Munafumi Nsañu Yakuzatisha muChihandilu niMudimu Wanetu AkwaKristu Mukanda waKupompa
MARCH 5-11
YUMA YALEMA YAMWIZU DANZAMBI | MATEWU 20-21
“Muntu Wejima Wunakukeña Kwikala Muneni Hakachi Kenu, Watela Kwikala Mukwakuyikalakela”
(Matewu 20:3) Chayiliyi cheñi kwakwihi naora yamuchisatu, wamweni cheñi antu amakwawu anemani hachisankanu chakadi nyidimu yinakuzatawu;
nwtsty intaneti
Chisankanu
Yisankanu yikwawu, chidi neyi ichi chinateniwu muNsona yadiña kumukwakwa. Akwakulandisha atanjikileña yuma yawu mumukwakwa chakwila antu akañenyeña mwakuhitila. Antu amuchituñilu alandileña yuma yakuzatisha hetala yidi neyi yipwepu niyuma yikwawu. Chineli kwadiña kwosi mafurigi, antu ayileña kuchisankanu nakulanda yakuda hefuku-hefuku. Muntu neyi nayi nakulanda watiyileña nsañu yahosheleñawu akwakulandisha niañenji, anyana adiña nakuhema nawa antu ahembeleleña nawu ayiñiji nyidimu. Yesu wokileña antu akata muyoyeniyi yisankanu, Pawulu niyena dimwadiña nakushimwinayi. (Yil 17:17) Kwambukaku, ansoneki adiña adivwimba nawaFwarisi akeñeleña kuyimona kulema kudi antu amavulu nikuyimusha hanawa maluña.
(Matewu 20:20, 21) Dichi ñoda Zebedewu wenjili nawanyanindi awamayala kudi Yesu nakudifukula nakumulomba chuma chakeñeleñayi. 21 Yena wamwihwili nindi: “Wunakukeña chumanyi?” Iwu mumbanda wamwakwili nindi: “Inakulomba nami awa anyanami ayedi awamayala yiteji akashakami naneyi muWanta weyi, wumu kuchikasa cheyi chachidiilu, mukwawu nawa kuchikasa cheyi chachimunswa.”
nwtsty nsañu yakudiza yidi haMat 20:20, 21
ñoda Zebedewu: Diyi wadiña mama yakapostolu Yakoba niYowanu. Kwesekeja nansañu yasonekeliyi Maku, aYakoba naYowanu diwu ayili nakumuwana Yesu. Chakadi nikujina, awa anyana diwu alombeli, ilaña alombeli kuhitila mudi mama yawu, Salomi, wadiña mama yaYesu wakansi.—Mat 27:55, 56; Mak 15:40, 41; Yow 19:25.
wumu kuchikasa cheyi chachidiilu, mukwawu nawa kuchikasa cheyi chachimunswa: Tubadi twejima tunakumwekesha kulema niñovu, ilaña kabadi kakuchidiilu dikasweja kulema.—Ms 110:1; Yil 7:55, 56; Rom 8:34.
(Matewu 20:25-28) Ilaña Yesu wayitambikili kwinza kudi yena nakuyileja nindi: “Enu mweluka nenu anyuuli anyuza ekalaña nawuswa hadi antu jawu, nawa anlomboli niwena ekalaña nawuswa hadi antu jawu. 26 Ilaña enu bayi mwilaña mwenimuku; dichi muntu wejima wunakukeña kwikala muneni hakachi kenu, watela kwikala mukwakuyikalakela, 27 nawa muntu wejima wunakukeña kwikala watachi hakachi kenu, watela kwikala nduñu yenu. 28 Neyi chenjiliyi Mwana kamuntu, henjili nindi amukalakeliku, ilaña wenjili kulonda yakalakeli antu nikuhana wumi windi kwikala ifutu danyiloña dakukuula nachu antu amavulu.”
nwtsty nsañu yakudiza yidi haMat 20:26, 28
mukwakukalakala: Hela “nduñu.” Bayibolu kakavulu yazatisha izu dachiGiriki dakwila nawu di·aʹko·nos hakutena muntu wazataña nyidimu nakudizoza hakukalakela akwawu. Idi izu adizatisha hakutena Kristu, (Rom 15:8), akwakukalakala hela anduñu jaKristu (1 Ko 3:5-7; Kol 1:23), ankoñi akuzatila (Fwp 1:1; 1 Tim 3:8), kushilahu niakwakuzatila mwitala (Ywn 2:5, 9) niakulumpi janfulumendi (Rom 13:4).
amukalakeliku, ilaña wenjili kulonda yakalakeli: Hela “amuzatiliku, ilaña yayizatili.”
Kukeña Yuma Yalema yakuSpiritu
(Matewu 21:9) Kubombelahu, mazaza awantu adiña hambidi yindi ninowu amulondeleleña abidikileña nawu: “Tunakukulomba netu mwamwini Mwana kaDavidi! Wakiswilewa yowu muntu wenjilaña mwijina daYehova! Eyi wekala mwiwulu, tunakulomba netu mwamwini!”
nwtsty nsañu yakudiza yidi haMat 21:9
Tunakukulomba netu mwamwini: MuchiGiriki “Hozana.” Idi izu dachiGiriki dafuma kumazu achiHeberu atalisha mukwila nawu “tunakukulomba netu mwamwini” hela “amwamwini mwani.” Haniyi vasi, idi izu adizatisha kumwekesha kumulembelela Nzambi kulonda yamwini hela yashindi; anateli kudisoneka nawu “amwamwini mwani.” Mukuhita kwampinji, dekalili izu dakuzatisha hakulomba nihakushimeka. Izu dachiHeberu daHallel dekala haMas 118:25, adizatisheleña kudi ñimbi yaMasamu hakwimba tumina hachidika chaChipandakenu. Dichi, awa mazu wayanukileña hanichi chidika. Nzambi wakwili iku kulomba kwakwamwina Mwana kaDavidi kuhitila mukumusañula. HaMat 21:42, Yesu yomweni wahosheli mazu ekala haMas 118:22, 23 hakutena Mesiya.
