Antu amavulu analeki kuya nakupompa kumachechi muloña hiyayikwashaña kuwana ñakwilu yamalwihu asweja kulema hela kuyikundejaku. Hanu dinu, muloñadi wumwatelela kuya kukupompa kwawakwaKristu kwaloñeshawu kudi aYinsahu jaYehova? Yumanyi yimukawanaku?

Muzañalu wakwikala hakachi kawantu akamenaña nawa akweti kukeña. Kushankulu, akwaKristu adiña nayipompelu nawa apompeleña nakudifukula kudi Nzambi, kudiza Nsona nikudikolesha wumu namukwawu. (Aheberu 10:24, 25) Chineli apompeleña hamu nawantu akweti kukeña, elukili nawu adiña hakachi kawamabwambu alala, amana kwawu niahela akuspiritu. (2 Atesalonika 1:3; 3 Yowanu 14) Anetu twalondelaña chakutalilahu chawakwaKristu akushankulu nawa twekala namuzañalu.

Nkisu yafumaña hakudiza chakuzatisha nshimbi jamuBayibolu. Neyi chochichadiña kushankulu, amayala, ambanda nianyana apompelaña hamu. Antañishi akuluka yitembi azatishaña Bayibolu kulonda atukwashi kwiluka chitwatela kuzatisha nshimbi jamuBayibolu muwumi wetu. (Kuhituluka 31:12; Nehemiya 8:8) Ejima mwizaza anateli kwakulahu nikwimba, yumiyi yatuleñelaña kuhosha yuma yitwachiñejaña.​—Aheberu 10:23.

Nkisu yekala mukukolesha chikuhwelelu chenu mudi Nzambi. Kapostolu Pawulu walejeli chipompelu chimu chamumafuku indi nindi: “Muloña nakeñaña nankashi kuyimona, . . . Kulonda twakakwashañani nakukuhwelela kwetu, nikwenwenu nikwamami.” (Aroma 1:11, 12) Kudikunda nawakwetu akwakwitiya mpinji yejima hakupompa kwakoleshaña chikuhwelelu chetu nawa twafwilaña kulondela nshimbi jamuBayibolu.

Komana kwila mwiteja iwu mutambi wakwinza kukupompa kwetu kulonda mwakadimweni iyi yuma enu aweni nehi? Akayitambwila chiwahi nankashi. Kupompa kwejima kwawana, hitwafweteshaña antuku.

• Chakutalilahwinyi chitwembujolaña hakupompa kwetu kwachipompelu?

• Tunateli kuhetelamu ñahi neyi tupompaña kupompa kwawakwaKristu?

Twayaña kukupompa kwawakwaKristu mafuku ejima, chili twaketwishaña ivunda indi kwiji kunachi chiwahi wanyi. Muloñadi aYinsahu jaYehova chafwilañawu kuya nakupompa nawakwawu akwakwitiya chili akweti kukala muchihandilu hela neyi anazeyi nanyidimu hanodu ifuku?

Kwatukwashaña chikupu. Kapostolu Pawulu wasonekeli nindi, “Tuditoñojokenu muntu himuntu,” wadiña nakutena antu itwadikundaña nawu muchipompelu. (Aheberu 10:24) Iyi nhoshelu yaya mukwila nawu “kutoñojoka chikupu,” dikwila nawu kudiluka wumu namukwawu. Dichi mazu akapostolu atukoleshaña kwakamena akwetu. Neyi twiluka yisaka yikwawu yawakwaKristu, tukuwana netu amakwawu ashinda chiwahi kukala kwadifwana nakukala kutwamonaña nawa anateli kutukwasha.

