Malwihu Kufuma Kudi Antañi

Komana mazu akapostolu Pawulu ekala ha 1 Akorinda 15:29 atalisha mukwila nawu akwaKristu adiña nakupapatishewa kulonda emeniku antu afwa dehi?

Inehi, hosi hashimunawu muBayibolu hela munsañu yakunyaaka nawu chumichi chamwekeneña.

Chabalumunawu iyi vasi mumaBayibolu amakwawu chaletesha antu kutoñojoka nawu antu mumafuku awapostolu adiña nakupapatishewa kulonda emeniku antu afwa dehi. Chakutalilahu, ahoshaña nawu: “Neyi kwosi kusañuka, indi awa adiña nakupapatishewa kulonda emeniku antu afwa dehi akeladi?”

Hela chochu, talenu chahosheliwu antu ayedi adiza Bayibolu. Dr. Gregory Lockwood wahosheli nindi: “MuBayibolu hela munsañu yakunyaaka mwosi wunsahu wamwekeshaña nawu muntu wadiña nakupapatishewa kulonda yemeniku antu afwa dehi.” Professor Gordon D. Fee niyena wasonekeli nindi: “Kwosi wunsahu wamuBayibolu hela nsañu yakunyaaka yamwekeshaña nawu kwadiña kupapatishewa kwamuchidiwuku. MuTestamenta Yayiha hosi hasonekawu chumichi; kwosi cheñi wunsahu wamwekeshaña nawu chumichi achilileña kudi akwaKristu akusambila hela chechi yidi yejima yatuñiliwu hanyima yakwila apostolu anafwiku.”

Bayibolu yahosha nawu akwakumulondela Yesu ayilejeli ‘kwilisha antu akunyuza yejima kwikali atumbanji, kuyipapatisha . . . , nikuyidizisha kuhemba yuma yejima’ yayilejeliyi. (Mat. 28:19, 20) Henohu muntu kanda yekali kambanji wapapatishewa wateleli kumwiluka, kumukuhwelela nikumwovwahila Yehova niMwanindi. Muntu wafwa dehi hatwesheleña kwila yumiyiku; hela mukwaKristu wamumi hadiña nakumwililaku yumiyiku.—Mukwa. 9:5, 10; Yow. 4:1; 1 Kor. 1:14-16.

Hanu dinu Pawulu watalishili mudihi?

AkwaKorinda amakwawu akaanineña nawu afu hiyakayisañulaku. (1 Kor. 15:12) Pawulu wamwekesheli nindi iyi yitoñojoka yadiña yaluwa. Munjilanyi? Wayilejeli nindi ‘hefuku-hefuku watalañeneña nakufwa.’ Hela chochu, wachidiña wamumi. Hela chakwila wahitili muwubanji wawuvulu, wakuhweleli chikupu nindi neyi nafwi akamusañula namujimba wakuspiritu, neyi chamusañwiliwu Yesu.—1 Kor. 15:30-32, 42-44.

AkwaKorinda ateleleli kwiluka nawu kwikala mukwaKristu wawayishewa chatalisha mukwila nawu atela kumona kukala kwakuvulu nikufwa henohu kanda ayisañuli. ‘Kupapatishila mudi Kristu Yesu,’ mwabombela ‘kupapatishila mukufwa kwindi.’ (Rom. 6:3) Chumichi chatalishili mukwila nawu kufwana Yesu ateleleli kumona kukala nikufwa hakwila ayisañuli neyi Yesu.

Chimwahitili yaaka kubadika hayiyedi kufuma hamupapatishiliwu Yesu mumenji, walejeli apostolu indi ayedi nindi: “[Na]chipapatishu chinnakupapatishewa, ninenu dichi mukupapatishewa.” (Maku 10:38, 39) Hayina mpinji Yesu adiña kanda amupapatishi mumenji. Watalishili mukwila nindi kwikala washinshika kudi Nzambi kukumuleñela kufwa. Pawulu wasonekeli nindi awayishewa “akakabakena hamu nindi, kulonda [niwena] akayilemesheli hamu nindi.” (Rom. 8:16, 17; 2 Kor. 4:17) Dichi, niwena atela kufwa hakwila nawu akayisañuli nakuya mwiwulu.

Dichi mazu aPawulu atela kuyihosha nawu: “Neyi chidi mwenimu, antu anakupapatishawu nawu akafwi, akelañadi? Neyi afu akayisañula wanyi, hanu dinu, muloñadi chinakuyipapatishilawu nawu akafwi?”