‘Toñojokenu Chachiwahi Njila Yakunyendu Yenu’ Kulonda Muyiluku Hambidi

ANTU jaNzambi chafuminuwu muBabiloni mu 537 B.C.E., Yehova wayilombweleña hampinji yafuntileñawu kuYerusalema. Wayilejeli nindi: “Loñeshenu njila yawantu; dimenu, dimenu muhaña wamukwakwa, nonojolenumu malola.” (Isa. 62:10) Toñojokenu aYudeya amakwawu chazatiluwu nañovu hakwila mwenimu. Mazanvu atwamininuku atela aloñesheli njila, nakuwahisha mumaluña mwadiña mankulokela. Chuma cheliluwu chatela chakwashili ana kwawu ayilondeleleña hakufunta kumukala wawu.

Ichi dichi chakutalilahu chitwatela kulondela hakuzata nyidimu yakuspiritu. Yehova wakeñaña ambuñindi ejima kwenda muniyi njila chakadi kukala kudi kwejima. Izu dindi datukonkomwenaña nawu: ‘Toñojokaku chachiwahi njila yakunyendu yeyi, mwejima muwukuya muloñi chachiwahi.’ (Yish. 4:26) Chili neyi wudi kansi hela nehi, wunateli kuhetela muniku kufumba kwaNzambi.

WAHISHENU NJILA YENU KUHITILA MUKUFUUKULA CHIWAHI

Hadaha mwatiyahu dehi antu anakuhosha hadi kansi nawu: ‘Iwu kansi wamumbanda nakukula namaana’ hela nawu ‘Iwu kansi weyala kwakakulilayi wukekala mwana walumbwa hama.’ Atwansi ekala akola kumujimba, atoñojokaña swayi, nawa anateli kwila yuma yayivulu muchihandilu. Bayibolu yahosha chatiyakana nawu: “Kuwaha kwawanyikwenzi jojiñovu jawu.” (Yish. 20:29) Kansi wazatishaña ñovu jindi hela nyidimu yelukayi hakumukalakela Yehova nateli kushikija yikonkwanyi yakuspiritu nikwikala namuzañalu walala.

Neyi chimweluka, atwansi ayilemesha nankashi mukaayi. Neyi Chinsahu wakansi nakuzata chiwahi kushikola, mukwakuleja akashikola maana, ntañishi hela mukwawu mukashikola nateli kumukakeja Chinsahu kulonda yatañi shikola yahewulu nindi dichi chuma chinateli kumukwasha kuya mpuhu mukanu kaayi. Neyi mana kwetu wakansi hela muhela wukweti wuswa wakuhema yisela yakutemuka, akulumpi jayisela anateli kumukakeja nawu yatonduhu mudimu wayisela. Komana munakumona ikakeja damuchidiwu, indi kwiji mweluka muntu wunakumona ikakeja damuchidiwu? Chumanyi chinateli kumukwasha mukwaKristu kufuukulahu chiwahi?

Yuma yatañishaña Bayibolu yinateli kumukwasha muntu kwenda munjila yayiwahi muchihandilu chindi. Mukanda waMukwakutaŋisha 12:1 wahosha nawu, “Anukaña nawa Nleñi yeyi mumafuku awukwenzi weyi.” Indi eyi hela mukwenu kansi, munateli ‘kwanuka ñahi Nleñi yenu’?

Toñojokenu hachuma chamumwekeneni Erica wakuWest Africa. Wadiña wakeña kwasa ngunja. Eric chashikijiliyi yaaka 15, amutondeli kwasa ngunja mwizanvu deneni damwituña dawu. Ichi chatalishili mukwila nawu wadi kuya kuEurope kulonda yakadizi chikupu, hadaha wadi kuya nakwasa ngunja kumatuña acheñi. Hanu dinu wunateli kulondela ñahi kufumba kwakwila nawu “anukaña nawa Nleñi yeyi”? Indi eyi hela mukwenu kansi munateli kudizilaku chumanyi?

Hampinji yadiñayi kushikola, Eric watachikili kudiza Bayibolu nawaYinsahu jaYehova. Dichi watachikili kwiluka nindi Nleñi yindi wakafumishahu chikupu kukala kwejima kwamonañawu antu. Eric welukili kulema kwakuzatisha mpinji niñovu yindi kulonda yeli mwaya kukeña kwaNzambi. Chelukiliyi mwenimu, Eric watondeluhu kuleka kwasa ngunja. Ilaña wapapatisheweli nakutachika kumukalakela Nzambi. Chimwahitili mpinji, wekalili nkoñi wakuzatila nawa amutambikili kuShikola yaKudiza Bayibolu Yawamana Kwetu Ajiki.

