Mwatalisha Kubula Kudiñija muNsañu jaMapolitiki

Yesu wahosheli nindi akakumulondela hiyatela kwikala “kabadi kakaayiku.” (Yowanu 15:19) Kubula kudiñija mumapolitiki munabombeli kubula kuhakwilaku kabadi kamu munsañu jamapolitiki ninjita. Kuhosha hohu chalala, kubula kudiñija munsañu jamapolitiki kwapela wanyi. Anateli kutusupisha muloña wakubula kudiñija munsañu jamapolitiki. Tunateli kubula kudiñija ñahi munsañu jamapolitiki kulonda tutwalekihu kwikala ashinshika kudi Yehova Nzambi?

1. AkaKristu alala amonaña ñahi nfulumendi jawantu?

AkaKristu alemesha nfulumendi. Twelaña neyi chahosheliyi Yesu nawa “yuma yaKesari, [twamwinkaña] Kesari”—dikwila nawu, twovwahilaña nshimbi yamwituña, chidi neyi nshimbi yakufweta nyisonku. (Maku 12:17) Bayibolu yahoshaña nawu nfulumendi jawantu jayuulaña muloña Yehova diyi wajiteja kuyuula. (ARoma 13:1) Tweluka netu nfulumendi jawantu jikweti wuswa wantesha hohu. Twatalilaña hohu kudi Nzambi yetu niWanta windi wamwiwulu netu wakamanishi kukala kunakumonawu antu.

2. Tunateli kumwekesha ñahi netu hitwadiñijaña munsañu jamapolitikiku?

Kufwana Yesu, hitwadiñijaña munsañu jamapolitikiku. Antu chamweniwu chihayamisha chakoñeleñayi Yesu, akeñeleña kumudiisha wanta hanu hamaseki, ilaña yena wakaanini. (Yowanu 6:15) Muloñadi? Muloña chimwahitili mpinji, Yesu wahosheli nindi, “Wanta wami wambadi yakanu kaayi wanyi.” (Yowanu 18:36) Chineli tudi atumbanji twaYesu, kudi njila jajivulu mutwabulilaña kudiñija munsañu jamapolitiki. Chakutalilahu, hitwayaña kunjitaku. (Tañenu Mika 4:3.) Twalemeshaña yifwikija yetuña, chidi neyi mpandela, ilaña twadifukulañaku wanyi. (1 Yowanu 5:21) Nawa hitwahakwilañaku nlomboli wumu hela pati yimuku. Muniyi njila ninjila jikwawu jitunabuli kutena, twamwekeshaña netu twovwahilaña nfulumendi yaNzambi, dikwila nawu Wanta windi.

SANDUJOLENU CHIKUPU

3. AkaKristu alala hiyadiñijaña munsañu jamapolitikiku

Yesu niatumbanji twindi hiyadiñijileña munsañu jamapolitikiku. Tañenu ARoma 13:1, 5-7 ni 1 Petulu 2:13, 14. Nawa vumishenu VIDIYO, kuhiñahu hanjekenu hamalwihu analondelihu.

VIDIYO: AkwaKristu Alala Hiyadiñijaña muNsañu jaMapolitikiku—Chibalu 1 (4:28)

• Muloñadi chitwatela kulemeshela akawuswa?

• Twamwekeshaña ñahi netu twayovwahilaña?

Neyi kudi njita, matuña amakwawu ahoshaña nawu wena adi hakachi, ilaña akwashaña matuña ejima anakuzuña. Kubula kudiñija munsañu jamapolitiki kwatalisha mudihi? Tañenu Yowanu 17:16. Nawa vumishenu VIDIYO, kuhiñahu hanjekenu halwihu lunalondelihu.

VIDIYO: AkwaKristu Alala Hiyadiñijaña muNsañu jaMapolitikiku—Chibalu 2 (3:11)

• Kubula kudiñija munsañu jamapolitiki kwatalisha mudihi?

Tukwila ñahi neyi akawuswa atuleja nawu twili chuma chikuletesha tufumpi nshimbi jaNzambi? Tañenu Yilwilu 5:28, 29. Nawa vumishenu VIDIYO, kuhiñahu hanjekenu hamalwihu analondelihu.

VIDIYO: AkwaKristu Alala Hiyadiñijaña muNsañu jaMapolitikiku​—Chibalu 3 (1:18)

• Neyi nshimbi yawantu yinakuditaadikisha nanshimbi jaNzambi, nshimbi yanyi yitwatela kwovwahila?

• Kudihu yuma yikwawu yimunakutoñojoka yikuletesha akaKristu abuli kwovwahila nshimbi jawakawuswa?

4. Bayi mudiñijaña mumapolitiki muyitoñojoka nimuyuma yimwelañaku

Tañenu 1 Yowanu 5:21. Nawa vumishenu VIDIYO, kuhiñahu hanjekenu hamalwihu analondelihu.

VIDIYO: AkwaKristu Alala Chatela Kwikalilawu Ahamuka​—Hakubula Kudiñija Mujamapolitiki (2:49)

• Muniyi vidiyo, muloñadi Ayenge chabuliliyi kudiñija munsañu jamapolitiki hela muyuma yikwawu yidi neyi, kubuzwila mpandela?

• Munakutoñojoka nenu wafuukwilihu chiwahi?

Yumanyi yikwawu yinateli kuletesha tudiñiji munsañu jamapolitiki? Vumishenu VIDIYO, kuhiñahu hanjekenu hamalwihu analondelihu.

VIDIYO: Yuma Yitwadizaña muKaposhi Kakutalila—Kubula Kudiñija mujaMapolitiki muKaayi Katama (5:16)

• Tunateli kubula ñahi kudiñija munsañu jamatuña neyi kudi yisela yamatuña?

• Tunateli kubula ñahi kudiñija munsañu jamapolitiki neyi yuma yinafuukuliwu akamapolitiki yinatukundami?

• Yuma yitwatiyaña hayisanji hela amabwambu jetu anateli kutwisha ñahi mukweseka kwakudiñija munsañu jamapolitiki?

YUMA YIMUNADIZI

AkaKristu azataña nañovu kubula kudiñija munsañu jamapolitiki muyitoñojoka, munhoshelu nimuyuma yelañawu.

Kuhitulukamu

• Nfulumendi jawantu twatela kujimona ñahi?

• Muloñadi chitwabulilaña kudiñija munsañu jamapolitiki?

• Yumanyi yinateli kuletesha tudiñiji munsañu jamapolitiki?

ILUKILENUHU NSAÑU YIKWAWU

Yumanyi yitwatela kudibonda kulonda tubuleña kudiñija mujamapolitiki?

Yehova Hatuumbaku (3:14)

Yumanyi yatela kwila yisaka kulonda yidiloñesheli chadimu kubula kudiñija munsañu jamapolitiki?

Kudiñija Munsañu Jamatuña Nachiyuulu Kwejima Kumudi Nehi (4:25)

Muloñadi chitukuhoshela netu muntu hiyanateli kumulemesha chikupu muloña wakuhakwilaku ituña dindiku?

“Yuma Yejima Kudi Nzambi Yikutwesheka” (5:19)

Talenu chimunateli kubula kwikala ambadi yakaayi hampinji yimunakufuukula mudimu imunakukeña kuzata.

“Muntu-hiMuntu Wakadisendela Chisenda Chindi Yomweni” (Kaposhi Kakutalila, March 15, 2006)