1-3. (a) Indi Esita watiyililidi woma hampinji yayileñayi nakudimona nanfumwindi? (b) Tukuhanjeka hamalwihwinyi akundama hadi Esita?

ESITA wafwilileña kutulisha muchima mwivumu chayileñayi nakushika mulubanza lwachipañu chamuShushani. Chamukalilili. Yuma yejima yamuchipañu ayituñili chiwahi chikupu, kumbañu abazililuku maboñu akweti mpuula, akwakwasa mata anyikunji, nianyitupa nawulombu wawuwahi. Kumbañu kwadiña malola akubaza chiwahi ninyikishi yakusoña chiwahi nawa chipañu achituñilili hachinañamu kwakwihi naMapidi aZagros adiña namayimakanza. Ichi chipañu chatalishilili kukaloña Choaspes kadiña namenji atooka. Chipañu chenichi achituñili munjila yakwanukisha enyi ejima ñovu yasweja yadiña namuntu wayileñayi nakutalayi Esita, muntu waditeneneña nindi “mwanta muneni.” Wadiña nfumwindi.

² Indi Esita wasumbukili ñahi naniwu iyala? Ahasuwerusi wadiña wambukaku chikupu neyala wateleleli kusumbuka nakankaña wudi wejima washinshika wakaYudeya.a Hembujolileña antu adi neyi Abarahamaku, muntu watiyilili chamulejeluwu kudi Nzambi kumutiyilila iñodindi Sara. (Kutach. 21:12) Mwanta hamwilukili Nzambi yaEsita, Yehova hela Nshimbi Jinduku. Hela chochu, Ahasuwerusi welukili nshimbi yawaPeresi, kushilahu nilushimbi lwakaanishili chuma chakeñeleña kwilayi Esita. Hilushimbinyi lwenilu? Ilu lushimbi lwahosheli nawu, muntu wejima wukuya kudi mwanta wawaPeresi chakubula kumutambika kudi mwanta atela kumujaha. Esita amutambikili wanyi, ilaña wayileña nakudimona namwanta. Chashikiliyi kwakwihi nalubanza lwamukachi, hatela kumumonawu kudi mwanta, watela watoñojokeleña nindi akumujaha.—Tañenu Esita 4:11; 5:1.

³ Muloñadi chashililiyi wumi windi hakatoña? Nawa chumanyi chitunateli kudizila kuchikuhwelelu chaniwu mumbanda wadimena? Tusambilenu kumona chekaliliyi Esita mwadi muPeresi.

Nkulilu yaEsita

4. Indi Esita wakulili ñahi, nawa chumanyi chaletesheli yashakameña namusonyindi Modekayi?

⁴ Esita wadiña nginga. Tweluka nsañu yantesha hohu yahosha hadi anvwali jindi amutumbili nawu Hadasa, izu dachiHeberu dakwila nawu “yibubu,” chiputa chasoñaña nkenu yayiwahi yitooka. Chafwiluwu anvwali jaEsita, ntaña yindi wumu nawa muntu wadiña luwi wejina daModekayi, watachikili kumuhemba. Wadiña musonyindi, nawa Modekayi wadiña mukulumpi chikupu. Wamusendeli Esita kwitala dindi nakumuhemba neyi mwanindi.—Esita 2:5-7, 15.

5, 6. (a) Indi Modekayi wamuleleli ñahi Esita? (b) Indi Esita naModekayi adiña nachihandilu chamuchidinyi muShushani?

⁵ Modekayi naEsita ashakamineña neyi ankoli aYudeya mumusumba waPeresi, chakadi nikujina ayiheleli muloña wakwitiya kwawu niNshimbi yovwahilileñawu. Ilaña Esita wadikundili chikupu namusonyindi hampinji yamudizishileñayi hadi Yehova, Nzambi waluwi wamwinini antu Jindi mukukala kapampa kakavulu kunyima, nawa wukayamwina cheñi. (Lev. 26:44, 45) Chalala aEsita naModekayi adikundili chikupu.

⁶ Chamwekana neyi Modekayi wazatileña neyi kalama kuchipañu muShushani, washakamineña mpinji yejima kuchisu hamu nawambuña mwanta amakwawu. (Esita 2:19, 21; 3:3) Hitweluka chadiña chihandilu chaEsita hampinji yakulileñayuku, ilaña watela wadiña nakumwakamena musonyindi nikuhemba itala dawu chiwahi. Hadaha ashakamineña kwiluña kwashakamineña atuzweñi mumusumba. Hadaha watiyileña kuwaha kuya kuchisankanu muShushani, kwalandishilileñawu achiji awuru niachiji asiliva niakwakulandisha amakwawu yuma yawu. Esita watoñojokeleña wanyi nindi wukaheta yuma yayiwahi yamuchidiwu kumbidi; welukili wanyi nindi chihandilu chindi chikahimpika.

‘Wamuwahi Kumesu’

7. Muloñadi Vashitayi chamufumishililuwu hawumwadi, nawa chumanyi chamwekeni?

⁷ Ifuku dimu muShushani mwatiyakeni mbonji nawu muchisaka chamwanta mwadiña kukala. Hachawija cheneni, Ahasuwerusi waloñesheleli antu jindi alema yakudya yayiwahi nivinyu, mwanta wafuukwiluhu kumutambika mwadi windi wamuwahi Vashitayi wadiñi nakudiila chawija kwacheñi nawambanda. Ilaña Vashitayi wakaanini. Wamusawishili mwanta nawa wahilili, dichi wayihwili atulamba twindi chiyatela kumubabeshawu Vashitayi. Chumanyi chamwililuwu? Amufumishili hawumwadi. Atulamba twamwanta atachikili kukeñakeña mwahita ituña dejima atunkaña alubanji, kulonda mwanta yatondi hakachi kawu mwadi wamuha.—Esita 1:1–2:4.

