MALWIHU EHULAÑAWU ANTAÑI . . .
Muloñadi Nzambi Chetejelayi Akwañovu Kukabisha Azeya?
MuBayibolu mwekala nsañu yahoshaña hadi akwañovu akabishileña azeya. Naboti wadiña hakachi kawantu akabishileñawu.a Ahabi, mwanta wawaIsarela wadiñaku munkulakaji yayaaka ikumi B.C.E., wamwitejeli ñodindi, Yezebeli, kujaha Naboti nianyanindi awamayala kulonda mwanta yashali netempa dindi danyivinyu. (1 Anyanta 21:1-16) Muloñadi Nzambi chetejeleliyi mwanta kuzatisha ñovu jindi munjila yaheña?
Tusambilenu kushinshika hachuma chimu chalema: Nzambi hatwambañaku. (Titusa 1:2) Indi ichi chikuma chinakundami ñahi kunsañu yakukabisha antu? Hatachi, Nzambi wayilejeli antu nindi neyi amufutalela akamona jomisha mbaña, akafwa. Chochahosheliyi Nzambi, antu anakuhondeka kufuma tuhu hampinji yakudikaña mwitempa daEdeni. Makabisha diwu aletesheli muntu watachi kufwa. Chumichi chamwekeni hampinji yelili Kena yajahi manakwindi Abeli.—Kutachika 2:16, 17; 4:8.
Kufuma hayina mpinji, Izu daNzambi datulejaña chidi chihandilu chawantu nawu: ‘Muntu wayuulaña mukwawu muntu kulonda yamukatishi.’ (Mukwakutañisha 8:9) Komana awa mazu anakushikijewa? Yehova walejeli muza wawaIsarela, antu jindi, nindi anyanta jawu akayikabishaña, antu akamudililaña Nzambi. (1 Samweli 8:11-18) NiMwanta Solomoni wayikabishili antu jindi nankashi. (1 Anyanta 11:43; 12:3, 4) Anyanta atama adi neyi Ahabi, akabishileña antu nankashi. Chakutalilahu: Neyi Nzambi wakañesheleña yuma yejimiyi, kachi mwahosheliyi mwadi kwikala mwalala?
Anukenu cheñi nenu Satana wahoshaña nindi antu amukalakelaña Nzambi muloña wakwila wayinkaña yuma. (Yoba 1:9, 10; 2:4) Neyi chakwila Nzambi wayikiñili antu jindi ejima kumakabisha, mwahosheliyi Satana himwadi kulumbulukaku? Neyi Nzambi wakañesheleña makabisha ejima amweneñawu antu, komana hadi kwikala sakutwamba munenuku? Neyi Nzambi wayikiñileña, antu adi kuhoshaña nawu anateli kudiyuula chiwahi chakadi Nzambi. Ilaña Izu daNzambi dahoshaña nawu muntu kwila yadiyuula yomwenindi chiwahi nehi. (Yeremiya 10:23) Tunakukeña Wanta waNzambi winzi, neyi wunenzi dihakamana makabi.
Komana chumichi chinayi mukwila nawu kwosi chuma chelañayi Nzambi kutalisha hamakabisha? Inehi. Talenu hayuma yiyedi yelañayi: Chatachi, watulejaña nsañu yayivulu kutalisha hamakabisha. Chakutalilahu, Izu dindi dafuñunwini kafuta kamukasililuwu Naboti kudi Yezebeli. Bayibolu yalumbululaña cheñi nawu iyi yuma yatama ayikojejaña kudi nyuuli wañovu wadiswekaña. (Yowanu 14:30; 2 Akorinda 11:14) Bayibolu yamushimunaña nawu diyi Satana Diyabolu. Nzambi watukwashaña kwambuka kuyuma yatama kuhitila mukutuleja nsañu yahoshaña hamakabisha niyomweni ndetaju. Watukiñaña kulonda tukekali nawumi wahaya nyaka.
Chamuchiyedi, Nzambi watulejaña nindi wukafumishahu makabisha. Nzambi chayifuñunwiniyi Ahabi niYezebeli nikuyisompesha nikuyibabesha, niantu amakwawu adi newena, chatuleñelaña kukuhwelela netu wakayibabesha antu elaña yuma yatama. (Masamu 52:1-5) Nzambi wayinka cheñi antu amukeña kuchiñeja kwalala nindi keña yafumishuhu yuma yatama nimakabisha.b Ifuku dimu Naboti washinshika nianyanindi awamayala akashakama muParadisa yahamaseki haya nyaka mwakabula yuma yatama.—Masamu 37:34.
[Tumazu twaheshina]
a Talenu chibaaba chinakuhosha nawu “Imbujolenu Chikuhwelelu Chawu” mukanu kaposhi kakutalila.
b Talenu kapetulu 11 kamukanda waChumanyi Chacheni Chatañishaña Bayibolu? wasonekawu kudi aYinsahu jaYehova.
[Mazu ekoku adi hefu 11]
‘Muntu wayuulaña mukwawu muntu kulonda yamukatishi.’—Mukwakutañisha 8:9
‘Nzambi hatwambañaku.’—Titusa 1:2