditena nawu aYinsahu jaYehova?

• Munahiti yaaka yiñahi kufuma hampinji yatachikiliyi Yehova kwikala nawayinsahu hanu hamaseki?

• Indi Chinsahu waYehova muneni hinyi?

Bayibolu yashimwineñahu dehi nawu chakafwayi Kristu, mukachi kawakwaKristu akusambila mukanyamuka antañishi akutwamba nawa akaluwañesha ntañishilu yalala yamuBayibolu. (Yililu 20:29, 30) Chimwahitili mpinji, chumichi chamwekeni. Hantañishilu yaYesu ashiluhu ntañishilu yakwitiya kwawasenji, nawa atuñili chipompelu chawakwaKristu akutwamba. (2 Timotewu 4:3, 4) Tunateli kwiluka ñahi makonu netu tweluka chikupu chuma chacheni chatañishaña Bayibolu?

Mpinji yaYehova yakumwekesha nsañu yalala yashikili. Washimwineñahu dehi nindi ‘kumpinji yakukuminina antu akeluka nsañu yalala yayivulu.’ (Danyeli 12:4) Mu 1870 izanvu danyanya dawakwakukeñakeña nsañu yalala delukili nawu ntañishilu yamumachechi amavulu yamuNsona wanyi. Dichi atachikili kusandujola kulonda atiyishishi ntañishilu yayeni yamuBayibolu nawa Yehova wayikwashili kwiluka Nsona.

Antu ashinshika adizileña Bayibolu nakanañachima. Awa Atudizi aBayibolu adikita, atubusilili njila yakudizilamu yituchidi kuzatisha nimakonu. Ahanjekeleña hansañu jamuBayibolu kwesekeja namutu wansañu. Elileña neyi awana nsañu yamuBayibolu yakala kutiyishisha, atalileña mavasi amakwawu alumbulula nsañu yenoyu. Chelukawu nawu nsañu yenoyu yinesekani naNsona jejima, ayisonekeleña. Kuhitila mukwiteja Bayibolu yidilumbululi yayeni, elukili cheñi nsañu yalala kutalisha hejina daNzambi niWanta, yuma yafuukwilayi antu heseki, chekalawu afu nikuchiñeja kwakusañuka. Yuma yawaninuwu yayileñeleli afumi muwunduñu wakukuhwelela nsañu yayivulu yakutwamba.​—Yowanu 8:31, 32.

Mu 1879 aTudizi aBayibolu elukili nawu mpinji yashikili yakutiyakesha nsañu yalala mukaayi kejima. Dichi muchaaka chenichi, atachikila kusoneka magazini yaKaposhi Kakutalila Kanakubidika Wanta waYehova yituchidi kusoneka nimakonu. Chayinu mpinji, twashimwinaña nsañu yalala yamuBayibolu kudi antu mumatuña 240 nawa mumadimi 750. Antu anakwiluka nsañu yalala yayivulu kubadika kumpinji yakunyima.

• Chafwiliyi Kristu, chumanyi chamwekeni kutalisha hansañu yalala yamuBayibolu?

• Chumanyi chinatukwashi kwiluka cheñi nsañu yalala yaMwizu daNzambi?

Hayaaka yayivulu yinahituhu aYinsahu jaYehova azatishileña, apulintileña nikuhana maBayibolu ambokamboka. Ilaña twelukili netu twatela kwikala naBayibolu yakubalumuna chachiha yinateli kukwasha antu kudiza “nsañu yalala chikupu,” chuma chakeñañayi Nzambi nindi antu ejima eluki. (1 Timotewu 2:⁠3, 4) Dichi, mu 1950 twatachikili kwidisha yibalu yaBayibolu yamwidimi detu damakonu yaNew World Translation. Iyi Bayibolu ayibalumuna choloka nawa chatiyakana mumadimi akubadika ha 130.

Bayibolu yaswayi kutiyisha yakeñekeleña. Madimi ahimpaña mukuhita kwampinji, nawa mumaBayibolu amavulu mwekala mazu akala kutiyisha hela nhoshelu yayikulu. Cheñi nawa, awana mamanyusikiliputi amakulu amavulu akweti nsañu yoloka adifwana chikupu naakushankulu, chumichi chaleñela kutiyisha chachiwahi chiHeberu, chiAramaic nichiGriki chamuBayibolu.

Kwakeñekeleña Bayibolu yalondelaña chikupu Izu daNzambi. Chatela ahimpi nsañu Mwizu daNzambi donenawu, akwakubalumuna Bayibolu atela kwikala ashinshika nakulondela nyikanda yayeni. Hela chochu, mumaBayibolu amavulu ijina daNzambi, Yehova adifumishamu muNyikanda Yajila.

Bayibolu yamulemeshaña yomweni Nsoneki yakeñekeleña. (2 Samweli 23:2) MuBayibolu yaNew World Translation, ijina daYehova adifuntishamu kwesekeja nachidamwekanaña kwakwihi namapampa 7,000 mumanyusikiliputi yamuBayibolu yakushankulu neyi chinamwekeshuwu muchakutalilahu chidi heshina. (Masamu 83:18) Hamuloña wakwila mwahitili yaaka yayivulu chikupu nakusandujola, antu atiyaña kuwaha kutaña iyi Bayibolu, muloña yashimuna yitoñojoka yaNzambi choloka. Chili mukweti Bayibolu yaNew World Translation mwidimi denu hela nehi, tunayikoleshi kwikala nachaaku chakutaña Izu daYehova mafuku ejima.—Yoshuwa 1:8; Masamu 1:2, 3.

• Muloñadi chitwafuukwiluhu kwikala naBayibolu yakubalumuna chachiha?

• Chaakwinyi chachiwahi chakeñekaña mafuku ejima kudi antu afwilaña kudiza mwaya muchima waNzambi?