Komana Munadiloñeshi ‘Kuswana Iseki’?

WEJIMA wetu twatalilaña kushikijewa kwachikaninu chaYesu chakwila nawu: “Adi namuzañalu wowu abulaña kuzuwa swayi, muloña akaswana iseki.” (Mat. 5:5) Awayishewa akaswana iseki kuhitila mukuyuula neyi anyanta mwiwulu hamu naYesu. (Chim. 5:10; 20:6) AkaKristu alala amavulu makonu atalilaña kuswana iseki nikushakamahu haya nyaaka mukuwanina, mukuwunda ninamuzañalu. Hakwila yuma yejimiyi yakashikijewi, akekala nanyidimu yayivulu yakuzata. Toñojokenu haniyi nyidimu yisatu: kudima iseki, kutambwila antu akasañuka nikuyidizisha chalala. Toñojokenu cheñi nichayinu mpinji chimunateli kumwekesha nenu munakukeña mwakazatiku iyi nyidimu.

KOMANA MUNADILOÑESHI KUDIMA ISEKI?

Yehova Nzambi chayilejeliyi antu nindi ‘enzeshi iseki nawa adiidimeña,’ wamwekesheli nindi iseki dejima dakekala paradisa. (Kutach. 1:28) Awa antu akashakamaña haya nyaaka hamaseki atela kwovwahila ilu lushimbi. Hakusambila iseki hidakekala paradisaku, muloña itempa daEdeni hidekalaku cheñiku. Hanyima yakwila njita yaamagedoni yinamani dehi, twakekala namudimu weneni wakuwahisha maluña akakisika hanu heseki. Iwu mudimu wakela himudimu weneni nankashi!

Chumichi chatwanukishaña mudimu wazatiliwu aIsarela hafuntiliwu kufuma kuBabiloni. Ituña dawu dashakamini dakadi antu hadi yaaka 70. Ilaña Isaya washimwineñahu dehi nindi nawukwashu waYehova, akadiwahisha cheñi. Iwu wuprofwetu washimwini nawu: “Wakelisha isaña dindi kwikala neyi Edeni nawa chana chindi chachinkalampata chakekala neyi itempa daYehova.” (Isa. 51:3) AIsarela atwesheli kuzata iwu mudimu. Munjila yoyimu, nawukwashu waYehova, ana akaswana iseki akatwesha kudiidima. Nichayinu mpinji munateli kumwekesha nenu munakufwila mwakazatiku iwu mudimu.

Njila yimu mumunateli kudiloñeshela, hikuhemba hetala denu nawunyonji nawa chachiwahi. Munateli kwila mwenimu hela chakwila antuñi nenu ekala nawunyonji wanyi. Munateli cheñi kuzataku mudimu wakuwahisha Itala denu daWanta niiluña himwapompelaña kupompa kwamaneni. Kwesekeja nachidi yuma muchihandilu chenu, munateli cheñi kusonekesha kuzataku mudimu wakukwasha antu adi muwubanji wadimwekenaña. Chumichi chikumwekesha nawu munakukeña kukwasha amanakwetu niahela adi mukukala. Dihulenu nenu: ‘Komana natela kudizahu nyidimu yimu yinakazataña neyi niikala nakukooleka kwakuswana iseki?’

Izanvu dawamanakwetu niahela anakuwahisha nikwakamena Itala daWanta.

KOMANA MUNADILOÑESHI KUTAMBWILA ANTU AKASAÑULAWU?

Hanyima yakwila namusañuli dehi mwana kaJayirusi wamumbanda, Yesu wahosheli nindi iwu mwana atela kumwinka yakuda. (Maku 5:42, 43) Kwakamena ona mwana wamumbanda wadiña nayaaka 12 wadiña himudimu wakala wanyi. Hela chochu, toñojokenu hamudimu wutwakekala nawu neyi Yesu nashikiji chikaninu chindi chakwila nawu, “antu ejima adi mumajamu achanukishu [akatiya] izu dindi nakufumamu.” (Yow. 5:28, 29) Hela chakwila Bayibolu yashimuna yuma yayivulu wanyi, twatela kwiluka netu antu akasañulawu akakeñekaña wukwashu hakwila akekali nayakuda, hakukaama niyakuvwala. Nichayinu mpinji, komana kwila mumwekesha nenu munadiloñeshi kukwashana nehi? Awa diwu malwihu imwatela kudihula.

