Samuel mar Ariyo
1 Bang’ tho Saulo, Daudi ne oduogo koa loyo* Jo-Amalek kae to nobet Ziklag+ kuom ndalo ariyo. 2 E odiechieng’ mar adek, ng’at moro ne obiro kowuok e kambi mar Saulo ka lepe oyiech kendo wiye otimo buru. Ka ne ochopo ir Daudi, ne opodho piny auma.
3 Daudi ne openje niya: “Ia kanye?” Ne odwoke ni, “Awuok e kambi mar Jo-Israel.” 4 Daudi ne openje niya: “Weche ne odhi nade kuno? Wachna.” Ng’atno ne odwoke kama: “Ne olo jolweny mi giringo kendo ji mang’eny ne otho. Kata mana Saulo gi Jonathan wuode bende otho.”+ 5 Daudi nopenjo wuoyi ma nokelone wachno niya: “Ing’e nade ni Saulo gi Jonathan wuode otho?” 6 Wuoyino ne odwoke kama: “Ne apo ka an e Got Gilboa+ mi aneno Saulo kosirore e tong’ mare kendo geche lweny kod joidh farese ne osejuke.+ 7 Ka ne olokore mi onena, ne oluonga mi adwoke ni, ‘An ka!’ 8 Ne openja niya: ‘In ng’a?’ To ne adwoke ni, ‘An Ja-Amalek.’+ 9 Eka ne onyisa ni, ‘Bi mondo inega nimar an gi rem malit ahinya to pok atho.’ 10 Omiyo, ne adhi mi anege+ nikech nang’eyo ni odhi tho nimar ne osehinyore marach. Kae to ne akawo osimbo* ma ne nie wiye kod bangli ma ne nie bade mondo akelnigi ruodha.”
11 Gikanyono, Daudi ne oyiecho lawe kendo ji ma ne ni kode bende ne oyiecho lepgi. 12 Ne giywak matek kendo ne gitweyo chiemo+ nyaka odhiambo nikech tho Saulo, gi wuode Jonathan, gi jo Jehova, kod Jo-Israel+ duto ma ne ligangla onego chieng’no.
13 Daudi ne openjo wuoyi ma ne okelone wach tho Saulo niya: “Ija kanye?” Ne odwoke ni, “An wuod jadak ma Ja-Amalek.” 14 Eka Daudi ne openje kama: “Ang’o momiyo ne ok iluoro ting’o lweti mondo ineg ng’at ma Jehova owalo?”+ 15 Eka Daudi ne oluongo achiel kuom joge monyise niya: “Bi mondo inege.” Ng’atno ne ogoye motho.+ 16 Daudi ne owachone niya: “Rembi obed e wiyi iwuon nikech dhogi e ma ong’adoni bura kuom wacho ni, ‘An e ma ne anego ng’at ma Jehova owalo.’”+
17 Eka Daudi ne oywago Saulo gi Jonathan+ wuode gi wer 18 mowacho ni opuonj Jo-Juda wendno. Wendno ne iluongo ni, “Atung’” kendo ondike e bug Jashar:+
19 “Yaye Israel, oseneg jogi madongo kuonde moting’ore.+
Mano kaka jo madongo opodho!
20 Kik uwach wachno e piny Gath;+
Kik uland wachno e nderni mag Ashkelon,
Di po ka nyi Jo-Filistia obedo mamor,
Di po ka nyi jo ma ok oter nyangu osungore.
21 Un gode mag Gilboa,+
Koth kata tho kik bed kuomu,
Kata puothe ma nyago chiwo maler,+
Nikech osedwany okumba mag roteke kuomu,
Okumba mar Saulo koro ok owir gi mo.
22 Atung’ mar Jonathan ne ok dog chien,+
Ligangla mar Saulo bende ne ok duog nono,+
Ne gichuero remo kendo ne ging’olo boche mag roteke.
23 Saulo gi Jonathan+ ne ogen kendo ne oher e ngimagi duto,
Kata e thogi ne ok gipogore.+
E ng’uech ne giloyo otenga,+
Ne gin roteke moloyo sibuoche.+
24 Yaye nyi Israel, ywaguru Saulo,
Ma ne orwakou gi lewni makwar kendo mabeyo,
Ma ne oduso lepu gi dhahabu.
25 Mano kaka jo ma roteke otho e lweny!
Jonathan onindo kuonde moting’ore!+
27 Mano kaka jo ma roteke osetho
Kendo gige lweny olal nono!”