Mwana kaDavidi: Awa mazu amwekeshaña mutaña mwafumayi Yesu nimudimu windi wakwikala Mesiya akaniniwu.
(Matewu 21:18, 19) Chafuntileñayi mumusumba nabudidi, watiyili nzala. 19 Wamweni mutondu wachikuyu wadiña kwakwihi nanjila nawa wayiliku, ilaña hawaniniku nyikabuku, kwadiña hohu mafu, dichi walejeli owu mutondu nindi: “Bayi wakasoña cheñi nyikabuku.” Hohenohu mutondu wachikuyu washikeneni dakuuma.
Mutondu Wachikuyu Watudizishaña Kwikala naChikuhwelelu
Hanu dinu, muloñadi Yesu chomishililiyi iwu mutondu? Yomweni wayakwili atumbanji twindi nindi: “Inakuyileja chalala nami, neyi mukweti chikuhwelelu nawa mubula kujinoka, bayi neyi mukwila hohu chinneli ami naniwu mutondu wachikuyuku, ilaña hela muleja iyi mpidi nenu, ‘Fumaku aha wudinatili mukaluñalwiji,’ yikwila mwomwenomu. Dichi neyi mukweti chikuhwelelu, yuma yejima yimukulomba, mukutambwila.” (Matewu 21:21, 22) Nakuhosha chikuma chochimu chahoshayi hakusambila kutalisha hachikuhwelelu chichinateli kutuntulula mpidi.—Matewu 17:20.
Dichi chomishiliyi mutondu, Yesu wamwekesheli nindi twatela kumukuhwelela Nzambi. Wahosheli nindi: “Yuma yejima yimwalombaña, kuhwelelenu nenu munayitambwili dehi nawa mukekala nayu.” (Maku 11:24) Atumbanji twaYesu ejima ateleleli kudizilaku chikupu! Sweje-e, chumichi chikuyikwasha apostolu kuumika kukala kukumwekana hambidi. Kuuma kwaniwu mutondu wachikuyu kwadifwana nachilwilu chachikuhwelelu.
Kufwana iwu mutondu wachikuyu, muza wawaIsarela wadiña nakwila yuma yacheñi. Antu amuniwu muza adi nachitiyañenu chakwikala amabwambu jaNzambi nawa anakumwekana neyi anakulondela Nshimbi jindi. Hela chochu, muza wejima wunamwekeshi kubula chikuhwelelu nawa hiyanakusoña nyikaabu yayiwahiku. Anamukani niMwana kaNzambi. Dichi, chomishiliyi mutondu wachikuyu wabulileña kusoña nyikaabu, Yesu wamwekesheli chuma chikamwekena muza wabulaña kusoña nyikabu nawa wabula chikuhwelelu.
Kutaña Bayibolu
(Matewu 20:1-19) “Muloña Wanta wamwiwulu wudi neyi mwini itala wamenekeli budidi nakukeña akwakukalakala mwitempa dindi danyivinyu. 2 Chelili natiyañani dehi nawakwakukalakala nindi wukuyifweta denari yimu-yimu hefuku, wayitemesheli kuya mwitempa dindi danyivinyu. 3 Chayiliyi cheñi kwakwihi naora yamuchisatu, wamweni cheñi antu amakwawu anemani hachisankanu chakadi nyidimu yinakuzatawu; 4 niwena wayilejeli nindi, ‘Ninenu nawa yenu mwitempa danyivinyu, nukuyifweta wufwetu washikila.’ 5 Dichi ayili. Cheñi wayili kwakwihi naora yamu 6 nihaora yamu 9 nawa welili mwomumu. 6 Nkumininaku, kwakwihi naora yamu 11, wayili cheñi nawa wawanini antu amakwawu anemajali, wayihwili nindi, ‘Muloñadi chimunemeni hanu ifuku damukuma chakadi nyidimu yimunakuzata?’ 7 Wena amwakwili nawu, ‘Muloña kwosi muntu wunatwiñiji nyidimu.’ Yena wayilili nindi, ‘Ninenu nawa yenu mwitempa danyivinyu.’ 8 “Chikwelili melela, mwini itempa walejeli kapitawu kindi nindi, ‘Tambikaku akwakukalakala kulonda wuyinki wufwetu wawu, wutachiki nawantu akuminaku nawa wukumishiku nawantu asambila.’ 9 Akwakukalakala atachikili kuzata haora yamu 11 chenjiliwu, wayifweteli denari yimu-yimu wejima wawu. 10 Chenjili akwakukalakala asambililiku, atoñojokeli nawu akutambula wufwetu weneni, ilaña niwena ayifweteli denari yimu-yimu. 11 Chatambwiliwu nfwetu yawu, atachikili kumutoobela mwini itala 12 nawu, ‘Awa antu akuminaku anazati hohu ora yimu; ilaña wunayifweti wufwetu wowumu nanetu tunazati ifuku damukuma nakuha nankanza!’ 13 Ilaña yena walejeli wumu hakachi kawu nindi, ‘Eyi mukwetu, ami naluwañeshi wanyi. Komana hitwatiyañana kukwinka denari yimuku? 14 Tambulaku denari yeyi wuyeña. Inakukeña kufweta awa akuminaku neyi chinnakufweti eyi. 15 Komana hinikweti wuswa wakwila chuma chinnakukeña nayuma yamiku? Indi kwiji wunatiyi ichima muloña wakwila nayilili chuma chachiwahi?’ 16 Dichi, antu anakuminiku akekala akusambila nawa antu anasambiliku akekala akukuminina.” 17 Chayileñawu kuYerusalema, Yesu watambikili atumbanji 12 kwakankawawu hampinji yayileñawu munjila nakuyileja nindi: 18 “Tiyenu! Tunakukanduka nakuya kuYerusalema nawa Mwana kamuntu akumuhana mumakasa awakulumpi jawatupristu niansoneki. Dichi wena akumusompeshela kukufwa. 19 nawa akumuhana kudi antu akunyuza kulonda amusupishi nakumuvupola nikumujahila hamutondu; hefuku damuchisatu akamusañula.”
