Hela Chakwila Nadiña Nasonyi, Mukuhita kwaMpinji Nekalili Mishonali

Navwalikili mu 1951 muVienna, kuAustria, muchisaka chawanvwali ayileña muKatolika. Nadiña nansonyi, ilaña namukuhweleleli Nzambi nawa nalombeleña kakavulu. Hinadiña nayaaka 9, atata atachikili kudiza nawaYinsahu jaYehova. Mukuhita kwampinji, amama niwena atachikili kudizila hamu nawu.

Hashimbwili wanyi twatachikili kupompa naChipompelu chaDöbling, muVienna. Hamu neyi chisaka, twelilileña hamu yuma yayivulu. Twatañileña nikudiza Bayibolu, kuya kukupompa kwachipompelu nikudihana kuzataku nyidimu hakupompa kwamaneni. Henohu nichidi hohu kansi, atata ankwashili kumukeña Yehova chikupu. Kafwampi, atata mpinji yejima alombeleña nawu ami nimuhelami twakekali apayiniya. Ilaña hayina mpinji, hinafwilileña iwu mudimu.

CHINATACHIKILI MUDIMU WAMPINJI YEJIMA

Napapatisheweli mu 1965, hinadiña nayaaka 14. Hela chochu, chankalilileña mumudimu wakushimwina kutachika kuhanjeka nawantu inabulili kwiluka. Nalwishileña cheñi nayitoñojoka yakwila nami akwetu atwansi alema kubadika ami nawa nakeñeleña nankashi nami antiyeña kuwaha. Dichi hashimbwili wanyi kufuma hinapapatisheweli, natachikili kudikunda nawantu abulileña kumukalakela Yehova. Hela chakwila natiyileña kuwaha kwikala hamu nawu, chinleji chami chankabishileña muloña namanishileña mpinji yeneni nawantu abula kwikala aYinsahu. Ilaña chankalilileña kuleka kudikunda nawu. Yumanyi yankwashili?

Hayoyina mpinji, kansi wamumbanda wadiña nayaaka 16 wejina daDorothée wabuukilili muchipompelu chetu. Iyena dadiñayi nadu dakushimwina kwitala niitala dansañumwini ninami. Nadiñaku mukulumpi hadi yena, ilaña ami hinadikitileña nankashi mumudimu wakushimwinaku. Natachikili kutoñojoka nami: ‘Anvwali jami hiyaYinsahu, ilaña Dorothée kwosi ntaña yindi hela wumu wudi muchalalaku. Washakamaña nawamama yindi akata, hela chochu, mpinji yejima wayaña nakushimwina!’ Muchima wadiñayi nawu wakudikita, wankwashili ninami kumuzatila Yehova chikupu. Hashimbwili wanyi kufuma haniyi mpinji, ami naDorothée twatachikili kuzatila hamu wupayiniya. Hakusambila, twekalili apayiniya akukwasha nawa nkumininaku, twekalili apayiniya ampinji yejima. Iyena daDorothée dakudikita dansambukilili. Wankwashili kwikala nakadizi waBayibolu watachi. Mukuhita kwampinji, natachikili kwikala wakasunuka kuhanjeka nawantu hamatala awu, munyikwakwa nikumaluña amakwawu.

Muchaaka chinatachikili kuzata wupayiniya wampinji yejima, manakwetu wejina daHeinz wakuAustria wenjili muchipompelu chetu. Wadizili chalala hadiñayi muCanada hampinji yayiliyi nakuhempula manakwindi, wadiña Chinsahu chaYehova. Heinz amutemesheli kuzatila wupayiniya wadimena muchipompelu chetu muVienna. Muchima washikeneni hohu baku mwivumu chinamumweni katachi. Wakeñeleña kuzata mudimu wawumishonali, ilaña ami hinatoñojokeleñahu nijakuzata wumishonaliku. Dichi hakusambila, namulejeli wanyi nami namukeña. Hela chochu, mukuhita kwampinji ami naHeinz twatachikili kudiluka, twadisumbwili, nawa twatachikili kuzatila hamu wupayiniya kuAustria.

