Monenuña Walwa Neyi Chawumonañayi Yehova

CHAKADI nikujina, mwalemesha yawaana yamboka-mboka yayinkayi Yehova, kushilahu niwuswa wakudifuukwila chimunateli kuzatisha iyi yawaana. Kafwampi, Bayibolu yatena vinyu nawu hichawaana chatwinkayi Nzambi, nawa yahosha nawu: “Yakuda yaletaña tusehu, nawa vinyu yaletaña muzañalu muchihandilu.” (Mukwa. 10:19; Mas. 104:15) Hela chochu, hadaha mwamonahu dehi antu amakwawu amweni kukala muloña wawalwa. Kubombelahu, antu mwahita kaayi niyisemwa amonaña walwa munjila jashiyashana. Chumanyi chinateli kukwasha akaKristu kufuukula chiwahi kutalisha hakunwa walwa?

Hichikweti muloña nakutwashakamaña hela chisemwa chetuku, neyi twiteja yitoñojoka yaNzambi kulombola yitoñojoka yetu niyuma yitwafuukulaña, mukufuma yuma yayiwahi nawa tukwikala namuzañalu muchihandilu.

Neyi chimuneluki, antu amavulu mukaayi anwaña walwa kakavulu nawa anwaña wawuvulu. Amakwawu anwaña walwa muloña atoñojokaña nawu wunateli kuyikwasha kukeheshaku yitoñojoka. Amakwawu anwaña kulonda akeheshiku kwakama hakukala kukwetiwu. Nawa mumaluña amakwawu, antu anwaña walwa wawuvulu ayimonaña nawu akola hela nawu hiyamayala chikupu.

Hela chochu, akaKristu akweti wunlomboli wawuwahi wafumaña kudi Nleñi yawu wukweti kukeña. Chakutalilahu, watusoñamishaña hayuma yatama yafumaña mukunwa walwa wawuvulu. Hadaha twatañahu dehi nsañu yekala haYishimu 23:​29-35 halumbululawu chekala muntu washetaña nikukala kwafumañamu.a Manakwetu Daniel, mukulumpi muchipompelu kuEurope, wanukaña chadiña chihandilu chindi henohu kanda ekali mukaKristu walala. Wahosheli nindi, “Kunwa walwa wawuvulu kwanletesheli kufuukula mwaluwa nawa chankataña kumuchima neyi nitoñojoka hayuma yatama yinahitilimu.”

AkaKristu anateli kuzatisha ñahi chiwahi wuswa wawu wakudifuukwila nakutondolwela kukala kwafumaña mukunwa walwa wawuvulu? Chuma chinateli kutukwasha hikwiteja yitoñojoka yaNzambi kuyuula yitoñojoka yetu niyuma yitwelaña.

Tutalenu chahosha Bayibolu hawalwa niyuma yaleteshaña antu amakwawu anweña walwa.

CHAHOSHA BAYIBOLU HAKUNWA WALWA

Izu daNzambi dakaanisha wanyi kunwa walwa wamweseka. Kafwampi, Bayibolu yahosha nawu kunwa vinyu kunateli kuzañalesha muntu. Twatañañamu netu: “Kadii yakuda yeyi namuzañalu, nawa kanwi vinyu yeyi namuchima wakuzañalala.” (Mukwa. 9:7) Mpinji jimu, Yesu wanwineña vinyu nawa dichelileña niambuña aYehova amakwawu ashinshika.—Mat. 26:​27-29; Luka 7:34; 1 Tim. 5:23.

Hela chochu, Izu daNzambi dashimuna chaambu cheneni chekala hakunwa walwa wantesha nakusheta. Dashimuna hatooka nawu: “Bayi musheteña vinyuku.” (Efwe. 5:18) Nawa dashimuna cheñi nawu “akakusheta . . . hiyamba kaswana Wanta waNzambiku.” (1 Kor. 6:10) Mwamweni, Yehova wahela antu anwaña walwa wawuvulu niashetaña. Chatela tunweña walwa kwesekeja nachelañawu muchisemwa chetu, twatela kufuukula munjila yikumutiyisha Nzambi kuwaha.

Antu amakwawu amonaña nawu anateli kunwa walwa wawuvulu chakadi kusheta. Hela chochu, kwila mwenimu kunateli kusha wumi wawu muwubanji. Nsona yashimuna hatooka nawu kwikala “muwuduñu wakusweja kunwa vinyu” kukuletesha muntu weyala hela wamumbanda kuleka kwikala nayilwilu yayiwahi nikukisañana wubwambu windi naNzambi. (Tit. 2:3; Yish. 20:1) Yesu niyena wasoñamishili nindi “kusweja kunwa” kunateli kukañesha muntu kwiñila mukaayi kaNzambi kakaha. (Luka 21:​34-36) Hanu dinu, yumanyi yinateli kumukwasha mukaKristu kutondolwela kukala kwafumaña mukunwa walwa?

