Tunateli Kushakama Haya Nyaaka

1. Kutoñojoka hachikaninu chaYehova chakwikala nawumi wahaya nyaaka kwatukwashaña kwiladi?

YEHOVA wakana nindi antu akumwovwahilaña akekala “[nawumi] wahaya nyaaka.” (Rom. 6:23) Neyi tutoñojokaña hayuma yatukanayi Yehova, twaswejaña kumukeña. Toñojokenu hachumichi: Tata yetu wamwiwulu watukeña nankashi chakwila hiyamba katwambula kudi yenaku.

2. Chikaninu chakwikala nawumi wahaya nyaaka chatukwashaña ñahi?

² Chikaninu chaNzambi chakutwinka wumi wahaya nyaaka chatukwashaña kuumika kukala kutunakumona makonu. Hela chakwila ayilumbu jetu akutuchiinisha nawu atujahi, hitukuleka kumukalakela Yehovaku. Muloñadi? Muloña tuneluki netu neyi tufwa iku twashinshika kudi Yehova, wakatusañula mudi afu nakwikala nakuchiñeja kwakubula kufwa cheñi. (Yow. 5:28, 29; 1 Kor. 15:55-58; Heb. 2:15) Muloñadi chitwatela kukuhwelela chikupu netu tunateli kushakama haya nyaaka? Talenu yuma yikuletesha tukuhweleli mwenimu.

YEHOVA WASHAKAMAÑA HAYA NYAAKA

3. Muloñadi chitukukuhwelela netu Yehova nateli kutuletesha kushakama haya nyaaka? (Isamu 102:12, 24, 27)

³ Tweluka netu Yehova nateli kutuletesha kushakama haya nyaaka muloña diyi Nsulu yawumi nawa washakamaña haya nyaaka. (Mas. 36:9) Talenu nsona jantesha jamuBayibolu jamwekeshaña nawu Yehova wekalañaku nawa wakekalañaku mpinji yejima. Isamu 90:2 dahosha nawu Yehova wekalañaku “kufuma kunyaaka oko-o nakuya haya nyaaka.” Isamu 102 nidena damwekeshaña chuma chochimu. (Tañenu Isamu 102:12, 24, 27.) Nawa kaprofwetu Habakuki wasonekeli kutalisha hadi Tata yetu wamwiwulu nindi: “Eyi Yehova, komana hiwudi wakunyaakaku? Eyi Nzambi yami, wami Wajila, wafwaña wanyi.”—Hab. 1:12.

4. Komana twatela kwakama neyi chinakutukalila kutiyishisha nsañu yahosha nawu Yehova wekalañaku mpinji yejima? Lumbululenu.

⁴ Komana chayikalilaña kutiyishisha nsañu yahosha nawu Yehova wekalaku “[haya] nyaaka nanyaaka”? (Isa. 40:28) Mudi nkawenu wanyi. Elihu wahosheli hadi Nzambi nindi: “Yaaka yindi hitukutwesha kuyilukaku.” (Yoba 36:26) Ilaña neyi tunatiyishi munatalishi chuma chimu wanyi, hichinayi mukwila nawu ochu chuma chakutwambaku. Chakutalilahu, hela chakwila hitweluka chikupu chazatikaña chejejiku, komana ichi chinayi mukwila nawu chejeji chekalaku wanyi? Inehi! Munjila yoyimu, etu antu hitunateli kutiyishisha nsañu yejima yahosha nawu Yehova wekalañaku nawa wakekalañaku mpinji yejimaku. Ilaña chumichi chinatalishi wanyi mukwila nawu Nzambi hashakamaña haya nyaakaku. Yuma yitwatiyishishaña hela yitwabulaña kutiyishisha hidiyinateli kuletesha Nleñi abuli kwikalakuku. (Rom. 11:33-36) Nawa yena wekaliliku henohu mawulu niiseki kanda jiikaliku, kushilahu niyuma yatoñekaña chejeji, chidi neyi itena. Yehova watulejaña nindi diyi “watuñili iseki nañovu jindi.” Mwamweni, wadiña kwoku henohu kanda ‘atandumuni mawulu.’ (Yere. 51:15; Yilw. 17:24) Chumanyi chikwawu chikuletesha tukuhweleli netu chikutwesha etu kushakama haya nyaaka?