MARCH 12-18
YUMA YALEMA YAMWIZU DANZAMBI | MATEWU 22-23
“Ovwahilenu Nshimbi Jiyedi Jabadika Kulema”
(Matewu 22:36-38) “Ntañishi, lushimbinyi lwabadika haNshimbi jejima?” 37 Yena wamwakwili nindi: “‘Keñaku Yehova Nzambi yeyi namuchima weyi wejima, nawumi weyi wejima, nayitoñojoka yeyi yejima.’ 38 Ilu dilu lushimbi lwabadika nawa lwakusambila.
nwtsty nsañu yakudiza yidi haMat 22:37
muchima: Muchifwikija, idi izu datalisha kuwuntu wamukachi. Neyi mazu akwila nawu “wumi” “nayitoñojoka” ayizatishila hamu, chakadi nikujina alumbululaña yitoñojoka yamuntu, yuma yafwilañayi nichatiyañayi. Mazu asatu azatishawu hanu (muchima, wumi niyitoñojoka) bayi neyi dichatela kwilayi muntuku; ilaña ayizatisha kulonda akonkomweni hachikuma chakwila nawu muntu watela kumukeña Nzambi chikupu.
wumi: Hela “muntu yomweni.”
yitoñojoka: Dikwila nawu kashinshi. Muntu watela kuzatisha kashinshi kindi hakwila nawu yamwiluki Nzambi nikumukeña. (Ywn 17:3; Rom 12:1) Nsañu yayeni yachiHeberu yekala haKuh 6:5 hafuma awa mazu azatishahu mazu asatu akwila nawu, ‘muchima, wumi niñovu.’ Hela chochu, kwesekeja nansañu yasonekeliyi Matewu neyi chasonekawu muchiGiriki azatishili izu dakwila nawu “yitoñojoka” chatela azatishi izu dakwila nawu “ñovu.” Kudi yuma yaletesheli azatishi awa mazu ambuka. Chatachi, hela chakwila aHeberu akushankulu hiyadiña nezu dimu dakutena “yitoñojokaku,” idi izu adibombeleleña kwizu dachiHeberu dakwila nawu “muchima.” Idi izu adizatisha muchifwikija hakutena wuntu wamukachi, kushilahu niyitoñojoka yamuntu, chatiyañayi, yilwilu yindi niyuma yaleteshaña yeli chuma. (Kuh 29:4; Ms 26:2; 64:6; talenu nsañu yakudiza yidi haniyi vasi yinakuhosha hamuchima.) Chumichi dichaletesha hazatishawu “muchima” muchiHeberu, muSeptuagint yachiGiriki kakavulu azatishahu izu dadifwanaku dachiGiriki dakwila nawu “yitoñojoka.” (Kut 8:21; 17:17; Yis 2:10; Isa 14:13) Chikuma chikwawu chaletesheli Matewu yasoneki izu dachiGiriki dakwila nawu “yitoñojoka” chatela yasoneki izu dakwila nawu “ñovu” hazatishileñayi mazu ekala haKuh 6:5 chidi chakwila nawu izu dachiHeberu dakwila nawu “ñovu” dinateli kwikala ñovu jakumujimba hela jamuyitoñojoka. Hela chochu, kwambuka kwanawa mazu ayedi achiHeberu nachiGiriki kunateli kutukwasha kwiluka chuma chaletesheli ansoneki aNsañu yayiwahi abuli kusoneka mazu wowamu hampinji yazatishileñawu mazu ekala haKuhituluka.
(Matewu 22:39) Lushimbi lwamuchiyedi ludi neyi ilu, lwakwila nawu: ‘Keñaku mukwenu neyi chiwadikeña eyi aweni.’
nwtsty nsañu yakudiza yidi haMat 22:39
Lwamuchiyedi: HaMat 22:37, asonekahu mazu akwiliyi Yesu aFwarisi, nawa Yesu watwalekelihu kuyakula nakuhosha mazu amulushimbi lwamuchiyedi (Lev 19:18), watalishili mukwila nindi nshimbi jejima jiyedi jendelaña hamu nawa dihashindamena Nshimbi jejima nimazu awaTuprofwetu.—Mat 22:40.
mukwenu: Idi izu dachiGiriki dakwila nawu “mukwenu” (muchiGiriki, “muntu wudi mukamwihi”) bayi neyi datalisha hohu kudi antu itwashakamaña nawu mukamwihiku. Dinateli kutalisha cheñi kudi muntu itwadikunda nindi.—Luk 10:29-37; Rom 13:8-10.