ILUKENU CHALETESHAÑA MUNWEÑA NICHIMWANWAÑA

Neyi tunakufuukula hansañu yakunwa walwa, chatama nankashi kufuukula kushindamena hachelañawu antu amavulu muchisemwa chetu. AkaKristu elaña yuma yamutiyishaña Yehova kuwaha neyi anakufuukula hansañu yayakuda niyakunwa. Bayibolu yatwanukishaña nawu: “Hela munakuda, hela munakunwa, hela munakwila chuma chidi chejima, ilenuña yuma yejima yikumulemesha Nzambi.” (1 Kor. 10:31) Talenu awa malwihu niyishina yamuBayibolu yitwatela kutoñojokahu:

Komana nanwaña walwa kulonda akwetu antiyeña kuwaha? Kwidika 23:2 yahosha nawu: “Bayi wulondela izaza dawantuku.” Haniyi vasi, Yehova wayisoñamishileña aIsarela kubula kulondela antu elileña yuma yamuneñesheleña. Iku kusoñamisha kwalema nikudi akaKristu makonu. Neyi twiteja akwetu kuluwañesha yitoñojoka yetu nichitwafuukulaña kutalisha hakunwa walwa, tukutachika chovu-chovu kuleka kwovwahila nshimbi jaYehova nawa tukuluwañesha wubwambu wetu nayena.—Rom. 12:2.

Komana nanwaña walwa kulonda nimwekeshi nami nakola? Muyisemwa yikwawu, antu amonaña nawu kunwa walwa wawuvulu nawa kunwa mpinji yejima chidi hohu chiwahi. (1 Pet. 4:3) Ilaña talenu mazu akukolesha ekala ha 1 AKorinda 16:13 akwila nawu: “Tonenuña, imanenu akola mbe-e muchikuhwelelu, ikalenu ahamuka, nawa kolenu.” Komana mwamweni walwa wunateli kuletesha muntu kwikala wakola? Inehi. Walwa wunateli kushikena kuluwañesha yitoñojoka yamuntu niyuma yelañayi. Chikufumamu, chatela kunwa walwa wawuvulu kumuleteshi muntu kwikala wakola, ilaña kukumwekesha nawu wazeya. Isaya 28:7 yamulumbulula muntu wasenukaña muloña wawalwa nawu watedañilaña nawa wahukanaña.

Ñovu yakeñekaña hakwila twili chuma chaloña yafumaña kudi Yehova nawa mwabombela ‘kutwalekahu kutona nikwimana akola mbe-e muchikuhwelelu.’ (Mas. 18:32) MukaKristu washinshika nateli kwila chumichi neyi atwalekahu kwikala watona nikwila yuma yinateli kumukwasha kukiña wubwambu windi naYehova. Yesu wamwekesheli iyi ñovu hadiñayi hamaseki nawa antu amavulu amulemesheli muloña wakwikala muntu wahamuka chikupu nikufwila kwila yuma yaloña.

Komana nanwaña walwa kulonda nileki kwakama hakukala kunukweti? Ñimbi yaMasamu amoneneni kusoneka nawu: “Yuma yinakamineña chiyanswejeleli, eyi [Yehova] wankundejeleña nikunwundisha.” (Mas. 94:19) Neyi kudi chuma chinakuyakamisha, mushindamenenu Yehova ayikwashi, bayi hawalwaku. Njila yimu yalema yinateli kuyikwasha kukeheshaku kwakama hikulomba kudi Yehova kakavulu. Cheñi, amavulu awana kwila nawu kulomba wukwashu kudi ibwambu wapama muchipompelu kwayikwashaña. Kafwampi, neyi muntu anwa walwa nindi amanishi kukala kukwetiyi, chumichi chikumuletesha kwikala mukweseka kwakwila yuma yatama chatela eleña yuma yaloña. (Hos. 4:11) Manakwetu Daniel ashimunawu hakusambila, wahosheli nindi: “Nalwishileña nakusweja kwakama nikudinka nyiloña. Nanwineña walwa kulonda nimanishi kukala kunukweti, ilaña kukala kwavulilileñaku, nashalili chakadi amabwambu nawa antu anlemesheleña wanyi.” Chumanyi chamukwashili manakwetu Daniel? Wahosheli nindi, “Nenjili nakwiluka nami nakeñekeleña kumushindamena Yehova bayi hawalwaku. Nkumininaku, natwesheleña kuumika kukala kunekalileña naku nikukumanisha.” Twatela kwanukaña netu Yehova mpinji yejima wadiloñesha kutukwasha, hela chakwila kukala kutukweti kunakumwekana neyi kukumana wanyi.—Fwili. 4:​6, 7; 1 Pet. 5:7.