Kwaleñelaña kwikala nawubwambu wakola. Hakupompa kwetu, bayi neyi twapompaña hamu nawakwetu itwadiluka nawu hohuku, ilaña nenzavu dawamabwambu itwadikunda nawu chikupu. Mpinji yikwawu twekalaña hamu nakuhema hampinji yakunooka. Indi kudikunda kwamuchidiwu kwatukwashaña ñahi? Kwatukwashaña kwiluka chakudilemesha wumu namukwawu nawa chumichi chakoleshaña mpanda yetu yakukeña. Nawa neyi amabwambu jetu anakumona kukala, twayikwashaña muloña wubwambu wetu wakola. (Yishimu 17:17) Twamwekeshaña netu ‘twadihembaña nawakwetu’ kuhitila mukudikunda nawantu ejima muchipompelu chetu.​—1 Akorinda 12:​25, 26.

Tunayikoleshi netu tondenu antu anakwila mwaya muchima waNzambi ekali amabwambu jenu. Mukuwana amabwambu wenawa hakachi kawaYinsahu jaYehova. Bayi mwiteja chuma chidi chejima chiyikañeshi kudikunda nanetuku.

• Indi kupompela hamu kwatuheteshaña munjilanyi?

• Mpinjinyi yimwakatachika kwinza kuchipompelu chetu hakwila mwakadiluki nawaYinsahu?

AkwaKristu akusambila embileña tumina, kulomba, kutaña nikuhanjeka haNsona hakupompa nawa hiyelileña yidika yidi yejimaku. (1 Akorinda 14:26) Munateli kuwana yuma yadifwanaku hakupompa kwetu.

Nsañu yitwadizaña yashindamena haBayibolu nawa yayiwahi. Kunsa yamulungu, yipompelu yejima yahumañanaña nakutiyilila kumpanji yaBayibolu yajiminiti 30 yahoshaña haNsona jatukwashaña muchihandilu chetu nihamafuku itunakushakamamu. Wejima wetu atukoleshaña kutaña mumaBayibolu etu. Hanyima yampanji kwekalaña Kudiza “Kaposhi Kakutalila” hadi ora yimu nawa antu ejima muchipompelu ayikoleshaña kwakulahu hachibaaba chaKaposhi Kakutalila kakudizamu. Kuhanjeka kweniku kwatukwashaña kuzatisha kufumba kwamuBayibolu muchihandilu chetu. Yipompelu yakubadika ha 110,000 mukaayi kejima yadizaña nsañu yoyimu.

Atukwashaña kuwahisha ntañishilu yetu. Twekala cheñi nefuku dikwawu mukachi kamulungu ditwapompaña kupompa kwayibalu yisatu kutwatenaña netu Chihandilu niMudimu Wanetu AkwaKristu, kwesekeja nansañu yidi muChihandilu niMudimu Wanetu AkwaKristu Mukanda waKupompa. Chibalu chatachi chaniku kupompa chitwatenaña netu Yuma yalema yamwizu daNzambi chatukwashaña kwiluka chibalu chimu chamuBayibolu chinaloñesheli chandimu chipompelu. Kuhiñahu, chibalu chaShenu Muchima haMudimu Wakushimwina mwekalaña yimwenu yamwekeshaña chakudiza Bayibolu nawantu amakwawu. Mukwakufumba watalaña chitunakuhosha mpanji hakwila yatukwashi kulonda twiluki chakutaña chiwahi nikwiluka chakuhosha. (1 Timotewu 4:13) Chibalu chakukumishaku, chitwatenaña netu Chatela Kushakamawu akwaKristu chahoshaña hachitunateli kuzatisha yishina yamuBayibolu muchihandilu chetu. Mwabombela kuhanjeka kwamalwihu niñakwilu kwatukwashaña kutiyishisha Bayibolu.

Neyi mwinzaña nakupompa muchipompelu chetu, chakadi nikujina nsañu yayiwahi yimukudizaña muBayibolu yikayizañalesha.​—Isaya 54:⁠13.

• Yumanyi yimukatiya hakupompa kwawaYinsahu jaYehova?

• Kupompanyi kutwapompaña mulungu nimulungu kumukakeña kupompa?