Neyi watwalekeluhu kwasa ngunja, mutenowu Eric wadi kwikala namaheta nikuya mpuhu. Ilaña welukili walala wekala muBayibolu wakwila nawu: “Maheta amukwakuheta diwu mukala windi wakola, wayifuukulaña kwindi nindi, himpwembu yanyuña.” (Yish. 18:11) Eñañi, maheta ahetañayi muntu nakumona nindi diyuma yatela kumukiña hiyuma yakuhemesha hohu. Kubombelahu, antu afwilaña chikupu kuheta ‘adipwikaña yihuñu yayivulu, zwa-a nikwishinadi.’—1 Tim. 6:9, 10.

Kafwampi, atwansi amavulu azañalalaña chikupu hamuloña wakuzata mudimu wampinji yejima. Eric wahosheli nindi: “Ichi inakuzatila hamu ‘nezanvu’ deneni dawambuña Yehova mumudimu wampinji yejima. Didu izanvu dadiwahi dinatela kwikalamu nawa namuhamekaña Yehova hakunleja njila yimu hohu yaletaña muzañalu waweni.”

Indenu mwatela kwiladi? Chatela mukeñeña nyidimu yakumujimba, kwila muloñesha ‘njila yenu’ kudi Yehova kuhitila mukuzata wupayiniya nehi?—Talenu chikasha chinakwila nawu “Naheti Nkisu Yinadi Kubula Kuheta haShikola yaMuñoñi.”

FUMISHENU YUMA YATELA KUYIKAÑESHA MUNJILA YENU

Hampinji yayiluwu nakuhempula kukasanji kamutayi kaUnited States antu adisumbula amweni akaBeteli amuzatilaña Yehova chadiñawu namuzañalu. Chimwahitili mafuku, muhela wasonekeli nindi: “Twatiyileña kuwaha nanyidimu yetu.” Afuukwiluhu kushiyaku mpinji yakuzataku nyidimu yalema yaNzambi.

Mpinji yimu, atachikili kwakamena chantesha hayuma yafuukwiluwu kuhimpa. Ilaña ifuku dimu, atoñojokeli chikupu haNsona yefuku denodu. Yadiña nsona yaYowanu 8:31, hitwatañaña mazu aYesu akwila nawu: “Neyi mukushakama mumazu ami, mukwikala atumbanji twami chalala.” Chatañiluwu iyi nsona, ahosheli nawu: “Neyi tudihana nakupelesha chihandilu chetu, hichuma chalema nankashi.” Dichi alandishili itala dawu deneni, niyuma yikwawu yadi kuyikañesha nawa abuukilili kuchipompelu kwadiña kukaankila. Chayinu mpinji anakuzata wupayiniya nawa akwashaña kutuña Matala aWanta nikudihana hakupompa kwankambi. Atiyaña ñahi? “Twahayamaña hamuzañalu wutukweti hakupelesha chihandilu chetu, chuma chitwelili dichi chuma chatulejaña kuloñesha kwaYehova.”

TWALEKENUHU KWENDA MUNJILA YIKUYILEÑELA MUYILUKU HAMBIDI MUNYIDIMU YANZAMBI

Solomoni wasonekeli nindi: “Mesu eyi atali kwakumbidi hohu, nlabu jeyi jitali kuwukuya swi-i.” (Yish. 4:25) Kufwana ñendeshi washinshikaña mesu mumukwakwa munakuyayi, anetu nawa twatela kutondolwela yuma yinateli kutukañesha kwimika yikonkwanyi yakumuzatila Nzambi nikuyishikija.