ATULEÑELI NAWU TUSHAKAMEÑA HAYA NYAAKA

5. Eyala namumbanda akusambila adiña nakukoolekanyi?

⁵ Yehova waleñeli yuma yayumi hanu hamaseki nindi yikushakamaña hohu kapinji kantesha, kufumishaku hohu antu. Wayileñeli nindi ashakameña chakadi kufwa. Ilaña, Yehova wamusoñamishili Adama nindi: “Kumutondu wakwiluka nachu yayiwahi niyatama bayi wakadakuku, muloña hefuku diwakadaku, chalala wakafwa.” (Kutach. 2:17) Neyi aAdama naEva amwovwahilili Yehova, hiyadi kufwaku. Chidi hohu chiwahi kukuhwelela netu mukuhita kwampinji, Yehova wadi kuyiteja kuda ‘kumutondu wawumi.’ Ichi chadi kutalisha mukwila nawu wayikanini nindi “[akahanda] haya nyaaka.”b—Kutach. 3:22.

6-7. (a) Yumanyi yikwawu yinakumwekesha nawu antu hiyayileñeli nawu afweñaku? (b) Yumanyi yayitiyishaña kuwaha yimwafwilaña nenu mwakeli kumbidi? (Talenu nyevulu.)

⁶ Asayantisiti amakwawu awana wunsahu wakwila nawu woñu wetu wunateli kuhemba nsañu yayivulu kubadika yitunateli kuhemba mukuhanda kwetu kwejima chayinu mpinji. Hichuma chakuhayamisha nankashi. Mu 2010, chibaaba chimu chamumagazini yaScientific American Mind chahosheli nawu, woñu wetu wunateli kuhemba nsañu yakushika kwakwihi nama GB 2.5 miliyoni, yikwesekana nansañu yinateli kukwatawu haTV hadi maora 3 miliyoni (yaaka kubadika 300). Ichi chinakumwekesha nawu woñu wetu wunateli kuhemba nsañu yayivulu nankashi. Chinakumwekesha cheñi nawu Yehova watuña woñu wetu munjila yakwila wuhembeña nsañu yayivulu nankashi kubadika yitunateli kwiluka muyaaka 70 hela 80.—Mas. 90:10.

⁷ Yehova watuleña cheñi nampwila yakukeña kutwalekahu kuhanda. Bayibolu yahosha kutalisha hadi antu nawu Nzambi “[washa muchima] wakufwila kushakama haya nyaaka mudi wena.” (Mukwa. 3:11) Dichuma chimu chaleteshaña tumoneña kufwa netu hichilumbu. (1 Kor. 15:26) Neyi tunakati nankashi, komana twashakamaña hohu nakuleka netu tufwi? Inehi. Kakavulu twayaña nakudimona nandotolu, hadaha nikunwa yitumbu kulonda tukoli. Kafwampi, twazataña nañovu jetu jejima kulonda tubuli kufwa. Nawa neyi muntu itwakeña nafwi, chili hikansi hela himukulumpi, twaneñaña hadi mpinji yayilehi. (Yow. 11:32, 33) Chakadi nikujina, muloña wakwila Nleñi yetu wukweti kukeña watwinka muchima wakufwila kushakama haya nyaaka, chamwekeshaña nawu wakeñeleña nindi tushakameña haya nyaaka. Nawa tukweti wunsahu wukwawu wukuletesha tukuhweleli netu tunateli kushakama haya nyaaka. Tuhanjekenu hayuma yeliliyi Yehova kunyima niyinakwilayi makonu yinakumwekesha nawu nkeñelu yindi yahimpa wanyi.

NKEÑELU YAYEHOVA YAHIMPIKA WANYI

8. Indi Isaya 55:11 yatulejeña nawudi kutalisha hayuma yakatwililayi Yehova?

⁸ Hela chakwila aAdama naEva avulumwini nakuletela anyanawu kufwa, Yehova hahimpili yitoñojoka yindi kutalisha hankeñelu yindiku. (Tañenu Isaya 55:11.) Wuchidi kufwila nindi antu ashinshika akashakami haya nyaaka. Tuneluki chumichi muloña wayuma yahoshayi Yehova niyelayi hakwila ashikiji nkeñelu yindi.