8. (a) Muloñadi Modekayi chakameneneñayi hampinji yakulileñayi Esita? (b) Munatoñojoki nenu tunateli kuzatisha ñahi chiwahi kufumba kwamuBayibolu kwahosha halubanji lwakumujimba? (Talenu cheñi Yishimu 31:30.)

⁸ Tunateli kufwikija Modekayi chatiyileñayi kuwaha hakumutala Esita mumpinji mumpinji nawa wakameneneña hakumona musonyindi wakansi chakuliliyi nakwikala mumbanda walubanji chikupu. Twatañaña nawu: “Yenowu chañadima wadiñi wamuwahi nikumujimba nikumesu.” (Esita 2:7) Bayibolu yahoshaña nawu muntu walubanji watela cheñi kwikala namaana nawa wadizoza. Mukunkulwayi muntu nateli kwikala nayililu yatama yidi neyi kudivwimba nikudinka wanta. (Tañenu Yishimu 11:22.) Komana mwamonaña nenu chumichi chalala? Komana lubanji lwamuleñeleli Esita kudinka wanta tahindi nehi? Yuma yamwekeni chimwahitili mpinji yamwekesheli nawu hadinkeli wantaku.

9. (a) Chumanyi chamwekeni chelili atulamba twamwanta amumoni Esita, nawa muloñadi chichamukalilili kwambuka naModekayi? (b) Muloñadi Modekayi chamwitejeleliyi Esita kusumbuka namuntu wabulili kwitiya? (Bombelenuhu chikasha.)

⁹ Atulamba twamwanta amumweni Esita. Niyena amusendeleli kumu nawantu atondeluwu, amutambwiliyi Modekayi nawa amutwalili kuchipañu cheneni kwishinadi dakaloña. (Esita 2:8) Chayikalilili kwambuka muloña adiña neyi tata yamuntu namwana. Modekayi hakeñeleña mwanindi waleleliyi kusumbuka namuntu wabula kwitiya hela tuhu mwantaku, ilaña hadiña namwakwililaku.b Esita watela washiluku muchima chikupu chamufumbileñawu kudi Modekayi henohu kanda amusendi. Chamutwalileñawu kuchipañu muShushani, watoñojokeleña yuma yayivulu. Wukuhandaña chihandilu chamuchidinyi?

Amuhamekeli “Kudi Antu Ejima Adiña Nakumutala”

10, 11. (a) Indi chihandilu chaEsita chachiha chadi kumuleñela kwiladi? (b) Indi Modekayi wamwekesheli ñahi nindi wadiña nakwakamena chahandileñayi Esita?

¹⁰ Chihandilu chaEsita chahimpikili chikupu. Wadiña hakachi ‘kawayañadima amavulu’ apompesheluwu muWanta wawaPeresi mwejima. Tushidikilu twawu, madimi awu niyililu yawu yadiña yambukaku chikupu. Ayañadima ayihembeleña kudi kalamba Hegayi, nawa ateleleli kudiwahisha kulonda amwekani chiwahi hadi chaaka chamukuma, ichi chidika chakudiwahisha chabombelelumu kudiwahisha namanji amavumba amawahi. (Esita 2:8, 12) Chihandilu chamuchidiwu chakojejeli ayañadima amakwawu kusha maana chikupu kunmwekenu, kushilahu nikudibecha nikudinka wanta. Komana Esita niyena dichelileñayi?

¹¹ Kwosi muntu wadiña nakumwakamena Esita chikupu kubadika chamwakameneneñayi Modekayi. Twatañaña nawu ifuku niifuku, Modekayi wayileña kwakwihi netala dawambanda kulonda yeluki chahandileñayi Esita. (Esita 2:11) Modekayi watela watiyileña kuwaha nankashi chamulejawu nawu Esita nakuhanda chiwahi, hadana amulejeleña kudi ñamba wamuchipañu. Muloñadi?

12, 13. (a) Indi Esita watuñili ijina damuchidinyi nawantu adiñayi nawu? (b) Muloñadi Modekayi chazañaleliyi hakwiluka nindi Esita hashimwini nindi hikaYudeyaku?

¹² Esita wamutiyishili Hegayi kuwaha chakwila wamuhembeleña chachiwahi nawa wamwinkeli añamba awambanda atanu nayedi niitala dasweja kuwaha mwitala dawambanda. Bayibolu yahosha nawu: “Esita amuhamekeli kudi antu ejima adiñi nakumutala.” (Esita 2:9, 15) Komana antu ejima akomokeli lubanji hohu? Inehi, bayi neyi antu amutiyileña Esita kuwaha muloña walubanjuku.

¹³ Chakutalilahu, twatañaña nawu: “Esita hashimwini hela kwasemukayi hela awusoku winduku, muloña amulekesheli kudi Modekayi, nindi, Bayi wakashimunaku.” (Esita 2:10) Modekayi wamukaanishili Esita nindi bayi yaleja antu nindi hikaYudeyaku, muloña welukili nindi akwawanta wawaPeresi aheleli chikupu aYudeya. Watiyili kuwaha hama hakwiluka nindi hela chakwila Esita wadiña kwacheñi, wadiña nakashinshi nawa wadiña wovwahila.

14. Indi atwansi makonu anateli kwimbujola ñahi chakutalilahu chaEsita?

¹⁴ Atwansi niwena makonu anateli kuzañalesha anvwali jawu hela antu amakwawu ayihembaña. Chili hiyadi nawanvwali jawuku, hela chakwila adi nawantu elaña yuma yatama, anateli kutondolwela yuma yatama nakukakela kuyuma yelukawu nawu yaloña. Neyi ela neyi cheliliyi Esita, anateli kutiyisha muchima waTata yawu wamwiwulu kuwaha.—Tañenu Yishimu 27:11.

15, 16. (a) Chumanyi chaletesheli Esita amukeñi kudi mwanta? (b) Chamukalilili ñahi Esita hakuhimpa chihandilu chindi?

