Ntañishilu Yakutwamba Yalombolaña Kuntañishilu Yikwawu
KAPOSTOLU Pawulu wasonekeleli akwaKristu ashakamineña kukumana kwayaaka nkulakaji yatachi C.E. nindi: “Babalenu.” Wayisoñamishileña hachumanyi? “Hakenda kamwekana muntu wukuyipupa namaanindi namakasu amukunkulwayi, mwaya yaaku yawantu.”—Akolose 2:8.
Hela chakwila Pawulu wayisoñamishili hakachi kayaaka nkulakaji yamuchiyedi C.E., akwaKristu amakwawu atachikili kuzatisha maana akutwamba adiziluwu kudi akwamaana kulonda kulumbulula yuma yakuhweleleluwu. Muloñadi? Akeñeleña nawu ayitambwili kudi antu ataña amuWanta waRoma kulonda abalumuni antu amavulu.
Justin Martyr, muntu wayili mpuhu hakachi kanawa akwaKristu, wakuhweleleli nindi Muntu wamuhosheleleñaku Nzambi wadimwekesheli kudi aGriki akwamaana henohu Yesu kanda yenzi. Kwesekeja naJustin niantañishi amakwawu adizishileña yuma yoyimu, maana nintañishilu yejima yakutwamba kutalisha hawuKristu yaleñeleli iyi nsakililu kutanda chikupu kudi antu ejima.
Nsakililu yawuKristu yaJustin Martyr yakokweli chikupu antu amavulu. Hela chochu, kwiteja ntañishilu yimu yakutwamba yalombweleña kuyikwawu nawa dikwafuma ntañishilu yamonañawu antu makonu nawu diyi ntañishilu yawakwaKristu. Hakwila nawu tusololi iyi ntañishilu yakutwamba, esekejenu chahosha nyikanda yidi muyibaaba yinalondeluhu nachuma chacheni chatañishaña Bayibolu.
[Mazu aKusakilila eniMwevulu wudi hefu 3]
Devil: Barrators—Giampolo/The Doré Illustrations For Dante’s Divine Comedy/Dover Publications Inc.; angels: Art Resource, NY; trinity relief: Museo Bardini, Florence