17 Mi achiel kuom jo ma ne ni e ogandano nodwoke kama: “Japuonj, ne akelo wuoda iri nikech en gi jachien ma momo.+ 18 Sa asaya ma jachiendno omake, ogore piny kae to buoyo wuok e dhoge kendo omuodo lekene mi tekone rum. Ne akwayo jopuonjreni mondo gigole, to ne otamogi.” 19 Nodwokogi kama: “Yaye un tieng’ ma onge yie,+ anabed kodu nyaka karang’o? Abiro nano kodu nyaka karang’o? Kelnagouru kae.”+ 20 Omiyo, ne gitero wuoyino ire, to ka jachiendno noneno Yesu, nomiyo nyathino ogwecho matek. Bang’ podho piny, nong’ielore ong’ielore kendo buoyo ne wuok e dhoge. 21 Eka Yesu nopenjo wuon wuoyino niya: “Ma osebedo ka time kuom ndalo ma romo nade?” Nodwoke niya: “Chakre tinne, 22 kendo nyading’eny ojawite e mach kata e pi kodwaro nege. To ka inyalo timo gimoro, kechwa kendo ikonywa.” 23 Yesu nowachone kama: “Ang’o momiyo iwacho ni, ‘Ka inyalo’? Gik moko duto nyalore ne ng’at ma nigi yie.”+ 24 Gikanyono, wuon nyathino nokok niya: “An gi yie! Konya kama aremie e yie!”+

25 Koro ka Yesu noseneno oganda ka reto kochomo irgi, nokwero jachiendno kama: “In jachien ma momo kendo ma ite odino, achiki ni iwuog ia kuome, kendo kik ichak idonj kuome!”+ 26 Eka bang’ kok kendo gwecho nyading’eny, jachiendno nowuok kuome mi nyathino ne oling’ ka ng’at motho, kendo mano nomiyo thoth ji owacho kama: “Otho!” 27 To Yesu nomako lwete mochunge malo. 28 Omiyo, bang’ ka nosedonjo e ot moro, jopuonjrene nopenje kar kendgi niya: “Ang’o momiyo gole ne otamowa?”+ 29 Nodwokogi kama: “Jachien ma chal kama nyalo mana wuok kuom lamo.”

38 Ng’at moro nokok matek ei ogandano niya: “Japuonj, asayi mondo ikony wuoda nimar en nyathina achiel kende.+ 39 Jachien moro makega kae to apoya nono oywak kendo ogwecho matek ka buoyo wuok e dhoge, kendo ok oweyega ka pok ohinye. 40 Ne asayo jopuonjreni mondo gigole, to ne ok ginyal.” 41 Yesu nodwoko kama: “Yaye un tieng’ ma onge yie kendo mobam,+ anabed kodu kendo nano kodu nyaka karang’o? Kel wuodino kae.”+ 42 To kata mana sa ma wuoyino ne sudo machiegni, jachiendno ne ogoye piny kendo nomiyo ogwecho matek. Kata kamano, Yesu nokwero jachiendno mi nochango wuoyino, kae to oduoke ne wuon mare.