(Matewu 22:40) Haniji nshimbi jiyedi dihashindamena Nshimbi jejima nimazu awaTuprofwetu.”
nwtsty nsañu yakudiza yidi haMat 22:40
Nshimbi . . . aTuprofwetu: “Nshimbi” hinyikanda yamuBayibolu kufuma kuKutachika nakushika kuKuhituluka. “aTuprofwetu” hinyikanda yawuprofwetu yaNsona jachiHeberu. Hela chochu, neyi awa mazu ayitenena hamu dikwila nawu anakutena Nsona jejima jachiHeberu.—Mat 7:12; 22:40; Luk 16:16.
dihashindamena: Izu dachiGiriki dakwila nawu “kushindamena” anadizatishi muchifwikija, dikwila nawu “kulemenahu; kukinkahu manuñu.” Dichi Yesu wamwekesheli nindi Nshimbi Ikumi niNshimbi jekala muNsona jachiHeberu jejima jashindamena hakukeña.—Rom 13:9.
Kukeña Yuma Yalema yakuSpiritu
(Matewu 22:21) Wena amwakwili nawu: “JaKesari.” Yena wayilili nindi: “Yuma yaKesari, mwinkenu Kesari nawa yuma yaNzambi, mwinkenu Nzambi.”
nwtsty nsañu yakudiza yidi haMat 22:21
Yuma yaKesari, mwinkenu Kesari: Iyi ñakwilu yaYesu yasonekawu nihanyikanda yikwawu yidi neyi Mak 12:17 niLuk 20:25, diwu mazu ahosheliyi yomweni asonekawu ayakwiliyi anyuuli awaRoma. “Yuma yaKesari” mwabombela nyisonku yahanañawu antu kunfulumendi, kalemesha nikwovwahila anlomboli amuchidiwu.—Rom 13:1-7.
yuma yaNzambi, mwinkenu Nzambi: Yumiyi yabombelamu kudifukula kudi Nzambi chakufuma hamuchima, kumukeña nawumi wejima nikumwovwahila chikupu.—Mat 4:10; 22:37, 38; Yil 5:29; Rom 14:8.
(Matewu 23:24) Enu anlomboli amputamesu, mwakelulaña ñweneni, ilaña ngameli mwamuminyaña!
nwtsty nsañu yakudiza yidi haMat 23:24
mwakelulaña ñweneni, ilaña ngameli mwamuminyaña: Ñweneni ningameli yadiña yileñaleña yanyanya niyamaneni yamajilu yelukiliwu aIsarela. (Lev 11:4, 21-24) Yesu wazatishili iyi nhoshelu hakulumbulula yilwilu yadiña nawanlomboli amunsakililu adiña nakukelula ñweneni kuwalwa kulonda wubuli kwikala namajilu, ilaña akaanini kulondela yuma yalema yamuNshimbi, dikwila nawu kuminya ngameli.
Kutaña Bayibolu
(Matewu 22:1-22) Yesu wahosheli cheñi nawu nayakutalilahu, nindi: 2 “Wanta wamwiwulu anateli kuwesekeja namwanta waloñesheli chawija chawulu wamwanindi weyala. 3 Dichi watemesheli anduñu jindi kulonda ayi nakuleja antu atambikiliyi enzi kuchawija chawulu, ilaña hiyakeñeleña kwinzaku. 4 Watemesheli cheñi anduñu amakwawu nakuyila nindi, ‘Yenu muleji antu ejima innatambiki nenu: “Naloñeshi dehi yakuda, najahi yizamba yami yañombi niyimuna yami yanuna nawa yuma yejima yakuloñesha dehi. Inzenu kuchawija chawulu.”’ 5 Ilaña awa antu ashiliku maana wanyi, elili iwu yaya kwiha dindi, mukwawu niyena kumudimu windi wakulandulula; 6 Ilaña antu amakwawu ashalilihu, akwatili owu anduñu jindi nakuyikabisha nikuyijaha. 7 “Dichi mwanta wazuwili nankashi nawa watemesheli mashidika indi kuya nakujaha awa antu ajahañeni nikuyochela musumba wawu. 8 Kuhiñahu walejeli anduñu jindi nindi, ‘Chawija chawulu anachiloñeshi dehi, ilaña antu innatambiki hiyanateleli kwinza kuchawija chawuluku. 9 Dichi, yenu munyikwakwa yinafumi mumusumba nawa mutambiki muntu wejima wumukuwana kulonda yenzi kuchawija chawulu.’ 10 Owu anduñu ayili munyikwakwa kwesekeja nachayilejeliwu nawa apompesheli antu ejima awaniniwu, amawahi niatama; nawa kapeka kachidika chawulu kenzeli to-o nawantu enjili nakuda. 11 “Mwanta chenjiliyi nakutala antu enjili, wamweni iyala wumu wabulili kuvwala chakuvwala chahawulu. 12 Dichi wamwihwili nindi, ‘Eyi mukwetu, wuneñili ñahi munu chakadi kuvwala chakuvwala chahawulu?’ Yena niizu dakuhoshahu nehi. 13 Kuhiñahu mwanta walejeli ambuñindi nindi, ‘Mukasenu kumakasa nikunyendu mumunatili hanji mumwidima. Mwenomu dimu mukudililañayi nikudisumona kumazewu.’ 