9. Nzambi wakana nindidi? (Danyeli 12:2, 13)

⁹ Yehova wakana nindi wakasañula afu nawa wakayinka wumi wahaya nyaaka. (Yilw. 24:15; Tit. 1:1, 2) Iyala washinshika, Yoba, welukili chikupu nindi Yehova wafwilaña kusañula antu afwa dehi. (Yoba 14:14, 15) Kaprofwetu Danyeli welukili nindi antu akayisañula nawa akashakamaña haya nyaaka. (Mas. 37:29; tañenu Danyeli 12:2, 13.) AYudeya amumafuku aYesu niwena elukili nawu Yehova wakayinka ambuñindi ashinshika “[wumi] wahaya nyaaka.” (Luka 10:25; 18:18) Yesu wahosheli kakavulu hanichi chikaninu, nawa niyena amusañwili kudi Tata yindi.—Mat. 19:29; 22:31, 32; Luka 18:30; Yow. 11:25.

10. Kusañuka kwawantu akunyima kwamwekeshañadi? (Talenu mwevulu.)

¹⁰ Yehova diyi Mukakuhana Wumi nawa wukweti ñovu yakusañula antu. Wamwinkeli kaprofwetu Elija ñovu yakusañula mwana kamumbanda ntuluwa wakuZarefwati. (1 Anya. 17:21-23) Mukuhita kwampinji, nawukwashu waNzambi, kaprofwetu Elisha wasañwili mwana kamumbanda mwini Shunemi. (2 Anya. 4:18-20, 34-37) Iku kusañuka nikusañuka kukwawu kwashimunawu kwamwekeshaña nawu Yehova wukweti ñovu yakusañula antu. Hadiñayi Yesu hamaseki, wamwekesheli nindi Tata yindi wamwinkeli ñovu yakusañula antu. (Yow. 11:23-25, 43, 44) Ichi Yesu wudi mwiwulu nawa amwinka “wuswa wejima mwiwulu niheseki.” Dichi, washikilamu kushikija chikaninu chakwila nawu “antu ejima adi mumajamu achanukishu” akayisañula nakwikala nakukooleka kwakwikala nawumi wahaya nyaaka.—Mat. 28:18; Yow. 5:25-29.

11. Ifutu danyiloña datwenzunwina ñahi njila yakushakama haya nyaaka?

¹¹ Muloñadi Yehova chetejeleliyi Mwanindi akeñayi nindi afwi kufwa kwayeña? Yesu waakwili ilu lwihu hahosheliyi nindi: “Nzambi wakeñeli nankashi kaayi chakwila watemesheli Mwanindi wumu hohu, kulonda muntu wejima wukumukuhwelela akabuli kujilumuka, ilaña akekali nawumi wahaya nyaaka.” (Yow. 3:16) Kuhitila mukuhana Mwanindi kwikala ifutu danyiloña dakubuta hanshidi jetu, Nzambi watwenzunwina njila yakwikala nawumi wahaya nyaaka. (Mat. 20:28) Kapostolu Pawulu walumbulwili iyi nkeñelu yaNzambi yalema hasonekeliyi nindi: “Chineli kufwa kwenjilili mudi muntu wumu, kusañuka kwawafu nikwena kunenjili mudi muntu wumu. Muloña neyi chinakufwawu antu ejima kuhitila mudi Adama, chochimu nawa antu ejima akekala nawumi kuhitila mudi Kristu.”—1 Kor. 15:21, 22.

12. Wanta waNzambi wakakwasha ñahi kushikija yuma yakeñañayi Yehova kutwilila?

¹² Yesu wadizishili akakumulondela nindi alombeña nawu Wanta waNzambi winzi ninkeñelu yaNzambi ayili hamaseki. (Mat. 6:9, 10) Nzambi wakeñaña cheñi nindi antu akashakameña haya nyaaka hamaseki. Hakwila akeli mwenimu, Yehova watonda Mwanindi kwikala Mwanta waWanta wawuMesiya. Nzambi natwalekihu kupompesha antu 144,000 kufuma hamaseki akazatili hamu naYesu mukushikija nkeñelu yaNzambi.—Chim. 5:9, 10.