Komana munamoni nyevulu muyinu buloshuwa aYinsahu jaYehova chiyanavwaluwu chiwahi hampinji yinakupompawu kupompa kwawu kwachipompelu? Muloñadi wutwashilañaku maana kunvwalilu nimmwekenu?

Kulonda tumwekeshi netu twamulemesha Nzambi yetu. Chalala Nzambi haakamaña antu kumesuku. (1 Samweli 16:⁠7) Hela chochu, neyi tunapompi nakudifukula kudi Nzambi, twafwilaña chikupu kumulemesha nikulemesha akwetu akwakwitiya. Neyi tunakuya nakwimana kumesu ansompeshi muchota, tukushaku maana kummwekenu yetu kulonda tumwekeshi kalemesha muloña wachifulu chikwetiyi. Chochimu, chitwamwekanaña hakupompa chamwekeshaña nawu twamulemesha “Mukwakusompesha iseki dejima,” Yehova Nzambi, niiluña ditwadifukwilaña kudi yena.​—Kutachika 18:⁠25.

Kulonda tumwekeshi nshimbi yitwovwahilaña. Bayibolu yakoleshaña akwaKristu kuvwala yakuvwala ‘yalumbuluka, nansonyi nikuwundisha mumesu.’ (1 Timotewu 2:​9, 10) Kuvwala “chalumbuluka” chaya mukwila nawu tubuleña kuvwala yakuvwala yakukomwesha antu, yakusañumuna wuvumbi hela yakumwekesha mujimba. “Kuwundisha mumesu” cheñi kwatukwashaña kubula kutonda yakuvwala yabula kutelela. Iyi nshimbi yatalisha mukwila nawu muntu nateli kuditondela yakuvwala yinakukeñayi yatelela yashiyashana. Mmwekenu yetu yayiwahi yinateli ‘kuwahisha ntañishilu . . . yaChamwinu chetu’ nawa ‘yamulemeshaña Nzambi.’ (Titusa 2:​10; 1 Petulu 2:​12) Neyi tuvwala chachiwahi hakuya kukupompa, tunateli kukwasha amakwawu kwiluka chatela kudifukulawu kudi Yehova.

Hela chakwila mudana yakuvwala yayiwahi munateli kwinza nakupompa Hetala daWanta. Tunateli kuvwala yakuvwala yawunyoji hela yatelela kubadika kuvwala yakuvwala yasweja wuseya.

• Indi nvwalilu yetu yalema ñahi neyi tunakudifukula kudi Nzambi?

• Nshimbinyi yatulombolaña kutalisha hakutonda yakuvwala ­nichitwamwekanaña?

Neyi mwadizaña Bayibolu naChinsahu chaYehova, hadaha mwahitulukaña chadimu munsañu yejima yimwadizaña. Hakwila nawu muhetelumu chikupu, mwatela cheñi kuloñesha nsañu yakudiza hakupompa kwachipompelu. Munateli kuhetelamu chikupu neyi muhitulukilañamu chadimu.

Ilukenu mpinji niiluña dimwatela kudizila. Mpinjinyi yimwatoñojokaña chiwahi neyi munakudiza? Ntetemena henohu kanda mutachiki kuzata nyidimu, tahindi namelela neyi anyana anakami dehi? Hela chakwila himwatela kudiza mpinji yenenuku, tanjikenu mpinji yakudiza nawa bayi mwiteja chuma chidi chejima chiyikañeshuku. Dizilenuña mwiluña damwena nawa jimenu yuma yejima yatela kuyiluwañesha yidi neyi chisanji, TV ninshiña. Neyi mulomba henohu kanda mutachiki kudiza mukwakamena wanyi yuma yanodu ifuku nawa mukushinshika hakudiza Izu daNzambi.​—Afwilipi 4:⁠6, 7.