14 “Muloña antu anatambikiwu amavulu, ilaña anatondiwu antesha.” 15 Dichi aFwarisi ayili nakumushakamina hampuña kulonda amwinki muloña namazu akuhoshayi. 16 Atemesheli atumbanji twawu kudi yena hamu nawakwakumulondela Herodi, nakumwila nawu: “Ntañishi, tweluka netu wahoshaña mwalala nikutañisha njila yaNzambi muchalala nawa hiwakeñaña wukwashu kudi muntuku, muloña hiwatalaña antu kumesuku. 17 Tuleji, wukuhoshahu neyidi? Komana nshimbi yeteja kuhana musonku kudi Kesari tahindi nehi?” 18 Ilaña Yesu chelukiliyi yitoñojoka yawu yatama, wayihwili nindi: “Enu anfwikiji, muloñadi chimunakuñesekela? 19 Tutalenu mali imwahanaña kumusonku.” Dichi wena amuleteleli denari yimu. 20 Yena wayihwili nindi: “Indi iwu mutu ninsona jidi aha, janyi?” 21 Wena amwakwili nawu: “JaKesari.” Yena wayilili nindi: “Yuma yaKesari, mwinkenu Kesari nawa yuma yaNzambi, mwinkenu Nzambi.” 22 Chatiyiliwu awa mazu, ahayamini, amushili nakuya kwacheñi.
MARCH 19-25
YUMA YALEMA YAMWIZU DANZAMBI | MATEWU 24
“Twalekenuhu Kwikala Atona kuSpiritu Munanu Mafuku Akukuminina”
(Matewu 24:12) chineli kuluwalala kukasweja, kukeña kwawantu amavulu kwakakeha.
it-2 279 ¶6
Kukeña
Kukeña kwaMuntu Kunateli Kukeha. Yesu hakuleja atumbanji twindi hayuma yikamwekana kumbidi wamwekesheli nindi kukeña (a·gaʹpe) kwawantu amavulu ahoshaña nawu amukuhwelela Nzambi kwakakeha. (Mat 24:3, 12) Kapostolu Pawulu wahosheli nindi, mumpinji jakala, antu akekala “asweja kukeña mali.” (2 Tim 3:1, 2) Dichi, muntu nateli kuleka kuzatisha yishina yayiwahi nawa kukeña kwadiñayi naku hakusambila kunateli kukeha. Chumichi chinakumwekesha nawu twatela kutwalekahu kumwekesha kukeña kuhitila mukutoñojokahu chikupu Hezu daNzambi nikuhimpa chihandilu chetu kwesekeja nachahosha yishina Yindi.—Efw 4:15, 22-24.
(Matewu 24:39) wena hiyashiliku maanaku, nichenjili Dibaji nakuyijilumuna wejima wawu. Nimpinji yakwikalahu kwaMwana kamuntu dichiyikekala.
w99 11/15 19 ¶5
Komana Munakuzata Mudimu Wayinkayi Nzambi?
Yesu Kristu wahosheli kutalisha kuyinu mpinji yakala nindi: “Neyi chochichadiña mumafuku aNowa, dichichakekala nihakwikalahu kwaMwana kamuntu. Muloña mumafuku wenowu chelili Dibaji kanda dinzi, antu adiileña nikunwa, amayala asumbwileña, ambanda asumbukileña kushika nihanodu ifuku deñililiyi Nowa muwatu, wena hiyashiliku maanaku, nichenjili Dibaji nakuyijilumuna wejima wawu. Nimpinji yakwikalahu kwaMwana kamuntu dichiyikekala.” (Matewu 24:37-39) Kuda, kunwa, nikwiñila muwulu kwatama wanyi muloña Nzambi diyi washiliku iyi ntanjikilu. (Kutachika 2:20-24) Hela chochu, neyi tumona netu iyi yuma yinakutuluwañesha, twatela kumulomba Nzambi yatukwashi. Yehova nateli kutukwasha kutwamijaku Wanta hambidi, kwila yuma yaloña, nikuzata mudimu watwinkayi.—Matewu 6:33; Aroma 12:12; 2 Akorinda 13:7.
(Matewu 24:44) Dichi hamuloña wachumichi, ninenu nawa diloñeshelenu chadimu, muloña Mwana kamuntu wakenza hampinji yimwakabula kumukuhwelela nenu nakwinza.
Atumbanji Anakwihula Chinjikijilu
Wahosheli nindi atumbanji twindi atela kwikala asoñama, atona nawa adiloñesha. Yesu wakonkomweneni iku kusoñamisha nachakutalilahu chakwila nawu: “Ilukenu chumichi: Neyi mwini itala welukili chilu chikwinzayi ikombi, mutenowu wadi kutwalekahu nakutona nawa hadi kumwiteja ikombi kulokola nakwiñila mwitala dindiku. Dichi hamuloña wachumichi, ninenu nawa diloñeshelenu chadimu, muloña Mwana kamuntu wakenza hampinji yimwakabula kumukuhwelela nenu nakwinza.”—Matewu 24:43, 44.