¹⁵ Chelili mpinji yinashiki dehi yakumutwala Esita kudi mwanta, amwitejeli kutonda yuma yidi yejima yakeñeleñayi, hadaha yakudiwahisha nachu chikupu. Muloña wakwila wadiña wadizoza, halombeli chuma chikwawu kubadika hayuma yamutoñweleluwu kudi Hegayuku. (Esita 2:15) Chakadi nikujina welukili nindi lubanji hohu hilunateli kumutiyisha mwanta kuwahaku, ilaña yililu yakudizoza yabulili kwikala nawantu amuchipañu diyinateli kumutiyisha kuwaha. Komana watoñojokeli mwalala?

¹⁶ Bayibolu yahosha nawu: “Mwanta wamukeñeli Esita chakubadika ambanda ejima, waweni niwuselewa niluwi kumesu indi, chakubadika ajiki ejima; dichi washili chibañula chawanta kumutu windi, hakumuhiñisha muwumwadi wadiñi waVashitayi.” (Esita 2:17) Chamukalilili iwu chañadima kaYudeya wadizoza kuhimpa chihandilu chindi, wadiña mwadi wamuha, ñoda mwanta wasweja ñovu haseki hayina mpinji. Komana chifulu chindi chachiha chamuleñeleli kudinka wanta? Inehi.

17. (a) Indi Esita watwalekeluhu ñahi kumwovwahila tata yindi wamuleleli? (b) Indi chakutalilahu chaEsita chalema ñahi kudi etu makonu?

¹⁷ Esita watwalekeluhu kumwovwahila tata yindi wamuleleli, Modekayi. Washimwini wanyi nindi hikaYudeya. Kubombelahu, Modekayi chasolweliyi kafuta kakwatiluwu kakukeña kumujaha Ahasuwerusi, Esita wamulejeli mwanta iyi nsañu nawa antu akwatili kafuta ayijahili. (Esita 2:20-23) Wamwekesheli cheñi chikuhwelelu chindi mudi Nzambi yindi kuhitila mukudizoza nikwovwahila. Anetu nawa twatela kwimbujola chakutalilahu chaEsita, muloña antu amavulu makonu ovwahilaña wanyi. Ilaña antu akweti chikuhwelelu chikupu alemesha chililu chakwovwahila neyi chadiñayi Esita.

Chikuhwelelu chaEsita Anacheseki

18. (a) Muloñadi Modekayi chakaaniniyi kumufukamina Hamani? (Talenu cheñi tumazu twaheshina.) (b) Indi amayala niambanda ashinshika makonu embujoleña ñahi chakutalilahu chaModekayi?

¹⁸ Muntu wejina daHamani amwinkeli chifulu cheneni muchipañu chaAhasuwerusi. Amutondeli kwikala mulopu, amwilishili Hamani kwikala wakumuleja mwanta maana nawa diyi wadiña chinlonda chindi muwanta wejima. Nawa mwanta washimwini nindi antu ejima akumumona iwu chinlonda chindi atela kumufukamina. (Esita 3:1-4) Ilaña ilu lushimbi lwamukalilili Modekayi. Welukili nindi wateleleli kumwovwahila mwanta, ilaña hateleleli kufumpa nshimbi jaNzambuku. Ilukenu nenu, Hamani wadiña kaAgagi. Chakadi nikujina, wadiña nkakulula yaAgagi, mwanta wawaAmaleki ajahiluwu kudi kaprofwetu kaNzambi Samweli. (1 Sam. 15:33) A Amaleki adiñi atama nankashi chakwila ekalili ayilumbu jaYehova niaIsarela. A Amaleki adiña atanya kumesu aNzambi.c (Kuhit. 25:19) Indi kaYudeya washinshika wukumufukamina ñahi kaAmaleki? Modekayi hateleleli kwila mwenimuku. Wakaanini kumufukamina Hamani. Nimakonu amayala niambanda ashinshika ashaña wumi wawu hakatoña muloña wakukakela kunichi chishina chakwila nawu: “Chiña twovwahila Nzambi, bayi antuku.”—Yil. 5:29.

19. Indi Hamani wakeñeleña kwiladi, nawa welilidi hakwila yamushinjili mwanta?

¹⁹ Hamani wahilili nankashi. Hafwilileña kumujaha Modekayi hohuku. Ilaña wakeñeleña nikujaha antu jaModekayi ejima. Hamani wamushinjilili mwanta kuhitila mukuhosha yuma yatama hadi aYudeya. Chakubula kuyitena hejina, washimwini nindi hiyadiña alema kudi mwantaku, nindi adiña antu ‘amwañala apalañena munyunza yawantu.’ Sweje-e dinu, wahosheli nindi hiyovwahilileña nshimbi jamwantaku; dichi adina akwakudikaña atama. Wahosheli nindi wukuhana mali amavulu muchimbañu chamwanta akuzatisha kumudimu wakujilumuna nachu aYudeya ejima adiña muwuna wanta.d Ahasuwerusi wamwinkeli Hamani kazeya kindi kulonda yalamiki chilamiku hayuma yejima yatoñojokeleñayi.—Esita 3:5-10.

20, 21. (a) Indi aYudeya amuWanta wawaPeresi wejima niModekayi atiyili ñahi hansañu yashimwiniyi Hamani? (b) Indi Modekayi wamulembeleleli Esita kwiladi?

²⁰ Chakadi nikulaba antemesha ayili lufuchi hatuwalu kumaluña amuwanta wejima, nakushimuna nsañu yakujilumuna aYudeya. Fwikijenu chatiyiluwu antu hakutiya nsañu yamuchidiwu chiyashikili kuYerusalema, kwadina aYudeya ashaliluhu afumini muwunduñu kuBabiloni nawa akabakeneña hakutuñulula musumba wabulili mpwembu yateleleli kuyikiña. Hadaha Modekayi chatiyiliyi iyi nsañu yatama watoñojokeleña hadi antu adiña muYerusalema kushilahu niamabwambu niantaña jindi adiña muShushani. Chineli waneñeli, watabwili mahinindi nakuvwala chikeleyi, nawa wadisukwilili mawuti mumutu, nawa wadilili ikumbu dadeni mukachi kamukala. Hela chochu, Hamani washakamini nakunwa namwanta nawa hashiluku muchima nindi wakojejeli aYudeya amavulu niamabwambu jawu adiña muShushani kuneña chikupuku.—Tañenu Esita 3:12–4:1.