13. Yehova nakwiladi chayinu mpinji, nawa yumanyi yimwatela kwila?

¹³ Yehova nakupompesha hamu “izaza deneni” dawantu nikuyidizisha kulonda akekali enimbu amuWanta windi. (Chim. 7:9, 10; Yak. 2:8) Hela chakwila anakushakama mukaayi mudi chaambu muloña wakuhelañana nimajita, antu ekala munidi izaza afwilaña kubula kwikala nachaambu chanyuza, chanyichidi nikubula kudihela wumu namukwawu. Muchifwikija, atachika dehi kuchila mpoku jawu jatubali kwikala yitwa yakudima nachu. (Mika 4:3) Chatela adiñijeña mumajita ajahishaña antu amavulu, anakukwasha antu kuwana ‘wumi walala’ kuhitila mukuyidizisha kulonda amwiluki Nzambi walala ninkeñelu yindi. (1 Tim. 6:19) Anateli kuyimakena kudi antaña jawu hela kubula kwikala namali amavulu muloña wakuhakwilaku Wanta waNzambi, ilaña Yehova wayinkaña yuma yejima yakeñañawu. (Mat. 6:25, 30-33; Luka 18:29, 30) Yuma yejimiyi yatukwashaña kwiluka netu Wanta wekala kwoku nawa wakatwalekahu kushikija nkeñelu yaYehova.

CHIHANDILU CHACHIWAHI CHIDI KUMBIDI

14-15. Chikaninu chaYehova chakufumishahu kufwa haya nyaaka chakashikijewa ñahi?

¹⁴ Ichi Yesu hiMwanta waWanta waNzambi mwiwulu nawa wakashikija yuma yejima yakanayi Yehova. (2 Kor. 1:20) Kufuma mu 1914, Yesu natwalekihu kuyiyuula ayilumbu jindi. (Mas. 110:1, 2) Yena niantu akayuulaña hamu nindi keña amanishi kushinda nawa akajilumuna antu atama.—Chim. 6:2.

¹⁵ MuChiyuulu chaKristu chaYaaka Ikombakaji, afu akayisañula nawa antu ovwahilaña akayilisha kwikala awanina. Hanyima yakweseka kwakukumishaku, ana akasompeshayi Yehova nindi aloña “akaswana iseki, nawa akashakamahu haya nyaaka.” (Mas. 37:10, 11, 29) Chasweja kuwaha, ‘chilumbu wakukumishaku, kufwa, akamujiyisha.’—1 Kor. 15:26.

16. Chumanyi chacheni chaleteshaña tumukalakeleña Yehova?

¹⁶ Neyi chitunamoni, kuchiñeja kwetu kwakushakama haya nyaaka kwashindamena Hezu daNzambi. Iku kuchiñeja kunateli kutukwasha kutwalekahu kwikala ashinshika munanu mafuku akukuminina akala. Ilaña hitwatela hohu kumutiyisha Yehova kuwaha muloña wakwila tunakukeña kushakama haya nyaakaku. Chuma chacheni chaleteshaña tutwalekihu kwikala ashinshika kudi Yehova niYesu himuloña wakwila twayikeña nankashi. (2 Kor. 5:14, 15) Iku kukeña dikwatuleteshaña tuyimbujoleña nikulejaku akwetu yuma yitwachiñejaña. (Rom. 10:13-15) Hampinji yitunakufwila kwikala nachilwilu chachisambu, twekalaña antu akeñañayi Yehova nindi ekali amabwambu jindi haya nyaaka.—Heb. 13:16.

17. Chumanyi chitwatela kwila hamuntu-hamuntu? (Matewu 7:13, 14)

¹⁷ Komana twakekala hakachi kawantu akatambwila wumi wahaya nyaaka? Yehova watwenzunwina njila yakuwumi wahaya nyaaka. Dichi chidi kudi etu aweni kutondahu kutwalekahu kwikala muniyi njila yatwalaña kuwumi. (Tañenu Matewu 7:13, 14.) Yuma yakekala ñahi hitwakashakamaña haya nyaaka? Twakahanjeka ñakwilu yanilu lwihu muchibaaba chinalondelihu.