Fundenu hadi yikuma nawa diloñeshenu kulonda mwakuluhu. Sambilenu kutiyisha nsañu yejima chiyidi. Toñojokenu hamutu wansañu wudi muchibaaba hela mukapetulu, talenu nyitu yanyanya chiyinakundami kumutu wampanji nawa shinshikenu nyevulu yejima nimalwihu akuhitulukamu anakukonkomwena hayikuma yamaneni. Kuhiñahu tañenu maparagilafu ejima nawa keñenu ñakwilu yamalwihu anasonekuwu. Tañenu nsona yinatenuwu nawa toñojokenu chiyinesekani nansañu yimunakuloñesha. (Yililu 17:11) Neyi muwana ñakwilu, fundenu hamazu antesha hela nyikuku yamazu yidi muparagilafu yikuyikwasha kwanuka ñakwilu hakupompa. Nawa neyi munakeñi munateli kwimika chikasa kulonda mwakuluhu mukwihihisha mumazu enu hakupompa.

Kuhitila mukushinshika nsañu yashiyashana yitwadizaña mulungu nimulungu hakupompa, mukubombelaku yuma yayiha ‘yalema yimwasweka’ hansañu yamuBayibolu yimweluka.​—Matewu 13:​51, 52.

• Mwatela kwikala nachaaku chamuchidinyi hakuloñesha nsañu yakupompa?

• Munateli kudiloñesha ñahi hakwila mwakakuluhu hakupompa?

Kufuma tuhu kushankulu, Yehova wakeñaña nindi yisaka yejima yikaleña nampinji yakudizila hamu kulonda akoleshi wulunda wawu nayena nimuchisaka chawu. (Kuhituluka 6:​6, 7) Dimuloña waweni aYinsahu jaYehova chiyatanjikilawu ifuku dimu mulungu nimulungu kulonda adifukuleña hamu nachisaka, nikuhanjeka chachiwahi yuma yakuspiritu yesekana nakukaankila kwawu. Neyi mwekala nkawenu, wanenu mpinji yakudiza hadi Nzambi nakutaña Bayibolu hansañu yimunatondi.

Himpinji yakukundama kwakwihi naYehova. “Kundamenu kwakwihi naNzambi, niyena wukukundama kwakwihi nanenu.” (Yakoba 4:⁠8) Twamwilukaña Yehova chiwahi neyi tudiza nsañu yahosha hayililu yindi nichelañayi yuma kuhitila mukudiza Izu dindi Bayibolu. Njila jajiwahi jakutachika kudifukula kwachisaka hikwikala nampinji yakutaña Bayibolu nezu datiyakana, hadaha munateli kulondela ndandanda yamulungu nimulungu yaChihandilu niMudimu Wanetu AkwaKristu. Munateli kwinka antu ejima amuchisaka chibalu chakutaña, kuhiñahu ejima anateli kuhanjeka hayuma yinadizuwu muNsona.

Himpinji yakudikunda nachisaka. Eyala namumbanda, anvwali nianyana anateli kukolesha wulunda wawu neyi ­adizilaña hamu Bayibolu nachisaka. Kudiza kwachisaka kwatela kwikala kwakuzañalesha nawa ejima amuchisaka atela kutalilaña iyi mpinji mulungu nimulungu. Anvwali anateli kutonda nsañu yatelela kuhanjekawu kwesekeja nayaaka yikweti anyanawu, hadaha nikuzatisha yibaaba yamuKaposhi Kakutalila niAwake! hela yahawebusayiti yetu, jw.org/lun. Munateli kuhanjeka hakukala kwamonañawu anyanenu hashikola nichatela kwilawu nakukala kwenoku. Kwila mutalila hamu progilamu yashañawu ha JW Broadcasting (t.v.jw.org) nikuhanjekahu hanyima nehi? Munateli kudiluñisha kudiza tumina tumwakemba hakupompa nawa munateli kuloñesha niyakunwa hanyima yakudifukula kwachisaka.

Iyi mpinji yalema yimwazatishaña hakudifukula kudi Yehova mulungu nimulungu yikukwasha ejima muchisaka kudiluñisha kudiza Izu daNzambi nawa wamba kayikiswila chikupu.​—Masamu 1:​1-3.

