“Twatiyili Iyena niKukeña Kwakufuma Hanyichima Kubadika Kunyima”

Hachitanu muSeptember 1922, antu 8, 000 apompeli mwitala dakupompela kupompa kweneni iku kunatachiki dehi kutata nantetemena. Cheyamani wabidikili nindi antu ejima anayiteji kwidika hanzi, ilaña kwosi wakwiñila cheñi neyi nediki.

Embileña “Tumina Twakutachika Nachu Kupompa,” kuhiñahu Manakwetu Joseph F. Rutherford wayili hachinañamu. Antu apompeli adiña nakuhembelela yuma yikukeña kumwekakana. Antu atachikili kwimajala muloña kwatatili. Dichi nhoshi wayilejeli nindi ashakami nakutiyilila. Chatachikili mpanji, komana antu amweni ihina deneni dakuvuña dakudikiliwu hewulu?

Manakwetu Rutherford wahanini mpanji yadiña namutu nawu, “Wanta wamwiwulu wudi mukamwihi.” Chahosheliyi hadi ora yimu nachikunku, izu dindi datachikili kudidima hampinji yahosheleñayi hadi atuprofwetu akunyima ahamuka chahosheleñawu haWanta wunakwinza. Kukamwinhi nakunkulula mpanji yindi, wenhwili nindi, “Munakuhweleli nenu Mwanta wampuhu natachiki dehi kuyuula?” Antu mwizaza akwili nezu datiyakana nawu: “Eña!”

Manakwetu Rutherford wahosheli nezu dakudidima nindi: “Yenu nakushimwina, Enu anyana kaNzambi Mukwakubadika! . . . Talenu, Mwanta hakuyuula! Yenu mwatela kumutiyakesha kudi antu ejima. Dichi, tiyakeshenu, tiyakeshenu, tiyakeshenu, Mwanta niwanta windi.”

Chahosheliyi awa mazu, ihina dalemukili chiwahi, hadiña mazu akwila nawu: “Tiyakeshenu Mwanta niwanta windi.”

Ray Bopp wahosheli nindi: “Antu mwizaza atiyili kuwaha.” Anna Gardner walumbulwili “chatenteli itala dejima namuzañalu watiyiliwu antu.” Fred Twarosh wahosheli nindi: “Antu ejima mwizaza emeni.” Evangelos Scouffas wahosheli nindi, “Twatiyili neyi kwiji spiritu diyi yinatukoki muyitwamu dichi twemeni nawa twadilili.”

Antu amavulu apompeli adiña atachika dehi kushimwina nsañu yayiwahi yaWanta. Hela chochu, atiyili kuwaha nachayilejeliwu kushimwina mukunyakashana. Ethel Bennecoff wahosheli nindi Atudizi aBayibolu atwalekelihu kushimwina “neyena nikukeña chakufuma hanyichima [yawu] kubadika chelileñawu kunyima.” Odessa Tuck, wadiña nayaaka 18 hayina mpinji, wafwilileña chikupu kwakula lwihu lwakwila nawu, Hinyi wukuya?” Wahosheli nindi: “Nelukili wanyi kwakuya hela chakuya. Chuma chinelukili nakeñeleña kwikala neyi Isaya, wahosheli nindi, ‘Ami nami, Yamonu, ntemeshami!’” (Isa. 6:8) Ralph Leffler wahosheli nindi, “Ifuku ditwatiyili kuwaha didaña ifuku dakutachika kampeni kakutiyakesha Wanta kanatandi mukaayi kejima makonu.”

Dichaletesha kupompa kwadiñaku muchaaka cha 1922 kuCedar Point, muOhio, akwanukeña chikupu! George Gangas wahosheli nindi, “Iku kupompa kwanletesheli nikali nampwila yakufwila kuyaña kukupompa kweneni kwejima.” Mwamweni wayileña kukupompa kweneni kwejima. Julia Wilcox wasonekeli nindi: “Nakañanyaña kulumbulula muzañalu wunatiyaña neyi munyikanda yetu niwana anasonekimu kutalisha hakupompa kwadiñaku kuCedar Point mu 1922. Nasakililaña mpinji yejima nami, ‘Kusakililaku Yehova, hachiwankwashili kuya kukuna kupompa.’”

Ninetu makonu twanukaña yuma yayiwahi yamwekeni hakupompa kwamaluña yatuzañalesheli nawa yatuletesheli kwikala neyena dakushimwina hadi Nzambi niMwanta windi. Chitukwanukaña hayuma yamuchidiwu, ninetu twahoshaña netu, “Kusakililaku Yehova, hachiwankwashili kuya kukuna kupompa.”