Muntu Wakuhwelelaña Chuma Chinamoniyi
“Mukwakusekesha Nzambi himuntu watoñojokaña nindi chakala kwiluka wunsahu walala hayuma yidi neyi chekalayi Nzambi nihachihandilu chakumbidi neyi chakamenaña nsakililu yawakwaKristu ninsakililu jikwawu. Hela neyi mpinji yejima chakala wanyi, dikwila nawu hayinu mpinji chidi chakala.” —MUKWAMAANA BERTRAND RUSSELL, 1953.
MUNTU watachikili kuzatisha izu dakwila nawu “mukwakusekesha” wadiñi sayantisiti wadizaña hadi anyama wejina daThomas Huxley. Wavwalikili mu 1825, Huxley wadiñaku muyaaka yadiñiyi Charles Darwin nawa watiyakesheleña ntañishilu yakwila nawu yuma yenjiluku hohu yayeni. Mu 1863, Huxley wasonekeli nindi kwosi wunsahu wamweniyi wamwekesheleña nawu kwekala Nzambi “watukeña nawa watwakamenaña neyi chahoshañawu akwaKristu.”
Makonu, antu amavulu etejaña mazu ahosheluwu awa amayala atiyakana, etejaña nawu wena atela kukuhwelela hohu yuma yanateli kumonawu. Ahoshaña nawu, kukuhwelela muntu hela chuma chakuleja hohu hiwusupi.
Komana Bayibolu yahoshaña nawu twatela kumukuhwelela Nzambi chakadi kwikala nawunsahu wunakumwekesha nawu wekala kwoku? Hidichi chatañishaña Bayiboluku. Bayibolu yashimunaña nawu kwiteja mazu akubula wunsahu ahoshañawu antu hikubula maana, nawa hiwusupi. Bayibolu yahosha nawu: “Muntu wakadi maana wetiyaña mazu ejima, ilaña muntu wadihoñeshaña mumuchima watalaña chachiwahi mwakuyayi.”—Yishimu 14:15.
Hanu dinu, tukuhosha netudi kutalisha hakumwitiya Nzambi? Kudihu wunsahu wamwekeshaña chikupu nawu Nzambi wekala kwoku, hela netu watukeña nawa watwakamenaña?
Yililu yaNzambi Ayimwekesha
Nsoneki waBayibolu Pawulu, hampinji yahosheleñayi nezanvu dawakwaAtenisi asweja kutaña, wahosheli nindi Nzambi “waleñeli mpata yamunu mwishina niyuma yejima yidumu.” Pawulu wayilejeli akwakujinooka nindi Nzambi wayikeña antu nawa, “hekala kwakulehi nanetu ejimaku.”—Yililu 17:24-27.
Muloñadi Pawulu chakuhweleleliyi chikupu nindi Nzambi wekala kwoku nawa wakeña antu Aleñeliyi? Pawulu washimwini muloña wumu hakuyisonekela akwawu akwaKristu mumusumba waRoma. Wahosheli hadi Nzambi nindi: “Kufumisha haleñeluwu mpata yamunu mwishina, yuma yindi yakadi kumonewa yalumbulukila, muloña ayilukaña nayuma yaleñeliyi.”—Aroma 1:20.
Mafu analondeluhu akumwekesha yililu yaNzambi yisatu yamwekenaña chikupu muyuma yaleñeliyi. Chimukushinshikaña iyi yakutalilahu, dihulenu nenu, ‘Indi kudiza iyi yililu yaNzambi yikuleñela ami kwiladi?’
[Mazu ekoku adi hefu 3]
Bayibolu hiyahoshaña nawu tumukuhweleli Nzambi chakadi wunsahuku