22 Ji duto ma ne oyier mondo orit dho rangeye ne gin 212. Ne gidak e miechgi kaluwore gi kaka ne ondik tiengegi gi anyuolagi.+ Daudi gi Samuel janen+ nomiyogi tich nikech ne gin jo ma ogen. 23 Gin kaachiel gi yawuotgi ne gichung’ ne rito rangeye mag od Jehova,+ tiende ni od hema. 24 Jorit ne ochung’ e bethene ang’wen: yo wuok chieng’, yo podho chieng’, nyandwat, kod milambo.+ 25 Kinde ka kinde, owetegi ne onego owuog e miechgi mondo obi oti kaachiel kodgi kuom ndalo abiriyo. 26 Ne nitie jotelo ang’wen mag jorit rangeye ma ne omi tijno. Ne gin Jo-Lawi kendo ne gichung’ ne ute matindo* kod kuonde keno mag od Nyasaye madier.+ 27 Ne girito otieno mangima ka gin kuondegi ka gilworo od Nyasaye, nimar mano ne en tijgi. Bende, ne gin gi ofungu kendo ne giyawo ot okinyi kokinyi.