Chahoshañawu Antu Kutalisha haKulomba
“Neyi nilomba natiyaña neyi Nzambi wudi kwakwihi nanami, nankwati kuchikasa nawa nakunlombola.”—MARÍA.
“Ñodami wafwili hanyima yakuyekela yaaka 13 nakansa. Inakwanuka nalombeleña kudi Nzambi ifuku dejima nawa nelukili nami watiyileña kulomba kwami niyihuñu yinamweneña. Dichi muchima wami wawundileña.”—RAÚL.
“Kulomba hichawaana chayinkawu antu kudi Nzambi.”—ARNE.
María, Raúl, Arne niantu amakwawu, amonaña nawu kulomba hichawaana chabadika muloña dimwahoshelañawu naNzambi, kumusakilila nikulomba wukwashu. Eluka nawu awa mazu ashimunawu muBayibolu kutalisha hakulomba kudi Nzambi alala: “Twamukuhwelela Nzambi netu, chuma chejima chitunateli kumulomba kwesekeja namwaya nkeñelu yindi, yena watutiyaña.”—1 Yowanu 5:14.
Ilaña amakwawu chayikalilaña kukuhwelela chahosha Bayibolu kutalisha hakulomba. Steve wahosheli nindi: “Hinadiña nayaaka 17, amabwambu jami asatu adiña mumaposu nawa afwili. Wumu wafwili namotoka, awa ayedi afwilili hamenji. Steve welilidi? “Namulombeli Nzambi kulonda yanleji chaletesheli ichi chuma chimwekani, ilaña wañakwili wanyi. Nadihwili nami, ‘innakulombeladi?’ Antu amavulu amonaña nawu kulomba kwawu akwakwili wanyi dichaleteshaña abuleña kumona kulomba nawu kwalema.
Kudi yuma yikwawu yaleteshaña antu amakwawu kubula kulemesha kulomba. Amakwawu ahoshaña nawu chineli Nzambi weluka yuma yejima, yitwakeñaña hela kukala kutwamonaña, hitwatela kumulejamu cheñi yuma yoyimuku.
Amakwawu akuhwelela nawu Nzambi wakaanaña kutiya kulomba kwawu muloña wayiluwa yakoñeliwu kunyima. Jenny wahosheli nindi: “Nekala nakukala kumu, nadimonaña nami nashikilamu wanyi.” Kudi yuma yatama yinelili yinaditoñeshaña, dichi namonaña nami Nzambi kwila yakula kulomba kwami nehi.”
Komana mwalemesha kulomba? Neyi ninenu dichimwatiyaña hela mwajinokaña neyi chakwila Nzambi wukutiya kulomba kwenu, mukutiya kuwaha kwiluka nenu muBayibolu mudi ñakwilu yinateli kuyikwasha. Yuma yashimunawu muBayibolu kutalisha hakulomba yalala;a yikuyikwasha kuwana ñakwilu yamalwihu adi neyi:
Komana Nzambi watiyaña kulomba kwetu?
Muloñadi chabulilañayi kwakula kulomba kwejima?
Mwatela kulomba ñahi hakwila Nzambi yatiyi kulomba kwenu?
Kulomba kunateli kuyikwasha ñahi?
a MuBayibolu mwekala kulomba kwawambuña aNzambi amavulu, kushilahu nikwaYesu Kristu. MuNsona jachiHeberu, jitwatenaña netu Chitiyañenu Chachikulu, mwekala kulomba kwakubadika ha 150.