• Muloñadi wutwatanjikilaña mpinji yakudifukula kwachisaka?

• Indi anvwali anateli kukwasha ñahi ejima muchisaka kudiluñisha hampinji yakudifukula?

Muloñadi awa antu chinazañaleluwu? Muloña anakupompa kupompa kwetu kweneni. Kufwana ambuña Nzambi akushankulu, alejeluwu nawu apompeña kapampa kasatu hachaaka, anetu nawa twatalilaña mpinji yakupompa kupompa kwamaneni. (Kuhituluka 16:16) Chaaka nichaaka twapompaña kupompa kusatu: twapompaña kayedi kupompa kwañinza kwefuku dimu, niKupompa Kweluña kwamafuku asatu. Twahetelañamu ñahi muniku kupompa?

Kwatukoleshaña hamu nawana kwetu akwaKristu. A Isarela azañaleleña hakumuhameka Yehova ‘hakupompa,’ anetu nawa twadiluñishaña hakudifukula hamu hanawa mafuku adimena. (Masamu 26:12; 111:1) Iku kupompa kwatwinkaña kukooleka kwakuhanjeka nawaYinsahu akuyipompelu yacheñi hela akumatuña acheñi. Hachayili, twadiilaña yakudya hamu heluña dakupompela, chumichi chaleñelaña kudiluñisha chikupu haniyi mpinji yachawija chakuspiritu. (Yililu 2:42) Haniku kupompa kwamaneni twamonaña namesu kukeña kwatunuñañeshaña ‘nawa mana kwetu ejima’ mukaayi.​—1 Petulu 2:17.

Kwatukwashaña kuyilaku hambidi kuspiritu. A Isarela ahetelelumu cheñi “chayilumbulukilili mazu” amuNsona ayilubulwililuwu. (Nehemiya 8:8, 12) Anetu nawa twalemesha nshimbi jamuBayibolu jatulejañawu hakupompa kwetu. Maprogiramu ejima ashindamenaña haNsona. Twadizaña chakwila mwaya muchima waNzambi muchihandilu chetu, kuhitila mujimpanji, mpanji jakulondashana nikumwekesha yuma yamwekeni. Twakoleshewaña neyi tutiya yuma yahitañamu ana kwetu anakuumika kukala kwamonañawu muchihandilu hakwikala akwaKristu munanu mafuku akala. Hakupompa kweluña, chimwenu cheneni chatukwashaña kumona nsañu yamuBayibolu neyi yinakumwekana makonu nawa yatudizishaña yuma yayiwahi. Hakupompa kwamaneni kwejima, apapatishaña antu akeñaña kumwekesha nawu anadihani kudi Nzambi.

• Muloñadi mpinji yakupompa kupompa kwamaneni chiyatuzañaleshaña?

• Munateli kuhetelamu ñahi neyi muya kukupompa kwamaneni?

Henohu wudi kwakwihi nakufwa, Yesu washimwini nindi: “Ninsañu iyi yaWanta yayiwahi akayishimwañena mwahita matuña ejima mwashakamawu antu, kulonda yakayilili nyuza yejima wunsahu; henohu dihu hakenza kukumisha.” (Matewu 24:14) Hanu dinu iwu mudimu wakushimwina mukaayi kejima anakuwuzata ñahi? Kuhitila mukulondela chakutalilahu chemikiliyi Yesu hampinji yadiñayi hamaseki.—Luka 8:1.

Twalondelaña antu hamatalawu. Yesu wayidizishili atumbanji twindi kushimwina nsañu yayiwahi kwitala nikwitala. (Matewu 10:11-​13; Yililu 5:42; 20:20) Ana akwakushimwina akushankulu ayilejeli maluña aweni akushimwinamu. (Matewu 10:5, 6; 2 Akorinda 10:13) Chochimu nimakonu, mudimu wetu wakushimwina awuntanjika chiwahi nawa chipompelu nichipompelu chikweti iluña dakushimwinamu. Chumichi chatukwashaña kushikija lushimbi lwaYesu lwakwila nawu ‘tushimwini antu, nikushimuna wunsahu chikupu.’—Yililu 10:42.

