AkaKristu Atela Kumona Ñahi Nsañu yaKunwa Walwa?

Mukaayi, antu awumonaña walwa munjila jamboka-mboka. Amakwawu anwaña neyi adi hamu nawamabwambu jawu. Amakwawu anwaña wanyi. Nawa amakwawu anwaña nakusheta. Bayibolu yahosha nawudi hansañu yakunwa walwa?

1. Komana kunwa walwa kwatama?

Bayibolu hiyakaanisha kunwa walwaku. Hayawaana yatwinkayi Nzambi, Bayibolu yabombelahu “nivinyu yazañaleshaña muchima wamuntu.” (Isamu 104:14, 15) Amayala niambanda amakwawu ashinshika atenawu muBayibolu, anwineña walwa.—1 Timotewu 5:23.

2. Bayibolu yayifumbaña nawudi antu anwaña walwa?

Yehova wakaanisha kunwa nankashi nikusheta. (AÑalija 5:21) Izu dindi dahoshaña nawu: “Bayi wiikala hakachi kawantu anwaña nankashi [vinyuku].” (Yishimu 23:20) Dichi neyi tunakukeña kunwa, hela kwakankawetu, hitwatela kunwa nakubadikisha chakwila tuleka nikutoñojoka chiwahi, tutachika nikutuboka nikwila yuma yatama hela kusha wumi wetu muwubanjiku. Neyi twakañanyaña kudiyuula chitwanwa, twatela kuleka.

3. Tunateli kulemesha ñahi munafuukuliwu akwetu hansañu yakunwa walwa?

Muntu wejima watela kudifuukwila neyi chakwila watela kunwaña walwa hela nehi. Dichi, muntu wanwaña nakwesekeja hitwatela kumwinka muloñaku, indi kwiji kukanjikija muntu wabulaña kunwa netu atachiki kunwa. (ARoma 14:10) Neyi twiluka netu chitwanwa tukuneñesha akwetu, twafuukulañahu kubula kunwa. (Tañenu ARoma 14:21.) Hitwafwilaña “yuma yakuditiyisha [etu aweni] kuwahaku, chiña yuma yakutiyisha [akwetu] kuwaha.”—Tañenu 1 AKorinda 10:23, 24.

SANDUJOLENU CHIKUPU

4. Fuukulenu neyi mukunwa hela nehi

Yesu wahosheli nindidi hansañu yakunwa walwa? Hakwila mwiluki ñakwilu, talenu chihayamisha chatachi chakoñeliyi. Tañenu Yowanu 2:1-11, kuhiñahu hanjekenu hanawa malwihu:

• Kutalisha kunichi chihayamisha, yumanyi yitukudizila kudi Yesu chamonañayi kunwa walwa niantu awunwaña?

• Chineli Yesu hakaanishili antu kunwa walwaku, mukaKristu nateli kumona ñahi muntu wanwaña walwa?

Hela chakwila mukaKristu nateli kunwa walwa, hichinayi mukwila nawu watela kunwaña mpinji yejimaku. Tañenu Yishimu 22:3, nawa talenu yuma yinalondelihu chiyikuyikwasha kwiluka neyi munateli kunwa hela nehi:

• Munakuya nakwendesha motoka hela kuzatisha ikina.

• Mudi nevumu.

• Ndotolu nayileji nindi himwatela kunwa walwaku.

• Mwakañanyaña kudiyuula neyi munanwi.

• Nfulumendi hiyinayiteji kunwa walwaku.

• Mudi namuntu waleka kunwa walwa muloña kunyima wakañenyeña kudiyuula neyi nanwi.

Komana munateli kuloñesha walwa hamawija hela kuyidika yikwawu? Neyi munakukeña kwiluka yuma yikuyikwasha, vumishenu VIDIYO.

VIDIYO: Komana Natela Kuyiloñeshela Walwa? (2:41)

Tañenu ARoma 13:13 ni 1 AKorinda 10:31, 32. Chimwamanisha kutaña nsona-hinsona, muhanjeki hanilu lwihu:

• Kuzatisha ichi chishina kukuyikwasha ñahi kwila yuma yikumutiyishaña Yehova kuwaha?

5. Ilukenu hakukumina

Neyi mufuukulahu kunwa walwa, anukenuña chumichi: Hela chakwila Yehova wakaanisha kunwa walwa wanyi, ilaña wakaanisha kusheta. Muloñadi? Tañenu Hoseya 4:11, 18, kuhiñahu hanjekenu hanilu lwihu:

• Yumanyi yikumwekana neyi muntu nanwi walwa nankashi?

Yumanyi yikutukwasha kubula kunwa walwa nankashi? Twatela kudiyuula hela kwiluka hakukumina hampinji yitunakunwa. Tañenu Yishimu 11:2, kuhiñahu hanjekenu hanilu lwihu:

• Chawahiladi kwiluka hakukumina neyi munakunwa walwa?

6. Chuma chikumukwasha muntu kubula kunwa walwa nankashi

VIDIYO: ‘Chihandilu Chami Chatamini Nankashi (6:32)

• Muniyi vidiyo, walwa wamuletesheleña Dmitry kwiladi?

• Komana washikeneni dakuleka kunwa walwa?

• Welili ñahi hakwila aleki kunwa nankashi?

Tañenu 1 AKorinda 6:10, 11, kuhiñahu hanjekenu hanawa malwihu:

• Bayibolu yahosha nawudi hakusheta?

• Yumanyi yinakumwekesha nawu muntu weñija mutu muwalwa nateli kuleka?

Tañenu Matewu 5:30, kuhiñahu hanjekenu hanilu lwihu:

• Kuketula chikasa chetu kwatalisha mukwila nawu twatela kuleka yuma yimu kulonda tumutiyisheña Yehova kuwaha. Chumanyi chimukwila neyi chinakuyikalila kuleka kunwa walwa nankashi?a

Tañenu 1 AKorinda 15:33, kuhiñahu hanjekenu hanilu lwihu:

• Neyi mwikala nawamabwambu amawahi akuyikwasha ñahi kubula kusweja kunwa walwa?

YUMA YIMUNADIZI

Yehova watwinka walwa kulonda tuditiyisheña kuwaha, ilaña wakaanisha kunwa nakubadikisha nikusheta.

Kuhitulukamu

• Bayibolu yahosha nawudi hansañu yakunwa walwa?

• Wubanjinyi wekala mukunwa walwa nankashi?

• Tunateli kulemesha ñahi munafuukuliwu akwetu hansañu yakunwa walwa?

ILUKILENUHU NSAÑU YIKWAWU

Yumanyi yikuyikwasha atwansi kufuukula chiwahi hansañu yakunwa walwa?

Toñojokaku Yuma Yafumaña Mukunwa Walwa (2:31)

Talenu yuma yimwatela kwila yikuyikwasha kumanisha kukala kumukweti.

“Kwikala naYitoñojoka Yayiwahi Kutalisha haKunwa Walwa” (Kaposhi Kakutalila, July 1, 2010)

Komana akaKristu atela kudetesha makaapu hakunwa?

“Malwihu Kufuma Kudi Antañi” (Kaposhi Kakutalila, February 15, 2007)

Munsañu yinakwila nawu “Nadiña Wakuyaapu,” talenu iyala wumu chalekeliyi kusheta.

“Bayibolu Yahimpaña Yihandilu Yawantu” (Kaposhi Kakutalila, May 1, 2012)