²¹ Modekayi welukili nindi watela kwilahu chuma kulonda yapulwishi aYudeya. Hanu dinu chumanyi chateleleli kwilayi? Esita watiyili nawu Modekayi naneñi nawa wamutemesheleli mahina, ilaña Modekayi wakaanini kumukundeja. Hadaha watoñojokeleña chaleñeleli Nzambi yindi, Yehova, yamwiteji Esita amutambuliyi nakumwilisha mwadi wanyuuli wawusenji. Muloña wetejeleliyi Nzambi chumichi kuzatika watachikilili kwilukewa. Modekayi watemesheli mazu kudi mwadi, wamulejeli Esita kuya nakumulembelela mwanta kulonda yahakwiluku ‘awusoku windi.’—Esita 4:4-8.

22. Muloñadi Esita chatiyileñayi woma kuya nakudimona nanfumwindi mwanta? (Talenu cheñi tumazu twaheshina.)

²² Esita watela wayitiyili woma nankashi chatiyiliyi awa mazu. Chikuhwelelu chindi achesekeli chikupu. Chamwakwiliyi Modekayi chamwekeshaña nawu watiyili woma. Wamwanukishili lushimbi lwamwanta. Neyi muntu yaya kudi mwanta chakubula kumutambika akumujaha. Nateli kuhanda hohu neyi mwanta amwolwela nkunyi yawuru. Komana Esita wakuhweleleli nindi akumujaha wanyi, sweje-e dinu nachuma cheliliyi Vashitayi chakudikaña hampinji yamutambikiluwu kudi mwanta? Esita wamulejeli Modekayi nindi hanahiti mafuku 30 chakubula kumutambika kudi mwanta. Chineli mwahitili mafuku amavulu chakubula kumutambika, wajinokeleña neyi chakwila mwanta wahimpili yitoñojoka yindi nawa hamukeñeleña nawa cheñuku.e—Esita 4:9-11.

23. (a) Modekayi wahoshelidi hakwila chikuhwelelu chaEsita chikoli? (b) Muloñanyi wutwatela kumwimbujolela Modekayi?

²³ Modekayi wakwili munjila yakolesheli chikuhwelelu chaEsita. Wamulejeli nindi neyi yakañanya kuzatilahu, wamwinu wawaYudeya wadi kufuma kwacheñi. Hanu dinu Esita wadi kupuluka neyi atachika kuyiyandisha? Modekayi wamwekesheli nindi wamukuhweleleli Yehova chikupu, wabulaña kwiteja antu Jindi kuyijilumuna nawa washikijaña yikaninu Yindi. (Yosh. 23:14) Kuhiñahu Modekayi wamwihwili Esita nindi: “Kwiji chiwunenzi muwanta wunenjili nsañu yoyeniyi; wukuchiluka hinyi?” (Esita 4:12-14) Komana hitwatela kumwimbujola Modekayuku? Wamukuhweleleli chikupu Nzambi yindi, Yehova. Komana ninetu twamukuhwelela Yehova?—Yish. 3:5, 6.

Wadiña naChikuhwelelu Chakola Chakwila Hachinini Kufwaku

24. Indi Esita wamwekesheli ñahi chikuhwelelu niwulobu?

²⁴ Esita welukili nindi diyi mpinji yatela kufuukulahu. Wamwilili Modekayi nindi aleji aYudeya ejima kulonda niwena ashakami nanzala mafuku asatu, nawa wakunkulwili namazu amwekeshaña nawu wadiña nachikuhwelelu niwulobu nindi: “Neyi nanoñi, nanoñi dehi kwami.” (Esita 4:15-17) Watela walombeleña chikupu hanana mafuku asatu kubadika chalombeleñayi muchihandilu chindi. Nkumininaku, mpinji yakuya kudi mwanta yashikili. Wavweli chikovwelu chindi chasweja kuwaha chawanta, wadiwahishili chikupu kulonda mwanta yamukomoki. Wayili nakudimona namwanta.

25. Lumbululenu chadiña yuma hampinji yayileñayi Esita kudi nfumwindi.

²⁵ Neyi chashimunawu kumatachikilu akanu kapetulu, Esita wayili mwibulu damwanta damukachi. Tunateli kufwikija muchima mwivumu chiwalulutileña nichalombeleñayi chikupu. Weñilili mwibulu damukachi nawa wamweni Ahasuwerusi nashakami hetanda dindi. Hadaha wasambilili kumona chamwekeneñayi Ahasuwerusi hamesu. Neyi chakwila wahembeleleli, wadi kutiya neyi kwiji yaaka yinakotoki chikupu. Ilaña chimwahitili kapinji nfumwindi wamumweni. Chalala wahayamini, ilaña wahosheli mumesu awunda. Wamwolweleli Esita nkunyi yawuru.—Esita 5:1, 2.

26. Indi akwaKristu alala makonu akeñekelañadi kwikala nawulobu neyi wadiña naEsita, nawa Esita wachidiña namudimwinyi weneni?

²⁶ Mwanta wakeñeleña kutiya mujimbu wendeleliyi Esita. Esita wadiña washinshika kudi Nzambi nawa washili wumi windi hakatoña hakukiña antu jindi, wemikilili ambuña Nzambi ejima chakutalilahu chachiwahi chachikuhwelelu. AkwaKristu alala makonu alemesha yakutalilahu yamuchidiwu. Yesu wahosheli nindi atumbanji twindi alala akayilukila kukukeña. (Tañenu Yowanu 13:34, 35.) Kumwekesha kukeña kwamuchidiwu kwakeñekaña kwikala nawulobu neyi wadiña naEsita. Hela chakwila Esita wemenenuku antu jaNzambi hadina ifuku, wachidiña namudimu weneni. Wadi kumushinjila ñahi mwanta nindi Hamani akeñeliyi mukwakumuleja maana, wadiña watama muchima? Chumanyi chikwilayi hakwila nawu yamwini antu jindi? Tukuhanjeka hanawa malwihu mukapetulu kanalondeluhu.