CHANKWASHILI KWIKALA NAMUCHIMA WAKUFWILA KWIKALA MISHONALI

Mpinji yejima Heinz wanlejeleña chafwilileñayi kuzata wumishonali. Hela chakwila wankanjikijileña wanyi, wansañumwineña kuhitila mukuñihula malwihu adi neyi, “Chineli tukweti anyana wanyi, kwila tufuukulahu kutandumuna mudimu waYehova nehi?” Muloña wakwila nadiña nansonyi, nachiinineña kwikala mishonali. Diimu tuhu nadiña payiniya, ilaña kuzata mudimu wawumishonali namweneña neyi nikutwesha wanyi. Hela chochu, Heinz wadiwunjikili nawa halekeli kufwila iwu mudimuku. Wankolesheli cheñi nindi nisheña muchima hakwakamena antu, bayi hayuma yinakuñakamishaku. Kufumba kwindi kwankwashili nankashi.

Chovu-chovu, natachikili kwikala nampwila yakuzata mudimu wawumishonali, dichi twasonekeli mukanda wakulombelahu kuya kuShikola yaGiliyadi. Hela chochu, nkoñi wakasanji kamutayi wanlejeli nindi nisambili kudiza chakuhosha chiwahi Ingilishi. Hanyima yakudiza hadi yaaka yisatu chakuhosha chiwahi Ingilishi, twahayamini chatulejeliwu kuya nakuzatila muchipompelu chaYugoslavia muSalzburg, kuAustria. Hadi yaaka 7, twashimwinineña antu ahosheleña idimi daSerbo-Croatian. Nfumwami wekalili nkoñi wañinza nawa hadi chaaka chimu twendeleleña yipompelu yahosheleña idi idimi. Idimi daSerbo-Croatian dadiña dakala, ilaña twekalili nawatudizi aBayibolu amavulu.

Mu 1979 atulejeli kuya “nakunooka” kuBulgaria. Mudimu wakushimwina munidi ituña awulekesheli. Dichi haniyi mpinji yitwayili “nakunooka” hitwashimwininihuku. Ilaña twasendeli nyikanda yantesha yanyanya mukuswamujoka yitwaleteleli ahela atanu munidi ituña ashakamineña muSofia, musumba weneni muBulgaria. Natiyili woma, ilaña Yehova wankwashili kuzata iwu mudimu walema watwinkeliwu. Chinamweni kuhamuka nimuzañalu wadiña nanawa ahela, hela chakwila elukili nawu neyi ayiwana adi kuyikasa, chansañumwini kuzata hakumina ñovu jami mumudimu wejima wanyikeli kuloñesha kwaYehova.

Chimwahitili mpinji, twasonekeli cheñi mukanda wakuya kuGiliyadi, nawa haniyi mpinji atwitejeli. Twatoñojokeleña netu tunakuya kushikola yamwidimi daIngilishi kuUnited States. Ilaña muNovember 1981, Shikola yaGiliyadi ayitachikishili nihakasanji kamutayi muWiesbaden, kuGermany. Dichi chineli iyi shikola yadiña mwidimi daGerman, champeleleli kutiyisha yuma yitwadizileña. Chitwamanisha shikola akututemesha kuya nakuzatila kudihi?

KUZATILA MWITUÑA MWADIÑA NJITA

Atutemesheli kuya nakuzatila muKenya! Hela chochu, kasanji kamutayi kamuKenya katwihwili neyi chakwila tukwiteja kuya nakuzatila muUganda, ituña mwadikumashaninawu. Haniyi mpinji, mwadiña mwahita dehi yaaka 10 kufuma hampinji yahukwiliwu nfulumendi yamuUganda kudi amashidika alombweleñawu kudi Mukulumpi wamashidika Idi Amin. Muyaaka yalondelelihu hampinji yayuulileñayi, antu amavulu ayijahili nawa amavulu nankashi akabakeni. Mu 1979, Idi Amin wayuulileña nfulumendi yamuUganda niyena amufumishilihu. Kuhosha hohu chalala, natiyileña woma kuya kwituña kudi njita. Ilaña shikola yaGiliyadi yatudizishili kumukuhwelela Yehova. Dichi twetejeli kuya.

