Nadizili nawu Yehova wukweti luwi nawa wanakenaña

CHIHANDILU CHAMI CHAKUNYIMA:

Nakulilili mwiluña mwadiña wuzweñi mumusumba waMontreal. Hinadiña natukweji 6, atata afwili, amama diwu ashalili namudimu wakutuhemba. Yami nadiña kansi hakachi kawanyana 8.

Chinakulili, natachikili kunwa yitumbu yashetana, kuhema yisela yalwisu, madombu nawa nahemeneña nawambanji. Chinashikijili yaaka 10 atachikili kuntemesha kudi anyakalwalu nawa natachikili kudila antu mabula hamutu kuhitila mukuhana mali alunda lunda. Natwalekeluhu kudimba antu nikuyikanjikija kwila yuma yinakeñeleña. Iyi yililu yadiña tuhu neyi diyi yakudya yami.

Chinashikijili yaaka 14, naswejeli kudimba antu. Chakutalilahu, nalandileña jinkoloku jawulu, yikomu, nituzeya nakujisoneka kulonda yimwekani neyi hiwulu yayeni chikupu nakuyilandisha munyikwakwa nihanzi yamasitolu hemikilañawu nyotoka. Natiyileña kuwaha nanjila yinawaninineñamu mali swayi-swayi. Ifuku dimu, nakwatili mali akushika ku $10,000.

Chanhañiliwu kushikola kwatwalañawu ayiluwañimbi hinadiñi nayaaka 15, nakañenyi kwakuya. Nadiña nakukama munyikwakwa, mumabulu hela kumatala awakwetu.

Muloña wayililu yami yatama, ankwatileña kudi akapokola nakuñihujola. Ilaña chineli yuma yinalandishileña yadiña yakwiya wanyi, hiyañumbilili mukaleyaku. Hela chochu nafweteleña mali amavulu kunfulumendi muloña wayililu yami yatama, makudi nikulandisha yuma chakadi lusesa. Hamuloña wakubula kutiya woma muntu wudi wejima, natambwileña mali alunda lunda. Iyi yadiña yililu yatama chikupu muloña mpinji yikwawu nasendeleña niwuta. Mafuku amakwawu nazatileña nawambanji.

BAYIBOLU CHIYAHIMPILI CHIHANDILU CHAMI:

Chinashikijili yaaka 17, dihu nelukili nami kwekala Bayibolu. Nashakamineña nakajila kami hampinji yatachikiliyi kudiza Bayibolu nawaYinsahu jaYehova. Ilaña, nakeñeleña wanyi kutiya nsañu yamuBayibolu yahosheleña hayililu yami, dichi nayili nakushakama namumbanda mukwawu inakeñeleña.

Mpinji yakuhimpa yitoñojoka yami yashikili chelili kajila kami wamuchiyedi yatachiki kudiza Bayibolu nawaYinsahu. Wahimpili chihandilu chindi nawa natiyili kuwaha chelili yatachiki kwovwahila nawa wawunda. Netejeli mutambi wakuya nakupompa Hetala daWanta dawaYinsahu jaYehova. Antambwilili chiwahi kudi antu akashinshi nawa akweti luwi. Awantu ambukili chikupu nawantu inelukili. Chisaka chami chanheleli, nawa nadiñi waneña hohu kufuma tuhu kuwansi wami. Kukeña kwamwekesheleli aYinsahu jaYehova dichuma chinakeñeleña. A Yinsahu chañililuwu nawu tudizeña Bayibolu, nashikeneni dakwiteja.

Yuma yinadizili muBayibolu yampulwishili. Nafuukwileña kuya nakwiya nawakwetu ayedi kulonda nifweti mukudi wamuyisela yalwisu, wamali akubadika ku $50,000. Nidi namuzañalu muloña nayili nakwiya wanyi. Amabwambu jami wena ayili nakwiya. Wumu amukasili mukaleya, mukwawu amujahili.

Chinatwalekeluhu kudiza Bayibolu neluki nami natela kuhimpa muyuma yayivulu. Chakutalilahu, nadizili chahosha Bayibolu ha 1 Akorinda 6:10 nawu: “Hela amakombi, hela akwalwisu, hela akwakusheta walwa, hela akwakutukana, hela akwanyilami, hiyamba kaswana wanta waNzambuku.” Chinatañili iyi vasi, yililu yami yanleñeleli nitachiki kudila. Nelukili nami natela kuhimpa chihandilu chami chikupu. (Aroma 12:2) Nadiña mbanji nawa wazuwa, nadiña nakutwamba.

Hela chochu, nadizili cheñi muBayibolu nawu Yehova wukweti luwi nawa wanakenaña. (Isaya 1:18) Nalombeli chikupu, nakumulembelela Yehova nami yankwashi kulonda nileki yililu yami yatama. Wankwashili, nawa mukuhita kwampinji nahimpili yililu yami. Chuma cheneni chitwelili nakajila kami hikusonekesha wulu wetu.

Chinashikijili yaaka 24 nadiña nanyana yisatu. Dichi nakeñeleña mudimu walumbwa. Ilaña hinatañiliku nawa hinadiña nachipapilu chamudimuku. Nalombeli cheñi kudi Yehova. Kuhiñahu nayili nakukeña mudimu. Naleji akwakwiñija mudimu nami nakeñeleña kuhimpa chihandilu chami kulonda nizateña mudimu nakashinshi. Mpinji yikwawu nayilejeleña nami nadiña nakudiza Bayibolu kulonda nikali muntu wakashinshi. Akwakwiñija mudimu amavulu akanini kuñiñija mudimu. Nkumininaku, hanyima yakushimuna chihandilu chami chakunyima hampinji yañihwileñayi, mukwakwiñija mudimu wanlejeli nindi: “Nakeñaña wanyi kukwiñija ilaña muchima wunakunleja nawu nikwiñiji.” Nelukili nami Nzambi nakuli kulomba kwami. Mukuhita kwampinji, ami niñodami twapapatisheweli nakwikala aYinsahu jaYehova.

CHINAHETELUMU:

Nidi wamumi muloña wakuzatisha nshimbi jamuBayibolu nikushakama nshakaminu yawakwaKristu. Nikweti chisaka chamuzañalu. Nikweti chinleji chitooka muloña wakwiluka nami Yehova wañanakena.

Hadi yaaka 14 yinahituhu, nakalakali mudimu wampinji yejima nakukwasha amakwawu kudiza chatañishaña Bayibolu nawa ñodami niyena natachiki kuzata mudimu wampinji yejima. Hadi yaaka 30 yinahituhu, nakwashi akwetu inazataña nawu 22 kutachika kudifukula kudi Yehova. Nayaña kumasitolu ilaña hinayaña nakwiyila antu neyi chinelileñaku. Dichi neyi nayi kumasitolu nalejaña antu yuma yinakuhwelela. Kudi chuma chinakeñaña kuyileja: kuchiñeja kwakwikala nawumi wahaya nyaka kumbidi mwituña dadiha mukabula makombi.—Masamu 37:10, 11.