1-3. (a) Indi Esita watiyili ñahi hakuya kwitanda danfumwindi? (b) Indi mwanta welilidi chamwendeleluwu kudi Esita?

ESITA wendeleña chovu-chovu hakuya nakushika kwiitanda, iku muchima wunakweta nankashi. Fwikijenu muchipañu chamwanta cheneni chamuPeresi muShushani munamweni nzo-o, mwamweneni chakwila Esita watiyileña kwanshindu yindi niyakuvwala yawanta yavwaliliyi. Haluwankeni nawukeleñi niyuma yadiña muchipañu yasweja lubanji nawa yalema wuseya yafumini kwakulehi kuLebanonuku. Washili maana hadi muntu washakamini hetanda, muntu wadi kufuukulahu neyi chakwila Esita atela kumujaha hela nehi.

² Mwanta wamutalileña Esita chashikiliyi kwakwihi nawa wamwolweleli nkunyi yawuru. Chuma cheliliyi mwanta chinateli kumwekana neyi chamukunkulwayi, ilaña kwila chumichi kwapulwishili wumi waEsita, muloña mwanta wamwanakeneni hamuloña wakoñeliyi wakuya kudi yena chakubula kumutambika. Chashikiliyi kwitanda, Esita wakwatili kumutu wankunyi.—Esita 5:1, 2.

³ Mwanta Ahasuwerusi wadiña samaheta nawa wadiña nañovu yawanta. Yakuvwala yawanyanta akuPeresi amunana mafuku ayilandileña namamiliyoni amadola neyi mumafuku etu. Ilaña, Esita wamweni chazañaleliyi nfumwindi nawa welukili nindi wamukeña. Wamwilili nindi: “Eyi mwadi Esita, wunakeñidi? Wukukeña kulombadi? Akukwinka tuhu hela chashikila muchibalu chawanta.”—Esita 5:3.

4. Indi Esita wachidiña namudimwinyi?

⁴ Esita wamwekesheli chikuhwelelu chikupu niwulobu; wayili kudi mwanta kulonda yakiñi antu jindi hakafunta kuyikasililuwu kakukeña kuyijilumuna wejima wawu. Hela chakwila wawanini wuselewa kudi mwanta, wachidiña namudimu weneni. Wateleleli kumushinjila iwu mwanta wadivwimba nindi muntu windi mukwakumuleja maana wakuhweleleliyi chikupu wadiña watama nawa wamudimbili kulonda yajahi antu jaEsita. Hanu dinu wukumushinjila ñahi, nawa tunateli kudizila kwodi kuchikuhwelelu chindi?

Watondeli Chiwahi “Mpinji Yakuhosha”

5, 6. (a) Indi Esita wazatishili ñahi chishina chekala haMukwakutaŋisha 3:1, 7? (b) Indi Esita wamwekesheli ñahi maana hampinji yahosheleñayi nanfumwindi?

⁵ Komana Esita wateleleli kushimuna kukala kwejima hakachi kawantu? Neyi welili mwenimu wadi kumutiyisha mwanta nsonyi nawa chadi kumuleñela Hamani mukwakumuleja mwanta maana kumutaadikisha Esita. Hanu dinu Esita welilidi? Henohu kuchidi yaaka yayivulu Mwanta Solomoni amoneneni kusoneka nawu: ‘Yuma yejima yikweti mpinji yayu, . . . mpinji yakumwena, nimpinji yakuhosha.’ (Mukwa. 3:1, 7) Tunateli kuhosha netu tata yaEsita wamuleleli, Modekayi muntu washinshika wamudizishileña Esita iyi yishina hampinji yamuhembeleñayi. Esita welukili chikupu kulema kwakutonda chiwahi “mpinji yakuhosha.”

⁶ Esita wahosheli nindi: “Neyi mwanta namoni nindi chinawahi, mwanta naHamani enzi lelu kuchawija chinamuloñesheli.” (Esita 5:4) Mwanta wetejeli nawa wamutambikili niHamani. Komana munamoni Esita chahosheliyi mwamaana? Wamulemesheli nfumwindi nawa wakeñeleña kuwana mpinji yayiwahi yakuhosha yuma yadiña kumuchima.—Tañenu Yishimu 10:19.

7, 8. Indi Esita waloñesheli ñahi chawija chatachi, nawa muloñadi chabuliliyi kumuleja mwanta swayi?

⁷ Chakadi nikujina Esita waloñesheli chiwahi chawija nawa washiluhu yuma yejima yakeñeliyi nfumwindi. Nawa waloñesheli nivinyu kulonda adiluñishi. (Mas. 104:15) Ahasuwerusi wadiluñishili nawa wamwihwili cheñi Esita kulonda yashimuni chuma chakeñeleñayi. Komana iyi yadiña mpinji yakuhosha?

⁸ Esita watoñojokeli nindi hiyadiña mpinji yayiwahi kuhoshaku. Ilaña wamulejeli mwanta niHamani kwinza cheñi kuchawija chaloñesheliyi ifuku dikwawu. (Esita 5:7, 8) Muloñadi chabulililiyi kushimuna swayi? Anukenu nenu antu jaEsita ejima akeñeleña kuyijaha. Muloña Hamani watambwili lusesa kudi mwanta kulonda yahani nshimbi yakujaha aYudeya ejima. Esita wateleleli kutonda mpinji yayiwahi yakuhosha, mukunkulwayi antu amavulu adi kufwa. Dichi wahembeleleli mpinji yikwawu yayiwahi yakumwekesha nindi wamulemesheli chikupu nfumwindi.

