KUDIZA 38
Lemeshenu Chawaana chaWumi
Tunateli kudiluñisha yuma yayivulu muchihandilu. Hela chakwila tudi mukukala, tunateli kudiluñisha yuma yikwawu muchihandilu. Twamwekeshaña ñahi netu twalemesha chawaana chawumi? Nawa chumanyi chacheni chikuletesha tulemeshi chawaana chawumi?
1. Muloñadi chitwatela kulemeshela wumi?
Twatela kulemesha wumi muloña hichawaana chafuma kudi Tata yetu wukweti kukeña, Yehova. Diyi “nsulu yawumi,” dikwila nawu waleñeli yuma yejima yikweti wumi. (Isamu 36:9) “Yena diyi wenkaña antu ejima wumi niyuma yejima.” (Yilwilu 17:25, 28) Yehova watwinkaña yuma yejima yakeñekaña kulonda tutwalekihu kuhanda. Kubombelahu, watukwashaña munjila yakwila tutwalekihu kudiluñisha wumi.—Tañenu Yilwilu 14:17.
2. Twamwekeshaña ñahi kudi Yehova netu twalemesha chawaana chawumi?
Kufuma tuhu hayibaabiliwu, Yehova wayakamenaña. Davidi, muntu wadiña hakachi kawakakudifukula aNzambi, amwoneneni kusoneka nawu: “Mesu eyi ammweni hinatuñikileña mwivumu.” (Isamu 139:16) Yehova walemesha wumi wenu chikupu. (Tañenu Matewu 10:29-31.) Chinateli kumukata nankashi neyi muntu ajaha mukwawu mumushikila hela adijaha yomweni.a (Kwidika 20:13) Tunateli cheñi kumutiyisha Yehova kutama neyi tusha wumi wetu muwubanji mumushikila hela kubula kusoñamisha akwetu kulonda abuli kuwanika mumaposu. Neyi tuhemba wumi wetu nikulemesha wumi wawakwetu, tukumwekeshaña netu twasakililaña hachawaana chalema chawumi.
SANDUJOLENU CHIKUPU
Talenu njila jikwawu jimunateli kumwekeshelamu nenu mwasakililaña hachawaana chawumi.
3. Dihembenuña kumujimba
AkaKristu adihana azatishaña wumi wawu kumukalakela Yehova. Chidi tuhu neyi alambulaña nyijimba yawu kudi Nzambi. Tañenu ARoma 12:1, 2, kuhiñahu hanjekenu hanawa malwihu:
Chumanyi chikuletesha mudihembeña kumujimba?
Njilanyi jimu mumunateli kudihembela kumujimba?
4. Bayi mwilaña yuma yikuyiletela maposu hela kufwaku
Bayibolu yatukwashaña kutondolwela yuma yikutuletela wubanji. Vumishenu VIDIYO kulonda mwiluki yuma yimwatela kwila hakwila mwiikali akiñewa.
Tañenu Yishimu 22:3, kuhiñahu hanjekenu chimunateli kudikiña enu niantu amakwawu . . .
mwitala denu.
neyi munakuzata mudimu.
neyi munakuhema yisela.
neyi munakuloñesha motoka hela munakwendesha.
5. Lemeshenu wumi wamwana wuchidi kanda avwaliki
Munhoshelu yankumbu, Davidi wahosheli hachamonañayi Yehova wumi nichakulaña mwana wuchidi kanda avwaliki. Tañenu Isamu 139:13-17, kuhiñahu hanjekenu hanilu lwihu:
Kwesekeja nachamonañayi Yehova, komana wumi wamuntu watachikaña hanamubaabiwu tahindi hakuvwalika?
Nshimbi jaYehova jayinkeliyi aIsarela jakiñileña amama jawantu nianyanawu achidi kanda avwaliki. Tañenu Kwidika 21:22, 23, kuhiñahu hanjekenu hanawa malwihu:
Yehova wamweneña ñahi muntu wajahileña chamaposu mwana wuchidi kanda avwaliki?
Wukutiya ñahi neyi muntu ajaha mwana wuchidi mwivumu mumushikila?b
Munakutoñojoka nenu Nzambi wamonaña ñahi chumichi?
Nimumbanda weluka nindi wumi walema nateli kutoñojoka nindi kufumisha ivumu dichuma chikumukwasha hohu. Tañenu Isaya 41:10, kuhiñahu hanjekenu hanawa malwihu:
Neyi mumbanda anakumukanjikija kufumisha ivumu, kudihi kunateli kuwanayi wukwashu? Muloñadi?
AMAKWAWU AHOSHAÑA NAWU: “Mumbanda wukweti wuswa wakufuukulahu kufumisha ivumu, muloña himujimba windi.”
Muneluki ñahi nenu Yehova walemesha wumi wamama yawantu niwamwana wuchidi kanda avwaliki?
YUMA YIMUNADIZI
Bayibolu yatulejaña kukeña, kulemesha nikukiña chawaana chawumi chatwinkayi Yehova. Munabombeli wumi wetu niwawakwetu.
Kuhitulukamu
Muloñadi wumi wamuntu chiwalemena kudi Yehova?
Yehova watiyaña ñahi neyi muntu ajaha mukwawu mumushikila?
Chumanyi chaleteshaña musakilileña hachawaana chawumi?
ILUKILENUHU NSAÑU YIKWAWU
Tunateli kumusakilila ñahi Yehova hachawaana chawumi?
Wanenu ñakwilu yalwihu lunakwila nawu, Komana Nzambi nateli kwanakena mumbanda wafumishahu dehi ivumu?
“Bayibolu Yahosha Nawudi haNsañu yaKufumisha Ivumu?” (Chibaaba chahaIntaneti)
Kwiluka Nzambi chamonañayi wumi kukutukwasha kutonda chiwahi yisela.
“Bushe Mufwile Ukuibika mu Kapoosa Mweo ka ‘Mangalo ya Busanso?’” (Loleni!, October 8, 2000)
Indi neyi muntu nakutoñojoka jakudijaha? Talenu Bayibolu chiyinateli kumukwasha.
a Yehova wakamenaña chikupu antu abaluka nyichima. (Masamu 34:18) Weluka yuma yaneñeshaña antu yaleteshaña atachiki kutoñojoka jakudijaha nawa wafwilaña kuyikwasha. Hakwila mwiluki chatukwashañayi, tañenu chibaaba chinakwila nawu, “Inakukeña Kufwa—Komana Bayibolu Yinateli Kunkwasha Neyi Inakutoñojoka jaKudijaha?” chidi hanasonekiwu nawu Ilukilenuhu Nsañu Yikwawu mukunu kudiza.
b Ana afumishahu dehi mavumu bayi asweja kudakamenaku, Yehova nateli kuyanakena. Neyi munakukeña kwilukilahu nsañu yikwawu, talenu chibaaba chinakwila nawu “Bayibolu Yahosha Nawudi haNsañu yaKufumisha Ivumu?” chidi hanasonekiwu nawu Ilukilenuhu Nsañu Yikwawu mukunu kudiza.