Malwihu Kufuma Kudi Antañi
Bayibolu yashimuna nawu hatela kwikala ayinsahu ayedi hakwila nawu nsañu ayikoleshi. (Kuch. 35:30; Kuhit. 17:6; 19:15; Mat. 18:16; 1 Tim. 5:19) Ilaña muNshimbi, neyi iyala yakama chañadima otawu chakumukanjikija “mumpata” nawa owu mumbanda yatambeka, hadiña namuloña wawuvumbiku, ilaña weyala wadiña nawu. Chineli antu amweneñaku wanyi chamukamineñawu, muloñadi chabulileñawu kumuwana namuloña ilaña iyala amuwana nawu?
Nsañu yekala haKuhituluka 22:25-27 hiyahosha hakuwana weyala namuloñaku, muloña iwu weyala wadiña dehi samuloña. Iyi nshimbi yahosheleña hakuyiñisha wamumbanda. Talenu iyi nsañu.
Mavasi anafumihu ahosha hadi iyala welili wuvumbi nawamumbanda otawu ‘mumukala.’ Neyi yela mwenimu, wadiña namuloña wawuvumbi chineli ona mumbanda otawu amumweneña neyi wasumbuka. Indi wamumbanda? “Hatambekeluku.” Neyi watambekeli, antu adi kumutiya nawa adi kwinza nakumukwasha. Ilaña hatambekeliku. Dikwila nawu niyena wadiña nakwila wuvumbi, dichi wejima wawu ayinkeleña muloña.—Kuh. 22:23, 24.
Nshimbi yashimwini cheñi hachuma chikwawu chambukaku nawu: “Ilaña neyi chañadima otawu dehi akamuwana kudi iyala mumpata, iyala hakumukwata nañovu hakukama nindi; iyala akamayi nindi diyi wakafwa hohu; chañadima kwindi kumwila chuma nehi; chañadimowu hakweti kwindi chitela chakufwilaku; chidi neyi muntu wukunyamukila mukwawu hakumutapa dimu mwaya ninsañu iyi; muloña wamuwana mumpata, nichañadima otawu watambeka, Hikwadiñi wakumwamwinaku.”—Kuhit. 22:25-27.
Muniyi njila, ansompeshi adiña nakukuhwelela wunsahu wamumbanda. Munjilanyi? Elileña nawu “watambeka, hikwadiñi wakumwamwinaku.” Dichi yena helileñaku wuvumbiku. Ilaña iyala yena amwinkeleña muloña wakumukaama chakumukanjikija niwawuvumbi, ‘muloña wakumukwata nañovu hakukama nindi,’ mumbanda otawu.
Hela chakwila ilu lushimbi lwashindameneni hakuyiñisha wamumbanda, nsañu yalumbulwileña muloña wukweti iyala wunakami mumbanda chakumukanjikija nawu hiwuvumbi. Twatela kukuhwelela netu ansompeshi ‘ashinshikileña chiwahi haniyi nsañu’ nikufuukula kushindamena hanshimbi jashimwiniyi Nzambi kapampa kakavulu.—Kuhit. 13:14; 17:4; Kwid. 20:14