9. Indi kudiwunjika kwalemenadi, nawa tunateli kwimbujola ñahi chakutalilahu chaEsita chakudiwunjika?

⁹ Kudiwunjika hichililu chachiwahi chabula kwikala nawantu amavulu. Hela chakwila wakameneneni nawa wakeñeleña kumuleja mwanta yuma yadiñi kumuchima, Esita wadiwunjikili nakuhembela mpinji yayiwahi. Twatela kudizilaku yuma yayivulu kuchakutalilahu chindi, muloña wejima wetu twamonahu dehi yiluwa yitwatoñojokaña netu atela kuzatilahu. Neyi tunakukeña kumushinjila muntu wukweti ñovu kulonda yazatili hakukala, twatela kumwimbujola Esita nakwikala adiwunjika. Yishimu 25:15 yahosha nawu: ‘Kwovwahila kwakwila ovwahile-e kwafumbaña nyuuli, niidimi dadovu dakotolaña ifwaha.’ Neyi tudiwunjika nakuhembela mpinji yayiwahi neyi cheliliyi Esita, tunateli kumushinjila muntu wakola neyi ifwaha. Komana Nzambi yaEsita Yehova, wamukiswilili hamuloña wakwikala namaana nikudiwunjika?

Kudiwunjika Kwaleñeleli Kwila Mwawuñaji

10, 11. Muloñadi Hamani chahililiyi hanyima yakufuma kuchawija chatachi, nawa ñodindi niamabwambu jindi amulejeli kwiladi?

¹⁰ Muloña Esita wadiña wadiwunjika, waleñeleli yuma yayiwahi yayivulu kuzatewa. Hamani chafuminiyi nakudya kuchawija chatachi wayili “nakuzañalala nakutiya kuwaha” muloña watoñojokeli nindi mwanta nimwadi amukeñeli nankashi kubadika akwawu. Hela chochu, Hamani chahitiliyi kuchisu chachipañu, wamumweni Modekayi, kaYudeya wakaanineña kumufukamina. Neyi chitwadizili mukapetulu kanafumuhu, Modekayi hamwekesheleña kasawuntu hakubula kumufukaminaku, ilaña walemesheli chinleji chindi niwumbwambu windi naYehova Nzambi. Ilaña Hamani watiyili “kumuchima pati nandombu.”—Esita 5:9.

¹¹ Hamani walejeli ñodindi niamabwambu jindi iyi nsañu, wena amulejeli nawu yemiki mutondu wawulehi wakushika kujimita 22, kuhiñahu alombi lusesa kudi mwanta kulonda akamukudikuhu Modekayi. Hamani watiyili kuwaha nawa hohenohu walejeli muntu kulonda yemiki mutondu.—Esita 5:12-14.

12. Muloñadi mwanta chakeñeleliyi nindi amutañili nyikanda mwasonekeleñawu nsañu Jawanta, nawa chumanyi chelukiliyi?

¹² Ilaña mwanta hakamini tulu nawufukuku. Bayibolu yatulejaña nawu ‘tulu twamuumini mwanta mumesu chawu,’ dichi walejeli antu kumutañila chatiyakana nyikanda mwasonekeleñawu nsañu Jawanta. Nsañu yatañiluwu hadiña ninsañu yakafuta kakasiluwu kakukeña kumujaha Ahasuwerusi. Wanukili iyi nsañu; ana antu akeñeleña kumujaha ayikwatila nawa ayijahili. Indi Modekayi wafuñunwini kafuta amwilililidi? Hohenohu mwanta wehwili wuloku wamwinkeluwu Modekayi. Akwili nawudi? Nawu kwosi chuma chamwinkeluwu.—Tañenu Esita 6:1-3.

13, 14. (a) Indi yuma yatachikili ñahi kumutamina Hamani? (b) Ñoda Hamani niamabwambu jindi amulejeli nawudi?

¹³ Mwanta wahilili, dichi wehwili atulamba atela kumukwashaku kulonda yamanishi iku kukala. Hakachi kawantu ejima, Hamani diyi wamenekeleli kuchipañu chamwanta, muloña wafwilileña kutabula lusesa kulonda yamujahi Modekayi. Henohu Hamani kanda yashimuni chuma chakeñeleñayi, mwanta wamwihwili chatela kumulemesha muntu atiyiliyi mwanta kuwaha. Hamani watoñojokeleña nindi mwanta wateneneña yena. Dichi Hamani washimwini njila yayiwahi yakumulemeshelamu owu muntu nindi: Amuvwiki yakuvwala yawanta, amwendeshi hakawalu kendelañayi mwanta muShushani mwejima nawa atela kubidika nakumulemesha kulonda antu ejima achitiyi. Fwikijenu Hamani chatiliyi hakutiya nawu muntu ateleleli kulemeshawu wadiñi Modekayi. Indi mwanta watondeli muntwinyi wakwimba nakumulemesha Modekayi? Watondeli Hamani.—Esita 6:4-10.

¹⁴ Hamani wazatili iwu mudimu wamweniyi nindi hichishimashima nachikela kufumahu wanyakeli kuya kwitala iku naneñi. Ñodindi nawamabwambu jindi ahosheli nawu yuma chiyinekali muniyi njila, yuma yikamutamina; wukatwesha wanyi kumushinda Modekayi kaYudeya.—Esita 6:12, 13.

15. (a) Yumanyi yayiwahi yafuminimu muloña wakwila Esita wadiwunjikili? (b) Muloñadi chichawahila neyi twikala ‘nachililu chakuchiñilila’?

¹⁵ Muloña wakwila Esita wadiwunjikili, nakwimena mpinji yayiwahi yakushimuna chuma chakeñeleñayi kudi mwanta, chumichi chaleñeleli Hamani yadisawishi yomweni. Komana Yehova Nzambi hidiyi waleñeleli tulu tuumumi mwanta mumesuku? (Yish. 21:1) Dihafuma Izu daNzambi kutukolesha nawu twikali ‘nachililu chakuchiñilila.’ (Tañenu Mika 7:7.) Neyi tumukuhwelela Nzambi nikuchiñilila kulonda yazatiluhu, tukwiluka netu nateli kuwana njila yayiwahi yakumanishilamu kukala kwetu kubadika etu aweni.