Chihandilu muUganda chakoleli nankashi. Nfulumendi yahanineña wanyi menji, malayiti niyuma yikwawu yakudikwashamu kumujimba. Mafoni azatikileña wanyi, antu alozeleña akwawu antu nikuyiyila yuma, sweje-e nawufuku. Neyi kuneyili dehi, antu ashakamineña hamatala, nawa amakwawu alombeleña nawu kubuli kwikala muntu wukwinza nakuyiyila hela kuyijaha. Hela chakwila kwadiña kukala kwamuchidiwu, amanakwetu amunidi ituña atwalekelihu kumukalakela Yehova.

Mu 1982, ami naHeinz twashikili muKampala, musumba weneni muUganda. Mutukweji twakutachikilahu tutanu, twashakamineña mwitala dawaSam Waiswa niañodawu aChristina hamu nianyanawu atanu niantaña jawu awana. Manakwetu nimuhela Waiswa kushilahu nichisaka chawu, adiileña hohu yakuda kamu hefuku, ilaña adiña namuchima wakuhana hela chakwila adiña nayakuda yantesha. Hampinji yitwashakamineña nachisaka chawaWaiswa, ami naHeinz twadizili yuma yayivulu yatukwashili mumudimu wetu wawumishonali. Chakutalilahu, twadizili chakuzatisha menji antesha hakuwela hamujimba, nawa neyi ashalamu twayizatishileña munyisalanyi. Mu 1983, ami naHeinz twawanini itala mutwatachikili kushakama dadiña kwiluña dakiñewa muKampala.

Twadiluñishileña chikupu mudimu wakushimwina. Inakwanuka mukakweji kamu twahanini magazini akubadika ha 4,000! Ilaña chuma chatutiyishileña kuwaha nankashi hikumona antu chatambwilileñawu chalala. Amulemesheli Nzambi nawa atiyileña kuwaha kuhanjeka nsañu yamuBayibolu. Kakavulu, ami naHeinz twekalileña nawatudizi aBayibolu 10 kushika ku 15 hamuntu-hamuntu. Nawa twadizilili yuma yayivulu kudi atudizi etu. Chakutalilahu, twayisakilileña hamuchima wamwekesheleñawu wakwenda hamaseki hakuya nakupompa nihakufunta kwitala mulungu-himulungu, chakadi kutooba nawa atumbileña chimwemweta mpinji yejima.

Mu 1985 nimu 1986, muUganda mwekalili njita jikwawu jiyedi jamashidika. Kakavulu, twamweneña anyana anyanya amashidika anadimanyeki mata amaneni nawa emeneña hanyikoleku. Hayina mpinji, twamulombeleña Yehova netu atwinki kashinshi nimuchima wawunda hampinji yitwakeñakeñeleña antu akweti mpwila yakukeña kudiza mumudimu wakushimwina. Nawa Yehova waakwili kulomba kwetu. Kakavulu twalekeleña hohenohu kutiya woma neyi tuwana muntu wunakutambwila chachiwahi nsañu yayiwahi yaWanta.

Twatiyileña cheñi kuwaha kushimwina añiinza. Chakutalilahu, twatachikili kudizisha Bayibolu eyala namumbanda adisumbula aMurat naDilbar Ibatullin, afumini kuTatarstan (Central Russia). Murat wadiña ndotolu. Wejima wawu ayedi apapatisheweli nawa anatwalekihu kumukalakela Yehova nakashinshi. Nkumininaku, natachikili kudiza Bayibolu naTatjana Vileyska, mumbanda wafumini kuUkraine watoñojokeleña hajakudijaha yomweni. Chelili Tatjana napapatishewi dehi, wafuntili kuUkraine nawa mukuhita kwampinji, watachikili kuzata mudimu wakubalumuna nyikanda yetu.

KUKALA KUKWAWU KUTWAMWENI

Mu 1991 hampinji yitwayili nakunooka ami naHeinz kuAustria, kasanji kamutayi kamuAustria katusonekeleli nakutuleja nawu tunakuya nakuzatila kwacheñi, kuBulgaria. Hadi yaaka yayivulu, mudimu wetu wakushimwina awulekesheli mumatuña amavulu akuEurope. Ilaña yuma yahimpikili nawa aYinsahu jaYehova muBulgaria ayitejeli kutachika cheñi kushimwina. Neyi chinashimuna, ami naHeinz twatwalili nyikanda mukuswamujoka munidi ituña henohu mudimu wetu anawulekeshi dehi. Ilaña haniyi mpinji, atutemesheli kuya kunidi ituña nakushimwina.