Yikonkwanyi yamuchidinyi yakuspiritu yimwatela kwimika nikuyishikija? Mudimu wampinji yejima hichuma chachiwahi nankashi. Chikonkwanyi chikwawu chidi chakuzatila muchipompelu chakwakwihi chidi nakukaankila kwawakwakushimwina akuluka yitembi kulonda kuyikwasha kushimwina mwiluña dawu deneni. Hadaha chipompelu chikweti akwakushimwina amavulu anakuzata chiwahi, ilaña mwosi aeluda amavulu niankoñi akuzatila. Komana munatweshi kuzatila muyipompelu yidi nakukaankila kwamuchidiwu? Komana kwila muhanjeka nankoñi wañinza nehi kulonda mwiluki neyi mukutwesha kuya nakuzatila kudi kukaankila? Neyi munakukeña kuya nakuzatila kwakulehi nankashi, munateli kwihula kulonda ayileji yipompelu yakwakulehi yidi mukukaankila.b

Tuhanjekenu cheñi hansañu yashimunawu haIsaya 62:10. A Yudeya amakwawu atela azatili nañovu hakwila nawu awahishi njila hampinji yafuntileñawu kumukala wawu kulonda antu jaNzambi ashiki kwayileñawu. Neyi munakuzata nañovu kulonda mushikiji yikonkwanyi yenu yakuzata nyidimu yajila bayi muzeyaku. Nzambi nateli kuyikwasha kushikija yikonkwanyi yenu. Twalekenuhu nakumulomba Yehova kulonda yayinki maana hampinji yimunakushinda yuma yikuyikañesha kuzata. Mukuhita kwampinji, Nzambi nateli kuyikwasha ‘kuwahisha chachiwahi njila yakunyendu yenu.’—Yish. 4:26.

a Ijina anadihimpi.

b Talenu Abaiteyanya Ukucita Ukufwaya Kwa Kwa Yehova, mafu 111-112.

Naheti Nkisu Yinadi Kubula Kuheta haShikola yaMuñoñi

HENOHU Flavia wuchidi kankaña, nkanka yindi wamumbanda, wadiña Chinsahu chaYehova, wamudizishileña Bayibolu. Hela chochu, tata yindi wadiña ntañishi, nawa wamudizishileña kulonda yekali nampwila yakudiza hayileñaleña nikutaña shikola yahewulu. Antu amakwawu amulejeleña nawu, “Ikiñu denu dinateli kukiña iseki kulonda dibuli kukisika.” Tata yindi wamutwalili hashikola yamuñoñi yaya mpuhu, hatachikiliyi kudiza chakutuña manji amumakina abulaña kuleta wubanji kuyileñaleña.

Flavia washikeneni dakwiluka nindi atudizi amavulu hiyashili maana ‘hakukiña isekuku.’ Cheñi nawa, jiprogiramu jikwawu jahashikola yamuñoñi jashindameneni hamali afumineña munyidimu yakuselujola, dichi akwakusandujola akeñeluhu yina nyidimu yakuselujola. Chumichi chamuneñesheleña Flavia. Dichi aYinsahu jaYehova chenjiluwu nakumushimwina, watachikili cheñi kukuhwelela yuma yahosha Bayibolu hadi Nzambi niyuma yikamwekana kumbidi.

Flavia wetejeli kudiza chalala chamuBayibolu nawa wapapatisheweli. Ilaña chineli wadiña nakudiza kulonda yekali nadigili yahewulu, wadiña nampinji yantesha yakushimwina nsañu yayiwahi. Ifuku dimu wadiña nakutiyilila chalumbulwileñayi nkoñi wañinza nsona yaYakoba 4:17 yahosha nawu: ‘Dichi muntu neluki kwila mwamuwahi, yena kwilamu nehi, kudi yena chinekali hinshidi.’ Chumichi chamuleñeleleli Flavia kutoñojoka hayuma yelileñayi. Washimwini nindi: “Nakeñeleña nami Yehova yankiswili, ilaña hampinji yoyimu nakeñeleña cheñi kudiluñisha namudimu wami wajasayansi. Dichi nateleleli kutondahu.”

Flavia wafuukwiluhu kuleka kudiza hashikola yamuñoñi. Komana waditoñesheli? Wahosheli nindi:

“Naheti nkisu yinadi kubula kuheta hashikola yamuñoñi mumudimu waYehova. Yehova nankiswili chikupu. Nandizishi kwikala naluwi, kukeña akwetu nikukwasha amakwawu kudiza chalala. Nasumbuka neyala walumbwa nawa nachiñejaña yuma yayiwahi yakumbidi kubadika yinadi kuheta hakudiza sayansi. Yehova hohu diyi wunateli kukiña iseki. Hinamba kamufutalelaku.” Flavia ninfumwindi azatilaña hachishina chamukaayi chawaYinsahu jaYehova muNew York.