Wahosheli Chakubula Woma

16, 17. (a) Indi Esita welukili ñahi nindi “mpinji yakuhosha” yashikili? (b) Esita wambukiluku ñahi naVashitayi wadiña ñoda mwanta?

¹⁶ Esita wamweni nindi chikuwaha wanyi neyi yabula kumuleja mwanta cheñi; hachawija chamuchiyedi wamulejeli mwanta yuma yejima. Hanu dinu wateleli kumuleja mpinjinyi? Mwanta wamwilili cheñi nindi yalombi chuma chakeñeleñayi. (Esita 7:2) Esita welukili nindi “mpinji yakuhosha” yashikili.

¹⁷ Esita watela walombeli mumuchima kudi Nzambi yindi henohu kanda yahoshi awa mazu nindi: “Eyi mwanta, neyi nawani wuselewa kumesu eyi, neyi mwanta natiyi kuwaha, nakeñi nami anyinki wumi wami, nalombi nami anyinki ataña jami.” (Esita 7:3) Ilukenu nenu wamulejeli mwanta nindi walemesheli chuma chafuukwiliyi mwanta hayuma yamweniyi nindi yayiwahi. Esita wadiña wambukaku chikupu naVashitayi, wadiña ñoda mwanta, wamusawishili nfumwindi mumushikila. (Esita 1:10-12) Kubombelahu, Esita hamuhosholeli mwanta hamuloña wakumukuhwelela Hamanuku. Ilaña wamulembeleli mwanta kulonda yakiñi wumi windi wadiña hakatoña.

18. Indi Esita wamulejeli ñahi mwanta iku kukala?

¹⁸ Chuma chalombeliyi Esita chamuhayamishili mwanta chikupu. Muntwinyi wakeñeleña kujaha mwadi windi? Esita watwalekeluhu nindi: “Atulanda dehi, ninami niantaña jami, nawu atujilumuni, atujahi, atunoñeshi. Neyi akumina dakutulanda kwamuwuduñu twikali anduñu amayala nawambanda, nadi kudimwenena tuhu kwami, hela chenochu ntahi, mukwankunyi wadi kumufuntishila cheñi mwanta yuma yanamubondiyi wanyi.” (Esita 7:4) Ilukenu nenu Esita washimwini iku kukala chakubula kuhita mumbadi, ilaña wabombeleluhu nindi wadi kudimwenena neyi ayilandishili muwuduñu. Wateleleli kushimuna iyi nsañu yakujilumuna aYudeya ejima muloña nimwanta adi kumubonda.

19. Chumanyi chitunateli kudizila kudi Esita kutalisha hakwiluka chakushinjila antu?

¹⁹ Chakutalilahu chaEsita chatudizishaña yuma yayivulu kutalisha hakwiluka chakushinjila antu. Neyi chakwila munakukeña kushimuna kukala kweneni kudi muntu imwakeña hela muntu wayibadika ñovu, mwatela kudiwunjika, kwikala nakalemesha nikwikala ashinshika.—Yish. 16:21, 23.

20, 21. (a) Indi Esita wafuñunwini ñahi kafuta kaHamani, nawa mwanta welilidi? (b) Indi Hamani welilidi chafuñunwinuwu kafuta kindi?

²⁰ Ahasuwerusi wehwili nindi: “Hinyi yenowu? Wekala kudihi yenowu? Wabula woma wakufuukula mumuchima windi kwila mwenomu!” Fwikijenu Esita nakwinyika namunu hakuhosha nindi: “Iyala mukwankunyi chilumbu, yoyeniwu Hamani watamiwu.” Chumanyi chikwilayi mwanta haniwu muloña waha mesu bwi-i? Hamani watiyili woma. Toñojokenu mwanta chahimpiliyi hamesu muloña wakuzuwa chelukiliyi nindi mukwakumuleja maana wakuhweleleliyi wamudimbili kulonda yafwachiki lushimbi lwakujilumuna ñodindi akeñeliyi. Mwanta wedikili hanzi nakuya mwitempa kulonda yawundishi muchima.—Esita 7:5-7.

²¹ Chafuñunwinuwu kafuta kindi, Hamani watiyili woma nawa watachikili kudifulafula kunyendu yamwadi. Mwanta chafuntiliyi nakumuwana Hamani nafukami kuchitwamu chaEsita nakumulembelela, wazuwili nakumwila Hamani nindi wakeñeleña kumukamina mwadi windi mwitala dindi. Chamutwikiliyi iwu muloña chatalishili mukwila nawu Hamani akumujaha. Amusendeli iku anamubuti hamesu. Kalamba wumu wamwanta wamulejeli mwanta nindi Hamani waloñesheli mutondu wawulehi wakumukudikilahu Modekayi. Hohenohu Ahasuwerusi wahosheli nindi mukudikenuhu Hamani yomweni.—Esita 7:8-10.

22. Indi chakutalilahu chaEsita chatudizishañadi kutalisha hakubula kuzeya nikubula kwikala nachikuhwelelu chazeya?

²² Mukanu kaayi mudi yuma yatama tunateli kutoñojoka netu hitwamba kamona yuma yaloñaku. Komana mwatoñojokahu dehi muniyi njila? Esita hazeyeluku nawa chikuhwelelu chindi hichazeyeluku. Mpinji yakuhosha chiyashikili, wahosheli hayuma yaloña chakadi woma, nawa wamukuhweleleli Yehova kulonda yazatili hayuma yikwawu. Anetu nawa twatela kwila neyi cheliliyi Esita. Yehova hahimpaku kufuma tuhu mumafuku aEsita. Nateli kumona antu elaña yuma yatama nikuyifwisha mutukosi twawu neyi chamwililiyi Hamani.—Tañenu Masamu 7:11-16.