Atulejeli nawu bayi tufunta kuUganda cheñiku. Dichi chatela tufunti kwitala kutwashakamineña hitwazatileña wumishonali nakusenda yuma yetu hela nakushiika amabwambu jetu, twayili kuBeteli muGermany, atwinkeli motoka, dichi twayili kuBulgaria. Atulejeli kuya nakuzatila hamu nezanvu dadiña nawakakushimwina 20 muSofia.

Twamweni kukala kwaambukaku kwakuvulu muBulgaria. Kukala kwatachi, twelukili wanyi chakuhosha idimi damunidi ituña. Kwamuchiyedi, nyikanda yadiñaku hohu mwidimi daBulgaria yadiña The Truth That Leads to Eternal Life niMukanda Wami waMpanji Jamu Bayibolu. Nawa chatukalilileña kwikala nawatudizi aBayibolu. Hela chakwila twamweneña kukala kwamuchidiwu, izanvu detu danyanya nawa dadikita dawaYinsahu jaYehova, dapaminineñaku. Chechi yaOrthodox yamweni chumichi, nawa kufuma haniyi mpinji dihatachikili kukala kweneni.

Mu 1994, aYinsahu ayitambwili wuswa wakuzata nyidimu yawu mukukasunuka nawa atachikili kuyimona neyi hikudifukula kwatama. Amanakwetu amakwawu ayikasili. Antu ataandishili nsañu yayivulu yakutwamba hadi etu muyipapilu yansañu nihayikunzulemba, nakuhosha nawu aYinsahu jaYehova ajahaña anyana anyanya nawa akanjikijaña akwawu aYinsahu kudijaha aweni. Dichi ami naHeinz chatukalilileña kushimwina. Kakavulu twawanineña antu atuhosheleña kasawuntu, kututambikila akapokola, kushilahu nikunonojola yuma nakutwasa. Chadiña chaswayi wanyi kuleta nyikanda munidi ituña, nawa kusonkela matala mwakupompela nikwena kwekalili kukala kweneni. Mpinji yimu, hitwapompeleña kupompa kweneni, atulukukili kudi akapokola. Ami naHeinz twenjililili wanyi kumona kukala kwamuchidiwu. Hadiña chaambu cheneni nawantu amuUganda, adiña namuchima wakukeña kudiza Bayibolu! Chumanyi chatukwashili ami naHeinz kwiteja iku kuhimpika?

Kudikunda hamu nawamanakwetu niahela dichuma chatukwashili. Atiyileña kuwaha chelukiliwu chalala nawa atusakilileña nanochu chitwayikwashili. Twadakameneneña wejima wetu nikudikwasha wumu namukwawu. Twadizililiku yuma yayivulu kuniyi yuma yamwekeni. Twelukili netu tunateli kwikala namuzañalu mumudimu wudi wejima wutukweti neyi tutwalekahu kuyimwekeshela antu kukeña.

Hela chochu, mukuhita kwampinji yuma yahimpikili. Mu 1998 nfulumendi yetejeli cheñi kuloñesha kwetu kutwalekahu kuzata nyidimu yetu mukukasunuka, nawa hashimbwili wanyi twekalili nanyikanda yayivulu mwidimi daBulgaria. Kuhiñahu, mu 2004 kasanji ketu kamutayi kakaha akenzunwini. Ichi, muBulgaria mudi yipompelu 57 niakakushimwina 2,953. Muchaaka chamudimu chinamani, antu enjili kuChanukishu adiña 6,475. Hela chakwila mpinji yimu muSofia mwadiña hohu ahela atanu, ichi mudi yipompelu 9. Mwamweni tunadimweni ‘kantesha chikanekali ikombakaji.’—Isa. 60:22.

KUKALA KWASHIYASHANA KWINNOMIKI

Nakatakataña nankashi kumujimba. Hadi yaaka yayivulu, andotolu ananwani nayikatu yayivulu yatenañawu nawu tumor [ikuma], kushilahu nitumor yakuwoñu. Anshili mwikina nawa anladikili hadi maora 12 kulndia kulonda afumishi iyi tumor. Hanyima yakunladika, twashakamini hakasanji kamutayi muIndia sampu chinakoleli. Kuhiñahu, twafuntili kumudimu wetu kuBulgaria.

