Komana Nadiloñeshi?
Nadiloñeshi Kushimwina Hamu naChipompelu?
Munateli kwikala mukakushimwina wabula kupapatishewa neyi . . .
Mudizaña Bayibolu mpinji yejima, kulomba nikuya nakupompa.
Mukeña yuma yimunakudiza nawa mukuhwelela yuma yimunakudiza nikulejaku antu.
Mumukeña Yehova nikutonda amabwambu amukeña.
Muleka kudiñija mumazanvu amapolitiki hela kudikunda nakudifukula kwakutwamba.
Mwilaña yuma yakeñayi Yehova nikufwila kwikala Chinsahu chaYehova.
Neyi mumona nenu ichi munateli kushimwina hamu nachipompelu, muntu wayidizishaña Bayibolu wakaleja akulumpi akabulakani nanenu kulonda akahanjeki nanenu chimunateli kushikahu.
Komana Nadiloñeshi Kupapatishewa?
Munateli kupapatishewa neyi . . .
Mudi mukakushimwina wabula kupapatishewa.
Mwazataña nañovu mumudimu wakushimwina mpinji yejima.
Mwakwashaña nikulondela wunlomboli “[wa]Nduñu wamaana nikashinshi.”—Matewu 24:45-47.
Mudihana kudi Yehova mukulomba nawa munakukeña kumukalakela haya nyaaka.
Neyi mumona nenu munadiloñeshi kupapatishewa, muntu wayidizishaña Bayibolu wakayileja akulumpi akabulakani nanenu kulonda akahanjeki nanenu chimunateli kushikahu.