Kukeña Yuma Yalema yakuSpiritu
(Matewu 24:8) Yuma yejimiyi yakekala dikutachika kwayihuñu.
nwtsty nsañu yakudiza yidi haMat 24:8
yihuñu: Idi izu dachiGiriki datalisha kunyisoñu yatiyañayi mumbanda hakuvwala. Hela chakwila dinateli kutalisha kuyihuñu, nyisoñu nimakabi ejima, tunateli kuhosha cheñi netu kufwana nyisoñu yatiyañayi mumbanda hakuvwala, kukala nimakabi iyashimwineñahu dehi jikasweja chikupu henohu lukadi lwasweja lwashimunawu haMat 24:21 kanda lutachiki.
(Matewu 24:20) Dichi lombenuña kulonda lwendu lwenu lwakabuli kwikalaku mumpinji yamashika hela hefuku daSabata;
nwtsty nsañu yakudiza yidi haMat 24:20
mumpinji yamashika: Muniyi mpinji chadiña chakala kwenda, kuwana yakuda nihakukama muloña kwekalaña nvula jamaneni, dibaji nimashika.—Ezr 10:9, 13.
hefuku daSabata: Maluña adi neyi Yudeya, chakalileña kwenda iluña dadilehi, kusenda yiteli yalema muloña wanshimbi yaSabata; nawa yenzelu ayishinkileña hefuku daSabata.—Talenu Yil 1:12 nichibalu 16 mu sgd.
Kutaña Bayibolu
(Matewu 24:1-22) Dichi Yesu chafumineñayi mutembeli, atumbanji twindi enjili kwadiñayi kulonda amuleji matala ahatembeli. 2 Yena wayihwili nindi: “Yuma yejimiyi munayimoni? Inakuyileja chalala nami, awa malola adi hanu, hosi ilola nidimu dakashala hewulu delola dikwawu dakabula kwalumunawuku.” 3 Chashakaminiyi haMpidi yaMaolivi, atumbanji enjili nakumuwana kwakankawawu, nakumwihula nawu: “Tuleji, mpinjinyi yakamwekana yumiyi, nawa chinjikijilwinyi chikamwekesha kwikalahu kweyi nikukuma kwanshakaminu yamakonu?” 4 Yesu wayakwili nindi: “Babalenu kulonda abuli kuyiluwañesha kudi muntu hela wumu, 5 muloña antu amavulu akenjila mwijina dami, nakuhosha nawu, ‘Yami Kristu,’ nawa akadimba antu amavulu. 6 Mwakatiya nsañu jamajita mukamwihi nikwakulehi. Bayi mwakatiya womaku, muloña yumiyi yatela kumwekana henohu kukuma kuchidi kanda kwinzi. 7 “Muloña muza wakanyamuka nakuzuña namuza wukwawu, wanta niwena wakanyamuka nakuzuña nawanta wukwawu, kwakekala nzala yakapwelendendi ninyitentanshi kweñi-nakweñi. 8 Yuma yejimiyi yakekala dikutachika kwayihuñu. 9 “Antu akayikabisha enu nikuyijaha nawa akayihela kudi akwanyuza yejima kukoola ijina dami. 10 Cheñi, antu amavulu akaleka kukuhwelela nawa akadifukejelaña nikudihela wumu namukwawu. 11 Kwakenza atuprofwetu akutwamba amavulu akadimba antu amavulu, 12 chineli kuluwalala kukasweja, kukeña kwawantu amavulu kwakakeha. 13 Ilaña muntu wakomika kushika nikunsa, diyi akamwinawu. 14 Ninsañu iyi yayiwahi yaWanta akayishimwina mwahita iseki dejima mwashakamawu antu kulonda yikekali wunsahu kudi akwanyuza yejima, mwaka dinu kukuma kwakenzi. 15 “Dichi, chimwakamona chuma chawuzondu chakisañanaña yuma, neyi chahosheliwu kuhitila mudi kaprofwetu Danyeli, chinemani mwiluña dajila (muntu wunakutaña watela kuzatisha kashinshi kulonda yatiyishishi munatalishi iyi nsañu), 16 dichi antu akekala muYudeya akatachiki kutemukila kumapidi. 17 Muntu wakekala hewulu detala, bayi yakasuluka nakusenda yuma yidi mwitala dindiku, 18 nawa muntu wakekala mwiha, bayi yakafunta nakunona chakuvwala chindi chahewuluku. 19 Oyihuñu yakamonawu ambanda akekala namavumu niambanda akekala nawanyana anyanya mumafuku wenowu! 20 Dichi lombenuña kulonda lwendu lwenu lwakabuli kwikalaku mumpinji yamashika hela hefuku daSabata; 21 muloña hanoyu mpinji kwakekala lukadi lwasweja lwakwila kanda lwikaleñaku dehi kufuma hatachikiliyi Nzambi kuleña yuma kushika nikulelu nawa hilwamba kamwekanahu cheñiku. 22 Kafwampi, neyi kuyihihisha owu mafuku nehi, kwosi muntu niwumu akamwinawuku; ilaña wakayihihisha owu mafuku muloña wawantu atondewa.