Haniyi mpinji, Heinz watachikili kukata chikatu cheneni chabula kwilukewa nankashi. Hatwesheleña kwenda, kuhosha nikwimana nkawindi hela kudinonela yumaku. Yikatu yindi chiyatoheleleñaku, yami namwakameneneña hohu muyuma yejima. Mpinji jikwawu, nazeyeleña nankashi nawa nakameneneña nami hinukutwesha kumwakamena nkawamiku. Hela chochu, manakwetu wakansi wejina daBobi watachikili kumusenda Heinz kakavulu mumudimu wakushimwina. Bobi watiyileña sonyi wanyi kutalisha hachikuhoshawu antu neyi Heinz yakañanya kuhosha chiwahi, indi kwiji kudimena hela kudinonela yomweni yuma. Bobi wankwashileña mpinji yejima kumwakamena Heinz neyi chakwila ami nakañanyi. Hela chakwila ami naHeinz twafuukwilihu kubula kwikala nawanyana munshakaminu yamakonu, twatiyileña netu Yehova watwinkeli Bobi kwikala mwanetu!—Maku 10:​29, 30.

Heinz wakabakeneña cheñi nachikatu chakansa. Chawushona, nfumwami inakeña wafwili mu 2015. Heinz chafwiliyi, natiyili neyi nidi nkawami; chankalili kukuhwelela nami nafwi. Ilaña namwanukaña mpinji yejima, namonaña hohu neyi kwiji wuchidi wamumi! (Luka 20:38) Kakavulu, nanukaña mazu amawahi anlejeleñayi nikufumba kwakuwahi kwanfumbileñayi. Nasakililaña nankashi hayaaka yejima yitwazatilili hamu nakashinshi.

NAMUSAKILILAÑA YEHOVA CHINATWALEKIHU KUNKWASHA

Chalala Yehova nankwashi mukukala kwejima kwinnahitimu. Wankwashili cheñi kuleka kutiya nsonyi nawa wankwashili kwikala mishonali wakeña antu. (2 Tim. 1:7) Namusakililaña Yehova, muloña ami nimwanyikami tudi mumudimu wampinji yejima. Chayinu mpinji, yena ninfumwindi adi mumudimu wakwenda muSerbia kuEurope. Kulomba kwalombeliwu atata hadi yaaka yayivulu yinahitihu, akwakula!

Kudiza Bayibolu nkawami kunankwashi kwikala nakuwunda kwamuyitoñojoka. Mumpinji jakala, nadizi “kulomba chikupu” neyi chelileñayi Yesu. (Luka 22:44) Njila yimu Yehova mwakwilañayi kulomba kwami hikuhitila mukukeña niluwi lwammwekeshelaña amabwambu ekala muchipompelu munapompaña muNadezhda, kuSofia. Antambikaña neyi kudi kuda nikuhemena hamu nawa ansakililaña mpinji yejima, chumichi chanletelaña muzañalu chikupu.

Kakavulu natoñojokaña chikupu hakusañuka. Nafwikijaña inakumona anvwali jami anemani kumbidi yetala dawu, anakumwekana lubanji neyi chamwekeneñawu hampinji yadisumbwiliwu. Nafwikijaña muhelami nakuloñesha yakuda. Nawa namufwikijaña Heinz nemani kwakwihi nakawalu kindi. Kufwikija muniyi njila, kwankwashaña kuleka kutoñojoka hayuma yatama ilaña kwikala namuchima wakumusakilila chikupu Yehova.

Kutoñojoka hayuma yinnahitimu muchihandilu niyinnakutalila kumbidi, yinankwashi kwiteja chakufuma hamuchima mazu aDavidi ekala haIsamu 27:​13, 14, akwila nawu: “Nadi kwikala kudihi neyi nadiñi nachikuhwelelu wanyi nami nakamona kuwaha kwaYehova mwituña mwashakamaña antu? Muchiñeji Yehova; ikalaku wahamuka nawa kolaku muchima. Eña, muchiñeji Yehova.”