Twafwilaña kushimwina antu kwejima kwaduwu. Yesu watwimikila chakutalilahu kuhitila mukushimwina antu hatooka, chidi neyi kuchikumu chakaloña hela kwishima kwenzaña antu amavulu. (Maku 4:1; Yowanu 4:5-15) Anetu nawa twahanjekaña nawantu nsañu yamuBayibolu kwejima kwaduwu, chidi neyi munyikwakwa, kumaluña akuzatila, kumaluña akunookela hela hajinshiña. Twashimwinaña cheñi atuñi netu, akwetu akwanyidimu, akwetu mutwatañilaña niantaña jetu hampinji yatelela. Kuzatila hamu nañovu muniyi njila kunakwashi antu amavulu mukaayi kejima kutiya ‘nsañu yayiwahi yawamwinu.’—Masamu 96:2.

Komana munelukuhu muntu imwatela kushimwina nsañu yayiwahi yaWanta waNzambi nichiyikamukwasha iyi nsañu kumbidi? Bayi mushintajala kulejaku amakwawu iyi nsañuku. Yishimwinenu chakubula kumanisha mpinji.

• “Nsañu yayiwahi” yamuchidinyi yitwatela kushimwina?

• Indi aYinsahu jaYehova embujolaña ñahi njila jashimwinineñamu Yesu?

Izu dakwila nawu “payiniya” kakavulu datalisha kudi antu akeñakeñaña maluña amaha nawa enzulwilaña amakwawu njila yakulondela. Yesu wadiña payiniya, chineli amutemesheli hamaseki nakukalakala mudimu wakuhana wumi nikwenzulwila amakwawu njila yawamwinu. (Matewu 20:28) Makonu atumbanji twindi amwimbujolaña kuhitila mukuzata mpinji yeneni mumudimu ‘wakwilisha atumbanji.’ (Matewu 28:​19, 20) Amakwawu azataña mudimu wutwatenaña netu mudimu wawupayiniya.

Payiniya himukwakushimwina wampinji yejima. A Yinsahu jaYehova ejima hiyakwakushimwina ansañu yayiwahi. Hela chochu, amakwawu ahimpa chihandilu chawu kulonda azateña mudimu wawupayiniya wampinji yejima, kakweji nikakweji azataña maora 70 mumudimu wakushimwina. Hakwila nawu eli mwenimu, amakwawu aleka kuzata mudimu wakumujimba wampinji yejima nakutachika mudimu wakapinji kantesha. Amakwawu ayitondaña kuzata wupayiniya wadimena mumaluña mudi kukaankila kwawakwakushimwina aWanta, azataña maora 130 mumudimu wamwiha kakweji nikakweji. Apayiniya atiyaña kuwaha kwikala nachihandilu chapela, akuhwelela nawu Yehova wukuyinka yuma yakeñañawu muchihandilu. (Matewu 6:​31-​33; 1 Timotewu 6:​6-8) Antu akañanyaña kuzata wupayiniya wampinji yejima anateli kuzata wupayiniya wakukwasha neyi anatweshi kudikita mumudimu wakushimwina hadi maora 30 hela 50 hakakweji.

Kukeña kwakeñayi Nzambi niantu dikwamusañumunaña payiniya. Kufwana Yesu, tweluka netu antu amavulu akeñaña kwiluka nsañu yaNzambi niyuma yafuukulayi. (Maku 6:​34) Ilaña tweluka nsañu yinateli kuyikwasha makonu yikuyileñela kwikala nakuchiñeja kwalala kwakumbidi. Kukeña kwakeñayi antu dikwamusañumunaña payiniya kuzatisha mpinji yindi niñovu kulonda yakwashi amakwawu kwiluka nsañu yayiwahi. (Matewu 22:39; 1 Atesalonika 2:⁠8) Muloña wakuzata iwu mudimu, chikuhwelelu chapayiniya chakolelañaku nawa wakundamaña kwakwihi naNzambi nikwikala namuzañalu chikupu.​—Yililu 20:⁠35.