Wadihanini Hakuhakwilaku Yehova niAntu Jindi

23. (a) Indi mwanta wayinkeli aModekayi naEsita wulokwinyi? (b) Indi wuprofwetu waprofweteliyi Yakoba hadi Benjamini henohu wudi hakafwilu washikijeweli ñahi? (Talenu chikasha chinakwila nawu “Wuprofwetu Wunashikijewi.”)

²³ Nkumininaku mwanta wamwilukili Modekayi bayi neyi muntu wamukiñili kudi antu akeñeleña kumujahaku, ilaña wamwilukili cheñi neyi tata yaEsita wamuleleli. Ahasuwerusi wamwinkeli Modekayi chifulu chaHamani chakwikala mulopu. Mwanta wamwinkeli Esita itala daHamani kushilahu nimaheta indi amavulu, nawa Esita wamwinkeli Modekayi kuyihemba.—Esita 8:1, 2.

24, 25. (a) Muloñadi Esita chabulili kudishakaminayi hanyima yakufuñununa kafuta kaHamani? (b) Indi Esita washili ñahi cheñi wumu windi hakatoña?

²⁴ Chineli wumi waEsita niModekayi hiwadiña nawa hakatoñaku, komana mwadi walekeli kwakamena? Chiña neyi wadiña wadikeña yomweni. Hayina mpinji, nshimbi yashimwini Hamani yakujaha aYudeya ejima adiña nakuyitemesha kumaluña ejima amuwanta. Hamani wasakwili nachinjikijilu chakusakula nachu hela Puri, chakadi kujina chadiña chuma chakupesha nachu, kulonda yeluki ifuku dadiwahi datela kuyijahayi. (Esita 9:24-26) Kwachidiña tukweji hakwili idi ifuku dishiki, ilaña mafuku endeleña swayi. Komana iku kukala ateleleli kukukañesha?

²⁵ Esita washili wumi windi hakatoña hakuya nakudimona cheñi namwanta chakubula kumutambika. Haniyi mpinji wayidililili antu jindi nakumulembelela nfumwindi kulonda yafumishuhu lushimbi lwakujilumuna aYudeya. Ilaña nshimbi jasonekeleñawu mwijina damwanta wakuPeresi hiyajihimpileñaku. (Dan. 6:12, 15) Dichi mwanta wayinkeli aEsita naModekayi ñovu yakusoneka lushimbi lwaluha. Atemesheli lushimbi lwamuchiyedi nawa ayinkeli aYudeya wuswa wakudamwina aweni. Akwakwendela hatuwalu ayili lufuchi muwanta wejima nakutwala iyi nsañu yayiwahi kudi aYudeya. Ichi dinu aYudeya elukili nawu akuyijaha wanyi. (Esita 8:3-16) Kunyeñumuka muwanta wejima aYudeya adiloñesheli kulonda alwi njita yadi kubula kulwawu neyi abulili kusoneka lushimbi lwaluha. Hela chochu, komana “Yehova wamazaza” wukwikala nawantu jindi?—1 Sam. 17:45.

26, 27. (a) Indi Yehova wayikwashili ñahi antu jindi kushinda chikupu ayilumbu jawu? (b) Wuprofwetwinyi washikijeweli chajahiluwu anyana kaHamani?

²⁶ Chashikili ifuku datoñweluwu, antu jaNzambi adiña adiloñesha dehi. Niatulamba amuwanta waPeresi mwejima ayikwashiluku aYudeya chatiyiluwu nawu Modekayi kaYudeya nekali dehi mulopu wamuha. Yehova wayikwashili antu jindi nawa ashindili. Chakadi nikujina, wakiñili antu jindi kulonda abuli kuyijaha kuhitila mukushinda chikupu ayilumbu jawu.a—Esita 9:1-6.

²⁷ Kubombelahu, chineli anyana ikumi anona muntu watama Hamani achidiña amomi, Modekayi wadi kwikala mukukala hakuhemba itala daHamani. Niwena ayijahili. (Esita 9:7-10) Dichi wuprofwetu wamuBayibolu washikijeweli, muloña Nzambi washimwineñahu dehi nindi aAmaleki adiñi ayilumbu jawantu jindi akayijilumuna chikupu. (Kuhit. 25:17-19) Anyana kaHamani atela adiñi hakachi kawantu akukumishaku awuna munza watanya.

28, 29. (a) Muloñadi Yehova chakeñeleñayi nindi Esita niantu jindi alwi njita? (b) Muloñadi chitwakoolekela hakwikala nachakutalilahu chaEsita makonu?

²⁸ Chineli wachidiña chañadima, Esita wadiña namudimu weneni chikupu wudi neyi kusoneka nshimbi yamwanta yahosheleña hanjita nikujilumuna ayilumbu jawu. Wadiña mudimu wakala chikupu. Ilaña Yehova wakeñeli nindi antu jindi abuli kuyijilumuna; mumunza wawaIsarela mwateleleli kufuma Mesiya akaninuwu wadi kupulwisha antu ejima. (Kutach. 22:18) Ambuña Nzambi makonu azañalalaña hakwiluka nawu Mesiya, Yesu, chenjiliyi hamaseki, wakaanishili atumbanji twindi kulwa njita kufuma tuhu hayina mpinji kushika nimakonu.—Mat. 26:52.

²⁹ Hela chochu, akwaKristu alwaña njita yikwawu; Satana nakufwila chikupu kutuluwañesha kulonda tubuli kumukuhwelela Yehova Nzambi. (Tañenu 2 Akorinda 10:3, 4.) Hikukooleka kwakweni hakwikala nachakutalilahu chachiwahi chaEsita. Kufwana Esita, tumwekeshenu chikuhwelelu kuhitila mukwikala namaana nikushinjila antu mukudiwunjika, kwikala nawulobu nikudihana hakwimenaku antu jaNzambi.