Neyi mpinji yikwawu mwanwaña walwa, munateli kutoñojoka hanawa malwihu kulonda mumoni neyi mwatela kuhimpa njila yimwanwinañamu, munateli kudihula nenu: ‘Kudihu muntu wamuchisaka hela ibwambu dami wunanleji nindi natela kuhimpa njila yinanwinañamu walwa?’ Neyi dichichidi, chumichi chinakumwekesha nawu munatachiki kwikala nachaaku hela kukala kumunabuli kwiluka. ‘Komana inakunwa nankashi walwa kubadika chinanwineña kunyima?’ Hichinjikijilu chinakumwesha nawu hela chakwila owu muntu wadiña wateñuka nawalwa wanyi, wukutachika kuteñuka. ‘Komana chankalilaña kushakama chakadi kunwa walwa hadi mafuku antesha hela kubadikahu?’ Neyi dichichidi, dikwila nawu owu muntu nateñuki nawalwa. Dichi watela kudimona nandotolu kulonda amukwashi kumanisha kukala kukwetiyi.

Muloña wawubanji nikukala kwafumaña mukunwa walwa, akaKristu amakwawu atondahu kubula kunwa walwa wudi wejima. Amakwawu afuukulañahu kubula kunwa walwa muloña ahela chiwatiyakanaña. Neyi mukwenu imwadikundaña nindi afuukulahu kubula kunwa, munateli kumwekesha nenu mwamukeña kuhitila mukulemesha munafuukuliyi chakadi kumuseha.

Hadaha munafuukulihu nenu mwatela kwiluka mwakukumina kutalisha hakuvula kwawalwa wumwatela kunwa. Indi kwiji munadishiliku enu aweni lushimbi kutalisha hamapampa imwatela kunwa, hadaha kamu mumulungu hela kunwa wantesha hakuda. Amakwawu atondahu walwa watela kunwawu, chidi neyi kunwa vinyu hela walwa wukwawu wantesha, bayi wazuwa nankashi hela madrinki akubombashana nawalwaku. Neyi muntu eluka hatela kukuminayi kutalisha hakunwa walwa, chikumupelela kulondela mwafuukulayi. Nawa mukaKristu wapama watela kutiya nsonyi wanyi neyi yafuukula chuma chamuchidiwu nawa yafwilaña kwila munafuukuliyi.

Chuma chalema chikwawu chitwatela kwanukaña hikutoñojokelaku akwetu. ARoma 14:21 yahosha nawu: “Chikuwaha kubula kuda mbiji hela kunwa vinyu hela kukoña chuma chidi chejima chikumuhukesha manakweyi.” Munateli kuzatisha ñahi iku kufumba? Mwekeshenuña nenu mwayikeña amanakwenu. Neyi mumona nenu kunwa walwa kukumuneñesha mukwenu, kukeña kukuyiletesha mubuli kunwa. Chimwela mwenimu, mukumwekesha nenu munakuyakamena akwenu nikulemesha chinakutiyawu, nakuyitiyisha kuwaha chatela muditiyisheña enu aweni kuwaha.—1 Kor. 10:24.

Kubombelahu, nfulumendi yinateli kushaku nshimbi jinateli kumukwasha mukaKristu kufuukula chiwahi. Oju nshimbi jinateli kushimuna yaaka yatela kwikalayi nayu muntu hakwila atachiki kunwa walwa, indi kwiji kumukaanisha muntu kwendesha motoka iku nakunwa walwa hela nakuzatisha ikina.—Rom. 13:​1-5.

Yehova watulemesha hakutwinka wuswa wakudiluñisha yawaana yayivulu yatwinkayi. Chumichi mwabombela chawaana chitukweti chakuzatisha chiwahi wuswa wetu wakudifuukwila yuma yitwatela kuda niyitwatela kunwa. Dichi yuma yitwatondaña yimwekesheña nawu twalemesha iwu wuswa kuhitila mukuwuzatisha munjila yikumutiyisha kuwaha Tata yetu wamwiwulu.