• Indi payiniya hinyi?

• Chumanyi chayisañumunaña amakwawu kuzata wupayiniya wampinji yejima?

Kufuma tuhu kunyaka, aYinsahu jaYehova ayiluka nawu ekala namashikola akudiza hadi Nzambi. Antu azataña mudimu wampinji yejima hakushimwina Wanta ayiloñeshela mashikola adimena kulonda ‘amanishi chikupu mudimu wawu.’—2 Timotewu 4:5.

Shikola yaMudimu wawuPayiniya. Hakumana kwachaaka chatachi chakuzata mudimu wampinji yejima, payiniya nateli kusonekesha shikola yakudiza mafuku atanu nadimu yekalaña Hetala daWanta damukamwihi. Nkeñelu yaniyi shikola yakukwasha apayiniya kukundama kwakwihi naYehova, kuzata chiwahi munjila jejima jakushimwinamu nikutwalekahu kwikala ashinshika hakuzata.

Shikola Yawakwakushimwina Nsañu Yayiwahi yaWanta. Iyi shikola yadizañawu hatukweji tuyedi yakwashaña apayiniya akuluka yitembi adikeñelaña kushiya nyikala yawu nakuya nakuzatila kudi kwejima kwayitemeshañawu. Munjila yikwawu ahoshaña nawu, “Yamonu, ntemeshami” hakumwimbujola Mukwakushimwina nsañu yayiwahi muneni wakalakeleli hamaseki, Yesu Kristu. (Isaya 6:8; Yowanu 7:29) Antu neyi afuma kumukala wawu nakuya kwacheñi chakeñekaña kuhimpa nikupelesha chihandilu. Chisemwa, mpepela, niyakudya yinateli kwikala yambukaku chikupu nayenjililawu. Mpinji yikwawu atela nikudiza idimi dacheñi. Iyi shikola yakwashaña amana kwetu niahela ajiki niadisumbula, akweti yaaka 23 nakushika ku 65, kwikala nayililu yayiwahi yakeñekaña mumudimu wawu nikwiluka yuma yikuyikwasha kulonda ayizatishi chiwahi kudi Yehova nikuloñesha kwindi.

Shikola yaWatchtower Yakudiza Bayibolu yaGileyadi. MuchiHeberu izu dakwila nawu “Gileyadi” dalumbuluka nawu “Wunsahu Wawuvulu.” Kufuma muchaaka cha 1943 hatachikiluwu shikola yaGileyadi, antu akubadika ha 8,000 amanisha iyi shikola ayitemesha hamu neyi amishonali kulonda ashimwineña chachiwahi wunsahu ‘kwakumina maseki.’ (Yililu 13:47) Hampinji yashikiluwu awa antu amanishili iyi shikola muPeru, munidi ituña himwadiña yipompeluku. Makonu mudi yipompelu yakubadika ku 1,000. Hampinji yatachikiluwu amishonali etu kuzatila muJapan, mwadiña hohu aYinsahu ikumi. Chayinu mpinji anabadiki ha 200,000. Shikola yaGileyadi yatañañawu hadi tukweji tutanu adizaña chikupu Izu daNzambi. Antu azataña wupayiniya wadimena hela wumishonali hela hatusanji twanyitayi niankoñi añinza diwu atambikañawu kushikola nakuyidizisha chikupu kulonda azateña chiwahi mudimu wakushimwina mukaayi kejima.

• Indi Shikola yaMudimu wawuPayiniya yikweti nkeñelwinyi?

• Anyi aloñeshelawu Shikola Yawakwakushimwina Nsañu Yayiwahi yaWanta?