Malwihu Kufuma Kudi Antañi
Mpinjinyi yakamana mudimu wakushimwina wutunakuzata?
Yesu wahosheli nindi: “[Iyi] nsañu yayiwahi yaWanta akayishimwina mwahita iseki dejima mwashakamawu antu kulonda yakekali wunsahu kunyuza yejima, kuhiñahu dinu kukuma kwakenzi.” (Mat. 24:14) Izu dachiGiriki kwabalumunawu izu dakwila nawu “kukuma” haniyi vasi, kushilahu nihavasi 6, datalisha kukuma kwakaayi kaSatana haAmagedoni. (Chim. 16:14, 16) Dichi tukutwalekahu kushimwina nsañu yayiwahi henohu iku kukuma kanda kushiki. Iyi ntiyishishilu yayiha yachalala yinasinsi hantiyishishilu yitweluka dehi.
Kunyima twelukili netu twakaleka kushimwina nsañu yayiwahi neyi lukadi lwasweja lunatachiki dehi hampinji yakamujilumunawu Babiloni Muneni. (Chim. 17:3, 5, 15, 16) Twakuhweleleli netu neyi lukadi lwasweja lunatachiki dehi, Yehova hakayinka cheñi antu kukooleka kwakutiyilila kunsañu yayiwahiku. (Isa. 61:2) Twatoñojokeleña cheñi netu antu akapuluka lukadi lwasweja chiña yowenana amukalakeleleña Yehova nakashinshi henohu lukadi lwasweja kanda lutachiki. Twayesekejeleña nawaYudeya apulukili hakujilumuka kwaYerusalema mu 607 B.C.E. Awa antu adiña ayisha dehi chinjikijilu chakupuluka muloña adifukwileña kudi Yehova nawa aheleli yuma yatama. (Ezek. 5:11; 9:4) Hela chochu, iyi njila yitwesekejeleleñamu yinesakani wanyi namazu aYesu ekala haMatewu 24:14, amwekeshaña nawu hadaha antu akayinka cheñi kukooleka kwakutiyilila kunsañu yayiwahi henohu kunashali hohu chanti hakwila kukuma kwakashiki haAmagedoni.
Chineli tunekali nantiyishishilu yayiha yachalala kutalisha hansona yaMatewu 24:14, chinaleteshi tuhimpi nintiyishishilu yachalala yansona yaChimwekeshu 16:21, yahosha hanvula yamalola yeneni. Kusandujola kwakuvulu kunamwekeshi nawu iji nsona jiyedi jahosha hansañu yoyimu. Munjilanyi? Ñakwilu yinashindameni hanochu chatambwilañawu antu nsañu yaWanta. Kapostolu Pawulu wasonekeli kutalisha hadi “antu akamwinawu” nindi, kudi wena iyi hinsañu yayiwahi, “ivumba dawumi.” Ilaña kutalisha kudi ayilumbu jaNzambi, iyi hinsañu yatama, “ivumba dakufwa.” (2 Kor. 2:15, 16) Ahela nsañu yaWanta muloña yasololaña hatooka chekala kaayi kawu, katama, akiyuulaña kudi Satana nawa kumbidi akakijilumuna.—Yow. 7:7; 1 Yow. 2:17; 5:19.
Ilukenu cheñi chumichi, Chimwekeshu 16:21 yahosha nawu iyi nvula yamalola “yakatoha nankashi.” Chumichi chinakumwekesha nawu mumpinji yalukadi lwasweja nsañu yitwakashimwinaña yakekala nañovu chikupu, chikafumamu antu amavulu akeluka ijina daYehova. (Ezek. 39:7) Hayina mpinji, neyi Babiloni Muneni anamujilumuni dehi, komana antu amakwawu akekala namuchima wakukeña kutiyilila kuniyi nsañu, neyi chochinateli kukeñawu kwipula ivumba dadiwahi? Chumichi chikatwesheka. Hadaha akanuka hela kwiluka nawu hadi yaaka yayivulu aYinsahu jaYehova abidikileña kukuma kwakudifukula kwakutwamba.
Ichi dichamwekeni muEjipitu yakushankulu hanyima yaYipupu 10. Yehova ‘chasompesheliyi nikubabesha anzambi ejima awaEjipitu’ “antu amavulu ashiyashana” abulili kwikala aIsarela adibombeli nawantu jindi. (Kwid. 12:12, 37, 38) Awa añiinza abalumukilili kudi Yehova chelili amoni yuma yejima yahosheliyi Mosi nindi yikamwekana kutalisha haYipupu 10 yimwekani.
Antu akabalumukila kudi Yehova hanyima yakujilumuka kwaBabiloni Muneni, akekala nakukooleka kwakukwasha amana kwaKristu akekala hamaseki ayina mpinji. (Mat. 25:34-36, 40) Hela chochu, mpinji yakusompesha anyikoku yikamana henohu kunashali chanti Amagedoni kutachika, hampinji yakela awayishewa akashalahu anatambwili dehi wufwetu wawu wamwiwulu.
Iyi ntiyishishilu yayiha yachalala yinakumwekesha chikupu kukeña niluwi lwasweja lukwetiyi Yehova. Eña, “hakeñaña muntu hela wumu akakisikiku, ilaña wakeñaña antu ejima abalumuki munyichima.”—2 Pet. 3:9.