Yumanyi yimwatela kwila chayinu mpinji yikumwekesha nawu munadiloñeshi kuswana iseki

Amanakwetu niahela anazañalali adi kwibulu dandeki anakutambwila amanakwetu anakwinza kukupompa kwamatuña muParis.

Neyi anabidiki nawu nkoñi wañinza wakendela chipompelu chenu, kwila mudihanahu kulonda mwakamutambiki kwitala denu nakudiila nindi hamu yakuda nehi? Neyi amanakwetu amumudimu wampinji yejima anafumi haBeteli nakwinza nakukalakela muchipompelu chenu indi kwiji nkoñi wañinza naleki mudimu windi wakwenda, kwila muyikwashaku kuwana hakushakama nehi? Neyi chakwila kupompa kweluña kwakekalila mwiluña denu, kwila mudihana kuzataku henohu kupompa kanda hela hanyima yakupompa, indi kwiji kutambwila antu akenzaña nehi?

KOMANA MUNADILOÑESHI KUDIZISHA ANTU AKASAÑULAWU?

Kwesekeja naYilwilu 24:15, tuneluki chikupu netu antu amavulu akayisañula. Amavulu akekala antu abulili kwikala nakukooleka kwakumwiluka Yehova. Dichi hanyima yakuyisañula akekala naniku kukooleka.a Ambuña aNzambi ashinshika eluka iwu mudimu diwu akayidizishaña. (Isa. 11:9) Muhela Charlotte wunazati mudimu wakushimwina muEurope, kuSouth America, nimuAfrica, nakutalila kuzataku iwu mudimu. Wahoshaña namuzañalu nindi: “Natalilaña kudizisha antu akasañulawu. Neyi nitaña hadi muntu wadiñaku kunyima, kakavulu natoñojokaña nami: ‘Iwu muntu neyi wamwilukili Yehova, kachi chihandilu chindi chadiña chambukaku.’ Natalilaña kuleja antu akasañuka yuma yabulili kwilukawu.”

Niambuña aYehova ashinshika adiñaku henohu Yesu kanda enzi hanu heseki akekala nayuma yayivulu yakudiza. Fwikijenu owu muzañalu wutwakatiya nikukooleka kutwakekala naku kwakumulumbulwila Danyeli kushikijewa kwawuprofwetu wasonekeliyi wabulili kutiyishishayi. (Dan. 12:8) Hela owu muzañalu wutwakatiya hakuyikwasha aNawomi naLuti kwiluka nawu mundonda yachisaka chawu dimwavwalikilili Mesiya! Twakadiluñishaña kushimwina antu ejima hanu heseki nawa hiyakatukañesha hela kutuluwañesha kudi antu atama adi mukanu kaayi katamaku!

Muhela nakwinka mumbanda wumu tilakiti mwiluña dakoselañawu.

Munateli kumwekesha ñahi chayinu mpinji nenu munadiloñeshi kulonda mwakazatiku iwu mudimu? Munateli kwila mwenimu kuhitila mukuzata nañovu kuwahishaku mudimu wenu wakushimwina nikuzataku mpinji yejima mumudimu wakushimwina wunakuzatewa mukanu kaayi makonu. (Mat. 24:14) Hela chakwila kukula indi kwiji kukala kukwawu kunakuyikañesha kuzataku nankashi iyi nyidimu, chimunakuzata nahanakumini ñovu jenu chinakumwekesha nawu munadiloñeshi kudizisha antu akasañulawu.

Mwamweni, chalema nankashi kutoñojoka hanawa malwihu, Komana munakufwila chikupu kuswana iseki? Komana munakutalila kudima iseki, kutambwila antu akasañulawu nikuyidizisha? Mukumwekesha nenu munadiloñeshi neyi mukuzatañaku nyidimu yinadifwani nanyidimu yimwakazataña himwakaswana iseki.

a Talenu chibaaba chinakwila nawu “Kukwasha Antu Amavulu Kwikala Aloña” muKaposhi Kakutalila kaSeptember 2022.