MARCH 26–APRIL 1
YUMA YALEMA YAMWIZU DANZAMBI | MATEWU 25
“Tonenuña”
(Matewu 25:1-6) Wanta wamwiwulu anateli kuwesekeja nawambanda ajiki 10 asendeli manoñu awu kulonda ayi nakukinkilila kalemba. 2 Hakachi kanowu ambanda, atanu adiña abula maana, atanu adiña namaana. 3 Owu abula maana asendeli manoñu awu ilaña hiyasendelihu manji amakwawuku, 4 ilaña owu adiña namaana asendeli manji amakwawu munyilondu hamu nimanoñu awu. 5 Chelili kalemba walabili kwinza, atachikili kunoñoka nawa akaamini. 6 Hakachi kawufuku, atiyili antu abidikileña nawu: ‘Kalemba nashiki! Yenu mukamukinkilili.’
(Matewu 25:7-10) Dichi owu ambanda ajiki ejima ahindukili kulonda ashi manji mumanoñu awu. 8 Owu abula maana alombeli manji kudi adiña namaana nawu, ‘Twinkenuhu manji, muloña manoñu etu keña ajimi.’ 9 Owu ambanda ajiki adiña namaana ayakwili nawu: ‘Hadaha hitukuwanina wejima wetuku. Dichi yenu kudi antu alandishaña manji kulonda mulandi enu.’ 10 Chayileñawu nakulanda manji, kalemba wenjili. Owu ambanda ajiki adiloñesheli eñilili nindi mwitala mwadiña chawija nawa chenzelu achenzeli.
(Matewu 25:11, 12) Chimwahitili mpinji, owu ambanda ajiki abula maana niwena enjili, nakubidika nawu, ‘Kalemba, Kalemba, twenzunwiniku!’ 12 Yena wayakwili nindi, ‘Kuyileja hohu chalala, nayiluki wanyi.’
Kukeña Yuma Yalema yakuSpiritu
(Matewu 25:31-33) “Mwana kamuntu chakenzayi mukulema kwindi hamu nawañelu ejima, wakashakama hetanda dindi dakulema. 32 Akwanyuza yejima akayipompesha kumesu indi nawa yena wakaambula antu neyi chaambulañayi kabiña anyikoku hadi ampembi. 33 Dichi anyikoku wakayisha kuchikasa chindi chachidiilu, hakwila ampembi wakayisha kuchikasa chindi chachimunswa.
Kukwasha Ana kwaKristu naKashinshi
Makonu, tweluka chikupu mwatalisha chishimu chawanyikoku niampembi. Kutalisha hamuntu ashimunawu, Yesu diyi “Mwana kamuntu” nawa Mwanta. Antu atenawu nawu ‘ana kwami’ hiyamayala niambanda awayishawu naspiritu akayuulila hamu naKristu mwiwulu. (Rom. 8:16, 17) “Anyikoku” ‘niampembi’ emenañaku antu akunyunza yejima. Awa antu ayiwayisha wanyi naspiritu yajila. Indi mpinji yakusompesha yikashika mwakanyi? Yesu wakasompesha antu kwakwihi nakumana kwalukadi lweneni ludi mukamwihi. Chumanyi chikaletesha antu akayisompeshi nawu anyikoku hela ampembi? Yuma yikafumamu yashindamena hachahembañawu ashalahu ana kwaKristu awayishewa naspiritu achidi hamaseki. Chineli kukuma kwakanu kaayi kudi kukamwihi, twamusakililaña Yehova chikupu muloña nakulumbulula chovu-chovu mwatalisha ichi chishimu niyishimu yadifwanaku yasonekawu mumukanda waMatewu kapetulu 24 ni 25!
(Matewu 25:40) Mwanta wakayakula nindi, ‘Inakuyileja chalala nami, yuma yejima yimwakoñeleli wumu hakachi kanawa anakwami akehelamu, dikwila nawu mwankoñeleli ami.’
w09 10/15 16 ¶16-18
“Mukwikala Amabwambu Jami”
Neyi mwachiñejaña kushakama hamaseki nakuyuulewa naWanta waNzambi, munateli kumwekesha ñahi wubwambu wenu kudi amana kwaKristu? Tushinshikenu hanjila jisatu. Chatachi, kuhitila mukukalakala namuchima wejima mumudimu wakushimwina. Kristu walejeli amana kwindi kushimwina nsañu yayiwahi mukaayi kejima. (Mat. 24:14) Hela chochu, amana kwaKristu ashalahu hanu hamaseki kachi chayikalila kukalakala iwu mudimu chakubula kuyikwashaku kudi alundanawu anyikoku acheñi. Chalala, mpinji yejima antu amwizaza dawanyikoku acheñi akalakalaña mudimu wakushimwina, akwashaña amana kwaKristu kulonda kukalakala mudimu wawu wajila. Kristu nizanvu danduñu wamaana nikashinshi ahamekaña hawubwambu wamuchidiwu.
Njila yamuchiyedi anyikoku acheñi yatela kukwashilamu amana kwaKristu yekala yakukwasha mudimu wakushimwina kuhitila mukuhana mali. Yesu wakolesheli atumbanji twindi kukwata wubwambu kuhitila ‘mumaheta amunu mwishina.’ (Luka 16:9) Bayi neyi tunateli kulanda wubwambu naYesu hela naYehovaku. Neyi tuzatisha maheta etu kulonda kukwasha Wanta waYehova ninyidimu yamuchipompelu chahanu hamaseki, dikwila nawu tunakumwekesha wubwambu wetu nikukeña bayi neyi mumazu hohu, ilaña “nikwila mutwahoshaña.” (1 Yowanu. 3:16-18) Twahanaña yawaana yeniyi neyi tukalakala mumudimu wakushimwina, neyi tuhana mali kumudimu wakutuña nikuwahisha matala itwapompelañamu, nikuhana mali kulonda kukwasha mudimu wakushimwina wamukaayi kejima. Chili twahaninaña hantesha chili heneni, Yehova niYesu ahamekaña neyi tuhana namuzañalu.—2 Kor. 9:7.
