Malwihu Kufuma Kudi Antañi

Hanyima yakuvwalika kwaYesu, muloñadi aYosefu naMariya chashakamininiwu muBetelemi chatela afunti kumukala wawu kuNazareta?

Bayibolu yashimuna wanyi. Ilaña yamwekesha wunsahu wawuwahi watela waletesheli abuli kufunta kuNazareta.

Kañelu wamulejeli Mariya nindi wukubaaba ivumu nawa wukuvwala mwana. Kañelu chaleteliyi iyi nsañu, aMariya naYosefu adiña nakushakama muNazareta, mukala waYosefu muÑaliliya. (Luka 1:26-31; 2:4) Nkumininaku, chafuminiwu kuEjipitu, afuntili kuNazareta. Yesu wakulilili kwenoku nawa wekalili kaNazareta. (Mat. 2:19-23) Dichaleteshaña tutoñojokeña hamukala waNazareta neyi tunakuhosha hadi Yesu, Yosefu niMariya.

Mariya wadiña nantaña yindi wejina daElizabeta, washakamineña muYuda. Elizabeta wadiña ñoda kapristu Zekariya nawa wekalili mama yaYowanu Mpapatishi. (Luka 1:5, 9, 13, 36) Mariya wayili nakumuhempula Elizabeta nawa washakamini tukweji tusatu muYuda. Kuhiñahu Mariya wafuntili kuNazareta. (Luka 1:39, 40, 56) Dichaletesheli Mariya eluki iluña damuYuda.

Mukuhita kwampinji, Yosefu wovwahilili lushimbi ‘lwakudisonekesha.’ Dichi Yosefu wafumini kuNazareta nakuya kuBetelemi, “mumusumba waDavidi” nawa dadiña iluña daprofweteliwu nawu dimwakavwalikilayi Mesiya. (Luka 2:3, 4; 1 Sam. 17:15; 20:6; Mika 5:2) Hanyima yakwila Mariya navwali dehi Yesu kwenoku, Yosefu hamwitejeli Mariya kwenda lwendu lwalulehi lwakufunta kuNazareta namwana wanyanyaku. Ashakamini muBetelemi, hadiña kwakwihi namakilomita 9 (hela mamayilu 6) kufuma kuYerusalema. Dichi chayipeleleli kusenda mukeki nakumutwala kutembeli nakulambula mulambu watelela.—Lev. 12:2, 6-8; Luka 2:22-24.

Hakusambila kañelu kaNzambi wamulejeli Mariya nindi mwanindi wakatambula “itanda daDavidi” nawa “wakayuula neyi Mwanta.” Hadaha aYosefu naMariya atoñojokeli nawu chawahili Yesu chavwalikililiyi mumusumba waDavidi. (Luka 1:32, 33; 2:11, 17) Hadaha atoñojokeli nawu chawahili kushakama kwenoku sampu aneluki Nzambi chakeñeleñayi nawu eli.

Tuneluki wanyi kuleha kwampinji yashakaminiwu muBetelemi hakwila akakuhoña natutumbwa ashiki. Hela chochu, haniyi mpinji, chisaka chawu chadiña nakushakama mwitala, nawa mwanawu wadiña “mwana wanyanya,” bayi mukekiku. (Mat. 2:11) Chinamwekani neyi ashakamini muBetelemi hadi mpinji yayilehi nakuwilisha kwikala mukala wawu, chatela afunti kukabeta kakuchimunswa kuNazareta.

Herodi wahanini lushimbi nindi “anyana awamayala ejima amuBetelemi . . . kutachikila hadi anyana adiña nayaaka yiyedi nakufunta mwishina” ayijahi. (Mat. 2:16) Chayisoñamishiliwu kudi Nzambi kutalisha hanilu lushimbi, aYosefu naMariya atemukilili kuEjipitu naYesu nawa ashakamini kwenoku kushika nimpinji yafwiliyi Herodi. Nkumininaku, Yosefu watwalili chisaka chindi kuNazareta. Muloñadi chabulililiwu kufunta kuBetelemi? Hakwila atondolweli mwana kaHerodi watama muchima, Akelawusi wadiña muYuda, nawa ovwahili kukusoñamisha kwaNzambi. MuNazareta, Yosefu wadi kumukulisha chiwahi Yesu nakwikala mukakudifukula waNzambi walala.—Mat. 2:19-22; 13:55; Luka 2:39, 52.

Chinamwekani neyi Yosefu wafwili henohu Yesu kanda afwi nakwenzununa njila yaletesheli amakwawu kuya mwiwulu. Dichi Yosefu akamusañwila hanu hamaseki. Amavulu akamumona nawa akeluka yuma yayivulu yaletesheli yena naMariya atwalekihu kushakama muBetelemi hanyima yakuvwalika kwaYesu.