Njila yamuchisatu yitwamwekeshelañamu netu tudi amabwambu jaKristu yekala yakwovwahila nshimbi yahanañawu aeluda amuchipompelu. Amayala wenawa ayitondaña kudi spiritu yajila kuhitila muwunlomboli waKristu. (Efwe. 5:23) Kapostolu Pawulu nindi: “Ovwahilenu anlomboli jenu nakuyitiyilila.” (Heb. 13:17) Mpinji jikwawu, chinateli kutukalila kwovwahila nshimbi jamuBayibolu jinateli kutwinkawu kudi aeluda. Neyi tweluka yiluwa yawu, chumichi chinateli kutwileñela kudiwula kufumba kwawu. Hela chochu, Kristu, Mutu wachipompelu, watiyaña kuwaha kuzatisha amayala wenawa abula kuwanina. Dichi, wubwambu wetu naKristu washindamena hachitwazataña nawunlomboli wahanañawu aeluda. Neyi tudiwula yiluwa yawaeluda nikulondela wunlomboli wawu, dikwila nawu twamukeña Kristu.
Kutaña Bayibolu
(Matewu 25:1-23) “Wanta wamwiwulu anateli kuwesekeja nawambanda ajiki 10 asendeli manoñu awu kulonda ayi nakukinkilila kalemba. 2 Hakachi kanowu ambanda, atanu adiña abula maana, atanu adiña namaana. 3 Owu abula maana asendeli manoñu awu ilaña hiyasendelihu manji amakwawuku, 4 ilaña owu adiña namaana asendeli manji amakwawu munyilondu hamu nimanoñu awu. 5 Chelili kalemba walabili kwinza, atachikili kunoñoka nawa akaamini. 6 Hakachi kawufuku, atiyili antu abidikileña nawu: ‘Kalemba nashiki! Yenu mukamukinkilili!’ 7 Dichi owu ambanda ajiki ejima ahindukili kulonda ashi manji mumanoñu awu. 8 Owu abula maana alombeli manji kudi adiña namaana nawu, ‘Twinkenuhu manji, muloña manoñu etu keña ajimi.’ 9 Owu ambanda ajiki adiña namaana ayakwili nawu: ‘Hadaha hitukuwanina wejima wetuku. Dichi yenu kudi antu alandishaña manji kulonda mulandi enu.’ 10 Chayileñawu nakulanda manji, kalemba wenjili. Owu ambanda ajiki adiloñesheli eñilili nindi mwitala mwadiña chawija nawa chenzelu achenzeli. 11 Chimwahitili mpinji, owu ambanda ajiki abula maana niwena enjili, nakubidika nawu, ‘Kalemba, Kalemba, twenzunwiniku!’ 12 Yena wayakwili nindi, ‘Kuyileja hohu chalala, nayiluki wanyi.’ 13 “Dichi tonenuña, muloña himuneluki ifuku hela mpinjiku. 14 “Iwu Wanta wudi neyi muntu wakeñeleña kuya kwituña dacheñi, watambikili anduñu jindi nakuyishila maheta indi. 15 Wumu wamwinkeli ntalenta jitanu, mukwawu jiyedi, mukwawu nawa yimu, wenkeli nduñu wejima kwesekeja nahakumina ñovu jindi nawa wayili kwituña dacheñi. 16 Hohenohu, nduñu watambwili ntalenta jitanu wayili nakujizatisha nawa wawanininihu jikwawu jitanu. 17 Nduñu watambwili ntalenta jiyedi niyena wawanininihu jikwawu jiyedi. 18 Ilaña owu nduñu watambwili ntalenta yimu wayili nakupunda heseki nawa waswekelihu mali ankaaka yindi. 19 “Chimwahitili mafuku amavulu, nkaaka yanowu anduñu wenjili kulonda yatali chinazatishiwu mali indi. 20 Dichi nduñu watambwili ntalenta jitanu wenjili nawa waletelelihu ntalenta jikwawu jitanu, nakuhosha nindi, ‘Nkaaka, wanshilili ntalenta jitanu; talaña, nawaninihu cheñi jikwawu jitanu.’ 21 Nkaaka yindi wamwilili nindi: ‘Wuzataña, eyi nduñu wamuwahi nawa washinshika! Wunashinshiki muyuma yantesha. Dichi inakukutonda wiikali kalama wayuma yayivulu. Zañalelaku hamu nankaaka yeyi.’ 22 Kuhiñahu owu nduñu watambwili ntalenta jiyedi wenjili nawa wahosheli nindi, ‘Nkaaka, wanshilili ntalenta jiyedi; talaña, nawaninihu cheñi jikwawu jiyedi.’ 23 Nkaaka yindi wamwilili nindi: ‘Wuzataña, eyi nduñu wamuwahi nawa washinshika! Wunashinshiki muyuma yantesha. Dichi inakukutonda wiikali kalama wayuma yayivulu. Zañalelaku hamu nankaaka yeyi.’